Read Kanasi 3 Ion 1 Bible Online

3 Ion 1 - Kanasi bible

3 Ion 1

¹Ne Ion ekelesia onionia apanawa letana ema nuana sowa Gaias manawo girumantedina. E ne do ulaipa gagalowa bedewe deantene wainitana, sa baiwa ne e nuawadawadaedine auwaedina!

²Nua sona, ne e baia rauparintedina e wanwana euda ipuipua ita inawaa os wanempaa baiwa. Tane ne atenten e aleu bedewe euda os wainiana. Ion Gaias mampe nuaeulen

³Sumanai sosomba isiwa e manawoe wimone ambi e ulaipa waeuwa bedewe wainie ita ulaipa intawa asiasi aitiana umanawa dianeieno etane nuana eudidalen.

⁴Tane mo mida aleu bedewe ne obaina wanantone ulaipa intawa waeuwamona asiasi antoia umanawa etedine nuana nuaeu nopeidoleide, mai dewa isiwa epe nuaeuneipona, dia.

⁵Nuana sowa, e sumanai sosomba isiwa e manawo wimoio e nola eudida dewasaie mo simbiadewasamoiana. Do sosomba isiwa ware rua e manawo wimoio e ideita dewa deawaa dewasaie wainiana, mai etedabuaitipona, dia.

⁶Mo mida e simbiamoana wimone e nuawadawadaa mape no ekelesiamba bedeuwo benemawantono etatana. Sa baiwa ne iririedina sumanai sosomba isiwa Gagalo euda amonantoie laia au nowe manawo wimompaa, e ideita euda mampo dewasane dima mo menamompa mampe saumone simbiadewasamona. Gaias, e ipa God mampea, sa baiwa epe dewaitone me nuawa eusana.

⁷Gagalo euda amonalala apanawa ne umanau wadina, mo ipa Keriso ebowa baiwa waaubamoieno nomone antoiena, tane mo mai dima da osowe wampona baiwa wadapona sumanaisiawaia apanawa mampo, dia.

⁸Mo ipa no sumanailala saumba asiasi nolantoie lai, sa baiwa no deaitopa oniadewasamonte mo do awodea ulaipa waeuwa nolawantonta.

⁹Ne gagalona da letana bautaa bedewe girumanten ekelesia e bolaawo waimoia mampo. Ne letana sa bedewe wasau gagalowa isiwa wamona, tane Diotirepes, mida kainokaino bautaleipona menasadia, ne gagalona etadabuasadie mai ruawaleipona, dia.

¹⁰Walama da ne e manawo wineape dima me dewasadia gagalowa sabamosapa. Me dewawa kadiwa ipa ema epe: Me no sumanailala wakadisanedie kutunnede. Tane mai sa os, do Gagalo euda amonalala wimoio me mai simbiamoipona, dia. Tane do apana isiwa sosomba simbiamoio me anaanamodie ita ekelesia bedeuwo tanamodio nomoie antoi.

¹¹Nuana sowa, mai dima kadiwa ewone ruawa dewasana, tane dima euda ewone ruawa dewasana. Apana mida dewa euda dewasadia me bumpawa ipa God bedewe winede. Tane mida kadiwa dewasadia me mai God ewape atenlepona, diaida.

¹²Tauma ne somba da Demetirius umanawa wapa. Apana uduudu me dewawa euda benemawantoi. Me dewawa euwa mampe sabamoleide me ipa ulaipa bedewe wande. No do me euwawa baiwa gagalontitana, tane e ateiten no benemamba ipa ulaipa.

¹³Ne gagalo uaraia mainawo wineia girumanteapona e manawo, tane ne mai girumanteapa, dia.

¹⁴Tane ne insedina ne ibunaida tauwadea manawo wineape e do gagalontata. Sosoa uduudu auwaa waiaubei, tane sosomba deadea ebouwoebouwo auwamoa! Ne gagalona kampaida mape dialen. Euda e manawo winepi, niapo!