Read Kanasi Ibru 1 Bible Online

Ibru 1 - Kanasi bible

Ibru 1

¹Mapo God peroweta bedeuwoe no nosinosimba Israel apanawa mampo inta daitada mampe osoweosowe gagalolen. Tane me gagalowa uduudu mai wapatuwapona, dia.

²Tauma walama ema ompa osowe God no mainimbo me Otopaida bedewee gagalolentuwan. God me Otopa sonabena nitu uduudu me witapesapia baiwa. Do me bedewe God uba ita tawo dewasano segalen.

³God sapawaida me Otopa bedewe enditewade, mo nata ipa sapau deawaa os. God Otopa me Mamba inainamba ita dewawa uduudu otentuwan. God Otopa aiawa mukamukaua mampe dewa uduudu wadadomodio badowa winei. Me bauta meba osinawa mampe apana kadiu mitenauben. Ema aupe me tawo ema ene odene alene uboo God debamawaida witapa on deneuwe aisidene waine wande. God Otopa ipa ionoido

⁴Ita ema baiwa God Otopa ensel amboiamone ionoidolene ita ebowa debamaia waden, mai ensel ebou ruau.

⁵God mai ensel da diape waponase,“E ipa ne Otona, ande ne sabamoedina e ne Otonaida.” Tane do God mai ensel da diape waponase,“Ne ipa me Mamba wananteapa ita me ne Otona wanalepi.” God aia ema wana, sa ipa me Otopaida umanawa wade.

⁶Deawaa, God me Otopa ionoidoa tawo osowe wadiaubedie wane wanase,“Ne enselina uduudu me wawa bumpe imimpu emmisintopue me wadaposisapu.”

⁷God ensel umanau wadi wadiase,“Ne enselina dewamopo lanunu rua nolantompa, ita ne nolana dewalala dewamopo ia epawa wanantompa.”

⁸Tane God me Otopa umanawa peroweta bedewee wadi wadiase,“E kolaiwataa, o God, ipa tauma ita ando winakasalala! E apana gonaa bedewe waimoia dodomana os oniadewasamoiana.

⁹E dewa dodomana nuawadawadasaie ita kadiwa nibuasaiana. Sa baiwa God, e Goda sonabaena e nuaeua baiwa ia asiwa bonabonaua esapa osoawo itune warereen, ita sosoa bedeuwo ituposien.”

¹⁰Do peroweta ema epe wane wanase,“O Tatamba, bumpeido e tawo segasaana. Ita e eba witaa mampe uba dewasaana.

¹¹Uba ita tawo gara rua tontalepie diaidalepi, tane e ando wankasaitaa.

¹²E uba ita tawo uduudu gara onapea rua wadaaube nukuite nambesaa, ewaewa gara tontawa wadeiaubeie aupawe sanaa tauia rua. Tane e ipa wanwankasalala, e wanwana enawa mai ompalepi, dia.”

¹³God mai ensel da diape waponase,“Witana on deneuwe aisite wana, ne ideita e emalawoa apanawa waa atowe teamopa.”

¹⁴Tauma no ensel umanau ambi wata? Mo uduudu ipa aleu, God nolawa dewalala. God mo waaubamode apana mida inaida bedewe antoia simbiamompaa baiwa.