Read Kangri मत्ती 28 Bible Online

मत्ती 28 - Kangri bible

मत्ती 28

¹बिस्रामे आल़े दिन दे बाद हफ्ते दे पैहल्ले दिन भ्याग होणे ते पैहल्लैं ई मरियम मगदलीनी कने दूई मरियम कब्रा जो दिक्खणा आईआं।

²कने दिक्खा, इक्क बड्डा हिल्लण होएया, क्जोकि प्रभु दा सुअर्गदूत सुअर्गे ते लुत्था कने बक्खे आई नैं तिन्हीं पत्थरे जो खसकाई दित्ता, कने तिस पर बेई गेआ।

³तिसदा रूप बिजलिया साइआं कने तिसदे कपड़े पाल़े साइआं चमका करदे थे।

⁴तिसदे डरे दे पैहरेदार कम्बी पै, कने मरेयां साइआं होई गै

⁵सुअर्गदूत जणासां नैं ग्लाणा लग्गा, “मत डरा, मैं जाणदा ऐ, कि तुहां यीशुये जो तोपा दियां हन, जेह्ड़ा सूल़िया पर टूंगेया था।

⁶सैह़ ऐत्थु नीं ऐ, अपर अपणे वचने दे मताबक जिन्दा होई गेआ ऐ। ओआ, एह़ जगाह दिक्खा, जित्थु प्रभु रखेया था,

⁷कने झटपट जाई नैं तिसदे चेलेयां नैं ग्ला कि यीशु मरेयां ते जिन्दा होई गेआ ऐ, कने सैह़ तुहां ते पैहल्ले गलील प्रदेसे जो जांदा ऐ, तुहां तित्थु तिसदा दर्शन पांगे। सुणा, मैं तुहां नैं एह़ सब दस्सी दित्ता।”

⁸कने सैह़ डरदियां कने बड़ी खुसिया सौगी कब्रा ते झटपट निकल़ी नैं तिसदे चेलेयां जो खबर दैणे तांई दौड़ियां।

⁹ताह़लू यीशु तिन्हां जो मिल्ला कने ग्लाणा लग्गा, “सुखी रेह्आ।” तिन्हां बक्खे आई नैं कने तिसदे पैर पकड़ी करी तिसियो प्रणांम कित्ता।

¹⁰ताह़लू यीशु तिन्हां नैं ग्लाणा लग्गा, “मत डरा; मेरे चेलेयां नैं जाई नैं ग्ला कि गलील प्रदेसे जो चली जान, तित्थु सैह़ मिन्जो सौगी मिलगे।”

¹¹जाह़लू सैह़ जणासां चेलेयां जो एह़ खबर दैणे तांई बापस जा दियां थियां, कि पैहरेदारां च कुच्छ सैहरे च आई नैं पूरा हाल प्रधान याजकां नैं दस्सी दित्ता।

¹²ताह़लू प्रधान याजकां स्याणे माणुआं सौगी किठ्ठे होई नैं सलाह कित्ती कने सपाईयां जो बड़ी चाँदी दित्ती,

¹³कने तिन्हां सपाईयां नैं ग्लाया, “तुहां लोकां नैं ग्लानेयों कि राती जो जाह़लू अहां सुतेयो थे, तां तिसदे कुच्छ चेले आई नैं तिसदिया लाह्सा चुराई लेई गै।

¹⁴कने जे एह़ गल्ल पिलातुस हाकमे दे कन्नां तिकर पुज्जगी, तां अहां तिसियो समझाई लैंगे कने तुहां जो खतरे ते बचाई लैंगे।”

¹⁵कने तिन्हां पैसे लेई नैं जिंआं दस्सेया था, तिंआं ई कित्ता। एह़ गल्ल अज्जे तिकर यहूदी माणुआं च प्रचलित ऐ।

¹⁶ग्यारा चेले गलील प्रदेसे च तिस प्हाड़े पर गै जिसियो यीशुयैं दस्सेया था।

¹⁷चेलेयां यीशुये दे दर्शन पाई नैं तिसियो प्रणांम कित्ता, अपर कुसी-कुसी जो शक होएया, कि सैह़ जिन्दा बापस आई गेआ।

¹⁸यीशुयैं तिन्हां अल्ल आई नैं ग्लाया, “सुअर्ग कने धरतिया दा सारा हक्क मिन्जो दित्या ऐ।

¹⁹इसतांई तुहां जा, सारी जातिआं दे लोकां जो चेला बणा; कने तिन्हां जो पिता, कने पुत्तर, कने पवित्र आत्मा दे नांऐ ते बपतिस्मा देआ,

²⁰कने तिन्हां जो सारे हुक्म जेह्ड़े मैं तुहां जो दित्यो हन, तिन्हां जो मन्नणा सखा कने सुणा मैं संसारे दे अन्त तिकर सदा तुहां सौगी ऐ।”