Read Kanasi Ibru 6 Bible Online

Ibru 6 - Kanasi bible

Ibru 6

¹No euda ita kadiwa intawa atentena baiwa sumanaimba waeuwa bumpea antaboe ete inintate su ane winetaaubeta! Waeuwa bumpea tauma mai osowe waeuwaleta, dia. Tane sumanai waeuwawa bumpea ipa ema epe: Insaisala leusane dewala ipusiawaia emone winlene God mampe sumanaitana waeuwawa.

²Ita babatutu waeuwau, apana sau euda wadepia baiwa witala osowe ituna waeuwa, apana bo bedewe enawisa waeuwa, ita dima God kotu walamawa ompa osowe wapia, kotu gagalowa sa ipa winakasalala. Ema ipa sumanai waeuwawa bumpea.

³God no saunempa no dewa ema bumpea amboiamote inintate ana!

⁴Apana mida sumanaiwa epiiepie adiananasapia ambi me osowe insaisawa leusapie God mampe dodomanalepi? Mai inta da wineipona, dia! Dima baiwa? Ipawa me bauta God sapawa bedewe wandie, me God amonawa euda eueuwa osowe itune atenlen, ita do Aleu kakaiwa me waden.

⁵Apana sa God aiawa eueuwa osowe itune ita atenlen God aiawa ipa euda. Tane do God mukawa ando wisepie sabamolepia me dewasane dauwa etaetawa atenlen.

⁶Apana mida epe dewalepie tane sumanaiwa epiiepie omepia, me mai osowe insaisawa leusapia rua, dia. Ipawa dewa ema bedewe me osowe God Otopa koros osowe bosadie apana emauwo malaidasade.

⁷Irai dogowa euda osowe unu kainokaino wadie nosedio nitu uduudu irai apanawa menasadia rua irailena inidewantoi. Dogo sa osowe God me sauwa euda itude.

⁸Tane irai dogowa da osowe gedara ita bodu os inintoia. Dogo sa ipa ipasia, ita God irai dogowa sa wapidabuasapia baiwaleide, do ompa osowe ia bedewe ipituwapi.

⁹Nuana sosowa, no gagalo ema wamoitana, tane e baila no mai nuamba pola waipona. No badowa inseitana e euwa donsale inaida bedewe wainilana.

¹⁰God dewawa ipa dodomana ita e nolala dewasale ita nuawadawada e me mampe sabamosalano me ewena, mai nuawa awawaleipona, dia. E nuawadawada, sa ipa e God apanawaida kakaibu simbiamolana ita tauma e ideita deawaa dewasailana.

¹¹Tane no menaidanede e uduudu ompa osowe badowa enonune nolaitonuna, ita dima bedewe e insaisala ituilana ando ulaipa segalepi.

¹²No mai menaneipona e nuala obasalepi! Tane apana mida sumanaintoie nuau aiaisiwa mampe odane antone ita dima God sauawalena wadeiena mo ruauitana, mai etedabuaitane ena. God sauawa ipa badowa ita ulaipa

¹³Gagalo ema do insena: God Abraam mampe badowa saualene wanase, “Ne sauna euda e osoawo itupe e dana debamasapa.” Tane mai mida da debamawaida God rua wainipona baiwa God saua Abraam mampe wana meba ebowa mampe saisaisane ipawanasan.

¹⁵God Abraam sauasano etene nuawa aiaisiwa mampe inta ewaewalene odene alene ita dima God sauasana donsan.

¹⁶Apana mida saualeidia me nitu da, ba apana da ebowa debamaia, mai meba ebowa rua, mampe sauawaleide. Saua aiawa ema mampe wakoa gagalowa uduudu dialepi.

¹⁷Deawaa, God apana mida mo ando dima me sauawalen wadapua mampo sabamoidosana me insaisawa mai leusapi, dia, tane ideita dewasapi. Sa baiwa me saua badowa wane, ita me meba ebowa mampe wane saisaisan.

¹⁸Dewa ema nata God mai lagau wapie insaisawa leusapia rua, dia. Sa baiwa gagalo ema no mida God gonaawa bedewe odate inantena wasauidanede. Ita dima no nainimbanepe inseitana badowa wadatado, mai etedabuantate eta.

¹⁹Tane no insaisamba ema ipa God duwa uboo garawa seudia bedewainta du pouweido God mampe wisene winede. No insaisamba ema ituitana ipa anika rua inawamba wadediitue badosade.

²⁰Bola sa bedewe Iesu no baimba bautalene odene alene God danawe enede. Ita me ipa Pirisi ionoidoa wanwankasalala wanalen, pirisi Melikisedek rua.