Read Kangri मत्ती 18 Bible Online

मत्ती 18 - Kangri bible

मत्ती 18

¹तिस बग्त चेले यीशु अल्ल आई नैं पुछणा लग्गे, “सुअर्गे दे राज्जे च बड्डा कुण ऐ?”

²इसा गल्ला पर यीशुयैं इक्की जागते जो अपणे अल्ल सद्दी नैं तिन्हां बिच्च खरेड़ी दित्ता,

³कने ग्लाणा लग्गा, “मैं तुहां नैं सच्च ग्लांदा ऐ, कि जाह़लू तुहां अपणे आप्पे जो बदली करी जागतां साइआं बणी जांगे, ताह़लू तुहां सुअर्ग दे राज्जे च पुज्जी जांगे।

⁴जेह्ड़ा कोई अप्पु जो इस जागते साइआं लोक्का करगा, सैह़ सुअर्ग दे राज्जे च बड्डा हुंगा।

⁵कने जेह्ड़ा कोई मेरे नांऐ ते इक्क ऐदेय जागते जो अपनांदा ऐ सैह़ मिन्जो अपनांदा ऐ।

⁶“अपर जेह्ड़ा कोई इन्हां लोक्केयां च जेह्ड़े मिन्जो पर बसुआस करदे हन, कुसी इक्की ते पाप करवां, तिसियो परमात्मा सज़ा दिंगा, अपर परमात्मे दिया खतरनाक सज़ा ते एह़ खरा कि बड्डे घराटे दा पुड़ तिसदे गल़े च लटकाई करी सैह़ समुंदरे च सट्टी दित्ता जां।

⁷ठोकरां दियां बज़ाह ते संसारे पर हाय। ठोकरां दा लगणा जरूरी ऐ; अपर हाय तिस माणुये पर जिसदिया बज़ाह ते ठोकर लगदी ऐ।

⁸“जे तेरा हत्थ या पैर हुंदे भी पाप करवांदा ऐ, तां तिसियो बड्डी नैं सट्टी दे, डुंडा या लंगड़ा होई नैं सदा दिया ज़िन्दगिया च प्रवेश करणा तिज्जो तांई इसते बधिया ऐ कि दूँ हत्थां या दूँ पैरां हुंदेया तू नरके दिया अग्गी च सट्टेया जां।

⁹जे तेरी अख हुंदे भी तिज्जो ते पाप करवांदी ऐ, तां तिसायो कड्डी नैं सट्टी दे; काणा होई नैं सदा दी ज़िन्दगिया च प्रवेश करणा तिज्जो तांई इसते बधिया ऐ कि दूँ अखीं हुंदेया भी तू नरके दिया अग्गी च सट्टेया जां।

¹⁰“दिक्खा, तुहां इन्हां लोक्केयां च कुसी जो घटिया मत समझा; क्जोकि मैं तुहां नैं ग्लांदा ऐ, कि सुअर्गे च तिन्हां दे सुअर्गदूत सदा मेरे सुअर्गीय पिता दे सौगी रैंह्दे हन।

¹¹क्जोकि मैं माणु दा पुत्तर गुआचेआं जो बचाणा आया ऐ।

¹²“तुहां क्या सोचा दे हन? मन्नी लेआ कुसी माणुये दियां सौ भेड्डां होन, कने तिन्हां च इक्क गुआची जां, तां क्या सैह़ नड़ीनूयें जो छड्डी नैं प्हाड़ां पर जाई नैं, तिसा गुआचिया जो नीं तोपगा?

¹³कने जे देहया होयैं कि जाह़लू सैह़ मिल्ली जांदी ऐ, तां मैं तुहां नैं सच्च ग्लांदा ऐ, कि सैह़ तिन्हां च नड़ीनूयें भेड्डां तांई जेह्ड़ियां गुआचिआं नीं थियां, इतणी खुसी नीं होणी जितणी कि इसा भेड्डा तांई होणी ऐ।

¹⁴इआं ई तुहां दे पिता दी जेह्ड़ा सुअर्गे च ऐ एह़ इच्छा नीं कि इन्हां लोक्केयां च इक्क भी नास होई जां।

¹⁵“जे तेरा भाऊ तेरे खलाफ अपराध करैं, तां जा कने किल्ले च गल्लबात करी नैं तिसियो समझा। कने जे सैह़ तेरिया गल्लां सुणी करी पछतां, तां तैं अपणे भाऊये जो पाई लेआ।

¹⁶जे तेरी सैह़ ना सुणे, तां इक्क या दो जणे होर अपणे सौगी लेई जा, कि हर इक्क गल्ल मूसा दिया व्यबस्था दे मताबक दूँ या त्रीं गवाहां दे मुँऐ ते पक्की होई जां।

¹⁷जे सैह़ तिन्हां दी भी नीं मन्नैं, तां कलीसिया नैं ग्लाई दे, अपर जे सैह़ कलीसिया दी ना मन्नैं, तां तू तिसियो दूईआं जातिआं कने चुंगी लैणे आल़ेआं साइआं समझ।

¹⁸“मैं तुहां नैं सच्च ग्लांदा ऐ, जेह्ड़ा कुच्छ तुहां धरतिया पर बन्नगे, सैह़ सुअर्गे च बन्नेया जाणा, कने जेह्ड़ा कुच्छ तुहां धरतिया पर खोलगे, सैह़ सुअर्गे च खुलणा।

¹⁹भिरी मैं तुहां नैं ग्लांदा, जे तुहां च दो जणे धरतिया पर कुसी गल्लां तांई इक्क मन होई नैं प्रार्थना करी नैं मंगगे, तां सैह़ मेरे पिता दे पास्से ते जेह्ड़ा सुअर्ग च ऐ, तिन्हां तांई होई जांगा।

²⁰एह़ इसतांई कि जित्थु दो या त्रै माणु मेरे नांऐ ते किठ्ठे हुंदे हन, तित्थु मैं तिन्हां बिच्च हुंदा ऐ।”

²¹ताह़लू पतरस बक्खे आई नैं यीशुये नैं ग्लाणा लग्गा, “हे प्रभु, जे मेरा भाऊ अपराध करदा रैंह्, तां मैं कितणी बरी तिसियो माफ करां? क्या सत बरी?”

²²यीशुयैं तिस नैं ग्लाया, “मैं तुहां नैं एह़ नीं ग्लांदा ऐ, कि सत बरी तिकर अपर तिज्जो सत बरी दे सत्तर गुणा तिकर तिसियो माफ करणा चाइदा।”

²³“एह़ उदारण सुअर्गीय राज्ज दे तिस राजे साइआं ऐ, जिन्हीं अपणे दासां ते लेखा लैणां चाया।

²⁴जाह़लू सैह़ लेखा लैणां लग्गा, तां इक्क जणा तिस सामणै लंदा जेह्ड़ा दस हज़ार तोड़ेयां[7] दा कर्जदार था।

²⁵कि तिस कर्जे जो भरणे तांई तिस अल्ल कुच्छ भी नीं था, तां तिसदे मालकैं ग्लाया, ‘एह़ कने इसदी लाड़ी, बाल बच्चे कने जेह्ड़ा कुच्छ इसदा ऐ, सब कुच्छ बेची दित्ता जां, कने कर्ज भरी दित्ता जां।’

²⁶इसा गल्ला पर तिन्हीं दासें गांह झुकी नैं तिसियो प्रणांम कित्ता, कने ग्लाणा लग्गा, ‘हे मेरेया मालका सबर रख, मैं सारा कर्ज भरी दिंगा।’

²⁷ताह़लू तिस दासे दे मालकैं तरस खाई नैं तिसियो छड्डी दित्ता, कने तिसदा कर्ज भी माफ करी दित्ता।

²⁸“अपर जाह़लू सैह़ दास बाहर निकल़ेया, तां तिसदे संगी दासां च इक्क देहया तिसियो मिल्ला जेह्ड़ा तिसदे सौ दीनारां[8] दा कर्जदार था। तिन्हीं तिसियो पकड़ी नैं तिसदा गल़ा घुटेया कने ग्लाणा लग्गा, ‘जेह्ड़ा कुच्छ तिज्जो अल्ल मेरा कर्ज ऐ तिसियो भरी दे।’

²⁹इसा गल्ला पर तिसदा संगी दास तिस गांह पेई नैं तिस नैं विणती करणा लग्गा, ‘सबर रख, मैं सारा कर्ज भरी दिंगा।’

³⁰सैह़ नीं मन्नेया, अपर जाई नैं तिसियो जेला च पाई दित्ता कि जाह़लू तिकर कर्ज नीं भरी दैं, ताह़लू तिकर तित्थु रैंह्।

³¹तिसदे संगी दास एह़ जेह्ड़ा होएया था दिक्खी नैं बड़े दुखी होये, कने जाई नैं अपणे मालके जो पूरा हाल दस्सी दित्ता।

³²ताह़लू तिसदे मालकैं तिसियो सद्दी करी तिस नैं ग्लाणा लग्गा, ‘हे दुष्ट दास, मैं तां तेरा सारा ई कर्ज माफ करी दित्ता। क्जोकि तैं मिन्जो नैं अपणे कर्जे तांई बड़ी विणती कित्तियो थी,

³³इसतांई जिंआं मैं तिज्जो पर तरस खाई नैं तेरा सारा कर्ज माफ करी दित्ता, तिंआं ई तिज्जो भी अपणे संगी दासे पर तरस खाई नैं कर्ज माफ करणा चाइदा था।’

³⁴कने तिसदे मालकैं गुस्से च आई नैं तिसियो सज़ा दैणे आल़ेआं दे हुआलैं करी दित्ता, कि जाह़लू तिकर सैह़ सारा कर्ज भरी नीं दैं, ताह़लू तिकर तिन्हां दे हुआलैं रैंह्।

³⁵“इआं ई जे तुहां च हर इक्क अपणे भाऊये जो दिले ते माफ नीं करगे, तां मेरा पिता जेह्ड़ा सुअर्गे च ऐ, तुहां नैं देहया बर्ताब करगा।”