Read Kanasi Ibru 2 Bible Online

Ibru 2 - Kanasi bible

Ibru 2

¹God Otopa me ipa ionoido, mai ensel ruau. Sa baiwa no me ulaipa gagalowa eteitana deaitopa asisudewantata, ina intawa saiete nambe antataa sawa!

²God gagalowa bautaa ensel bedeuwoe no nosinosimba wanamona ipa badowa nolaleidie. Apana mida gagalo sa mai etape ruawalepona ita ainpundena, me ipa sipoa matangela waden.

³Tane ina gagalowa sanaa ipa pokawaaida, mai gagalo bautaa rua. No tauma ina gagalowa sanaa etate adiananasate ete, ambi no matangela saiete inantata? Diaida, mai inta da wineipona! Ina gagalowa sanaa ema Tatamba bumpe benemaleno aposel etane no mainimbo wane sabamosane badosaiena.

⁴Tane do God ina gagalowa ema dewa mukamukaua daitada ita eueuwa isiwa dewamona mampe ipawanasan. Ita do Aleu kakaiwa amonawa apana deadea mampo me insaisawa rua wanamona mampe me gagalowa ulaipawanasan. Iesu no ruambalena no saunepia baiwa

⁵Ema baiwa do no ina gagalowa asisudewantata: No bauta uba ita tawo sanaa segalepia umanawa watana. Tane God uba ita tawo sanaa mai ensel atouwosapona, dia.

⁶Tane buka bedewe naepe gagalo ema benemawaleidi wadiase,“O God, no ipa apana os, tane e no insaneiana.No apanaida, tane e no oniadewasaneiana.

⁷E apana walama kerauda os ituaisideno ensel atouwolen. Tane ema aupe e apana sapaidasae ebowa debamasaana.

⁸E nitu uduudu me atowesaana.” Aia ema bedewe God wadi wadiase, “Nitu uduudu ipa apana atowe.” Sa ipa mai nitu da epanosidepono di winakoaleipona, dia. Tane walama ema bedewe mai nitu uduudu apana atowe wineipono emambo eweipona, dia, ando os sabamoidolepi.

⁹Tane no Iesu ewate atentata. God me walama kerauda os bedewe itunaisideno ensel atouwolen. Me no uduudu baimba bolen, ipawa God no nuaparembalen. Tane tauma God me sapaidasane me ebowa debamasan, ipawa me bauta poka etene bolen.

¹⁰God menasana apana uara me obampa wanantopue me sapawaida bedewe antopue wimopu. Ema segalepia baiwa me dewasano me Otopaida poka etene alene ompa osowe wisene sapaidalene ita inaida intawa enabodala wadenauben. God nitu uduudu segasana me os baiwa winei. Me ipa epe dewasapia rua.

¹¹Iesu meba ita apana mida me kakaimodie God mampemodia, mo ipa uwa dea os waimoi. Sa baiwa Iesu apana mida me kakaimodia mampo ebo Sosona wawawa mai malaleipona, dia.

¹²Buka bedewe ema epe wadi wadiase,“God, e eboa ne sosona mampo wape sabamosapa, ita apana auweia bedeuwo e wadaposia sasawa wapina.”

¹³Ita do wadi wadiase,“Ne God sumanaiwantedine me bedewe insaisana itudina.” Ita do girumalene wadiase,“Ewaa, ne ema God obaina neana do eneitana.”

¹⁴Tane apana umanau God me perowetawa bedewee wadi wadiase, “Ne obaina.” Tane mo ipa apanaida. Ita Iesu mo ruaulene apanaida wanalen. Me poka etene ita bolen. Iesu epe dewalena, me mida bo mukawa wadedia, sa ipa kadi mamba Seitan, kadisapie nanausisapia baiwa. Ita do me bowa bedewee apana mo wanwambu uduudu bedewe bo sawa mo taudomodia inamopia baiwa.

¹⁶Ema ipa sabamo no ateinimba: Iesu mai ensel insamoipona, dia, tane me Abraam nosinosiwa insamodie saumode.

¹⁷Sa baiwa God inta dea os ituno winede. Ema epe: Iesu me ideita apanaidalen dewa uduudu bedewe sosowaida ruaulen. Ema bedewe me Pirisi ionoidoa wanalene God baiwa noladewaleidie ita no nuaparemba do God ita apana sawanauwo enede. Me meba etepa itune en, apana kadiu siniepiaubepia baiwa.

¹⁸Iesu meba rubu bedewe pokaida etene atenlen, sa baiwa apana rubu bedewe antoia me saumompaa rua.