Read Kangri मत्ती 3 Bible Online

मत्ती 3 - Kangri bible

मत्ती 3

¹तिन्हां दिनां च यूहन्ना बपतिस्मा दैणे आल़ा आई नैं यहूदिया प्रदेसे दिया सुनसाण जगाह च एह़ प्रचार करणा लग्गा;

²“मने बदला, क्जोकि सुअर्गे दा राज्ज नेड़े आई गेआ ऐ।”

³एह़ सैई ऐ, जिसदे बारे च यशायाह भविष्यवक्तैं ग्लाया था, “सुनसाण जगाह च इक्क हक्कां पाणे आल़े दी उआज़ सुम्मां दी, कि प्रभु तांई लोकां देयां मनां जो त्यार करा, कने अपणे आप्पे जो सुधारा।”

⁴यूहन्ना ऊँटे दे बाल़ां दे कपड़े बणाई नैं लगांदा था, कने अपणे लक्के च चमड़े दा पटका बन्नी रखदा था। कने सैह़ टिड्डियां कने जंगली मखीर खांदा था।

⁵ताह़लू यरूशलेम सैहरे दे कने सारे यहूदिया प्रदेसे दे, कने यरदन नदिया दे अक्खे-बक्खे दी सारी जगांह दे लोक तिस अल्ल आईये।

⁶कने तिन्हां अपणे-अपणे पापां जो मन्नी नैं यरदन नदिया च यूहन्ने ते बपतिस्मा लेआ।

⁷जाह़लू तिन्हीं मते फरीसी कने सदूकी माणुआं जो बपतिस्मे तांई अप्पु अल्ल ओंदे दिख्या, तां तिन्हां नैं ग्लाणा लग्गा, “हे सर्पे साइआं जेहरिलै लोको, तुहां जो कुणी दस्सी दित्ता कि परमात्मे दे ओणे आल़े कोपे ते नठा?

⁸इसतांई खरे कम्म करी नैं सबूत देआ कि तुहां सच्च बिच्च अपणा मन पापां ते बदली लेआ ऐ।

⁹कने अपणे-अपणे मने च एह़ मत सोचा कि ‘अहां तां अब्राहमे दे वंशे दे हन, तां अहां बची जाणा।’ क्जोकि मैं तुहां नैं ग्लांदा ऐ, कि परमात्मा इन्हां पत्थरां ते भी अब्राहमे तांई औलाद पैदा करी सकदा ऐ।

¹⁰हुण गल्ल इआं कि परमात्मा हर इक्की जो जेह्ड़ा मने जो नीं बदलणा चांह़दा, तिसियो सज़ा दैणे तांई बिलकुल त्यार ऐ। ठीक तिंआं ई जिंआं कि कुआड़ी रूखां दियां जड़ा पर रखियो ऐ, इसतांई जेह्ड़ा-जेह्ड़ा रूख खरा फल़ नीं दिंदा, सैह़ बड्डी करी अग्गी च फूकेया जांदा ऐ।

¹¹“मैं तां तुहां जो पांणिये च मने बदलणे दा बपतिस्मा दिंदा ऐ, अपर जेह्ड़ा मेरे बाद ओणे आल़ा ऐ, सैह़ मिन्जो ते बड़ा सामर्थी ऐ। मैं तिसदियां जुतियां चुकणे जोग्गा भी नीं ऐ, अपर सैह़ तां तुहां जो पवित्र आत्मा कने अग्गी नैं बपतिस्मा दिंगा।

¹²तिसदा छज तिसदे हत्थे च ऐ, कने सैह़ अपणेयां खेतां जो खरे कित्ते साफ करगा, कने अपणिया कणका दे दाणेयां जो पेड़ूये च किठ्ठा करगा, अपर भूये जो तिसा अग्गी च जेह्ड़ी कदी भी बुझदी नीं फुकी दिंगा।”

¹³तिस बग्त यीशु गलील प्रदेसे ते यरदन नदिया कनारे यूहन्ने अल्ल बपतिस्मा लैणां आया।

¹⁴अपर यूहन्ना एह़ ग्लाई नैं तिसियो रोकणा लग्गा, “मिन्जो तां तेरे हत्थे ते बपतिस्मा लैणे दी जरूरत ऐ, कने तू मिन्जो अल्ल आया?”

¹⁵यीशुयैं तिसियो एह़ जवाब दित्ता, “हुण तां इआं ई होणा दे, क्जोकि अहां जो इस तरीके नैं परमात्मे दिया इच्छा जो पूरा करणा ठीक ऐ।” ताह़लू तिन्हीं तिसदी गल्ल मन्नी लेई।

¹⁶कने यीशु बपतिस्मा लेई नैं झट पांणिये ते बाहर आया, कने दिक्खा तिस तांई सुअर्ग खुली गेआ, कने तिन्हीं परमात्मे दिया आत्मा जो कबूतरे साइआं लौदें कने अपणे ऊपर ओंदे दिख्या।

¹⁷कने दिक्खा, सुअर्गे ते परमात्मैं एह़ ग्लाया, “एह़ मेरा प्यारा पुत्तर ऐ, जिस नैं मैं प्यार रखदा ऐ, कने जिसते मैं बड़ा भरी खुस ऐ।”