Read Kangri मरकुस 5 Bible Online

मरकुस 5 - Kangri bible

मरकुस 5

¹यीशु कने तिसदे चेले गलीले दिया झीला दे पारली तरफ गिरासेनियां दे प्रदेसे च पुज्जे,

²कने जाह़लू यीशु किस्तिया ते लुत्था तां तिसी बग्त इक्क माणु जिस च दुष्टआत्मा थी, कब्रां ते निकल़ी नैं तिसियो मिल्ला।

³सैह़ कब्रां च रैंह्दा था। क्जोकि सैह़ बड़ा प्रचंड था, कने कोई तिसियो संगल़ां नैं भी नीं बन्नी सकदा था,

⁴क्जोकि सैह़ बड़ी बरी बेड़ियां कने संगल़ां नैं बन्नेया था, अपर तिन्हीं संगल़ां जो तोड़ी दित्ता कने बेड़ियां दे टोटे-टोटे करी दित्यो थे, कने कोई तिसियो काबू च नीं करी सकदा था।

⁵सैह़ माणु हर बग्त रात दिन कब्रां कने प्हाड़ां पर डड्डदा कने अप्पु जो पत्थरां नैं जख्मी करदा था।

⁶सैह़ यीशुये जो दूरे ते ई दिक्खी नैं दौड़ेया कने तिसियो प्रणांम कित्ता।

⁷कने जोरे नैं डड्डी करी ग्लाणा लग्गा, “हे यीशु परम प्रधान परमात्मे दे पुत्तर, मिन्जो तिज्जो नैं क्या कम्म? मैं तिज्जो परमात्मे दे नांऐ दी कसम दिंदा कि मिन्जो दुखी मत कर।”

⁸ताह़लू यीशुयैं तिसा दुष्टआत्मा जो ग्लाया, “हे दुष्टआत्मा, इस माणुये ते निकल़ी आ।”

⁹यीशुयैं तिसा दुष्टआत्मा ते पुछया, “तेरा नां क्या ऐ?” तिन्नै दुष्टआत्मा ग्लाया, “मेरा नां सेना ऐ; क्जोकि अहां मतिआं भरी हन।”

¹⁰तिन्हां दुष्टआत्मां यीशुये नैं बड़ी विणती कित्ती, “अहां जो इस प्रदेसे ते बाहर मत घल्ल।”

¹¹तित्थु प्हाड़े पर इक्क मते सूअरां दा झुंड चुगा दा था।

¹²तिन्हां दुष्टआत्मां यीशुये नैं विणती करी नैं ग्लाया, “अहां जो इन्हां सूअरां च घल्ली देआ कि अहां तिन्हां दे अंदर जाई सकन।”

¹³यीशुयैं तिन्हां जो हुक्म दित्ता कने दुष्टआत्मां निकल़ी नैं सूअरां अंदर समाई गेई, कने सूअर, जेह्ड़े दो हज़ार थे खड़िया भेठी ते रिड़की नैं झीला च जाई पेआ कने डुबी करी मरी गेआ।

¹⁴कने तिन्हां सूअरां दे गुआलेयां नठ्ठी नैं सैहरे च कने ग्रांऐ च जाई नैं जेह्ड़ा प्हाड़े पर होएया था सब कुच्छ सणाई दित्ता, लोक तिसियो दिक्खणा आये।

¹⁵कने सैह़ यीशु अल्ल आई नैं तिसियो जिस च दुष्टआत्मां थियां, मतलब जिस माणु च दुष्टआत्मां दी सेनां समाईयो थी, कपड़े पैहनी करी कने खरिया हालता च बैठेया दिक्खी नैं, डरी गै।

¹⁶इस घटनां जो दिक्खणे आल़ेआं तिसदा जिस च दुष्टआत्मां थियां, कने सूअरां दा पूरा हाल तिन्हां लोकां जो सणाई दित्ता।

¹⁷ताह़लू लोक यीशुये नैं विणती करी नैं ग्लाणा लग्गे, “कि अहां दे लाक्के ते चली जा।”

¹⁸जाह़लू यीशु किस्तिया पर चढ़णा लग्गा तां सैह़ जिस च पैहल्लैं दुष्टआत्मां थियां, यीशुये नैं विणती करणा लग्गा, “मिन्जो अप्पु सौगी औणां दे।”

¹⁹अपर यीशुयैं तिसियो अप्पु सौगी ओणे ते मना करी दित्ता, कने तिसियो ग्लाया, “अपणे घरैं जाई नैं अपणे लोकां जो दस्स कि तिज्जो पर दया करी नैं प्रभुयैं तिज्जो तांई कदेय बड्डे कम्म कित्ते हन।”

²⁰भिरी सैह़ जाई नैं दिकापुलिस सैहरे च इसा गल्ला दा प्रचार करणा लग्गा कि “यीशुयैं मिन्जो बासती कदेय बड्डे कम्म कित्ते।” कने एह़ सुणी करी सारे माणु हरान होये।

²¹जाह़लू यीशु गिरासेनियां दे प्रदेसे ते किस्तिया च गलीले प्रदेसे दी तरफ आई गेआ, तां इक्क बड्डी भीड़ तिस अल्ल कठ्ठरोई गेई। सैह़ झीला दे कनारे पर था कि

²²कने इतणे च याईर नांऐ दा माणु आराधनालय दे सरदारां च इक्क था सैह़ आया, कने यीशुये जो दिक्खी नैं पैरां पेईया,

²³कने एह़ ग्लाई नैं तिस नैं बड़ी विणती करी नैं ग्लाणा लग्गा, “हे गुरू, मेरी लोक्की देई कुड़ी बमार ऐ कने मरने आल़ी ऐ; तू आई नैं तिसा पर हत्थ रख, कि सैह़ खरी होई नैं जिन्दा रैह्।”

²⁴तिसी बग्त यीशु तिस सौगी चली पेआ कने इक्क बड्डी भरी भीड़ तिसदे पचांह़ चली पेई, ऐत्थु तिकर कि माणु धक्का-मुक्की करदे थे।

²⁵तिसा भीड़ा च इक्क जणांस थी, जिसा जो बारांह साल ते खून चलणे दी बमारी थी।

²⁶तिन्नै मतेआं बैदां-हकीम्मां ते अपणा लाज कराया था, कने अपणिया सारियां चीज्जां जो बेची नैं तिसायो बमारिया ते कोई फर्क नीं पेआ, अपर सैह़ होर जादा बमार होई गियो थी।

²⁷तिन्नै यीशुये दे बारे च सुणी नैं भीड़ा च तिसदे पचांह़ ते आई कने तिसदे कपड़े जो छुई लेआ,

²⁸क्जोकि सैह़ ग्लांदी थी, “जे मैं तिसदे कपड़े जो ई छुई लैंगी तां खरी होई जांगी।”

²⁹कने तिसी बग्त तिसादा खून चलणा बंद होईया, कने तिन्नै अपणे सरीरे ते मसूस करी लेआ, “कि मैं इसा बमारिया ते खरी होई गियो।”

³⁰यीशुयैं तिसी बग्त अप्पु च जाणी लेआ, “मिन्जो ते सामर्थ निकल़ी ऐ।” कने पचांह़ मुड़ी नैं भीड़ा जो पुछया, “मेरे कपड़े कुणी छुते?”

³¹तिसदे चेलेयां तिस नैं ग्लाया, “हे गुरू, तुहां तां दिक्खा दे हन, कि भीड़ इतणी होणे दिया बज़ाह ते लोक इक्की-दूये जो धक्का-मुक्की करा दे हन, कने तुहां ग्ला दे हन, ‘कि मिन्जो कुणी छुता?’ ”

³²ताह़लू तिन्हीं तिसियो दिक्खणे तांई जिन्हीं एह़ कम्म कित्या था, चौंन्नी पास्से नजर घुमाई।

³³ताह़लू सैह़ जणांस एह़ जाणी गेई कि मिन्जो नैं कदेया भला कम्म होएया ऐ, डरदी कने कम्मदी होई तिसदेयां पैरां च पेई नैं यीशुये जो अपणा सारा हाल सच्च-सच्च दस्सी दित्ता।

³⁴ताह़लू यीशु तिसा जणासा नैं ग्लाणा लग्गा, “हे कुड़िये, तेरे बसुआसैं तिज्जो खरा कित्ता ऐ। खुसिया नैं जा, कने अपणिया इसा बमारिया ते बची रैह्।”

³⁵यीशु एह़ ग्ला दा ई था कि आराधनालय दे सरदारे दे घरे ते लोकां आई नैं ग्लाया, “हुण गुरू जो तकलीफ मत दे, क्जोकि तेरी कुड़ी तां मरी गियो।”

³⁶जेह्ड़ी गल्ल सैह़ लोक ग्लांदे थे, तिसा जो यीशुयैं अणसुणी करी नैं आराधनालय दे सरदारे जो ग्लाया, “मत डर; सिर्फ बसुआस रख।”

³⁷कने यीशुयैं पतरसे कने याकूबे जो कने याकूबे दे लोक्के भाऊये यूहन्ने जो छड्डी, होर कुसी जो अपणे सौगी औणां नीं दित्ता।

³⁸आराधनालय दे सरदारे दे घरैं पुज्जी नैं, यीशुयैं लोकां जो बड़े रोंदे कने बड़ियां डाडां मारदे दिख्या।

³⁹ताह़लू यीशुयैं अंदर जाई नैं तिन्हां जो ग्लाया, “तुहां क्जो डड्डा दे कने रौआ दे हन। कुड़ी मरियो नीं ऐ, अपर सुतियो ऐ।”

⁴⁰इसा गल्ला जो सुणी नैं लोक यीशु पर हंसणा लग्गे, पर तिन्हीं सारेयां जो बाहर कड्डी नैं कुड़िया दे माँऊ बुढ़े कने अपणे त्रीं चेलेयां सौगी अंदरेयो गेआ, जित्थु कुड़ी थी।

⁴¹कने कुड़िया दा हत्थ पकड़ी नैं तिसा जो ग्लाया, “तलीता कूमी।” जिसदा मतलब ऐ, “हे कुड़ी, मैं तिज्जो ग्ला दा, उठ।”

⁴²कने कुड़ी ताह़लू उठी नैं चलणा फिरणा लग्गी पेई; क्जोकि सैह़ कुड़ी बारांह साल्लां दी थी। एह़ दिक्खी करी सारे लोक बड़े हरान होई गै।

⁴³भिरी यीशुयैं तिन्हां जो समझाई करी चतौणी दित्ती कि एह़ गल्ल कुसी जो पता ना लग्गैं कने ग्लाया, “इसायो कुच्छ खाणे जो देआ।”