Read Kangri मत्ती 14 Bible Online

मत्ती 14 - Kangri bible

मत्ती 14

¹तिस बग्त चौथाई देसे दे हेरोदेस राजैं यीशु दी चर्चा सुणी,

²कने अपणे दासां नैं ग्लाणा लग्गा, “एह़ यूहन्ना बपतिस्मा दैणे आल़ा ऐ। सैह़ मरेयां ते जिन्दा होई गेआ ऐ, इसतांई तिसते सामर्था दे कम्म प्रगट हुंदे हन।”

³क्जोकि हेरोदेस राजैं अपणे भाऊ फिलिप्पुसे दी लाड़ी हेरोदियासा नैं ब्याह करी लेआ था, इसतांई यूहन्ने हेरोदेस राजे जो ग्लाया था, कि व्यबस्था दे मताबक तिज्जो अपणे भाऊये दिया लाड़िया नैं ब्याह करणा ठीक नीं ऐ, इसा गल्ला पर यूहन्ने जो पकड़ी करी जेला च पाई दित्या था।

⁵इसतांई सैह़ तिसियो मारी दैणा चांह़दा था, अपर लोकां ते डरदा था क्जोकि सैह़ तिसियो भविष्यवक्ता मनदे थे।

⁶अपर जाह़लू हेरोदेस राजे दा जन्मदिन आया, तां हेरोदियासा दिया कुड़िया जन्मदिने दिया खुसिया च नची करी दस्सी नैं हेरोदेस राजे जो खुस कित्ता।

⁷इसा गल्ला पर तिन्हीं कसम खाई नैं वचन दित्ता, “जेह्ड़ा कुच्छ तू मंगगी, मैं तिज्जो दिंगा।”

⁸सैह़ अपणिया माँऊ दे भकाणे पर ग्लाणा लग्गी, “यूहन्ना बपतिस्मा दैणे आल़े दा सिर थाल़िया च ऐत्थु ई मिन्जो तांई मंगवाई दे।”

⁹राजा बड़ा दुखी होएया, अपर अपणिया कसमा दिया कने सौगी बैठणे आल़ेआं दिया बज़ाह ते, हुक्म दित्ता कि देई दित्ता जां।

¹⁰कने तिन्हीं जेला च सपाईयां जो घल्ली नैं यूहन्ने दा सिर बडवाई दित्ता;

¹¹कने तिसदा सिर थाल़िया च लंदा कने कुड़िया जो देई दित्ता, जिसियो सैह़ अपणिया माँऊ अल्ल लेई गेई।

¹²ताह़लू यूहन्ना दे चेले आये कने तिसदी लाह्स लेई करी कने जाई नैं दब्बी दित्ती, कने जाई नैं यीशुये जो खबर दित्ती।

¹³जाह़लू यीशुयैं एह़ बुरी खबर सुणी, तां सैह़ किस्तिया पर बेई करी तित्थु ते लग्ग होई नैं सुनसाण जगाह जो चली गेआ। कने लोक एह़ सुणी करी सैहरे-सैहरे ते पैदल ई तिसदे पचांह़ चली पै।

¹⁴तिन्हीं निकल़ी नैं इक्क मती सारी भीड़ दिक्खी कने तिन्हां पर तरस खादा कने तिन्हां दे बमारां जो ठीक कित्ता।

¹⁵जाह़लू संझ होई तां तिसदे चेलेयां तिस अल्ल आई नैं ग्लाया, “एह़ सुनसाण जगाह ऐ कने देर होआ दी ऐ; लोकां जो घल्ली देआ कि सैह़ बस्तियां च जाई नैं अपणे तांई खाणा खरीदी लैन।”

¹⁶अपर यीशुयैं तिन्हां नैं ग्लाया, “इन्हां दा जाणा जरूरी नीं। तुहां ई इन्हां जो खाणे जो देआ।

¹⁷तिन्हां तिस नैं ग्लाया, ऐत्थु अहां अल्ल पंज रोटियां कने दो मच्छियां जो छड्डी होर कुच्छ नीं ऐ।”

¹⁸यीशुयैं ग्लाया, “तिन्हां जो मिन्जो अल्ल लेई ओआ।”

¹⁹ताह़लू तिन्हीं लोकां जो घाऐ पर इक्क-इक्क पंगत लगाई नैं बैणे जो ग्लाया, कने तिन्हां पंज रोटियां कने दूँ मच्छियां जो लेआ, कने सुअर्गे दे पास्से दिक्खी नैं धन्यावाद कित्ता कने रोटियां तोड़ी-तोड़ी नैं चेलेयां जो दित्तियां, कने चेलेयां लोकां जो।

²⁰जाह़लू सारे खाई नैं रज्जी गै, तां चेलेयां बचियां रोटियां दे भरेयो बाराह टोकरु चुके।

²¹कने खाणे आल़ेआं च जणासा कने जागतां जो छड्डी नैं लगभग पंज हज़ार मरद थे।

²²तिन्हीं तिसी बग्त अपणे चेलेयां जो किस्तिया पर चढ़णे तांई मजबूर कित्ता कि सैह़ तिसते पैहल्लैं पारले पास्सेयो चली जान, जाह़लू तिकर सैह़ लोकां जो घल्ली लैं।

²³सैह़ लोकां जो घल्ली नैं, प्रार्थना करणे जो लग्ग प्हाड़े पर चली गेआ; कने संझा सैह़ तित्थु किल्ला था।

²⁴तिस बग्त किस्ती झीला दे बिच्च लैहरां नैं डगमगा दी थी, क्जोकि हौआ सामणै ते ओआ दी थी।

²⁵कने यीशु अधिया राती बाद झीला पर चली करी तिन्हां अल्ल आया।

²⁶चेले तिसियो झीला पर चलदे होये दिक्खी नैं डरी गै। कने ग्लाणा लग्गे, “एह़ भूत ऐ।” कने डरे दे मारे डड्डणा लग्गे।

²⁷यीशुयैं तिसी बग्त तिन्हां नैं गल्लां कित्तियां कने ग्लाया, “हौंसला रखा। मैं ऐ डरा मत।”

²⁸पतरसैं तिस जो जवाब दित्ता, “हे प्रभु जे तू ई ऐ, तां मिन्जो अप्पु अल्ल पांणिये पर चली नैं ओणे दा हुक्म दे।”

²⁹तिन्हीं ग्लाया, “आई जा!” ताह़लू पतरस किस्तिया ते लौई नैं यीशु अल्ल जाणे तांई पांणिये पर चलणा लग्गा।

³⁰अपर सैह़ तेज हौआ जो दिक्खी नैं डरी गेआ, कने जाह़लू डुबणा लग्गा तां डड्डी नैं ग्लाणा लग्गा, “हे प्रभु मिन्जो बचा।”

³¹यीशुयैं तिसी बग्त अपणा हत्थ गांह करी नैं तिसियो थमी लेआ कने तिस नैं ग्लाया, “हे बेबसुआसी, तैं क्जो शक कित्ता?”

³²जाह़लू सैह़ किस्तिया पर चढ़ी गै, तां हौआ रुकी गेई।

³³इसा गल्ला पर तिन्हां जेह्ड़े किस्तिया पर थे, तिसियो प्रणांम करी नैं ग्लाया, “सच्च-बिच्च तू परमात्मे दा पुत्तर ऐ।”

³⁴यीशु कने तिसदे चेले पारले पास्से लौई नैं गन्नेसरत सैहरे च पुज्जे।

³⁵तित्थु दे लोकां तिसियो पणछैणी लेआ कने अक्खे-बक्खे दे सारे लाक्के च खबर घल्ली, कने सारे बमारां जो तिस अल्ल लेई आये।

³⁶कने तिस नैं विणती करणा लग्गे कि सैह़ तिन्हां जो अपणे कपड़े दे पल्ले ई जो छूणा दैं; कने जितणेयां तिसियो छुता, सैह़ खरे होई गै।