Read Kangri मरकुस 12 Bible Online

मरकुस 12 - Kangri bible

मरकुस 12

¹भिरी यीशु तिन्हां कुच्छ यहूदी नेतेयां सौगी उदारणां नैं गल्लां करणा लग्गा, “इक्की माणुयैं अंगूरा दा बाग लगाया, कने तिसदे चौंन्नी पास्सेयां बाड़ लगाया। कने रसे जो कठ्ठेरणे तांई जमीना च खड्डा खोदी नैं पत्थरे दी बड्डी उखली रखी, कने देखभाल करणे तांई टपरी बणाई, कने किसानां जो तिसदा ठेका देई नैं परदेस चली गेआ।

²भिरी फल़े दे मौसमे च तिन्हीं किसानां अल्ल इक्की दासे जो घल्लेया कि किसानां ते बागे दे फल़ां दा हिस्सा लैं।

³अपर तिन्हां किसानां तिस दासे जो पकड़ी नैं कुटेया कने खाली हत्थ बापस घल्ली दित्ता।

⁴तिन्हीं भिरी इक्क होर दास तिन्हां अल्ल घल्लेया; तिन्हां किसानां तिस दास दा सिर फाड़ी दित्ता, कने तिसदी बेज्जती कित्ती।

⁵भिरी तिन्हीं इक्क होर दासे जो घल्लेया; तिन्हां तिसियो मारी दित्ता। ताह़लू तिन्हीं होर मतेआं दासां जो घल्लेया; तिन्हां दासां च किसानां कुच्छ दासां जो कुटेया कने कुच्छ दासां जो मारी दित्ता।

⁶हुण इक्क ई रेई गेआ था, जेह्ड़ा तिसदा प्यारा पुत्तर था; आखर च तिन्हीं तिसियो भी तिन्हां अल्ल एह़ सोची नैं घल्लेया, ‘कि सैह़ मेरे जागते दा लैआज करगे।’

⁷अपर तिन्हां किसानां अप्पु च ग्लाया, ‘ऐई तां असली वारस ऐ; ओआ, जे अहां इसियो मारी दिये, तां एह़ सारी मलकीत अहां दी होई जागी।’

⁸कने तिन्हां तिसियो पकड़ी नैं मारी दित्ता, कने अंगूरा दे बागे दे बाहर सट्टी दित्ता।”

⁹तिन्हां यहूदी लोकां ते यीशुयैं पुछया, “हुण अंगूरा दे बागे दा मालक क्या करगा? सैह़ आई नैं तिन्हां किसानां जो मारी दिंगा, या अंगूरा दे बागे जो होरनी किसानां जो देई दिंगा।

¹⁰क्या तुहां पवित्रशास्त्रे च एह़ वचन नीं पढ़ेया: ‘जिस पत्थरे जो राजमिस्त्रियां नकम्मा समझी लेआ था, सैई कुणे दा सिरा होई गेआ,

¹¹एह़ प्रभु दे पास्से ते होएया, कने अहां दिया नजरा च बड़ा अनोखा ऐ’?”

¹²ताह़लू तिन्हां यहूदी नेतेयां यीशुये जो पकड़णा चाया; क्जोकि सैह़ समझी गियो थे, “कि तिन्हीं अहां दे खलाफ च एह़ उदारण ग्लाया।” अपर सैह़ लोकां ते डरे, कने तिसियो छड्डी नैं चली गै।

¹³ताह़लू यहूदी नेतेयां यीशुये जो गल्लां च फसाणे तांई हेरोदेस राजे दे कुच्छ समर्थक कने फरीसी माणु तिस अल्ल घल्ले।

¹⁴कने तिन्हां आई नैं यीशुये जो ग्लाया, “हे गुरू अहां जाणदे हन, कि तुहां सच्चे हन, कने कुण क्या सोचदा कने क्या ग्लांदा ऐ इसते तुहां जो कोई लैणां दैणा नीं ऐ; क्जोकि तू माणुआं दा मुँ दिक्खी नैं गल्लां नीं करदा, अपर परमात्मे दा रस्ता सच्चाईया नैं दस्सदा ऐ। तां क्या कैसरे जो कर दैणा ठीक ऐ कि नीं?

¹⁵अहां जो दैणा चाइदा, कि नीं दैणा चाइदा?” यीशुयैं तिन्हां दा कपट जाणी नैं तिन्हां जो ग्लाया, “मिन्जो क्जो परखा दे हन, इक्क चाँदी दा सिक्का मिन्जो अल्ल लेयोआ तांजे मैं तिसियो दिक्खैं।”

¹⁶सैह़ लेई आये, कने यीशुयैं तिन्हां जो ग्लाया, “एह़ छाप कने नां कुसदा ऐ?” तिन्हां ग्लाया, “राजा कैसरे दा।”

¹⁷यीशुयैं तिन्हां जो ग्लाया, “जेह्ड़ा कैसरे दा ऐ सैह़ कैसर जो देआ, कने जेह्ड़ा परमात्मे दा ऐ सैह़ परमात्मे जो देआ।” ताह़लू सैह़ तिस पर बड़े हरान होये।

¹⁸भिरी सदूकी माणुआं भी, जेह्ड़े ग्लांदे हन कि मरेयां दा जिन्दा होणा ऐ ई नीं, यीशु अल्ल आई नैं तिसते पुछणा लग्गे,

¹⁹“हे गुरू, मूसैं व्यबस्था च अहां तांई लिख्या ऐ कि जे कुसी दा भाऊ बिना औलादी मरी जां कने तिसदी लाड़ी रेई जां, तां तिसदा भाऊ तिसदिया लाड़िया नैं ब्याह करी लैं कने अपणे भाऊये तांई वारस पैदा करैं।

²⁰इक्क उदारण सुणा कि इक्की घरे च सत भाऊ थे। पैहल्ला भाऊ ब्याह करी नैं बिना औलादी मरी गेआ।

²¹ताह़लू दूँये भाऊयें तिसा जणासा नैं ब्याह करी लेआ कने बिना औलादी मरी गेआ; कने तिंआं ई त्रीयें भी कित्ता।

²²कने सतां ब्याह कित्ता कने औलाद नीं होई। सारेयां दे बाद सैह़ जणांस भी मरी गेई।

²³ताह़लू सैह़ जिन्दे होणे पर सैह़ तिन्हां च कुसदी लाड़ी हुंगी? क्जोकि सैह़ सतां दी लाड़ी रेई चुकियो थी।”

²⁴यीशुयैं तिन्हां नैं ग्लाया, “क्या तुहां इसा बज़ाह ते भुल्ला च तां नीं पैयो हन कि ना तां तुहां पवित्रशास्त्रे जो जाणदे हन, कने ना तां परमात्मे दिया सामर्थी जो?

²⁵क्जोकि जाह़लू सैह़ मरेयां ते जिन्दे हुंगे, तां सैह़ ना ब्याह करगे कने ना तां ब्याह च दित्ते जांगे, अपर सुअर्गे च सुअर्गदूतां साइआं हुंगे।

²⁶जित्थु तिकर मरेयां ते जिन्दे होणे दा सवाल ऐ, तां क्या तुहां मूसा दिया कताब च नीं पढ़ेया, जित्थु बल़दी झाड़िया दा बखान ऐ, परमात्मैं मूसैं नैं ग्लाया; ‘मैं अब्राहमे दा परमात्मा, कने इसहाके दा परमात्मा, कने याकूबे दा परमात्मा ऐ’?

²⁷तुहां लोक बड़ी भुल्ला च पैयो हन, कि परमात्मा मरेयां दा नीं ऐ अपर जिन्देया दा परमात्मा ऐ।”

²⁸कने सास्त्री माणुआं च इक्की आई नैं तिन्हां जो गल्लां करदे सुणी लेआ, कने एह़ जाणी नैं कि यीशुयैं तिन्हां जो सोची समझी करी जवाब दित्ता, तिसते पुछया, “सबना ते जरूरी हुक्म कुण देहया ऐ?”

²⁹यीशुयैं तिसियो जवाब दित्ता, “सबना ते जरूरी हुक्म एह़ ऐ। ‘हे इस्राएले दे लोको सुणा। प्रभु अहां दा परमात्मा इक्को ई प्रभु ऐ,

³⁰कने तू अपणे प्रभु परमात्मे जो अपणे सारे मने नैं, कने अपणे सारे प्राणा नैं, कने अपणिया सारिया अक्ला नैं, कने अपणिया सारिया ताकता नैं प्यार रखणा।’

³¹कने दूआ हुक्म ऐ, ‘तू अपणे प्ड़ेसिये नैं अप्पु साइआं प्यार रखणा।’ इसते बड़ा होर कोई हुक्म नीं ऐ।”

³²सास्त्री माणुये यीशुये नैं ग्लाया, “हे गुरू, तुहां ठीक कने सच्च ग्लांदे हन, कि परमात्मा इक्को ई ऐ, कने तिसियो छड्डी नैं होर कोई नीं ऐ।

³³कने तू अपणे प्रभु परमात्मे जो अपणे सारे मने नैं, कने अपणे सारे प्राणा नैं, कने अपणिया सारिया अक्ला नैं, कने अपणिया सारिया ताकता नैं प्यार रखणा। तू अपणे प्ड़ेसिये नैं अप्पु साइआं प्यार रखणा। एह़ हुक्म सारे होमबल़ियां कने जानवरां दे बलिदानां ते बधी नैं हन।”

³⁴जाह़लू यीशुयैं दिख्या कि सास्त्री माणुयैं अक्ला दा जवाब दित्ता, तां तिस नैं ग्लाया, “तू परमात्मे दे राज्जे ते दूर नीं ऐ।” कने ताह़लू कुसी जो भी भिरी तिसते कुच्छ पुछणे दी हिम्मत नीं होई।

³⁵भिरी यीशुयैं मंदरे च सिक्षा दिंदे बग्त एह़ ग्लाया, “सास्त्री माणु क्जो ग्लांदे हन, कि मसीह दाऊद राजे दा पुत्तर ऐ?

³⁶दाऊद राजैं पवित्र आत्मा च होई नैं अप्पु ई ग्लाया ऐ, ‘प्रभुयैं मेरे प्रभु नैं ग्लाया ऐ, मेरे सज्जे पास्से बैठ, जाह़लू तिकर मैं तेरे बैरियां जो तेरे पैरां दी चौंकी नीं बणाई दैं।’

³⁷“दाऊद तां अप्पु ई तिसियो प्रभु ग्लांदा ऐ, भिरी सैह़ तिसदा पुत्तर कुत्थू ते होएया?” कने भीड़ा दे लोक तिसदियां गल्लां खुसिया नैं सुणदे थे।

³⁸यीशुयैं अपणिया सिक्षा च तिन्हां जो ग्लाया, “सास्त्री माणुआं ते चौकन्ने रेह्आ, जेह्ड़े लम्मे-लम्मे चोल़े पैहनी नैं घूमणा कने बजारां च लोकां ते नमस्कार,

³⁹कने आराधनालयां च खास-खास आसण कने धामा च खास जगाह चांह़दे हन।

⁴⁰सैह़ बिधवां दे घरां जो चलाकिया नैं हड़पी लेई जांदे हन, कने लोकां जो दस्सणे तांई लमियां-लमियां प्रार्थना करदे हन। क्जोकि एह़ जादा सज़ा पांगे।”

⁴¹यीशु मंदरे दे दानपात्रे सामणै बेई नैं दिक्खा दा था कि माणु मंदरे दे दानपात्रे च कितणे पैसे पांदे हन; कने बड़ेयां-बड़ेयां अमीरां बड़ा कुच्छ पाया।

⁴²ताह़लू इतणे च इक्क गरीब बिधवा आई, कने तिन्नै दो दमड़ियां पाईयां, जेह्ड़ियां इक्की धेल्ले दे बराबर हुंदियां हन।

⁴³ताह़लू यीशुयैं अपणे चेलेयां जो अप्पु अल्ल सद्दी नैं तिन्हां जो ग्लाया, “मैं तुहां नैं सच्च ग्लांदा ऐ, कि मंदरे दे दानपात्रे च पाणे आल़ेआं ते इन्नै गरीब बिधवा तां सबना ते जादा पाया;

⁴⁴क्जोकि सबना अपणिया कमाईया दा कुच्छ हिस्सा दाने च पाया, अपर इन्नै तंगिया च रैंह्दे भी जे कुच्छ इसा अल्ल था मतलब अपणी सारी कमाई पाई दित्ती ऐ।”