Read Kangri मरकुस 11 Bible Online

मरकुस 11 - Kangri bible

मरकुस 11

¹जाह़लू यीशु कने तिसदे चेले यरूशलेम सैहरे होई नैं जैतून प्हाड़े पर बैतफगे कने बैतनिय्याह ग्रांऐ दे नेड़े आये, तां तिन्हीं अपणे चेलेयां च दूँ जो एह़ ग्लाई नैं घल्लेया,

²“सामणै आल़े ग्रांऐ च जा, कने तिस ग्रांऐ पुजदेयां ई इक्क गधिया दा बच्चा, जिस पर कदी कोई भी नीं बैठेया ऐ, बन्नेया होएया तुहां जो मिलगा। तिसियो खोली नैं लेई ओआ।

³जे तुहां ते कोई पुछगा, कि ‘इसियो खोली करी कुत्थियो लेई चलेयो?’ तां ग्लाणा, ‘प्रभु जो इसदी जरूरत ऐ, कने सैह़ तिसी बग्त तिसियो ऐत्थु घल्ली दिंगा।’ ”

⁴तिन्हां जाई नैं गधिया दे बच्चे जो घरे बाहर दरवाजे दे बक्खे रस्ते च बन्नेया दिख्या, कने खोलणा लग्गे।

⁵तिस ग्रांऐ दे लोकां पुछया, एह़ क्या करणा लाया? “गधिया दे बच्चे जो खोली करी कुत्थियो लेई चलेयो हन?”

⁶जिंआं यीशुयैं ग्लाया था, तिंआं ई चेलेयां तिन्हां लोकां नैं ग्लाई दित्ता; ताह़लू लोकां तिन्हां जो गधिया दे बच्चे जो लेई जाणा दित्ता।

⁷तिन्हां चेलेयां गधिया दे बच्चे जो यीशु अल्ल अंणी करी तिस पर कपड़े पाई दित्ते कने यीशु तिस पर बेई गेआ।

⁸ताह़लू मतेआं लोकां अपणियां चादरां कने परने रस्ते च बछाये कने कुच्छ लोकां तां खेतां ते खजूरे दी डाल़िआं बड्डी-बड्डी नैं रस्ते च बछाई दित्तियां।

⁹जेह्ड़े-जेह्ड़े लोक यीशुये दे गांह-गांह कने पचांह़-पचांह़ चलेयो थे, सैह़ जोरे नैं डड्डी-डड्डी करी ग्लांदे थे, “होशाना[1]।” धन ऐ सैह़ जेह्ड़ा प्रभु दे नांऐ ते ओंदा ऐ।

¹⁰अहां दे पिता दाऊदे दा राज्ज जेह्ड़ा ओआ दा ऐ; सैह़ धन ऐ। “परमात्मे दी स्तुति करा जेह्ड़ा सुअर्गे च ऐ।”

¹¹यीशु यरूशलेम सैहरे च पुज्जी नैं मंदरे च आया, कने चौंन्नी पास्से दियां सारियां चीज्जां जो दिख्या। कने बारांह चेलेयां सौगी बैतनिय्याह ग्रांऐ जो गेआ, क्जोकि संझ होई गियो थी।

¹²दूये दिने जाह़लू यीशु कने तिसदे चेले यरूशलेम सैहरे ते बैतनिय्याह ग्रांऐ जो जा दे थे, तां रस्ते च चलदे-चलदे यीशुये जो भुख लग्गी।

¹³सैह़ दूरे ते धूड़े दे इक्की सैले रूखे जो दिक्खी नैं बक्खे गेआ कि तिस च कुच्छ मिल्लैं अपर पत्तरां छड्डी होर कुच्छ नीं मिल्लेया, क्जोकि फल़ां दा मौसम नीं था।

¹⁴इसा गल्ला पर यीशुयैं तिस रूखे जो ग्लाया, “कि अज्जे ते तेरा फल़ कोई नीं खाई सकगा।” कने तिसदे चेले सुणा दे थे।

¹⁵भिरी यीशु कने तिसदे चेले बैतनिय्याह ग्रांऐ ते वापस यरूशलेम सैहरे च आये, कने सैह़ मंदरे च गेआ; कने तित्थु जेह्ड़े पैसेयां दा लैण-दैण करा दे थे तिन्हां जो बाहर कड्डणा लग्गा, कने अड़तिआं दे तख्ते कने कबूतर बेचणे आल़ेआं दियां चौकिआं पलटी दित्तियां।

¹⁶कने यीशुयैं कुसी जो भी बेचणे आल़ा समान मंदरे च लेई जाणा नीं दित्ता।

¹⁷कने सिक्षा देई नैं तिन्हां जो ग्लाया, “क्या पवित्रशास्त्रे च एह़ नीं लिख्या ऐ, ‘कि मेरा मंदर सारियां जातिआं तांई प्रार्थना दा मंदर हुंगा?’ अपर तुहां तां इसियो डाकुआं दा अड्डा बणाई दित्या ऐ।”

¹⁸एह़ सुणी नैं प्रधान याजक कने सास्त्री माणु तिसियो नास करणे दा मौका तोपणा लग्गे, क्जोकि सैह़ तिसते डरदे थे, इसतांई कि सारे माणु तिसदिया सिक्षा ते हरान हुंदे थे।

¹⁹संझ हुंदे ई यीशु कने तिसदे चेले सैहरे दे बाहर चली जांदे थे।

²⁰दूये दिने जाह़लू यीशु कने तिसदे चेले यरूशलेम सैहरे ते बैतनिय्याह ग्रांऐ जो बापस तिसी रस्ते च जा दे थे जिस च सैह़ आएयो थे, ताह़लू तिन्हां दी नजर तिस धूड़े दे रूखे पर पेई, जिसियो तिन्हीं श्राप दित्या था, सैह़ रूख जड़ा तिकर सुकी गेआ था।

²¹जाह़लू पतरसे जो सैह़ गल्ल याद आई तिन्हीं यीशुये जो ग्लाया, “हे गुरू, दिक्ख। एह़ धूड़े दा रूख जिसियो तुहां श्राप दित्या था सैह़ रूख जड़ा तिकर सुकी गेआ ऐ।”

²²यीशुयैं तिस जो जवाब दित्ता, “परमात्मे पर बसुआस रख।

²³मैं तुहां नैं सच्च ग्लांदा ऐ, कि जेह्ड़ा कोई इस प्हाड़े जो ग्लांगा, ‘तू ऐत्थु ते पटौई नैं समुंदरे च जाई पो,’ कने अपणे मने च बैम नीं करैं अपर बसुआस रखैं कि जेह्ड़ा ग्लांदा ऐ सैह़ होई जांगा, तां तिस तांई सैई हुंगा।

²⁴इसतांई मैं तुहां नैं ग्लांदा कि जेह्ड़ा कुच्छ तुहां प्रार्थना करी नैं मंगगे, तां बसुआस करा कि तुहां जो मिलिया, कने तुहां तांई होई जांगा।

²⁵कने यीशुयैं एह़ भी ग्लाया, कि प्रार्थना करदे बग्त जे तुहां दे मने च कुसी तांई कुच्छ शकायत ऐ; तां माफ करी देआ तांजे तुहां दा पिता जेह्ड़ा सुअर्गे च ऐ, तुहां दे अपराध माफ करगा।

²⁶अपर जे तुहां माफ नीं करगे तां तुहां दा पिता भी जेह्ड़ा सुअर्गे च ऐ, तुहां दे अपराध माफ नीं करगा।”

²⁷यीशु कने तिसदे चेले बैतनिय्याह ग्रांऐ ते भिरी यरूशलेम सैहरे जो बापस आये, जाह़लू सैह़ मंदरे च घुमा दा था तां प्रधान याजक कने सास्त्री कने स्याणे माणु तिस अल्ल आई नैं पुछणा लग्गे,

²⁸“तू एह़ कम्म कुस हक्के नैं करदा ऐ? कने एह़ हक्क तिज्जो कुणी दित्या ऐ कि तू एह़ कम्म करैं?”

²⁹यीशुयैं तिन्हां जो ग्लाया, “मैं भी तुहां ते इक्क गल्ल पुछदा ऐ, जे तुहां मिन्जो जवाब दिंगे तां मैं तुहां जो दस्सगा कि एह़ कम्म कुस हक्के नैं करदा ऐ।

³⁰यूहन्ने दा बपतिस्मा क्या सुअर्गे दे पास्से ते था कि माणुआं दे पास्से ते था? मिन्जो जवाब देआ।”

³¹ताह़लू सैह़ अप्पु च सवाल जवाब करणा लग्गे, “कि जे अहां ग्लांगे, ‘सुअर्गे दे पास्से ते,’ तां इन्हीं ग्लाणा, ‘भिरी तुहां यूहन्ने पर बसुआस क्जो नीं कित्ता?’

³²जे अहां ग्लांगे, ‘कि माणुआं दे पास्से ते,’ तां लोकां गुस्से होई जाणा ऐ, क्जोकि सारे जाणदे हन कि यूहन्ना सच्च-बिच्च इक्क भविष्यवक्ता था।”

³³ताह़लू तिन्हां यीशुये जो जवाब दित्ता, “अहां नीं जाणदे।” यीशुयैं तिन्हां जो ग्लाया, “मैं भी तुहां जो नीं दस्सदा कि एह़ कम्म कुस हक्के नैं करदा ऐ।”