Read Kangri मत्ती 16 Bible Online

मत्ती 16 - Kangri bible

मत्ती 16

¹फरीसी कने सदूकी माणुआं बक्खे आई नैं तिसियो परखणे तांई तिस नैं ग्लाया, “अहां जो सुअर्गे दा कोई नसाण दस्स।”

²तिन्हीं तिन्हां जो जवाब दित्ता, “संझ हुंदे ई तुहां ग्लांदे हन, मौसम छैल़ रैंह्गा, क्जोकि अम्बर लाल ऐ,

³कने भ्यागा जो ग्लांदे हन, अज्ज तफान औणां, क्जोकि अम्बर लाल कने धुदंल़ा ऐ। तुहां अम्बरे दे लछणा दिक्खी नैं तिसदा भेत दस्सी सकदे हन, अपर बग्तां दे नसाणां दा भेत क्जो नीं दस्सी सकदे?

⁴इस जुगे दे बुरे कने ब्यभिचारी लोक नसाण तोपदे हन, अपर योना भविष्यवक्ता दे नसाणां जो छड्डी तिन्हां जो होर कोई नसाण नीं दित्ता जाणा।” कने सैह़ तिन्हां जो छड्डी नैं चली गेआ।

⁵चेले झीला दे पारले पास्से पुज्जे, अपर सैह़ रोटियां लैणां भुल्ली गियो थे।

⁶यीशुयैं तिन्हां नैं ग्लाया, “दिक्खा, फरीसी कने सदूकी माणुआं दे खमीरे ते मतलब झूठी सिक्षा ते चौकन्ने रैहणा।”

⁷चेले अप्पु च बचार करणा लग्गे, “अहां रोटियां नीं लंदियां, इसतांई सैह़ इआं ग्ला दा ऐ।”

⁸एह़ जाणी नैं, यीशुयैं तिन्हां नैं ग्लाया, “हे बेबसुआसियो, तुहां अप्पु च क्जो बचार करा दे हन कि अहां अल्ल रोटियां नीं हन।

⁹क्या तुहां अह्ल्ली तिकर नीं समझे? क्या तुहां जो सैह़ पंज हज़ारां दियां पंज रोटियां याद नीं हन, कने ना तुहां जो एह़ याद ऐ कि अहां कितणे बचेयो रोटियां दे टोकरु चुकेयो थे।

¹⁰कने ना सैह़ जेह्ड़ियां चौं हज़ारां दियां सत रोटियां, कने ना एह़ कि तुहां कितणे टोकरु चुकेयो थे?

¹¹क्या तुहां अह्ल्ली भी नीं समझी सके कि मैं तुहां नैं रोटियां दे बारे च नीं ग्लाया, अपर एह़ कि तुहां फरीसी कने सदूकी माणुआं दे खमीरे ते चौकन्ने रैहणा।”

¹²ताह़लू तिन्हां जो समझा च आया कि तिन्हीं रोटिया दे खमीर ते नीं, अपर फरीसी कने सदूकी माणुआं दिया सिक्षा ते चौकन्ने रैहणे जो ग्लाया था।

¹³यीशु कैसरिया फिलिप्पी दे प्रदेसे च आया कने अपणे चेलेयां ते पुछणा लग्गा, “लोक मिन्जो माणुये दे पुत्तर जो क्या ग्लांदे हन? कि मैं कुण ऐ?”

¹⁴तिन्हां ग्लाया, “कुच्छ तां यूहन्ना बपतिस्मा दैणे आल़ा ग्लांदे हन, कने कुच्छ एलिय्याह कने कुच्छ यिर्मयाह या भविष्यवक्ता च कोई इक्क ग्लांदे हन।”

¹⁵तिन्हीं तिन्हां नैं ग्लाया, “अपर तुहां मिन्जो क्या ग्लांदे हन कि मैं कुण ऐ?”

¹⁶शमौन पतरसैं ग्लाया, “तुहां जिन्दे परमात्मे दे पुत्तर मसीह हन।”

¹⁷यीशुयैं तिन्हां जो जवाब दित्ता, “हे शमौन, योना दे जागता, तू धन ऐ; क्जोकि मांस कने खून ते नीं, अपर मेरे पितैं जेह्ड़ा सुअर्गे च ऐ, एह़ गल्ल तिज्जो पर प्रगट कित्ती ऐ।

¹⁸कने मैं भी तिज्जो नैं ग्लांदा ऐ, कि तू पतरस ऐ, कने मैं इस पत्थरे पर अपणी कलीसिया बणांगा कने अधोलोक दे दरवाजे तिस पर हावी नीं हुंगे।

¹⁹मैं तिज्जो सुअर्गे दे राज्जे दी चाबियां दिंगा, कने जे कुच्छ तू धरतिया पर बन्नणा, सैह़ सुअर्गे च बन्नेया जाणा; कने जेह्ड़ा कुच्छ तू धरतिया पर खोलणा, सैह़ सुअर्गे च खुलणा।”

²⁰ताह़लू तिन्हीं चेलेयां जो चतौणी दित्ती कि कुस नैं मत दस्सदे! कि मैं मसीह ऐ।

²¹तिस बग्ते ते यीशु अपणे चेलेयां जो दस्सणा लग्गा, “जरूरी ऐ कि मैं यरूशलेम सैहरे जो जां कने स्याणेयां कने प्रधान याजकां, कने सास्त्री माणुआं दे हत्थां ते बड़े दुख उठां; कने मारी दित्ता जां; कने त्रीये दिनैं भिरी मरेयां ते जिन्दा होई जां।”

²²इसा गल्ला पर पतरस तिसियो लग्ग लेई जाई नैं झिड़कणा लग्गा, “हे प्रभु, परमात्मा ना करैं। तिज्जो नैं देहया कदी नीं हुंगा।”

²³तिन्हीं मुड़ी करी पतरसे नैं ग्लाया, “हे सैतान, मेरे सामणै ते दूर होई जा। तू मिन्जो तांई ठोकरा दी बज़ाह ऐ; क्जोकि तू परमात्मे दियां गल्लां पर मन नीं, अपर माणुआं दियां गल्लां पर मन लगांदा ऐ।”

²⁴ताह़लू यीशु अपणे चेलेयां नैं ग्लाणा लग्गा, “जेह्ड़ा कोई मिन्जो पचांह़ औणां चांह़दा ऐ, सैह़ अपणियां इच्छां जो छड्डी करी कने अपणे दुखां कने कष्टां दिया सूल़िया चुक्की नैं, मेरे पचांह़ चली पोयैं।

²⁵क्जोकि जेह्ड़ा कोई अपणे प्राण बचाणा चांह़दा, तिन्हीं अपणे प्राण गुआणे हन; कने जिन्हीं मिन्जो तांई अपणे प्राण गुआणे हन, तिन्हीं अपणे प्राण बचाणे हन।

²⁶जे माणु सारे संसारे जो हासल करणे तांई अपणे प्राणा जो गुआं, तां तिसियो क्या फायदा हुंगा? माणु अपणे प्राणा दे बदले होर क्या देई सकदा ऐ?

²⁷मैं माणुये दा पुत्तर अपणे सुअर्गदूतां सौगी अपणे पिता दी महिमा च ओंगा, कने तिस बग्त ‘सैह़ हर इक्की जो तिसदे कम्मां दे मताबक फल़ दिंगा।’

²⁸मैं तुहां नैं सच्च ग्लांदा ऐ, कि जेह्ड़े ऐत्थु खड़ोत्यो हन, इन्हां च कुच्छ-कुच्छ ऐदेय हन, कि जाह़लू तिकर माणुये दे पुत्तरे जो परमात्मे दे राज्जे च ओंदे नीं दिक्खी लैंगे, ताह़लू तिकर मौत्त तिन्हां पर कदी नीं ओंगी।”