Read Kangri मरकुस 16 Bible Online

मरकुस 16 - Kangri bible

मरकुस 16

¹जाह़लू बिस्रामे आल़ा दिन बीती गेआ, तां मरियम मगदलीनी, कने याकूबे दी माँ मरियम, कने सलोमी खुसबुआं आल़िआं चीज्जां जो खरीदेया, तांजे सैह़ यीशु दिया लाह्सा पर मल़ी सकन।

²हफ्ते दे पैहल्ले दिन बड़िया भ्यागा जाह़लू सूरज निकल़ा दा ई था, सैह़ कब्रा पर आईआं।

³कने अप्पु च ग्लादियां थियां, “अहां तांई कब्रा दे मुँऐ ते पत्थरे कुण खसकांगा?”

⁴जाह़लू सैह़ कब्रा च पुज्जिआं, तां दिख्या कि कब्रा दे मुँऐ ते पत्थर खिसकेया था। कने सैह़ पत्थर बड़ा बड्डा था।

⁵कने कब्रा अंदर जाई नैं तिन्हां जणासां इक्क नौजुआन दूते जो जिन्हीं चिट्टे कपड़े पैहनेयो थे, तिन्हां दे सज्जे पास्से बैठेयो दिख्या, कने बड़ियां हरान होईयां।

⁶तिन्हीं नौजुआने तिन्हां जणासां नैं ग्लाया, “हरान मत होएया। तुहां यीशु नासरी जो तोपा दियां हन जेह्ड़ा सूल़िया पर टूंगेया था। सैह़ जिन्दा होई गेआ ऐ, सैह़ ऐत्थु नीं ऐ, दिक्खा, एह़ सैई जगाह ऐ जित्थु तिन्हां तिसियो रखेया था।

⁷अपर तुहां जा, कने पतरस कने तिसदे बाक्कि चेलेयां नैं ग्ला, कि ‘यीशु मरेयां ते जिन्दा होई गेआ ऐ कने सैह़ तुहां ते पैहल्ले गलील प्रदेसे जो जांगा। जिंआं यीशुयैं तुहां नैं ग्लाया था, तुहां भी यीशुये जो तित्थु दिक्खगे।’ ”

⁸कने सैह़ कब्रा ते बाहर निकल़ी नैं दौड़ी करी गियां, क्जोकि सैह़ बड़ियां कम्बियां कने डरियां थियां, कने तिन्हां रस्ते च कुसियो कुच्छ नीं दस्सेया, क्जोकि सैह़ डरा दियां थियां।

⁹हफ्ते दे पैहल्ले दिन भ्यागा हुंदे ई यीशु मरेयां ते दुवारी जिन्दा होई नैं सबते पैहल्ले मरियम मगदलीनी जो दुस्सेया, जिसाते तिन्हीं सत दुष्टआत्मां कड्डियां थियां।

¹⁰तिन्नै जाई नैं यीशुये दे साथियां जो जेह्ड़े सोक मनादे थे कने रोया दे थे, खबर सणाई।

¹¹तिन्हां चेलेयां एह़ सुणी नैं कि यीशु जिन्दा होई गेआ ऐ कने तिन्नै तिसियो दिख्या ऐ, तिन्हां बसुआस नीं कित्ता।

¹²इसते बाद यीशु दूये रूपे च तिन्हां दूँ चेलेयां जो दुस्सेया, जेह्ड़े यरूशलेम सैहरे ते ग्रांऐ दे पास्सेयो जा दे थे।

¹³तिन्हां भी जाई नैं बाक्कि चेलेयां जो भी यीशुये दे मरेयां ते जिन्दे होणे दी खबर दित्ती, अपर तिन्हां भी तिन्हां दून्नी चेलेयां पर भी बसुआस नीं कित्ता।

¹⁴इसते बाद भिरी यीशु तिन्हां ग्यारां चेलेयां जो भी, जाह़लू सैह़ खाणा बैठेयो थे दुस्सेया कने तिन्हां दे बेबसुआसे कने मन कठोर होणे दिया बज़ाह पर झिड़केया, क्जोकि जिन्हां यीशुये जो जिन्दे होणे दे बाद दिख्या था, तिन्हां तिस पर बसुआस नीं कित्या था।

¹⁵कने यीशुयैं तिन्हां नैं ग्लाया, “तुहां सारे संसारे च जाई नैं सारिया सृष्टिया दे लोकां जो सुसमाचार प्रचार करा।

¹⁶जेह्ड़ा कोई मिन्जो पर कने सुसमाचारे पर बसुआस करगा कने बपतिस्मा लैंगा तिसदा ई उद्धार हुंगा, अपर जेह्ड़ा मिन्जो पर कने सुसमाचारे पर बसुआस नीं करगा सैह़ दोसी ठैहराया जांगा।

¹⁷बसुआस करणे आल़ेआं च एह़ नसाण हुंगे कि सैह़ मेरे नांऐ ते दुष्टआत्मां जो कड्डगे, नौई-नौई भासा ग्लांगे।

¹⁸सर्पां जो भी चुक्की लैंगे, कने जे सैह़ जैहरे आल़िआं चीज्जां भी पी जान, तमी तिन्हां दा कुच्छ नकसान नीं हुंगा, सैह़ बमारां पर हत्थ रखगे, कने सैह़ खरे होई जांगे।”

¹⁹ताह़लू प्रभु यीशु तिन्हां नैं गल्लां करणे दे बाद सुअर्गे पर चुक्की लेआ गेआ, कने परमात्मे दे सज्जे पास्से बेई गेआ।

²⁰कने तिन्हां चेलेयां निकल़ी नैं हर जगाह प्रचार कित्ता, कने प्रभु तिन्हां सौगी कम्म करदा रेह्आ, कने जेह्ड़े लोक सौगी-सौगी हुंदे थे, तिन्हां चमत्कारां दे जरिये वचने जो सच्च साबित करदा रेह्आ। आमीन।