Read Kangri मत्ती 7 Bible Online

मत्ती 7 - Kangri bible

मत्ती 7

¹“भिरी यीशु ग्लाणा लग्गा, कुसी पर दोस मत लग्गा, कि तुहां पर भी दोस नीं लग्गैं।

²क्जोकि जिंआं तुहां दोस लगांदे हन, तिंआं ई परमात्मा तुहां पर भी दोस लगांगा। कने जिंआं बर्ताब तुहां दूयेयां नैं करदे हन, तिंआं ई परमात्मा तुहां नैं भी करगा।

³“तू क्जो अपणे भाऊये दी अखीं दे कखे जो दिक्खदा ऐ, कने तिज्जो अपणिया अखीं दा लट्ठा नीं दुस्सदा?

⁴जाह़लू तेरिया ई अखीं च लट्ठा ऐ, तां तू अपणे भाऊये नैं किंआं ग्लाई सकदा ऐ, कि ‘ऊरेया मैं तेरिया अखीं ते कखे जो कड्डी दिंदा?’

⁵हे पाखंडी, पैहल्लैं अपणिया अखीं ते लट्ठे कड्डी लै, तां भिरी तू अपणे भाऊये दी अखीं दा कख खरे कित्ते दिक्खी नैं कड्डी सकगा।

⁶“पवित्र चीज्ज कुत्तेआं जो मत देआ, कने अपणे मोती सूरां गांह मत पा, इआं ना होयैं कि सैह़ तिन्हां जो पैरां थल्लैं देई दैंन कने मुड़ी नैं तुहां जो चिरी-फाड़ी दैंन।

⁷“परमात्मे ते मंगा, तां तुहां जो दित्ता जांगा। परमात्मे जो तोपगे, तां तुहां जो मिलगा। दरवाजे ठोरगे, तां तुहां तांई खोलेया जांगा।

⁸क्जोकि जेह्ड़ा कोई मंगदा ऐ, तिसियो मिलदा ऐ, कने जेह्ड़ा तोपदा ऐ, सैह़ पांदा ऐ, कने जेह्ड़ा दरवाजे ठोरदा ऐ, तिस तांई खोलेया जांगा।

⁹“तुहां च कोई भी ऐदेया माणु नीं ऐ, कि तिसदा जागत तिसते रोटी मंगे, तां सैह़ तिसियो पत्थर दैं।

¹⁰कने मच्छी मंगे तां सर्प दैं।

¹¹कने जाह़लू तुहां बुरे होई नैं अपणे बच्चेयां जो खरियां चीज्जां दैणा जाणदे हन, तां तुहां दा सुअर्गीय पिता भी अपणे मंगणे आल़ेआं जो खरियां चीज्जां क्जो नीं दिंगा?

¹²इसा बज़ाह ते जेह्ड़ा कुच्छ तुहां चांह़दे हन, कि माणु तुहां सौगी करन, तुहां भी तिन्हां सौगी तिंआं ई करा। क्जोकि मूसा दिया व्यबस्था कने भविष्यवक्ता दिया सिक्षा दा ऐई मतलब ऐ।

¹³“तुहां परमात्मे दे राज्जे च संगड़े दरवाजे ते ई दाखल होई सकदे हन, क्जोकि चौड़ा ऐ सैह़ दरवाजा कने सौखा ऐ सैह़ रस्ता जेह्ड़ा बरबादिया जो पज्जांदा ऐ; कने मते भरी लोक हन जेह्ड़े तिस च दाखल हुंदे हन।

¹⁴क्जोकि संगड़ा ऐ सैह़ दरवाजा कने औखा ऐ सैह़ रस्ता जेह्ड़ा सदा दी ज़िन्दगिया जो पज्जांदा ऐ। कने थोड़े लोक हन जेह्ड़े इस च दाखल हुंदे हन।

¹⁵“झूठे भविष्यवक्ता ते चौकन्ने रेह्आ, जेह्ड़े भेड्डां दे भेसे च ओंदे हन, अपर असल च सैह़ चीरणे आल़े भेड़िये हन।

¹⁶तिन्हां दे कम्मां ते तुहां तिन्हां जो पणछैणी लैंगे। क्या माणु झाड़ियां ते अंगूर कने कन्डे आल़े झुड़ेयां ते धूड़े तोड़ी सकदे हन?

¹⁷इआं ई हर इक्क खरा रूख खरा फल़ दिंदा ऐ कने नकम्मा रूख बुरा फल़ दिंदा ऐ।

¹⁸खरा रूख बुरा फल़ नीं देई सकदा, कने ना नकम्मा रूख खरा फल़ देई सकदा ऐ।

¹⁹जेह्ड़ा-जेह्ड़ा रूख खरा फल़ नीं दिंदा, सैह़ बड्डेया कने अग्गी च पाणा ऐ, कने तिंआं ई झूठे भविष्यवक्तां नैं भी होणा ऐ।

²⁰कने इआं ई तिन्हां दे कम्मां ते तुहां तिन्हां जो पणछैणी लैंगे।

²¹“जेह्ड़ा मिन्जो नैं, ‘हे प्रभु, हे प्रभु’ ग्लांदा ऐ, तिन्हां च सारे ई सुअर्गे दे राज्जे च दाखल नीं होणे हन, अपर सैई जेह्ड़ा मेरे सुअर्गीय पिता दी इच्छा पर चलदा ऐ।

²²कने मते लोक न्याय दे दिन मिन्जो नैं ग्लांगे, ‘हे प्रभु हे प्रभु, क्या अहां तेरे नांऐ ते भविष्यवाणी नीं कित्ती, कने तेरे नांऐ ते दुष्टआत्मां जो नीं कड्डेया, कने तेरे नांऐ ते मते चमत्कार नीं कित्ते?’

²³ताह़लू मैं तिन्हां नैं खुली नैं ग्लाई दिंगा, ‘मैं तुहां जो कदी नीं जाणेया। हे बुरे कम्मां करणे आल़ेयो, मेरे बक्खे ते चली जा।’

²⁴“इसतांई जेह्ड़ा कोई मेरियां एह़ गल्लां सुणी नैं तिन्हां जो मनदा ऐ सैह़ तिस अक्लमंद माणुये साइआं हुंगा जिन्हीं अपणा घर पत्थरे दिया नीआं पर बणाया।

²⁵कने अम्बर बरैया, कने पाणी आया, कने तफान चलेया, कने तिस घरे नैं टकराया भिरी भी सैह़ नीं टैत्था, क्जोकि तिसदियां नीआं पत्थरे पर पाईयां थियां।

²⁶अपर जेह्ड़ा कोई मेरियां एह़ गल्लां सुणदा ऐ कने तिन्हां पर नीं चलदा, सैह़ तिस मूर्ख माणुये साइआं हुंगा जिन्हीं अपणा घर रेता पर बणाया।

²⁷कने अम्बर बरैया, कने पाणी आया कने तफान चलेया, कने तिस घरे नैं टकराया कने सैह़ टेई नैं सत्यानाश होई गेआ।”

²⁸जाह़लू यीशु एह़ गल्लां ग्लाई बैठा, तां इआं होएया कि भीड़ तिसदिया सिक्षा ते हरान होई।

²⁹क्जोकि सैह़ तिन्हां दे सास्त्री माणुआं साइआं नीं अपर अधिकारिये साइआं तिन्हां जो सिक्षा दिंदा था।