Read Kangri मत्ती 9 Bible Online

मत्ती 9 - Kangri bible

मत्ती 9

¹भिरी यीशु किस्तिया पर चढ़ी नैं पारले पास्सेयो चली गेआ, कने अपणे सैहरे च आया।

²कने दिक्खा, कुच्छ लोक अधरंगे दे इक्की रोगिये जो मंजोल़ूये पर चुक्की नैं तिस अल्ल लेई आये। यीशुयैं तिन्हां दा बसुआस दिक्खी नैं तिस अधरंगे दे रोगिये नैं ग्लाया, “हे जागत, हौंसला रख। तेरे पाप माफ होये।”

³इसा गल्ला पर कई सास्त्री माणु सोचणा लग्गे, “एह़ तां परमात्मे दी निंदा करदा ऐ।”

⁴यीशुयैं तिन्हां दे मने दियां गल्लां जाणी नैं ग्लाया, “तुहां लोक अपणे-अपणे मने च बुरा बचार क्जो करा दे हन?

⁵सौखा क्या ऐ, एह़ ग्लाणा, ‘तेरे पाप माफ होये,’ या एह़ ग्लाणा ‘उठ कने चल फिर।’

⁶अपर इसतांई कि तुहां जाणी लेआ कि मैं माणुये दा पुत्तर जिसियो धरतिया पर पाप माफ करणे दा हक्क ऐ।” यीशु अधरंगे दे रोगिये नैं ग्लाणा लग्गा, “उठ, अपणे मंजोल़ूये चुक, कने अपणे घरे जो चली जा।”

⁷सैह़ उठी नैं अपणे घरेयो चली गेआ।

⁸लोक एह़ सब दिक्खी नैं हरान होई गै, कने परमात्मे दी महिमा करणा लग्गे जिन्हीं माणुआं जो ऐदेया हक्क दित्या ऐ।

⁹तित्थु ते गांह जाई नैं यीशुयैं मत्ती नांऐ दे इक्की माणुये जो चुंगी लैणे दिया चौकिआ पर बैठेयो दिख्या, कने तिस नैं ग्लाणा लग्गा, “मिन्जो पचांह़ चली पौ।” सैह़ उठी नैं यीशुये पचांह़ चली पेआ।

¹⁰जाह़लू यीशु लेविये दे घरैं खाणा-खाणा बैठा, तां मते भरी चुंगी लैणे आल़े कने पापी आई नैं यीशु कने तिसदे चेलेयां सौगी खाणा खाणे तांई बैठे।

¹¹एह़ दिक्खी नैं फरीसी माणुआं तिसदे चेलेयां नैं ग्लाया, “तुहां दा गुरू चुंगी लैणे आल़ेआं कने पापियां सौगी क्जो खांदा ऐ?”

¹²एह़ सुणी करी यीशु तिन्हां नैं ग्लाणा लग्गा, “बैद भले चंगेया तांई नीं अपर बमारां तांई जरूरी हुंदे हन।

¹³इसतांई तुहां जाई नैं इसदा मतलब सीखी लेआ। मैं बलिदान नीं अपर दया चांह़दा। क्जोकि मैं धर्मियां जो नीं, अपर पापियां जो सदणा आया ऐ तांजे पापी उद्धार पान।”

¹⁴ताह़लू यूहन्ने दे चेलेयां तिस अल्ल आई नैं ग्लाया, “क्या बज़ाह ऐ कि अहां कने फरीसी माणु इतणा ब्रत करदे हन, अपर तेरे चेले ब्रत नीं करदे?”

¹⁵यीशु तिन्हां नैं ग्लाणा लग्गा, “क्या बराती, जाह़लू तिकर लाड़ा तिन्हां सौगी ऐ, दुखी होई सकदे हन? अपर सैह़ दिन ओंगे जाह़लू लाड़ा तिन्हां ते लग्ग होई जांगा, तिस बग्त सैह़ ब्रत करगे।

¹⁶नौये कपड़े दा कितरू छेकी करी कोई भी पराणे कपड़े च कितरू नीं लगांदा, क्जोकि सैह़ कितरू तिस कपड़े ते सब कुच्छ खींजी लैंदा ऐ, कने सैह़ होर जादा छकूई जांदा ऐ।

¹⁷कने कोई भी माणु ताजा अंगूरा दा रस पराणियां पत्तल़ियां सराईयां च नीं भरदे हन, क्जोकि देहया करणे ते सराईयां फटी जांदियां हन, कने अंगूरा दा रस निकल़ी जांदा ऐ कने सराईयां बरबाद होई जादियां हन, अपर ताजा अंगूरा दा रस नौईआं मोटियां सराईयां च पांदे हन, कने सैह़ दोयो बची रैंह्दे हन ऐ।”

¹⁸यीशु तिन्हां नैं एह़ गल्लां ग्ला दा ई था, कि दिक्खा, इक्की आराधनालय[2] दे अधिकारियैं आई नैं तिसियो प्रणांम कित्ता कने ग्लाया, “मेरी कुड़ी हुण ई मरी ऐ, अपर चली नैं अपणा हत्थ तिसा पर रख, तांजे सैह़ जिन्दी होई जां।”

¹⁹यीशु उठी नैं अपणे चेलेयां जो लेई करी तिस सौगी चली पेआ।

²⁰कने दिक्खा, इक्की जणासा जो बारांह साल ते खून चलणे दी बमारी थी, तिन्नै पचांह़ ते आई करी तिसदे कपड़े दे पल्ले जो छुई लेआ।

²¹क्जोकि सैह़ अपणे मने च ग्लांदी थी “जे मैं तिसदे कपड़े जो ई छुई लैंगी तां खरी होई जांगी।”

²²यीशुयैं मुड़ी नैं तिसायो दिख्या कने ग्लाया, “कुड़िये हौंसला रख; तेरे बसुआसैं तिज्जो खरा कित्ता ऐ।” सैह़ जणांस तिसी बग्त खरी होई गेई।

²³जाह़लू यीशु तिस अधिकारिये दे घरैं पुज्जा, कने बंसरी बजाणे आल़ेआं कने भीड़ा जो रोल़ा पांदे दिख्या,

²⁴ताह़लू ग्लाया, “हटी जा कुड़ी मरियो नीं, अपर सुतियो ऐ।” इसा गल्ला सुणी नैं सैह़ यीशु पर हंसणा लग्गे।

²⁵अपर जाह़लू भीड़ कड्डी दित्ती, तां तिन्हीं अंदर जाई नैं कुड़िया दा हत्थ पकड़ेया, कने सैह़ जिन्दी होई गेई।

²⁶कने इसा गल्ला दी खबर तिस सारे देसे च फैली गेई।

²⁷जाह़लू यीशु तित्थु ते गांह गेआ, तां दो अन्ने तिसदे पचांह़ जोरे नैं एह़ ग्लांदे चल्ले, “हे दाऊदे दे वंश अहां पर दया कर।”

²⁸जाह़लू सैह़ घरैं पुज्जा, तां सैह़ अन्ने तिस अल्ल आये, कने यीशुयैं तिन्हां नैं ग्लाया, “क्या तुहां जो बसुआस ऐ कि मैं तुहां जो खरा करी सकदा ऐ?” तिन्हां तिस नैं ग्लाया, “हाँ प्रभु अहां बसुआस करदे हन कि तुहां अहां जो खरे करी सकदे हन।”

²⁹ताह़लू तिन्हीं तिन्हां दियां अखीं छुई नैं ग्लाया, “तुहां दे बसुआसे मताबक तुहां तांई होयैं।”

³⁰कने सैह़ तिसी बग्त दिक्खणा लग्गी पै। यीशुयैं तिन्हां जो चतौणी देई नैं ग्लाया, “चौकन्ने रेह्आ कि जेह्ड़ी भलाई मैं तुहां नैं कित्ती कुसी नैं मत दस्सदे।”

³¹अपर तिन्हां तित्थु ते निकल़ी नैं सारे देसे च तिसदा नां फैलाई दित्ता।

³²जाह़लू सैह़ बाहर जा दे थे, ताह़लू कुच्छ लोक इक्की जफ्फे जो जिस च दुष्टआत्मा थी, यीशु अल्ल लेई आये;

³³कने जाह़लू यीशुयैं दुष्टआत्मा बाहर कड्डी दित्ती, तां जफ्फा ग्लाणा लग्गी पेआ। एह़ सब दिक्खी करी भीड़ा दे लोक हरान होई नैं ग्लाणा लग्गे, “इस्राएल देसे च ऐदेया कदी भी नीं दिख्या।”

³⁴अपर फरीसी माणुआं ग्लाया, “एह़ तां दुष्टआत्मां दे प्रधान बालजबूल सैताने दी मदत लेई नैं दुष्टआत्मां जो कड्डदा ऐ।”

³⁵यीशु गलील प्रदेसे दे सारे सैहरां कने ग्रां च घूमदा रेह्आ कने तिन्हां दे आराधनालयां च सिक्षा दिंदा, कने परमात्मे दे राज्जे दा सुसमाचार प्रचार करदा, कने हर किस्मां दियां बमारियां कने कमजोरियां जो दूर करदा रेह्आ।

³⁶जाह़लू तिन्हीं भीड़ा जो दिख्या तां तिसियो लोकां पर तरस आया, क्जोकि सैह़ तिन्हां भेड्डां साइआं थे जिन्हां दा कोई रखवाल़ा नीं होयैं, सैह़ बेचैन कने भटकेयो थे।

³⁷ताह़लू तिन्हीं अपणे चेलेयां नैं ग्लाया, “मते खेत पकी गियो हन, अपर मजदूर घट हन।

³⁸इसतांई खेते दे मालके नैं विणती करा कि सैह़ अपणे खेतां च कम्म करणे तांई होर मजदूर घल्ली दैं।”