Read Kangri मत्ती 19 Bible Online

मत्ती 19 - Kangri bible

मत्ती 19

¹जाह़लू यीशु एह़ गल्लां ग्लाई बैठा, तां गलील प्रदेसे ते चली गेआ; कने यरदन नदिया दे पार यहूदिया प्रदेसे च आया।

²ताह़लू बड्डी भीड़ तिसदे पचांह़ चली पेई, कने तिन्हीं तित्थु तिन्हां जो ठीक कित्ता।

³ताह़लू फरीसी माणु तिसियो परखणे तांई बक्खे आई नैं ग्लाणा लग्गे, “क्या हर इक्क बज़ाह ते अपणिया लाड़िया जो छड्डणा ठीक ऐ?”

⁴तिन्हीं जवाब दित्ता, “क्या तुहां नीं पढ़ेया कि जिन्हीं तिन्हां जो बणाया, तिन्हीं सुरू ते मरद कने जणांस बणाई नैं ग्लाया,

⁵“इसा बज़ाह ते माणु अपणे माँऊ बुढ़े ते लग्ग होई नैं अपणिया लाड़िया सौगी रैंह्गा कने सैह़ दोयो इक्क जान्न हुंगे?

⁶कने सैह़ हुण दो तन नीं, अपर इक्क जान्न हन। इसतांई जिसियो परमात्मैं जोड़या ऐ, तिसियो माणु लग्ग ना करन।”

⁷तिन्हां तिस नैं ग्लाया, “भिरी मूसैं एह़ क्जो ठैहराया कि तलाक देई नैं तिसा जो छड्डी देआ?”

⁸यीशुयैं तिन्हां नैं ग्लाया, “मूसैं तुहां दे मन कठोर होणे दिया बज़ाह ते तुहां जो अपणिया-अपणिया लाड़िया जो छड्डणे दा हुक्म दित्या, अपर सुरू ते देहया नीं था।

⁹कने मैं तुहां नैं ग्लांदा ऐ, कि जेह्ड़ा कोई ब्यभिचारे जो छड्डी होर कुसा बज़ाह ते अपणिया लाड़िया जो छड्डी नैं दूईआ नैं ब्याह करैं, सैह़ ब्यभिचार करदा ऐ; कने जेह्ड़ा तिसा छड्डिया नैं ब्याह करैं, सैह़ भी ब्यभिचार करदा ऐ।”

¹⁰चेलेयां तिस नैं ग्लाया, “जे मर्दे दा जणासा सौगी ऐदेया रिस्ता ऐ, तां ब्याह करणा ठीक नीं।”

¹¹यीशुयैं तिन्हां नैं ग्लाया, “सारे एह़ वचन ग्रहण नीं करी सकदे, सिर्फ सैह़ जिन्हां जो परमात्मे दे जरिये वचन ग्रहण करणे दा दान मिल्लेया ऐ।

¹²क्जोकि कुच्छ नंपुसक ऐदेय हन, जेह्ड़े माँऊ दे गर्भे ते ई ऐदयो जम्मेयो, कने कुच्छ नंपुसक ऐदेय हन, जिन्हां जो माणुआं नंपुसक बणाया; कने कुच्छ नंपुसक ऐदेय हन, जिन्हां सुअर्गे दे राज्जे तांई अपणे आप्पे जो नंपुसक बणाई लेआ ऐ। जेह्ड़े इसा गल्ला जो समझणे जोग्गे हन, सैह़ इसा गल्ला जो समझी लैन।”

¹³ताह़लू लोक जागतां जो यीशु अल्ल लेई आये कि सैह़ तिन्हां पर हत्थ रखैं कने प्रार्थना करैं, अपर चेलेयां तिन्हां जो झिड़केया।

¹⁴यीशुयैं ग्लाया, “जागतां जो मिन्जो अल्ल औणां देआ, कने इन्हां जो मत रोका, क्जोकि सुअर्गे दा राज्ज ऐदेयां दा ई ऐ।”

¹⁵कने सैह़ तिन्हां पर हत्थ रखी नैं तित्थु ते चली गेआ।

¹⁶कने दिक्खा, इक्क माणु यीशु अल्ल आई नैं ग्लाणा लग्गा, “हे गुरू, मैं कुण देहया खरा कम्म करैं कि सदा दी ज़िन्दगी पां?”

¹⁷यीशुयैं तिस नैं ग्लाया, “तू मिन्जो ते भलाईया दे बारे च क्जो पुछा दा? भला तां इक्क ई ऐ, अपर जे तू ज़िन्दगिया च प्रवेश करणा चांह़दा ऐ, तां हुक्मां जो मन्ना कर।”

¹⁸तिन्हीं तिस नैं ग्लाया, “कुण देहया हुक्म?” यीशुयैं ग्लाया, “एह़ कि खून मत करणा, ब्यभिचार मत करणा, चोरी मत करणा, झूठी गवाही मत दैणा,

¹⁹अपणे बुढ़े दी कने अपणिया माँऊ दी इज्जत करणा, कने अपणे प्ड़ेसिये नैं अप्पु साइआं प्यार रखणा।”

²⁰तिस जुआनें तिस नैं ग्लाया, “इन्हां सबना जो तां मैं मनदा ऐ; हुण मिन्जो च कुसा गल्ला दी कमी ऐ?”

²¹यीशु तिस नैं ग्लाणा लग्गा, “जे तू म्हान होणा चांह़दा ऐ; तां जा, अपणा समान बेची नैं गरीबां जो बंडी दे, कने तिज्जो सुअर्गे च धन दौलत मिलगी; कने आई नैं मिन्जो पचांह़ चली पौ।”

²²अपर सैह़ जुआन एह़ गल्ल सुणी नैं उदास होई नैं चली गेआ, क्जोकि सैह़ बड़ा अमीर था।

²³ताह़लू यीशु अपणे चेलेयां नैं ग्लाणा लग्गा, “मैं तुहां नैं सच्च ग्लांदा ऐ, कि अमीरे दा सुअर्गे दे राज्जे च पुज्जणा औखा ऐ।

²⁴तुहां नैं भिरी ग्लांदा ऐ, कि जिंआं ऊँटे दा सूईया दे नक्के ते निकल़णा औखा ऐ, तिंआं ई अमीर माणुये दा परमात्मे दे राज्जे च प्रवेश करणा बड़ा औखा ऐ।”

²⁵एह़ सुणी नैं, चेले बड़े हरान होई नैं ग्लाणा लग्गे, “भिरी कुसदा उद्धार होई सकदा ऐ।”

²⁶यीशु तिन्हां बक्खी दिक्खी नैं ग्लाणा लग्गा, “माणुआं तांई तां बड़ा औखा ऐ, अपर परमात्मे ते सब कुच्छ होई सकदा ऐ।”

²⁷इसा गल्ला पर पतरस तिस नैं ग्लाणा लग्गा, “दिक्ख, अहां तां सब कुच्छ छड्डी नैं तिज्जो पचांह़ चली पैयो हन। अपर अहां जो क्या मिलगा?”

²⁸यीशुयैं तिन्हां नैं ग्लाया, “मैं तुहां नैं सच्च ग्लांदा ऐ, कि नौईआ सृष्टिया च जाह़लू माणु दा पुत्तर अपणी महिमा दे सिंहासणे पर बैंगा, तां तुहां भी जेह्ड़े मिन्जो पचांह़ चली पैयो, बारांह सिंहासणे पर बेई नैं इस्राएल देसे दे बारांह गोत्रां दा न्याय करगे।

²⁹कने जिन्हीं कुणी घरां, या भाऊआं या बैहणा, या बुढ़े, या माँऊ, या बाल बच्चेयां या खेतां जो मेरे नांऐ तांई छड्डी दित्या ऐ तिसियो सौ गुणा मिलगा, कने सैह़ सदा दी ज़िन्दगिया दा हक्कदार हुंगा।

³⁰अपर मत्ते सारे हन, जेह्ड़े इस संसारे च अपणे आप्पे जो म्हान समझदे हन, सैह़ परमात्मे दिया नजरा च नीच हुंगे; कने जिन्हां जो संसारे दे लोक नीच समझदे हन, सैह़ परमात्मे दिया नजरा च म्हान हुंगे।