Read Kanasi 1 Timoti 4 Bible Online

1 Timoti 4 - Kanasi bible

1 Timoti 4

¹Aleu kakaiwa sabamoido ema benemawaleide: Walama ompa osowe apana isiwa sumanaibu epuiapue ita aleu lagawaau banlakadisamoia aiau asisumopu ita aleu kadiu Seitan nolawa sausaia waeuwa wawentopu.

²Waeuwa inainamba ema ipa laga apanawa waeuwantoie lai. Mo nuau ipa bobopa, ia iilala monia mampe suieno inbolena rua.

³Apana ipa sa waie waiase, “Mai nainaitana, do nana isiwa iditana.” Tane nana uduudu God dewamona ipa nanala os. Apana mida sumanaintoie ulaipa atentoia nana uduudu baiwa God auwasapue napua rua.

⁴Ipawa nitu uduudu God dewamona eubu os, ita no mai nana da dabuasate etaa rua, dia. God aiawa ita raupari nana uduudu eusade, sa baiwa nana uduudu baiwa God auwasante nanta. Wasau gagalowa Timoti baiwa

⁶Timoti, gagalo ema ne girumantena sumanai sosoa isiwa benemamoa. Epe dewaitee e Keriso Iesu nolawa dewalala euda segaite sumanai gagalowa ita waeuwaida euda e waweitena mampee debamaite muka wadaa.

⁷Tane duduna tontau ipusiawaia sauite emoe nambeitaa, ipawa sa mai God mampea, dia. Tane e eba God insaisawa kainokaino eueuwa osowe itune ateitona.

⁸Ete owawa muka wadepia baiwa euwawa winede. Tane God insaisawa owawa ipa inta daitada bedewe saunede walama ande wainitana ita do walama ando iedia baiwa.

⁹Aia ema ipa sumanaiwalalaida:

¹⁰No insaisamba uduudu Godida wanwankasalala bedewe ituitana. Me ipa ina bumpa apana uduudu baibu, tane sumanaiwalala ipa me mebaawaida. Sa baiwa no sumanaimba bedewe badowa onantite nolantitana.

¹¹Wasau gagalowa ema sumanai sosoa waeuwamoe benemamoa.

¹²Ne otona Timoti, e ipa apana sanaa, tane ema baiwa mai mida e ewadabuaepi, dia. Tane e sumanailala baibu eueuwa euda dewasaa. E gagaloa euda, do dewaa mampe, nuawadawadaa, sumanaia ita wanwana euda dodomana os dewamono mo ewompe waawontompa.

¹³Nuaa uduudu mampe God aiawa apana mampo wisiaitone wasaumone ita waeuwamono leuntape manawo wineapa.

¹⁴Timoti, apana Aleu kakaiwa mukawa mampe gagalontoie ita ekelesia oniamoia apanawa witapu e osoawo ituieno e God amonawa euwa wadaana. Amona sa God e eneena e ideita nolawaitona, mai ea!

¹⁵Nola God e eneena nuaa ita insaisaa uduudu mampe dewasaa, ita apana uduudu e nolaa mukamukaua dewasaie bedewe initiana ewapu.

¹⁶Timoti, e eba ita dima e waeuwaitiana do ewaadewaitaa, mai etedabuaitaa, dia. E epe dewaitona e ita mida e gagaloa eteia do inaitana.