Read Kangri मत्ती 4 Bible Online

मत्ती 4 - Kangri bible

मत्ती 4

¹भिरी पवित्र आत्मा यीशुये जो सुनसाण जगाह जो इसतांई लेई गेआ, तांजे सैताने ते तिसदी परख होई सकैं।

²तिन्हीं चाल़ी दिन कने चाल़ी रात कुच्छ नीं खादा, ताह़लू तिसियो भुख लग्गी।

³तां सैतान परखणे तांई तित्थु आई नैं तिस नैं ग्लाणा लग्गा, “जे तू परमात्मे दा पुत्तर ऐ, तां ग्लाई दे, कि एह़ पत्थर रोटियां बणी जान।”

⁴यीशुयैं जवाब दित्ता, “पवित्रशास्त्रे च लिख्या ऐ, ‘माणु सिर्फ रोटिया ई ते नीं, अपर हर इक्क वचने ते जेह्ड़ा परमात्मे दे मुँऐ ते निकल़दा ऐ, तिस पर चलगा तां जिन्दा रैंह्गा।’”

⁵ताह़लू सैतान यीशुये जो पवित्र सैहर यरूशलेमे दे बड्डे मंदरे जो लेई गेआ कने तिसियो मंदरे दिया चुंडिया पर खरेड़ी दित्ता,

⁶कने तिस नैं ग्लाणा लग्गा, “जे तू परमात्मे दा पुत्तर ऐ, तां अप्पु जो ऐत्थु ते थल्लैं सट्टी दे। क्जोकि पवित्रशास्त्रे च लिख्या ऐ: ‘परमात्मा तेरे बारे च अपणे सुअर्गदूतां जो हुक्म दिंगा, कने तिन्हां तिज्जो हत्थां पर चुक्की लैणां। कने इआं होणा कि तेरे पैरां च पत्थरे नैं ठोकर भी नीं लगणी।’ ”

⁷यीशु तिस नैं ग्लाणा लग्गा, “एह़ भी पवित्रशास्त्रे च लिख्या ऐ, ‘तू प्रभु अपणे परमात्मे जो मत परख।’ ”

⁸भिरी सैतान तिसियो इक्क बड़े बड्डे कने ऊचे प्हाड़े पर लेई गेआ कने सारे संसारे दा राजपाठ कने तिसदी धन दौलत दा रुतबा दस्सी करी

⁹तिस नैं ग्लाया, “जे तू झुकी नैं मिन्जो प्रणांम कने भक्ति करैं, तां मैं एह़ सब कुच्छ तिज्जो देई दिंगा।”

¹⁰ताह़लू यीशुयैं तिस नैं ग्लाया, “हे सैतान दूर होई जा, क्जोकि पवित्रशास्त्रे च लिख्या ऐ, ‘तू प्रभु अपणे परमात्मे जो झुकी नैं प्रणांम कर, कने सिर्फ तिसदी भक्ति कर।’ ”

¹¹ताह़लू सैतान अगले मौके दिया निहाल़पा च कुच्छ बग्त तांई तिसियो छड्डी करी चली गेआ, कने सुअर्गदूत आई नैं तिसदी सेवा करणा लग्गे।

¹²जाह़लू यीशुयैं एह़ सुणेया कि यूहन्ने जो पकड़ी करी जेला च बंद करी दित्या, तां सैह़ यहूदिया प्रदेसे जो छड्डी करी गलील प्रदेसे दे नासरत सैहरे च बापस आई गेआ।

¹³कने भिरी सैह़ नासरत सैहरे जो छड्डी नैं कफरनहूम सैहरे च जाई नैं रैहणा लग्गा, जेह्ड़ा झीला दे कनारे जबूलूनियां कने नप्तालियां दे लाक्के च ऐ।

¹⁴तांजे जेह्ड़ा यशायाह भविष्यवक्ता दे जरिये ग्लाया था, सैह़ पूरा होयैं:

¹⁵“जबूलूनियां कने नप्तालियां दे लाक्के, झीला दे रस्ते ते यरदन नदिया दे पार होरनी जातिआं दा गलील प्रदेस-

¹⁶जेह्ड़े लोक परमात्मे जो नीं जाणदे थे सैह़ नेहरे च जीआ दे थे, तिन्हां बड़ी जोत्ती दिक्खी, कने जेह्ड़े मौत्ती दे डरे च जीआ दे थे, तिन्हां पर जोत्ती चमकी।”

¹⁷तिस बग्त ते यीशुयैं प्रचार करणा कने एह़ ग्लाणा सुरू कित्ता, “मने बदला क्जोकि सुअर्गे दा राज्ज नेड़े आई रेह्आ ऐ।”

¹⁸ताह़लू गलील प्रदेसे दिया झीला दे कनारे चलदे-चलदे यीशुयैं दूँ भाऊआं जो झीला च जाल़ पांदे मच्छियां पकड़दे दिख्या, जिन्हां च इक्की दा नां शमौन जिसियो पतरस ग्लांदे थे, कने तिसदे लोक्के भाऊये दा नां अन्द्रियास था, क्जोकि सैह़ मछुवारे थे।

¹⁹यीशु तिन्हां नैं ग्लाणा लग्गा, “मिन्जो पचांह़ चली ओआ, कने अज्जे ते बाद तुहां माणुआं जो परमात्मे तांई सिष्य बणांगे।”

²⁰सैह़ तिसी बग्त जाल़ां जो छड्डी नैं यीशुये पचांह़ चली पै।

²¹तित्थु ते थोड़ी गांह जाई नैं, यीशुयैं होर दूँ भाऊआं जो मतलब जबदिये दे दूँ जागतां जो याकूबे कने तिसदे लोक्के भाऊये यूहन्ने जो दिख्या। सैह़ अपणे बुढ़े जबदिये सौगी किस्तिया पर अपणे जाल़ां जो ठीक करा दे थे; तिन्हीं तिन्हां जो भी सद्देया।

²²सैह़ भी तिसी बग्त किस्तिया कने अपणे बुढ़े जो छड्डी नैं यीशुये पचांह़ चली पै।

²³यीशु सारे गलील प्रदेसे च घूमदा होएया तिन्हां दे आराधनालयां[1] च सिक्षा दिंदा, कने परमात्मे दे राज्जे दा सुसमाचार प्रचार करदा, कने लोकां दी हर किस्मां दियां बमारियां कने कमजोरियां जो दूर करदा रेह्आ।

²⁴कने सारे सीरिया प्रदेसे च तिसदा नां फैलदा गेआ; कने लोक सारे बमारां जो, जेह्ड़े कई किस्मां दियां बमारियां कने दुखां च जकड़ुयो थे, कने जिन्हां च दुष्टआत्मां थियां, कने मिर्गी आल़ेआं कने अधरंगे दे रोगियां जो तिस अल्ल लेई आये कने तिन्हीं तिन्हां जो खरा कित्ता।

²⁵कने गलील कने यहूदिया प्रदेस ते, दिकापुलिस कने यरूशलेम सैहरे ते, कने यरदन नदिया दे पारे ते भीड़ा दी भीड़ तिसदे पचांह़ चली पेई।