Read Kanasi 2 Pita 1 Bible Online

2 Pita 1 - Kanasi bible

2 Pita 1

¹Ne Saimon Pita Iesu Keriso mebaawaida nolawa dewalala ita aposeliwa leta ema girumantedina. Iesu Keriso no Godimba ita Inawamba, me mida dodomanaida, no sumanaimba uwatauwa neneno wadatana. Ne e sumanai sosona, mida sumanai uwatauwa ema no wadatana ruawa deawaa wadalana manlawo girumantedina.

²E God ita Iesu Keriso no Tatamba atendewamona bedewe mo nuawadawadau amonawa euwa ita wanwan euda obasa e bedelawo inilepie debamaidalepi. Ne auwana ema, niapo! God apawa no baimba ipawanasataa gagalowa

³Iesu Keriso me meba sapawaida ita nuaeuwa mampe no apanen. No me atensatana bedewe me God mukawa wadena mampee no dima wanwan dodomana kakaiwaida wampona baiwa menanedia uduudu nenen.

⁴Inta ema bedewe me amonawa uwataubu debamauida sauawalena no nenen. Ita no God amonawa eubu ema mampoe no tawo ewanuauwa kadinedia etaiate nonete God inawawaida bedewentate me inainambaida ruawantata.

⁵Iesu Keriso nitu uduudu ema no baimba dewasana baiwa badowa nolaitane e sumanaila wadalana osowe dewa euda ituna. Tane dewa euda osowe e God ateitana atemba ituna.

⁶E God ateitena osowe eba onioniadewaitana dewawa ituna. Ema osowe God awa akasalala ituna. God awa akasalala osowe God sawaitana dewawa ituna.

⁷Ema osowe sumanai sosola saumone euda dewasana dewawa ituna. Ita ema osowe dewa euwa dea debamawaida, sa ipa nuawadawada ituna.

⁸Dewa eubu ema uduudu wadaitumono bedelawo inintopue debamaidantopu! Epe dewaitonuna e Tatamba Iesu Keriso atensalana bedewe God nolawa dewasanadewaitane, ita do wanwanla bedewe euda ipuipua segaitana baiwa.

⁹Apana mida dewa eubu ema mai wadape mampesapona, sa ipa me emawa gapugapulen, mai sala ewepidewalepia rua, dia. Do me nuawa awawalen me kadiwa bauta dewasana apa God sinienauben.

¹⁰Sumanai sosona, e sumanaila ipuipua segalepia baiwa badowa nolaitane God apawa ita sonabawa e baila saisaisane ipawanasana. E epe dewaitana sumanaila bedewe mai omena rua, dia.

¹¹Inta ema bedewe Tatamba ita Inawamba Iesu Keriso me gonaawa winakasalala duwa moawa nuaeu debama maurala do wadepiaubepi e odana baiwa.

¹²Ne atenten e dewa ema uduudu umanawa ateitene ita ulaipa waeuwa e etale wadalana bedewe badowa eneilana. Tane ne ideita e dialepino dewa ema insenuna.

¹³Ne ete ema bedewe inawaa wainedinawo ne insedina euda ipa ne e epe dialepino insaisala sanaalempo insenuna baiwa.

¹⁴Ne walama kerauda os, Tatamba Iesu Keriso ne bauta sabamo dianena rua, bonteape ete ema ape rua bedewe wainedina itupe epaa baiwantedina. Sa baiwa ne gagalona ema wadina.

¹⁵Ne badowa nolantepine ne bonteape elepe anteapo aupanawo e ideita dima ne waeuwalena insenune wanlempa. Aposel benemau badowa winede

¹⁶Ne dima wadina e insamonuna, ipawa no Tatamba Iesu Keriso sapawaida emamboido ewatana, ita Iesu wiwisa mukawa do umanawa e dialetana. Tane no mai apanaida dudunau waeuwa ruawantepe gagalowantepona, dia.

¹⁷Mamamba God sapawaida bedewe wandia aiawa Iesu Keriso mampe wan, ita me ebowa debamasane sapawaida wanedie wane wanase,“Ema ipa ne Otonaida, ne nuawadawadasadina. Me nuaeu debama ne nedio wainedina.”

¹⁸Walama sawo no Iesu do wadi kakaiwa osowe eneite nuba asimboido God aiawa ema wano etatana.

¹⁹Aia dainea no wadiwa etatana sumanaiwantitana, tane peroweta gagalou bedewe no insaisamba badowaida ituitana. Sa baiwa e peroweta aiau deaitopa asisudewaitonuna! Peroweta aiau ipa bola dubawa bedewe siwa idie sapa wadia rua walama ande baiwa. Tane ando walama pundepio Iesu Keriso wiwisa bedewe me sapawa walama kiporawa Tauragaraga ruawa e nualawo sapa wapi.

²⁰Tane gagalo ema do etane insenadewaitana. Ema epe: Mai mida da peroweta aiau ipawaida buka bedewe winedia me meba insaisawa mampe wasabamosapia rua, dia.

²¹Ipawa peroweta gagalou mai apanaida insaisawa bedewe wineipona, diaida. Tane mo Aleu kakaiwa bedeuwolene waeuwamono God umanawa benemanton.