Read Kangri मरकुस 10 Bible Online

मरकुस 10 - Kangri bible

मरकुस 10

¹भिरी यीशु कने तिसदे चेले कफरनहूम सैहरे जो छड्डी नैं यहूदिया प्रदेसे दे लाक्के ते होई नैं यरदन नदिया दे पार आये। कने भीड़ तिस अल्ल भिरी कठ्ठरोई गेई, कने यीशु भिरी अपणे तरीके मताबक तिन्हां जो सिक्षा दैणा लग्गा।

²ताह़लू कुच्छ फरीसी माणु तिस अल्ल आई नैं तिसियो परखणे तांई तिसते पुछणा लग्गे, “क्या एह़ ठीक ऐ कि मरद अपणिया लाड़िया जो छड्डी दे?”

³यीशुयैं तिन्हां जो जवाब दित्ता, “मूसैं व्यबस्था च तुहां जो क्या हुक्म दित्या ऐ?”

⁴तिन्हां फरीसी माणुआं ग्लाया, “मूसैं व्यबस्था च तलाक नामा लिखणे कने छड्डणे दा हुक्म दित्या ऐ।”

⁵यीशुयैं तिन्हां फरीसी माणुआं जो ग्लाया, “तुहां दे मन कठोर होणे दिया बज़ाह ते तिन्हीं तुहां तांई एह़ हुक्म पवित्रशास्त्रे च लिख्या,

⁶अपर सृष्टिया दे सुरू ते ई, परमात्मैं मरद कने जणांस करी नैं तिन्हां जो बणाया ऐ।

⁷इसा बज़ाह ते ई मरद अपणे माँऊ कने बुढ़े ते लग्ग होई नैं अपणिया लाड़िया सौगी मिल्ली नैं रैंह्गा,

⁸कने सैह़ दोयो इक्क तन हुंगे, क्जोकि तिन्हां च दो नीं अपर इक्क जान्न ऐ।

⁹इसतांई जिसियो परमात्मैं जोड़या ऐ, सैह़ लाड़ा-लाड़ी अप्पु च लग्ग ना होन।”

¹⁰घर बापस आई नैं चेलेयां इसा सिक्षा दे बारे च यीशु ते भिरी पुछया।

¹¹तिन्हीं तिन्हां चेलेयां नैं ग्लाया, “जेह्ड़ा कोई अपणिया लाड़िया जो छड्डी नैं दूईआ जो ब्याई लै तां सैह़ पैहल्लिया दे बरोध च ब्यभिचार करदा ऐ;

¹²कने जे लाड़ी अपणे लाड़े जो छड्डी नैं दूये नैं ब्याह करैं तां सैह़ भी ब्यभिचार करदी ऐ।”

¹³भिरी लोक जागतां जो यीशु अल्ल लेयोणा लग्गे, तांजे यीशु तिन्हां दे सिरे पर हत्थ रखी नैं आशीर्वाद दैं, अपर चेलेयां तिन्हां जो झिड़केया।

¹⁴यीशुयैं एह़ दिक्खी नैं कने गुस्सा होई करी तिन्हां नैं ग्लाया, “जागतां जो मिन्जो अल्ल औणां देआ, कने इन्हां जो मत रोका, क्जोकि परमात्मे दा राज्ज ऐदेयां दा ऐ।

¹⁵मैं तुहां नैं सच्च ग्लांदा कि जेह्ड़ा कोई परमात्मे दे राज्जे जो इन्हां निक्के जागते साइआं मन्नी नीं लैं, ताह़लू सैह़ सुअर्गे दे राज्जे च कदी नीं पुज्जी पांगा।

¹⁶कने यीशुयैं जागतां जो मूड़ै लेआ, कने तिन्हां दे सिरे पर हत्थ रखी नैं तिन्हां जो आशीर्वाद दित्ता।”

¹⁷जाह़लू यीशु भिरी अपणे चेलेयां सौगी रस्ते च जा दा था, तां इक्क माणु तिस अल्ल दौड़ी नैं आया, कने तिसदे गांह गोड्डे टिकाई नैं तिसते पुछया, “हे भले गुरू, सदा दी ज़िन्दगिया दा हक्कदार होणे तांई मैं क्या करैं?”

¹⁸यीशुयैं तिस नैं ग्लाया, “तू मिन्जो भला क्जो ग्लांदा ऐ? परमात्मे जो छड्डी नैं कोई भला नीं ऐ।

¹⁹तू जाणदा ऐ, कि मूसा दिया व्यबस्था च क्या लिख्या ऐ, ‘हत्या मत करणा, ब्यभिचार मत करणा, कने चोरी मत करणा, झूठी गवाही ना दैणा, अपणे फायदे तांई कुसी जो धोखा ना दैणा, कने अपणे बुढ़े दा कने अपणिया माँऊ दा आदर करणा।’ ”

²⁰तिन्हीं तिसियो ग्लाया, “हे गुरू, इन्हां हुक्मां जो मैं बचपणे ते ई मनदा आया ऐ।”

²¹यीशुयैं तिसियो दिक्खी करी तिस नैं प्यार कित्ता, कने ग्लाया, “तिज्जो च इक्की गल्ला दी कमी ऐ। जा, जेह्ड़ा कुच्छ तिज्जो अल्ल ऐ तिसियो बेची नैं गरीबां जो देई दे, कने तिज्जो सुअर्गे च सच्ची धन-दौलत मिलगी, कने आई नैं मिन्जो पचांह़ चली पौ।”

²²इसा गल्ला सुणी नैं तिसदा मुँ उतरी गेआ, कने दुखी होई नैं चली गेआ, क्जोकि सैह़ बड़ा अमीर था।

²³यीशु चौंन्नी पास्से दिक्खी नैं अपणे चेलेयां नैं ग्लाणा लग्गा, “अमीरां दा परमात्मे दे राज्जे च पुज्जणा बड़ा भरी औखा ऐ।”

²⁴चेले तिसदियां गल्लां सुणी नैं बड़े हरान होये। तां यीशु भिरी तिन्हां नैं ग्लाणा लग्गा, “हे जागतो, जेह्ड़े धन-दौलता पर बसुआस रखदे हन, तिन्हां तांई परमात्मे दे राज्जे च पुज्जणा बड़ा भरी औखा ऐ।

²⁵जिंआं ऊँटे दा सूईया दे नक्के ते निकल़णा औखा ऐ, तिंआं ई अमीर माणुये दा परमात्मे दे राज्जे दा प्रवेश करणा बड़ा औखा ऐ।”

²⁶चेले बड़े ई हरान होई नैं अप्पु च ग्लाणा लग्गे, “तां भिरी कुसदा उद्धार होई सकदा ऐ?”

²⁷यीशु तिन्हां बक्खी दिक्खी नैं ग्लाणा लग्गा, “माणुआं तांई तां बड़ा औखा ऐ, अपर परमात्मे ते होई सकदा ऐ। क्जोकि परमात्मे तांई सब कुच्छ बड़ा सौखा ऐ।”

²⁸पतरस यीशुये नैं ग्लाणा लग्गा, कि “दिक्ख अहां तां सब कुच्छ छड्डी नैं तिज्जो पचांह़ चली पैयो हन।”

²⁹यीशुयैं ग्लाया, “मैं तुहां नैं सच्च ग्लांदा ऐ, कि जिन्हीं भी मिन्जो तांई कने सुसमाचारे तांई अपणा घरबार, भाऊ-बैहण, माँ-बुढ़ा, बाल-बच्चे, या जमीना जो छड्डेया ऐ,

³⁰तिसियो इसा ज़िन्दगिया च सौ गुणा इनाम मिलगा। जेह्ड़ा माणु घराबारां कने भाऊआं-बैहणा कने माँ कने बाल-बच्चेयां कने जमीना जो मुसीबतां सौगी पांगा, तिस माणुये जो परलोक च सदा दी ज़िन्दगी जरूर मिलणी ऐ।

³¹अपर जेह्ड़े इस संसारे च अपणे आप्पे जो म्हान समझदे हन, सैह़ परमात्मे दिया नजरा नीच हुंगे; कने जिसियो संसारे दे लोक नीच समझदे हन, सैह़ परमात्मे दिया नजरा च म्हान हुंगा।”

³²कने यीशु कने तिसदे चेले यरूशलेम सैहरे जो जांदे बग्त रस्ते च थे; कने यीशु तिन्हां दे गांह-गांह चलेया था; चेले हरान थे, कने जेह्ड़े तिसदे पचांह़-पचांह़ चलेयो थे सैह़ डरेयो थे। ताह़लू सैह़ भिरी तिन्हां बारांह चेलेयां जो लेई नैं तिन्हां नैं गल्लां ग्लाणा लग्गा, जेह्ड़ियां तिस पर बितणे आल़िआं थियां,

³³यीशुयैं ग्लाया, “दिक्खा अहां यरूशलेम सैहरे जो चलेयो हन, कने मैं माणु दा पुत्तर प्रधान याजकां कने सास्त्री माणुआं दे हुआलैं कित्ता जांगा, कने सैह़ मिन्जो मौत्ती दा दोसी बणाई दिंगे, कने होरनी जातिआं दे हुआले करी दिंगे।

³⁴सैह़ मेरा मजाक करगे, मिन्जो पर थुकगे, कने कोड़े मारगे कने मिन्जो जान्नी ते मारी दिंगे, कने त्रीये दिनैं मैं मरेयां ते भिरी जिन्दा होई जांगा।”

³⁵ताह़लू जबदिये दे पुत्तर याकूबे कने तिसदे लोक्के भाऊ यूहन्ने यीशु अल्ल आई नैं ग्लाया, “हे गुरू, अहां चांह़दे हन कि जेह्ड़ा कुच्छ अहां तिज्जो ते मंगगे, सैह़ तू अहां तांई करैं।”

³⁶यीशु तिन्हां ते पुछया, “तुहां मिन्जो ते क्या चांह़दे हन कि मैं तुहां तांई करैं?”

³⁷तिन्हां यीशुये जो ग्लाया, “जाह़लू तुहां महिमा दे राज्जे च ओंगे, ताह़लू अहां च इक्क तुहां दे सज्जे बक्खे कने दूआ तुहां दे खब्बे बक्खे बैठैं।”

³⁸यीशुयैं तिन्हां नैं ग्लाया, “तुहां नीं जाणदे कि तुहां क्या मंगा दे हन? जेह्ड़ा दुख मैं झेलणे आल़ा ऐ, क्या सैह़ तुहां झेली सकदे हन? कने जेह्ड़ा मौत्ती दा बपतिस्मा मैं लैणे आल़ा ऐ क्या तुहां लेई सकदे हन?”

³⁹चेलेयां यीशुये नैं ग्लाया, हाँ “अहां लेई सकदे हन।” भिरी यीशु तिन्हां नैं ग्लाणा लग्गा, “जेह्ड़ा दुख मैं झेलणे आल़ा ऐ, तुहां झेली सकदे हन, कने जेह्ड़ा मौत्त दा बपतिस्मा मिन्जो मिलणे आल़ा ऐ, तिसियो तुहां लेई सकदे हन।

⁴⁰अपर कुसी जो भी अपणे सज्जे कने खब्बे बठाणा मेरा कम्म नीं ऐ, एह़ जगाह तिन्हां तांई ऐ, जिन्हां जो इसा जगाह तांई त्यार कित्या ऐ।”

⁴¹एह़ सुणी नैं दसों चेले याकूबे कने तिसदे लोक्के भाऊ यूहन्ने पर गुस्सा होणा लग्गे।

⁴²ताह़लू यीशुयैं चेलेयां जो अप्पु अल्ल सद्दी नैं तिन्हां जो ग्लाया, “तुहां जाणदे हन कि जेह्ड़े लोक इस संसारे च हाकम समझे जांदे हन, सैह़ तिन्हां पर अपणी ताकत दस्सी करी राज्ज करदे हन। कने तिन्हां च जेह्ड़े बड्डे हन, सैह़ तिन्हां पर हक्क जमांदे हन।

⁴³अपर तुहां च ऐदेया नीं होणा चाइदा। तुहां च जेह्ड़ा कोई दूये ते बड्डा होणा चांह़दा ऐ, सैह़ तुहां दा दास बणैं।

⁴⁴कने जेह्ड़ा कोई तुहां च प्रधान होणा चांह़दा, सैह़ सारेयां दा दास बणैं।

⁴⁵क्जोकि मैं माणुये दा पुत्तर सेवा करवाणे तांई नीं, अपर इसतांई आया कि सेवा करैं, कने मतेआं जो छड्डाणे तांई अपणे प्राण दैं।”

⁴⁶यीशु कने तिसदे चेले यरीहो सैहरे च आये। जाह़लू सैह़ कने तिसदे चेले रस्ते च थे, तां इक्क बड़ी बड्डी भीड़ तिन्हां दे पचांह़-पचांह़ ओआ दी थी। ताह़लू तिमाई दा जागत बरतिमाई जेह्ड़ा इक्क अन्ना भिखारी था, सड़का कंडे बैठेया था।

⁴⁷जाह़लू तिन्हीं लोकां ते सुणेया कि यीशु नासरी जा दे हन, तां सैह़ जोरे नैं डड्डी-डड्डी करी ग्लाणा लग्गा, “हे यीशु राजा दाऊदे दे वंश मिन्जो पर दया कर।”

⁴⁸तिन्हां च कुच्छ लोक तिसियो झिड़कणा लग्गे, कि चुप रैह्, अपर सैह़ होर भी जोरे नैं डड्डणा लग्गा, “हे यीशु राजा दाऊदे दे वंश मिन्जो पर दया कर।”

⁴⁹ताह़लू यीशु एह़ सुणी करी रुकी गेआ, कने लोकां जो ग्लाणा लग्गा, “इसियो मिन्जो अल्ल लेई ओआ।” कने लोकां तिस अन्ने जो सद्दी नैं ग्लाया, “हौंसला रख। उठ, यीशु तिज्जो सद्दा दा ऐ।”

⁵⁰तिसी बग्त तिन्हीं अपणी चादरा दी प्ल़ोड परांह सट्टी नैं झटपट उठेया, कने यीशु अल्ल आई गेआ।

⁵¹इसा गल्ला पर यीशुयैं तिसियो पुछया, “तू क्या चांह़दा ऐ कि मैं तिज्जो तांई करैं?” अन्ने तिसियो ग्लाया, “हे गुरू जी, मैं चांह़दा ऐ कि मैं दिक्खणा लग्गी पोयैं।”

⁵²यीशुयैं तिसियो ग्लाया, “घरेयो चली जा, तेरे बसुआसैं तिज्जो खरा कित्ता ऐ जेह्ड़ा तू मिन्जो पर करदा ऐ।” सैह़ तिसी बग्त दिक्खणा लग्गी पेआ, कने तिसा भीड़ा सौगी तिस पचांह़ चली पेआ।