Read Kangri मत्ती 25 Bible Online

मत्ती 25 - Kangri bible

मत्ती 25

¹“ताह़लू यीशुयैं अपणे चेलेयां नैं इक्क उदारण ग्लाया, जाह़लू मैं माणुये दा पुत्तर बापस ओंगा तां सुअर्गे दा राज्ज तिन्हां दस कुंआरियां साइआं हुंगा जेह्ड़ियां अपणी मशालां लेई नैं लाड़े दे ब्याह च खुसी मनाणा गियां।

²तिन्हां च पंज मूर्ख कने पंज समझदार थियां।

³मूर्खां अप्पु सौगी अपणियां मशालां तां लियां, अपर तिन्हां च पाणे तांई होर तेल नीं लेआ।

⁴अपर समझदारां अपणियां मशालां सौगी अपणियां कुपियां च मता तेल भी भरी लेआ।

⁵जाह़लू लाड़े दे ओणे च देर होई, तां सैह़ सारियां झमाईयां मारणा लगियां कने सोई गियां।

⁶“कने अधिया राती धूम मची, कि दिक्खा, लाड़ा ओआ दा ऐ, तिस नैं मिलणे तांई चला।

⁷ताह़लू सैह़ सारियां कुआरियां उठी नैं मशालां जो ठीक करणा लगियां।

⁸ताह़लू मूर्खां समझदारां नैं ग्लाया, ‘अपणे तेले च थोड़ा देहया अहां जो भी देआ, क्जोकि अहां दियां मशालां बुझणा लग्गी पिआं।’

⁹अपर समझदारां जवाब दित्ता, मुस्कल ऐ एह़ अहां तांई कने तुहां तांई पूरा नीं होणा; खरा तां एह़ ऐ कि तुहां बेचणे आल़ेआं अल्ल जाई नैं अपणे तांई खरीदी करी लेई ओआ।

¹⁰जाह़लू सैह़ खरीदणा जा दियां थियां तां लाड़ा आई रेह्आ, कने जेह्ड़ियां त्यार थियां, सैह़ तिस सौगी ब्याह दे घरे च चली गियां कने दरवाजा बंद करी दित्ता।

¹¹इसते बाद सैह़ दूईआं कुआरियां भी बापस आईआं, कने लाड़े जो डड्डी करी ग्लाणा लगियां, ‘हे मालक, हे मालक अहां तांई दरवाजे खोली देआ।’

¹²तिन्हीं जवाब दित्ता, ‘मैं तुहां नैं सच्च ग्लांदा ऐ, मैं तुहां जो नीं जाणदा।’

¹³इसतांई जागदे रेह्आ, क्जोकि तुहां मेरे बापस ओणे दे दिने दे तिस बग्ते जो नीं जाणदे।

¹⁴“भिरी यीशुयैं इक्क होर उदारण ग्लाया, जाह़लू मैं माणुये दा पुत्तर बापस ओंगा तां सुअर्गे दा राज्ज तिस माणुये साइआं ऐ, जिन्हीं प्रदेस जांदे बग्त अपणे दासां जो सद्दी नैं अपणी जायदात तिन्हां जो सौंपी दित्ती।

¹⁵तिन्हीं इक्की जो पंज तोड़े[13], दूये जो दो, कने त्रीये जो इक्क; मतलब हर इक्क जो तिसदिया सामर्था मताबक दित्ता, कने ताह़लू प्रदेस चली गेआ।

¹⁶तां जिसियो पंज तोड़े मिल्लेयो थे, तिन्हीं ताह़लू जाई नैं लैण-दैण कित्ता, कने पंज तोड़े होर कमाये।

¹⁷इस तरीके नैं जिसियो दो मिल्लेयो थे, तिन्हीं भी दो होर तोड़े कमाये।

¹⁸अपर जिसियो इक्क तोड़ा मिल्लेया था, तिन्हीं जाई नैं धरतिया च खड्डा खोदेया कने अपणे मालके दे तोड़े जो छुपाई दित्ता।

¹⁹“मतेआं दिनां बाद तिन्हां दासां दा मालक आई नैं तिन्हां ते हसाब लैणां लग्गा।

²⁰जिसियो पंज मिल्लेयो थे, तिन्हीं पंज तोड़े होर अंणी करी ग्लाया, ‘हे मालक, तैं मिन्जो पंज तोड़े दित्यो थे, दिक्ख, मैं पंज तोड़े होर कमाये हन।’

²¹तिसदे मालकैं तिस नैं ग्लाया, ‘धन, हे अच्छे कने बसुआसे जोग्गे दास, तू थोड़ी धन दौलता जो सम्भाल़णे च ईमानदार रेह्आ; मैं तिज्जो मतिआं चीज्जां दा अधिकारी बणांगा। अपणे मालके दिया खुसिया च साझीदार बण।’

²²“कने जिसियो दो तोड़े मिल्लेयो थे, तिन्हीं भी आई नैं ग्लाया, ‘हे मालक, तैं मिन्जो दो तोड़े दित्यो थे, दिक्ख, मैं दो तोड़े होर कमाये हन।’

²³तिसदे मालकैं तिस नैं ग्लाया, ‘धन, हे अच्छे कने बसुआसे जोग्गे दास, तू भी बड़ी थोड़ी धन दौलता जो सम्भाल़णे च ईमानदार रेह्आ; मैं तिज्जो मतिआं चीज्जां दा अधिकारी बणांगा। अपणे मालके दिया खुसिया च साझीदार बण।’

²⁴“अपर जिसियो इक्क तोड़ा मिल्लेया था, तिन्हीं आई नैं ग्लाया, ‘हे मालक, मैं तिज्जो जाणदा था कि तू कठोर माणु ऐ, तू जित्थु नीं बांदा औत्थू ते बड्डदा ऐ, कने जित्थु बीई नीं छिड़केया औत्थू ते बटीणदा ऐ।’

²⁵इसतांई मैं डरी गेआ कने जाई नैं तेरा तोड़ा धरतिया च खड्डा खोदी नैं छुपाई दित्ता। दिक्ख, ‘जेह्ड़ा तेरा ऐ, सैह़ एह़ ऐ।’

²⁶तिसदे मालकैं तिसियो जवाब दित्ता, हे दुष्ट कने आलसी दास, जाह़लू तू एह़ जाणदा था कि जित्थु मैं नीं बाया औत्थू ते बड्डदा, कने जित्थु मैं बीई नीं छिड़केया औत्थू ते बटीणदा ऐ;

²⁷तां तिज्जो चाइदा था कि मेरा तोड़ा साहुकारां अल्ल जमा कराई दिंदा, कने मैं आई नैं अपणे तोड़े ब्याजे समेत लेई लैंदा।

²⁸ताह़लू मालकैं दूये दासां जो ग्लाया, सैह़ तोड़ा इसते लेई लेआ, कने जिस अल्ल दस तोड़े हन, तिसियो देई देआ।

²⁹क्जोकि जिस कुसी अल्ल ऐ, तिसियो होर दित्ता जाणा; कने तिस अल्ल मता होई जाणा, अपर जिस अल्ल नीं ऐ, तिसते सैह़ भी, जेह्ड़ा तिस अल्ल ऐ, लेई लेआ जाणा।

³⁰इस नकम्मे दासे जो बाहरे आल़े नेहरे च सट्टी देआ, जित्थु रोणा कने दंद पिणा हुंगा।”

³¹“जाह़लू मैं माणु दा पुत्तर दुवारी अपणी महिमा च ओंगा कने सारे सुअर्गदूत मिन्जो सौगी ओंगे, तां मैं अपणी महिमा दे सिंहासणे पर विराजमान होणा।

³²कने सारियां जातिआं दे लोक मेरे सामणै किठ्ठे कित्ते जाणे; कने जिंआं गुआल़ा भेड्डां जो बकरियां ते लग्ग करी दिंदा ऐ, तिंआं ई मैं भी तिन्हां जो इक्की दूये ते लग्ग करगा।

³³मैं भेड्डां जो अपणे सज्जे पास्से कने बकरियां जो खब्बे पास्से खरेड़गा।

³⁴ताह़लू मैं जेह्ड़ा राजा ऐ, अपणे सज्जे पास्से आल़ेआं नैं ग्लांगा, ‘हे मेरे पिता दे धन लोको, ओआ, तिस राज्जे दे अधिकारी होई जा, जेह्ड़ा संसारे दे सुरू ते लेई नैं तुहां तांई त्यार कित्या ऐ।

³⁵क्जोकि जाह़लू मैं भुखा था, कने तुहां मिन्जो खाणे जो दित्ता, जाह़लू मैं प्यासा था कने तुहां मिन्जो पाणी पियाया; जाह़लू मैं परदेसी था, कने तुहां मिन्जो अपणे घरैं ठैहराया;

³⁶जाह़लू मैं नंगा था, कने तुहां मिन्जो कपड़े लौआये; जाह़लू मैं बमार था, कने तुहां मेरा सकशांत लेआ, जाह़लू मैं जेला च था कने तुहां मिन्जो नैं मिलणा आये।’

³⁷“ताह़लू धर्मी तिस जो जवाब दिंगे, ‘हे प्रभु अहां कधैड़ी तिज्जो भुखा दिख्या कने खाणा खुआया? कने प्यासा दिख्या कने पाणी पियाया?

³⁸अहां कधैड़ी तिज्जो परदेसी दिख्या कने अपणे घरैं ठैहराया? या नंगा दिख्या कने कपड़े लौआये?

³⁹अहां कधैड़ी तिज्जो बमार या जेला च दिख्या कने तिज्जो नैं मिलणा आये?’

⁴⁰ताह़लू मैं जेह्ड़ा राजा ऐ, तिन्हां जो जवाब दिंगा, ‘मैं तुहां नैं सच्च ग्लांदा ऐ कि तुहां जेह्ड़े मेरे इन्हां लोक्के ते लोक्केयां चेलेयां च कुसी इक्की सौगी कित्ता, सैह़ समझा मिन्जो सौगी कित्ता।’

⁴¹“ताह़लू सैह़ खब्बे पास्से आल़ेआं नैं ग्लांगा, ‘हे श्रापित लोको, मेरे सामणै ते तिसा सदा दी अग्गी च चली जा, जेह्ड़ी परमात्मे सैताने कने तिसदे दूतां तांई त्यार कित्तियो ऐ।

⁴²क्जोकि जाह़लू मैं भुखा था, कने तुहां मिन्जो खाणे जो नीं दित्ता; जाह़लू मैं प्यासा था, कने तुहां पाणी नीं पियाया;

⁴³जाह़लू मैं परदेसी था, कने तुहां मिन्जो अपणे घरैं नीं ठैहराया; जाह़लू मैं नंगा था, कने तुहां कपड़े नीं लौआये; जाह़लू मैं बमार कने जेला च था, कने तुहां मेरा सकशांत नीं लेआ।’

⁴⁴“ताह़लू सैह़ जवाब दिंगे, ‘हे प्रभु अहां तिज्जो कधैड़ी भुखा, कने प्यासा, कने परदेसी, कने नंगा, कने बमार, कने जेला च दिख्या, कने तेरी सेवा टहल नीं कित्ती?’

⁴⁵ताह़लू मैं तिन्हां जो जवाब दिंगा, ‘मैं तुहां नैं सच्च ग्लांदा ऐ, कि तुहां जेह्ड़े इन्हां लोक्के ते लोक्केयां च कुसी इक्की सौगी नीं कित्ता, सैह़ मिन्जो सौगी भी नीं कित्ता।’

⁴⁶सैह़ जेह्ड़े खब्बे पास्से हन, सदा दी सज़ा झेलगे, अपर धर्मी लोक सदा दी ज़िन्दगिया च प्रवेश करगे।”