Read Kangri मरकुस 4 Bible Online

मरकुस 4 - Kangri bible

मरकुस 4

¹ताह़लू भिरी यीशु झीला दे कनारे सिक्षा दैणा लग्गा; कने इतणी बड्डी भीड़ तिस अल्ल कठ्ठरोई गेई कि सैह़ झीला च इक्की किस्तिया पर चढ़ी नैं बैठिया, कने बड़ी भरी भीड़ झीला दे कनारे धरतिया पर खड़ोई रेई।

²कने सैह़ तिन्हां जो उदारणा च मतिआं गल्लां सखाणा लग्गा, कने तिन्हीं सिक्षा च तिन्हां जो ग्लाया,

³“सुणा। कने दिक्खा, इक्क किसान बीई बाणा निकल़ेया।

⁴कने बांदे बग्त कुच्छ बीई रस्ते पर पै कने पंछियां आई नैं तिन्हां जो चुगी लेआ।

⁵कने कुच्छ बीई पथरीलिया जमीना पर पै जित्थु तिन्हां जो डुग्गी चिक्क नीं मिलणे दिया बज़ाह ते तौल़े लूंगी पै।

⁶कने जाह़लू सूरजे दी तेज धुप पेई तां सैह़ पल़ी गै, कने जड़ कमजोर होणे दिया बज़ाह ते सुकी गै।

⁷कने कुच्छ झुड़ां-बसुन्टां च पै, कने झुड़ां-बसुन्टां बधी नैं तिन्हां जो दब्बी दित्ता, कने तिन्हां फल़ नीं दित्ता।

⁸अपर कुच्छ बीई खरिया जमीना पर पै, कने सैह़ लूंगे कने निकल़ी नैं फल़वन्त होये; कने कईआं तीई गुणा, कईआं सठ गुणा कईआं सौ गुणा फल़ दित्ता।”

⁹ताह़लू यीशुयैं ग्लाया, “जेह्ड़े समझी सकदे हन, तिसियो ध्याने नैं सुणन कने मन्नी भी लैन।”

¹⁰ताह़लू लोकां दे जाणे ते बाद बारांह चेलेयां कने तिसदे कुच्छ लोकां यीशुये जो किल्ला दिख्या, तां तिन्हां तिसते इन्हां उदारणा दे बारे च पुछया।

¹¹तिन्हीं तिन्हां जो ग्लाया, “तुहां जो तां परमात्मे दे राज्जे दे भेत दी समझ दित्तियो ऐ अपर जिन्हां लोकां जो परमात्मे दे राज्जे दे भेते दी समझ नीं ऐ, तिन्हां तांई सारियां गल्लां उदारणा च हुंदियां।

¹²इसतांई कि “सैह़ दिक्खदे तां हन, अपर तिन्हां जो कुच्छ नीं दुस्सदा, सैह़ सुणदे तां हन अपर समझी नीं सकदे, इआं ना होये कि सैह़ पाप दे रस्ते ते मने बदलन, कने माफ कित्ते जान।”

¹³भिरी यीशुयैं तिन्हां जो ग्लाया, “क्या तुहां एह़ उदारण नीं समझदे? तां भिरी होर सारे उदारणा जो किंआं समझगे?

¹⁴बीई बाणे आल़ा किसान परमात्मे दा वचन बांदा ऐ।

¹⁵जेह्ड़े बीई रस्ते पर पैयो हन, एह़ तिन्हां माणुआं साइआं हन कि जाह़लू तिन्हां परमात्मे दा वचन सुणेया, तां सैतान तिन्हां पंछियां साइआं झट आई नैं बाएयो वचने जो चुराई नैं लेई जांदा ऐ।

¹⁶तिंआं ई जेह्ड़े बीई पथरीलिया जमीना बिच्च बाये जांदे हन, एह़ तिन्हां माणुआं साइआं हन जेह्ड़े वचने जो सुणी नैं झट खुसिया नैं तां मन्नी लैंदे हन।

¹⁷अपर अपणे अंदर वचने दी जड़ नीं रखणे दिया बज़ाह ते सैह़ थोड़े ई दिनां तिकर रैंह्दे हन; इसते बाद जाह़लू वचने दिया बज़ाह ते तिन्हां पर दुख या सताव हुंदा, तां सैह़ झट वचने जो भुल्ली जांदे हन।

¹⁸जेह्ड़े बीई झुड़ां-बसुन्टां च पैयो थे, एह़ तिन्हां माणुआं साइआं हन जिन्हां वचन तां सुणेया,

¹⁹अपर संसार दी फिकर, कने धन दौलत कने दूईआं चीज्जां दा लालच वचने जो दबाई दिंदा ऐ। कने सैह़ आत्मिक फल़ पाणे च नाकामयाब होई जांदे हन।

²⁰कने जेह्ड़े बीई खरिया जमीना च बाये गै हन, एह़ तिन्हां माणुआं साइआं हन जेह्ड़े वचने सुणी नैं मन्नी लैंदे कने आत्मिक फल़ लेयोंदे हन, कोई तीई गुणा, कोई सठ गुणा कने कोई सौ गुणा।”

²¹यीशुयैं तिन्हां जो ग्लाया, “दीय्ये जो इसतांई नीं बाल़दे हन कि टोकरुये या मंजोल़ूये थल्लैं रखेया जां, अपर इसतांई बाल़दे हन कि वरैक्टा पर रखेया जां, तांजे सबना जो लौ पुज्जैं।

²²क्जोकि जेह्ड़ी कोई चीज्ज छुपियो ऐ, सैह़ सामणै कित्ती जांगी; कने जेह्ड़ा गुप्त च ऐ, सैह़ खुल्लेआम प्रगट कित्ता जांगा।

²³जेह्ड़े समझी सकदे हन, तिसियो ध्याने नैं सुणन कने मन्नी भी लैन।”

²⁴भिरी यीशुयैं तिन्हां जो ग्लाया, “चौकन्ने रेह्आ, कि क्या सुणदे हन? जितणा जादा ध्याने नैं तुहां सुणगे, परमात्मा उतणी जादा अक्ल तुहां जो दिंगा, बल्कि तुहां होर भी जादा समझी सकगे।

²⁵क्जोकि जिस अल्ल अक्ल ऐ तिसियो होर दित्ती जांगी; कने जिस अल्ल थोड़ी अक्ल ऐ, तिसते सैह़ भी जेह्ड़ी तिस अल्ल ऐ, लेई-लेई जांगी।”

²⁶भिरी यीशुयैं ग्लाया, “परमात्मे दा राज ऐदेया ऐ, जिंआं कोई माणु धरती पर बीई बांदा,

²⁷कने सैह़ राती सोंदा ऐ, कने दिने कम्म करदा ऐ, कने तिसियो पता भी नीं लगदा कि सैह़ बीई काह़लू लूंगे कने बड्डे होई गै।

²⁸धरती अप्पु ई फल़ दिंदी ऐ, पैहल्लैं लूंग, भिरी सिल्ले, कने सिल्लेयां च त्यार दाणा।

²⁹अपर जाह़लू दाणा पकी जांदा ऐ तिसी बग्त सैह़ झट दराटी चलांदा ऐ, क्जोकि फसला बड्डणे दा बग्त आई रेह्आ।”

³⁰भिरी यीशुयैं ग्लाया, “अहां परमात्मे दे राज दी तुलणा कुस नैं करन, कने कुस उदारणे सौगी तिसदा बखान करैं?

³¹परमात्मे दा राज तिस राईया दे दाणे साइआं ऐ; जाह़लू धरतिया च बाया जांदा ऐ तां धरतिया दे सारे बीआं ते लोक्का हुंदा ऐ,

³²अपर बाणे ते बाद, लूंगी नैं सारे साग-पात ते बड्डा होई जांदा ऐ, कने तिसदियां इतणियां बड्डियां डाल़िआं निकल़दियां हन कि अम्बरे दे पंछी भी तिसदिया छाऊआं च बसेरा करी सकदे हन।”

³³यीशु तिन्हां जो देहय्-देहय् बड़े भरी उदारण देई नैं तिन्हां दी अक्ला मताबक परमात्मे दा वचन सणांदा था।

³⁴कने सैह़ सब कुच्छ उदारणा च तिन्हां नैं ग्लांदा था, अपर पड़दे च यीशु अपणे चेलेयां जो सारियां गल्लां दा मतलब दस्सदा था।

³⁵तिस दिनैं जाह़लू संझ होई, तां यीशु चेलेयां नैं ग्लाणा लग्गा, “ओआ, अहां झीला दे पारले पास्से चलदे।”

³⁶कने भीड़ा दे लोकां जो विदा करणे ते बाद चेले यीशुये जो तिसा ई किस्तिया पर सौगी लेई गै, जिसा पर यीशु बैठेया था, कने तिन्हां सौगी होर भी किस्तियां थियां।

³⁷कने तिसी बग्त झीला च बड़ा भरी तफान आया, कने लैहरां दे पांणिये नैं किस्ती भरोणा लग्गी पेई।

³⁸कने यीशु अप्पु किस्तिया दे पचांह़ आल़े हिस्से च सुतेया था। ताह़लू चेलेयां यीशुये जो जगाई करी तिस नैं ग्लाया, “हे गुरू क्या तिज्जो अहां दी फिकर नीं कि अहां डुबी चलेयो हन?”

³⁹ताह़लू यीशुयैं उठी नैं तफाने जो झिड़केया, कने पांणिये दियां लैहरां जो ग्लाया, “डोल रेह्आ, रुकी जा।” कने तफान रुकी गेआ कने बड़ी सांति होई गेई।

⁴⁰कने यीशुयैं चेलेयां नैं ग्लाया, “तुहां क्जो डरा दे हन? क्या तुहां जो अह्ल्ली तिकर बसुआस नीं होएया?”

⁴¹कने सैह़ बड़े डरी गै कने अप्पु च ग्लाणा लग्गे, “एह़ कुण माणु ऐ, कि तफान कने पांणिये दियां लैहरां कने दुष्टआत्मां भी इसदे हुक्मे दा पालण करदियां हन।”