Read Kangri मत्ती 26 Bible Online

मत्ती 26 - Kangri bible

मत्ती 26

¹जाह़लू यीशु एह़ सारियां गल्लां ग्लाई बैठा तां अपणे चेलेयां नैं ग्लाणा लग्गा,

²तुहां जाणदे हन कि दूँ दिनां दे बाद फसह दा त्योहार ऐ, कने मैं माणु दा पुत्तर सूल़िया पर टूंगणे तांई पकड़ुआया जाणा,

³ताह़लू प्रधान याजक कने प्रजा दे स्याणे माणु काइफा नांऐ दे महायाजके दे अँगणे च कठ्ठरोई गै।

⁴कने अप्पु च सोच-बचार करणा लग्गे कि यीशुये जो धोखे नैं पकड़ी नैं मारी दैन।

⁵अपर सैह़ ग्लांदे थे, “त्योहारे दे बग्त नीं, कुत्थी इआं ना होयैं कि लोक बखेड़ा नीं करी दैन।”

⁶जाह़लू यीशु बैतनिय्याह ग्रांऐ च शमौन कोढ़िये दे घरैं था,

⁷तां इक्क जणांस संगमरमरे दिया सीसिया च कीमती इत्तर लेई करी आई, कने जाह़लू सैह़ खाणा खाणे तांई बैठेया था, ताह़लू तिसदे सिरे पर पाई दित्ता।

⁸एह़ दिक्खी नैं तिसदे चेले गुस्सा होये कने ग्लाया, “इसदी क्जो बरबादी करी दित्ती?

⁹इसियो तां खरिया कीमता च बेची नैं गरीबां जो बंडेया जाई सकदा था।”

¹⁰एह़ जाणी नैं यीशुयैं तिन्हां नैं ग्लाया, “इसा जणासा जो क्जो सता दे हन? तिन्नै मिन्जो सौगी भलाई कित्ती ऐ।

¹¹गरीब तां तुहां सौगी सदा रैंह्दे हन, अपर मैं तुहां सौगी सदा नीं रैंह्गा।

¹²तिन्नै मेरे सरीरे पर जेह्ड़ा एह़ इत्तर पाया ऐ, सैह़ मेरे अन्तिम संस्कार होणे तांई कित्ता ऐ।

¹³मैं तुहां नैं सच्च ग्लांदा ऐ, कि सारे संसारे च जित्थु कुत्थी एह़ सुसमाचार प्रचार कित्ता जांगा, तित्थु इसादे इस कम्मे दा बखान भी तिसा दिया यादा च कित्ता जांगा।”

¹⁴ताह़लू यहूदा इस्करियोती, जेह्ड़ा बाराह चेलेयां च इक्क था, प्रधान याजकां अल्ल जाई नैं ग्लाणा लग्गा,

¹⁵“जे मैं तिसियो तुहां दे हुआलैं करी दैं तां मिन्जो क्या दिंगे?” तिन्हां तिसियो तीई चाँदी दे सिक्के तौल़ी नैं देई दित्ते।

¹⁶कने सैह़ तिस बग्त ते तिसियो पकड़ुआणे दा मौका तोपणा लग्गा।

¹⁷अखमीरी रोटिया दे त्योहारे दे पैहल्ले दिने चेले यीशु अल्ल आई नैं पुछणा लग्गे, “तू कुत्थू चांह़दा ऐ कि अहां तिज्जो तांई फसह खाणे दी त्यारी करन?”

¹⁸तिन्हीं ग्लाया, “सैहरे च फलाणे माणुये अल्ल जाई नैं तिस नैं ग्ला, कि गुरू ग्ला दा ऐ, कि मेरा बग्त नेड़े आई गेआ ऐ। मैं अपणे चेलेयां सौगी तेरे ऐत्थु त्योहार मनाणा चांह़दा।”

¹⁹चेलेयां यीशुये दा हुक्म मन्नेया कने फसह दा खाणा त्यार कित्ता।

²⁰जाह़लू संझ होई तां यीशु बारांह चेलेयां सौगी खाणा खाणे तांई बैठेया।

²¹जाह़लू सैह़ खा दे थे तां तिन्हीं ग्लाया, “मैं तुहां नैं सच्च ग्लांदा ऐ, कि तुहां च इक्की मिन्जो पकड़ुआंणा।”

²²इसा गल्ला पर सैह़ बड़े उदास होये, कने सब चेले इक्क-इक्क करी नैं तिसते पुछणा लग्गे, “हे गुरू, क्या सैह़ मैं ऐ?”

²³तिन्हीं जवाब दित्ता, “जेह्ड़ा मिन्जो सौगी इक्की थाल़िया च खा दा ऐ, सैई मिन्जो पकड़ुआंगा।

²⁴मैं माणु दा पुत्तर तां जिंआं तिसदे बारे च पवित्रशास्त्रे च लिख्या ऐ, तिंआं ई इस संसारे ते जांगा; अपर तिस माणु तांई अफसोस ऐ जिसदिया बज़ाह ते माणु दा पुत्तर पकड़ुआया जांदा ऐ, तां तिस माणुये तांई खरा हुंदा कि सैह़ इस संसारे च पैदा ई नीं हुंदा।”

²⁵ताह़लू तिसियो पकड़ुआणे आल़ा यहूदा ग्लाणा लग्गा, “हे गुरू, क्या सैह़ मैं ऐ?” तिन्हीं तिस नैं ग्लाया, “तूईं सैह़ ऐ।”

²⁶जाह़लू सैह़ खाणा खा दे थे, यीशुयैं रोटी लेई कने आसीष मंगी नैं तोड़ी, कने चेलेयां जो देई नैं ग्लाणा लग्गा, “लेआ, खा; एह़ मेरा सरीर ऐ।”

²⁷भिरी तिन्हीं अंगूरा दे रसे दा कटोरा लेई नैं धन्यावाद कित्ता, कने तिन्हां जो देई नैं ग्लाणा लग्गा, “तुहां सारे इस कटोरे ते पीआ,

²⁸क्जोकि एह़ वादे दा मेरा सैह़ खून ऐ, जेह्ड़ा मतेआं दे पापां दी माफी तांई बहाया जांदा ऐ।

²⁹मैं तुहां नैं ग्लांदा ऐ, कि मैं भिरी अंगूरा दा रस कदी नीं पींगा। जाह़लू तिकर तुहां सौगी अपणे पिता दे राज्ज च ताजा अंगूरा दा रस पी नीं लैं।”

³⁰भिरी यीशु कने तिसदे चेले भजन गाई नैं जैतून प्हाड़े पर गै।

³¹ताह़लू यीशु तिन्हां नैं ग्लाणा लग्गा, “तुहां सारे अज्ज ई राती मेरे बारे च ठोकर खांगे, क्जोकि पवित्रशास्त्रे च लिख्या ऐ, मैं गुआले जो मारगा, कने धणे दियां भेड्डां रुआंह परांह बिछड़ी जागियां।

³²अपर मैं मरेयां ते जिन्दे होणे ते बाद तुहां ते पैहल्लैं गलील प्रदेसे जो जांगा।”

³³इसा गल्ला पर पतरसैं तिस नैं ग्लाया, “जे सारे तेरे बारे च ठोकर खान तां खान, अपर मैं कदी भी ठोकर नीं खांगा।”

³⁴यीशु पतरसे नैं ग्लाणा लग्गा, “मैं तिज्जो नैं सच्च ग्लांदा ऐ कि अज्ज राती ई कुक्ड़े दी बांग दैणे ते पैहल्लैं तैं त्रै बरी मिन्जो पणछैणने ते मुकरना।”

³⁵पतरस यीशुये नैं ग्लाणा लग्गा, “जे मिन्जो तिज्जो सौगी मरना भी पोंगा तमी मैं तिज्जो ते कदी नीं मुकरना।” कने इआं ई सारे चेले भी ग्लाणा लग्गे।

³⁶ताह़लू यीशु अपणे चेलेयां सौगी गतसमनी नांऐ दी इक्की जगाह च आया कने अपणे चेलेयां नैं ग्लाणा लग्गा, “ऐत्थु बेई रैहनेयों, जाह़लू तिकर मैं औत्थू जाई नैं प्रार्थना करैं।”

³⁷सैह़ पतरसे कने जबदिये दे दून्नी जागतां जो सौगी लेई गेआ, कने दुखी कने बेचैन होणा लग्गा।

³⁸ताह़लू तिन्हीं तिन्हां नैं ग्लाया, “मेरा मन बड़ा दुखी ऐ, इआं लगदा ऐ कि जिंआं मैं मरने आल़ा ऐ। तुहां ऐत्थु रुका कने मिन्जो सौगी जागदे रेह्आ।”

³⁹भिरी सैह़ थोड़ा होर गांह जाई नैं मुँऐ दे भार पेई नैं एह़ प्रार्थना कित्ती, “हे मेरे पिता, जे होई सकैं तां एह़ दुखे दा बग्त मिन्जो ते दूर होई जां, भिरी भी जिंआं मैं चांह़दा तिंआं नीं, अपर जिंआं तू चांह़दा ऐ तिंआं ई होयैं।”

⁴⁰भिरी यीशु प्रार्थना करी नैं आया, कने तिन्हां चेलेयां जो सुतेयो दिक्खी नैं पतरसे नैं ग्लाणा लग्गा, “क्या तुहां मिन्जो सौगी इक्क घड़ी भी नीं जागी सके?

⁴¹जागदे रेह्आ, कने प्रार्थना करदे रेह्आ, कि तुहां परीक्षा च नीं पोन, आत्मा तां त्यार ऐ, अपर सरीर कमजोर ऐ।”

⁴²भिरी तिन्हीं दूई बरी जाई नैं एह़ प्रार्थना कित्ती, “हे मेरे पिता, जे एह़ दुखे दा बग्त मेरे झेलणे बगैर नीं हटी सकदा तां तेरी इच्छा पूरी होयैं।”

⁴³ताह़लू तिन्हीं भिरी दूई बरी आई नैं तिन्हां जो सुतेया दिख्या, क्जोकि तिन्हां दियां अखीं निंदरा नैं भरोईयां थियां।

⁴⁴तिन्हां जो छड्डी नैं सैह़ भिरी चली गेआ, कने तिसा उआज़ा च भिरी त्री बरी प्रार्थना कित्ती।

⁴⁵ताह़लू तिन्हीं चेलेयां अल्ल आई नैं ग्लाया, “हुण तुहां अरामे नैं सोई रेह्आ; दिक्खा, सैह़ बग्त आई ढुकेया ऐ, कने मैं माणुये दा पुत्तर पापियां दे हुआलैं कित्ता जाणे आल़ा ऐ।

⁴⁶उठा, चला; कने दिक्खा, मिन्जो पकड़ुआणे आल़ा नेड़े आई रेह्आ ऐ।”

⁴⁷सैह़ एह़ ग्ला दा था कि यहूदा जेह्ड़ा बारांह चेलेयां च इक्क था आया, कने तिस सौगी प्रधान याजकां कने स्याणे माणुआं दी बड्डी भीड़, तलवारां कने डांगा लेई करी आई।

⁴⁸तिसदे पकड़ुआणे आल़ैं तिन्हां जो एह़ नसाणी दित्ती; “जिसदा मैं पुक्का लैंगा सैई ऐ, तिसियो पकड़ी लैनेयों।”

⁴⁹कने ताह़लू ई यीशु अल्ल आई नैं ग्लाया, “हे गुरू नमस्कार।” कने तिसदे मते पुक्के लै।

⁵⁰यीशुयैं तिस नैं ग्लाया, “हे दोस्त, जिस कम्मे तांई तू आया ऐ, तिसियो करी लै।” ताह़लू तिन्हां बक्खे आई नैं यीशु पर हत्थ पाया कने तिसियो पकड़ी लेआ।

⁵¹यीशुये दे चेलेयां च इक्की अपणी तलवार कड्डी कने महायाजके दे दासे पर चलाई नैं तिसदा कंन्न बड्डी दित्ता।

⁵²ताह़लू यीशुयैं तिस नैं ग्लाया, “अपणिया तलवारा म्याना च रख क्जोकि जेह्ड़े तलवारा जो चलांदे हन सैह़ तलवारा नैं खत्म कित्ते जांगे।

⁵³क्या तू नीं जाणदा कि मैं अपणे पिता नैं विणती करी सकदा, कने सैह़ सुअर्गदूतां दी बाराह पलटन ते भी जादा हुण मेरे सामणै पज्जाई सकदा ऐ?

⁵⁴अपर पवित्रशास्त्रे दी सैह़ गल्लां कि ऐदेया ई होणा जरूरी ऐ, किंआं पूरियां होणियां?”

⁵⁵तिस बग्त यीशुयैं भीड़ा नैं ग्लाया, “क्या तुहां तलवारां कने डांगा लेई नैं मिन्जो डाकू समझी नैं पकड़णे तांई आएयो हन? मैं हर दिन मंदरे च बेई नैं सिक्षा दिंदा था, अपर तुहां मिन्जो नीं पकड़ेया।

⁵⁶अपर एह़ सब इसतांई होएया ऐ, कि भविष्यवक्तां दे वचन पूरे होन।” ताह़लू सारे चेले तिसियो छड्डी नैं नठ्ठी गै।

⁵⁷ताह़लू सैह़ यीशुये जो पकड़ी करी काइफा नांऐ दे महायाजके अल्ल लेई गै, जित्थु सास्त्री कने स्याणे माणु किठ्ठे होएयो थे।

⁵⁸पतरस डरदा-डरदा दूरी बणाई करी तिसदे पचांह़-पचांह़ महायाजके दे अँगणे तिकर गेआ कने अंदर जाई नैं अन्त दिक्खणे तांई प्यादेयां सौगी बेई गेआ।

⁵⁹प्रधान याजक कने सारी महासभा यीशुये जो मारने तांई तिसदे खलाफ झूठी गवाहिया दिया तोपा च थे,

⁶⁰अपर मते झूठे गवाहां दे होणे पर भी सैह़ गवाही नीं पाई सके। आखरी च दो माणु आये,

⁶¹कने ग्लाया, “इन्हीं ग्लाया ऐ कि मैं परमात्मे दे मंदरे जो ढाई सकदा कने तिसियो त्रीं दिनां च बणाई सकदा।”

⁶²ताह़लू महायाजकैं खड़े होई नैं यीशुये नैं ग्लाया, “क्या तू कोई जवाब नीं दिंगा? एह़ माणु तेरे खलाफ क्या गवाही दै दे हन?”

⁶³अपर यीशु चुप रेह्आ। ताह़लू महायाजकैं तिस नैं ग्लाया, “मैं तिज्जो जिन्दे परमात्मे दी कसम दिंदा कि जे तू परमात्मे दा पुत्तर मसीह ऐ, तां अहां नैं ग्लाई दे।”

⁶⁴यीशुयैं तिस नैं ग्लाया, “तैं अप्पु ई ग्लाई दित्ता; जे मैं तुहां नैं एह़ भी ग्लांदा कि अज्जे ते तुहां मिन्जो माणुये दे पुत्तरे जो सर्वशक्तिमान दे सज्जे पास्से बैठेयो, कने अम्बरे दे बदल़ां पर ओंदे दिक्खगे।”

⁶⁵इसा गल्ला पर महायाजक अपणे कपड़ेयां फाड़ी नैं ग्लाणा लग्गा, “इन्हीं परमात्मे दी निंदा कित्ती ऐ, हुण अहां जो होर गवाहिया दी क्या जरूरत? दिक्खा, तुहां हुण एह़ निंदा सुणी ऐ।

⁶⁶तुहां क्या सोचदे हन?” तिन्हां जवाब दित्ता, “एह़ मारने जोग्गा ऐ।”

⁶⁷ताह़लू तिन्हां तिसदे मुँऐ पर थुकेया कने तिसियो घसुन मारे, दूयेयां चपैड़ां मारी नैं ग्लाया,

⁶⁸“हे मसीह, अहां नैं भविष्यवाणी करी नैं दस्स कि कुणी तिज्जो मारेया।”

⁶⁹पतरस बाहर अँगणे च बैठेया था कि इक्क दासी तिस अल्ल आई कने ग्लाणा लग्गी, “तू भी यीशु गलीलिये सौगी था।”

⁷⁰तिन्हीं सबना सामणै एह़ ग्लांदे होये मना कित्ता, “मैं नीं जाणदा तू क्या ग्ला दी ऐ।”

⁷¹जाह़लू सैह़ बाहर अँगणे च गेआ, तां दूई दासी तिसियो दिक्खी नैं जेह्ड़े तित्थु थे तिन्हां नैं ग्लाणा लग्गी, “एह़ भी तां यीशु नासरिये सौगी था।”

⁷²तिन्हीं कसम खाई नैं भिरी मना कित्ता “मैं तिस माणुये जो नीं जाणदा।”

⁷³थोड़िया देरा बाद लोकां जेह्ड़े तित्थु खड़ोत्यो थे, पतरसे अल्ल आई नैं तिस नैं ग्लाया, “सच्च-बिच्च तू भी तिन्हां च इक्क ऐ, क्जोकि तेरी बोली तेरा भेत खोली दिंदी ऐ।”

⁷⁴ताह़लू सैह़ धिक्कारणे कने कसम खाणा लग्गा, “मैं तिस माणुये जो नीं जाणदा।” कने तिस बग्त ई कुक्ड़ैं बांग देई दित्ती।

⁷⁵ताह़लू पतरसे जो सैह़ गल्ल याद आई जेह्ड़ी यीशुयैं तिसियो ग्लाईयो थी, “कुक्ड़े दे बांग दैणे ते पैहल्लैं तैं त्रै बरी मिन्जो पणछैणने ते मुकरना।” कने सैह़ बाहर जाई नैं अखीं भरी-भरी नैं रोणा लग्गा।