Read Kangri मत्ती 15 Bible Online

मत्ती 15 - Kangri bible

मत्ती 15

¹ताह़लू यरूशलेम सैहरे ते कुच्छ फरीसी कने सास्त्री माणु यीशु अल्ल आई नैं ग्लाणा लग्गे।

²“तेरे चेले स्याणेयां दे रीति रिवाजां जो क्जो टाल़दे हन, कि बगैर हत्थां धोतेयां रोटी खांदे हन?”

³तिन्हीं तिन्हां जो जवाब दित्ता, “तुहां भी अपणे रीति रिवाजां दिया बज़ाह ते क्जो परमात्मे देआं हुक्मां टाल़दे हन?

⁴क्जोकि परमात्मैं ग्लाया ऐ, ‘अपणे बुढ़े कने अपणिया माँऊ दा आदर करणा’, कने ‘जेह्ड़ा कोई बुढ़े या माँऊ जो बुरा ग्लांगा, सैह़ जरूर मारी दित्ता जांगा।’

⁵अपर तुहां ग्लांदे हन कि जे कोई माणु अपणे बुढ़े या माँऊ नैं ग्लां, ‘मेरा जेह्ड़ा कुच्छ ऐ, सैह़ तुहां दे कम्म आई सकदा ऐ, सैह़ परमात्मे जो भेंट चढ़ी चुकियो,’

⁶तां सैह़ अपणे बुढ़े दा आदर ना करैं, इआं करी नैं तुहां अपणे रीति रिवाजां दिया बज़ाह ते जिन्हां जो तुहां बणाया ऐ, परमात्मे दा वचन टाल़ी दित्ता।

⁷हे पाखंडियों, यशायाह भविष्यवक्तैं तुहां दे बारे च एह़ भविष्यवाणी ठीक ई कित्तियो ऐ:

⁸‘एह़ लोक मुँऐ नैं तां मेरा आदर करदे हन, अपर इन्हां दा मन मिन्जो ते दूर रैंह्दा ऐ।

⁹कने एह़ बेकार च मेरी अराधना करदे हन, क्जोकि माणुआं दे नियमां जो धार्मिकता दी सिक्षा करी नैं सखांदे हन।’ ”

¹⁰ताह़लू यीशुयैं तिन्हां लोकां जो अपणे अल्ल सद्दी नैं तिन्हां जो ग्लाया, “सुणा, कने समझा:

¹¹जेह्ड़ा मुँऐ च जांदा ऐ, सैह़ माणुये जो असुद्ध नीं करदा, अपर जेह्ड़ा मुँऐ ते निकल़दा ऐ, सैई माणुये जो असुद्ध करदा ऐ।”

¹²ताह़लू चेलेयां आई नैं तिस नैं ग्लाया, “क्या तू जाणदा ऐ कि फरीसियां एह़ वचन सुणी नैं ठोकर खादी?”

¹³तिन्हीं जवाब दित्ता, हर रूख जेह्ड़ा मेरे सुअर्गीय पितैं नीं लगाया, पूटेया जाणा।

¹⁴“तिन्हां जो जाणा देआ; सैह़ अन्ने जो रस्ता दस्सणे आल़े हन कने अन्ना जे अन्ने जो रस्ता दस्से, तां दोयो खड्डे च पोंगे।”

¹⁵एह़ सुणी नैं पतरसैं तिस नैं ग्लाया, “एह़ उदारण अहां जो समझाई देआ।”

¹⁶तिन्हीं ग्लाया, “क्या तुहां भी अह्ल्ली तिकर नासमझ हन?

¹⁷क्या तुहां नीं जाणदे कि जेह्ड़ा कुच्छ मुँऐ च जांदा सैह़ पेटे च पोंदा ऐ, कने संडास ते निकल़ी जांदा ऐ?

¹⁸अपर जेह्ड़ी बुराई मुँऐ ते निकल़दी ऐ, सैह़ मने ते निकल़दी ऐ, कने सैई माणुये जो असुद्ध करदी ऐ।

¹⁹क्जोकि बुरे बचार, खून, परस्त्रीगमन, ब्यभिचार, चोरी, झूठी गवाही कने निंदा मने ते निकल़दी ऐ।

²⁰ऐई बुरिआं गल्लां हन जेह्ड़ियां माणुये जो असुद्ध करदियां हन, अपर हत्थां बगैर धोतेयां खाणा-खाणा माणुये जो असुद्ध नीं करदा।”

²¹यीशु तित्थु ते निकल़ी नैं, सूर कने सैदा दे सैहरां दे पास्से चली गेआ।

²²कने ताह़लू तिस प्रदेसे ते इक्क कनानी जणांस निकल़ी, कने डड्डी नैं ग्लाणा लग्गी, “हे प्रभु। दाऊदे दे वंश, मिन्जो पर दया कर। मेरी कुड़िया जो दुष्टआत्मां बड़ी सता दी ऐ।”

²³अपर तिन्हीं तिसायो कुच्छ जवाब नीं दित्ता। ताह़लू तिसदे चेलेयां आई करी तिस नैं विणती कित्ती, “इसायो घल्ली देआ, क्जोकि सैह़ अहां दे पचांह़ डड्डदी-डड्डदी ओआ दी ऐ।”

²⁴तिन्हीं जवाब दित्ता, “इस्राएल दे परवारें दिया गुआचिआं भेड्डां जो छड्डी नैं मैं कुसी अल्ल नीं घल्लेया।

²⁵अपर सैह़ आई, कने यीशुये जो प्रणांम करी नैं ग्लाणा लग्गी, हे प्रभु मेरी मदत कर।”

²⁶तिन्हीं जवाब दित्ता, “जागतां दी रोटी लेई नैं कुत्तेआं दे गांह पाणा ठीक नीं।”

²⁷तिन्नै ग्लाया, “एह़ गल्ल सच्च ऐ प्रभु, अपर कुत्ते भी सैह़ बचेयो रोटियां दे टुकड़ेयां जो खांदे हन, जेह्ड़े तिन्हां दे मालकां दे मेज्जे ते थल्लैं पोंदे हन।”

²⁸इसा गल्ला पर यीशुयैं तिसा जो जवाब दित्ता, “हे कुड़िये, तेरा बसुआस बड़ा ऐ। जिंआं तू चांह़दी ऐ, तिज्जो तांई तिंआं ई होयैं।” कने तिसा दी कुड़ी तिसी बग्त खरी होई गेई।

²⁹यीशु तित्थु ते गलीले दिया झीला अल्ल आया, कने प्हाड़े पर गौई करी बेई गेआ।

³⁰ताह़लू लोकां दी भीड़ा पर भीड़ तिस अल्ल आई। सैह़ अपणे सौगी लंगड़े, अन्ने, जफ्फे, टुंडे कने होर मतेआं जो तिस अल्ल लेई आये, कने तिन्हां जो तिसदेयां पैरां अल्ल बठाई दित्ता, कने तिन्हीं तिन्हां जो खरा कित्ता।

³¹जाह़लू लोकां दिख्या कि जफ्फे ग्लांदे, कने टुंडे खरे हुंदे, कने लंगड़े चलदे, कने अन्ने दिक्खदे हन तां हरान होई नैं इस्राएल देसे दे परमात्मे दी बड़ेयाई कित्ती।

³²यीशु अपणे चेलेयां जो सद्दी करी ग्लाणा लग्गा, “मिन्जो इसा लोकां दिया भीड़ा पर तरस ओआ दा ऐ, क्जोकि एह़ लोक त्रीं दिनां ते मिन्जो सौगी हन कने इन्हां अल्ल कुच्छ भी खाणे जो नीं ऐ। मैं इन्हां जो भुखे पेट घरे जो नीं घल्लणा चांह़दा, कुत्थी इआं ना होयैं कि घरे नीं पुज्जन।”

³³चेलेयां तिस नैं ग्लाया, “अहां जो इस सुनसाण जगाह च कतांह ते इतणियां रोटियां मिलगियां कि अहां इतणियां बड्डिया भीड़ा जो रज्जी नैं खुआन?”

³⁴यीशुयैं तिन्हां ते पुछया, “तुहां अल्ल कितणियां रोटियां हन?” तिन्हां ग्लाया, “सत रोटियां, कने थोड़ी दियां लोक्कियां मच्छियां।”

³⁵ताह़लू तिन्हीं लोकां जो भुइआं बैणे दा हुक्म दित्ता।

³⁶कने सैह़ बेई गै, इसते बाद यीशुयैं सत रोटियां जो कने मच्छियां जो लेई नैं परमात्मे दा धन्यावाद दित्ता, भिरी तिन्हां रोटियां जो तोड़ी करी अपणे चेलेयां जो दिंदा गेआ, कने चेले लोकां जो दैणा लग्गे।

³⁷इआं ई सारे खाई नैं रज्जी गै कने चेलेयां बचियां रोटियां दे भरेयो सत टोकरु चुके।

³⁸खाणे आल़ेआं च जणासां कने जागतां जो छड्डी नैं लगभग चार हज़ार मरद थे।

³⁹ताह़लू सैह़ भीड़ा जो घल्ली नैं किस्तिया पर चढ़ी गेआ, कने मगदन देसे दे लाक्के च आया।