Read Kangri मरकुस 7 Bible Online

मरकुस 7 - Kangri bible

मरकुस 7

¹ताह़लू फरीसी कने कुच्छ सास्त्री माणु जेह्ड़े यरूशलेम सैहरे ते आएयो थे, यीशु अल्ल कठ्ठरोई गै।

²कने तिन्हां यीशुये देयां कुच्छ चेलेयां जो बिना हत्थां धोतेयो रोटी खांदे दिख्या।

³क्जोकि फरीसी कने सारे यहूदी माणु, पुरखां देयां रीति रिवाजां पर चलदे हन, कने जाह़लू तिकर खरी कित्ते हत्थां नीं धोई लैंदे ताह़लू तिकर नीं खांदे;

⁴कने बजारे ते घर बापस आई नैं भी बगैर न्हौतेयो खाणा नीं खांदे थे; कने होर भी तिन्हां दे मते रीति रिवाज हन, जिंआं कि कटोरेयां, लोटेयां, तांबे दे भाडेयां जो धोणा कने मांजणा।

⁵इसतांई तिन्हां फरीसी कने सास्त्री माणुआं यीशु ते पुछया, “तेरे चेले पुरखां दे रीति रिवाजां मताबक नीं चलदे, कने बिना हत्थां धोतेयां रोटी खांदे हन।”

⁶यीशु तिन्हां नैं ग्लाणा लग्गा, “यशायाह भविष्यवक्तैं तुहां पाखंडी लोकां दे बारे च बड़ी ठीक भविष्यवाणी कित्तियो; जिंआं पवित्रशास्त्रे च लिख्या ऐ। ‘एह़ लोक मुँऐ नैं तां मेरा आदर करदे हन, अपर इन्हां दा मन मिन्जो ते दूर रैंह्दा ऐ।

⁷एह़ बेकार च मेरी अराधना करदे हन, क्जोकि माणुआं दे हुक्मां जो परमात्मे दी सिक्षा बणाई नैं सखांदे हन।’

⁸क्जोकि तुहां परमात्मे दे हुक्मां जो छड्डी नैं माणुआं देयां रीति रिवाजां जो मनदे हन।”

⁹यीशुयैं फरीसी कने सास्त्री माणुआं जो ग्लाया, “तुहां अपणे रीति रिवाजां जो मन्नणे तांई परमात्मे दे हुक्मां जो बड़ी सफाईया नैं टाल़ी दिंदे हन।

¹⁰क्जोकि मूसैं व्यबस्था च ग्लाया ऐ, ‘अपणे बुढ़े कने माँऊ दा आदर कर,’ कने ‘जेह्ड़ा कोई बुढ़े कने माँऊ जो बुरा ग्लांगा, सैह़ जरूर जान्नी ते मारी दित्ता जांगा।’

¹¹अपर तुहां ग्लांदे हन, कि जे कोई माणु अपणे माँऊ-बुढ़े नैं ग्लां, ‘मेरा जेह्ड़ा कुच्छ ऐ, सैह़ तुहां दे कम्म आई सकदा ऐ, सैह़ मैं परमात्मे जो भेंट चढ़ाई दित्ती।’ क्या इआं ग्लाणा ठीक ऐ?

¹²तां तुहां तिस माणुये जो तिसदे बुढ़े कने तिसदिया माँऊ दी कुच्छ सेवा करणा नीं दिंदे।

¹³इआं करी नैं तुहां अपणे रीति रिवाजां ते, जिन्हां जो तुहां बणाया ऐ, परमात्मे दे वचने जो टाल़ी दिंदे हन; कने ऐदेय-ऐदेय होर मत्ते बुरे कम्म तुहां करदे हन।”

¹⁴ताह़लू यीशुयैं तिन्हां लोकां जो अपणे अल्ल सद्दी नैं तिन्हां जो ग्लाया, “तुहां सारे मेरी सुणा, कने समझा।

¹⁵ऐदई कोई चीज्ज नीं ऐ जेह्ड़ी बाहरे ते माणुये च आई नैं तिसियो असुद्ध करैं; अपर जेह्ड़ियां गल्लां माणुये दे अंदरे ते निकल़दियां हन, सैई तिसियो असुद्ध करदियां हन।

¹⁶जेह्ड़े समझी सकदे हन, तिसियो ध्याने नैं सुणन कने मन्नी भी लैन।”

¹⁷जाह़लू सैह़ भीड़ा ते निकल़ी नैं घरेयो गेआ, तां तिसदेयां चेलेयां इस उदारणे दे बारे च तिसते पुछया।

¹⁸यीशुयैं तिन्हां जो ग्लाया, “क्या तुहां भी नासमझ हन? क्या तुहां नीं जाणदे कि जेह्ड़ा कुच्छ तुहां माणु खांदे हन, सैह़ तिसियो असुद्ध नीं करदा?

¹⁹क्जोकि सैह़ तिसदे मने च नीं, अपर पेटे च जांदा ऐ, कने संडास च निकल़ी जांदा ऐ।” एह़ ग्लाई नैं तिन्हीं सारी खाणे दियां चीज्जां जो सुद्ध ठैहराई दित्ता।

²⁰भिरी यीशुयैं एह़ भी ग्लाया, “जेह्ड़ियां बुरिआं गल्लां माणुआं दे अंदरे ते निकल़दियां हन, सैई माणुये जो असुद्ध करदियां हन।

²¹क्जोकि अंदरे ते, मतलब माणु दे मने ते बुरे-बुरे बचार, ब्यभिचार, चोरी, हत्या, परस्त्रीगमन,

²²लालच, बुराई, छल, लुचपण, बुरी नजर, निंदा, घमंड, कने मूर्खता निकल़दी ऐ।

²³एह़ सारियां बुरिआं गल्लां अंदरे ते ई निकल़दियां हन कने माणुये जो असुद्ध करदियां हन।”

²⁴भिरी यीशु कने तिसदे चेले गलील प्रदेसे ते निकल़ी नैं सूर कने सैदा दे सैहरां च आये; कने इक्की घरे च गै कने सैह़ नीं चांह़दा था कि कुसी जो पता लग्गैं, अपर भिरी भी लोकां जो तिसदे बारे च पता लग्गी गेआ था।

²⁵कने तिसी बग्त इक्क जणांस जिसा दिया लोक्किया कुड़िया च दुष्टआत्मा थी, यीशुये दे बारे च सुणी नैं आई कने तिसदेयां पैरां पेई गेई।

²⁶एह़ जणांस सीरिया प्रदेसे दे फिनीकी सैहरे दी रैहणे आल़ी यूनानी जाति दी थी। तिन्नै यीशुये नैं विणती कित्ती “कि मेरिया कुड़िया ते दुष्टआत्मां जो कड्डी दे।”

²⁷तिन्हीं तिसायो ग्लाया, “पैहल्ले बच्चेयां जो रज्जणा दे, क्जोकि बच्चेयां दी रोटी लेई नैं कुत्तेआं दे गांह पाणा ठीक नीं ऐ।”

²⁸तिन्नै जणासा यीशुये नैं ग्लाया, “एह़ गल्ल सच्च ऐ प्रभु; भिरी भी लोक्के कुत्ते भी तां बच्चेयां दे बचेयो रोटियां दे टुकड़ेयां जो खाई लैंदे हन।”

²⁹यीशुयैं तिसायो ग्लाया, “इसा गल्ला दिया बज़ाह ते तू अपणे घरे जो चली जा; क्जोकि तेरिया कुड़िया ते दुष्टआत्मा निकल़ी गियो ऐ।”

³⁰तिन्नै अपणे घरे आई नैं कुड़िया जो मंजोल़ूये पर सुतेया दिख्या, कने दुष्टआत्मा तिसाते निकल़ी गियो थी।

³¹भिरी यीशु कने तिसदे चेले तिस लाक्के जो छड्डी करी सूर कने सैदा दे सैहरां ते निकल़ी नैं दिकापुलिस सैहरे च होई नैं गलीले दिया झीला नेड़े आई रैह्।

³²कने ताह़लू लोकां इक्की टौणे जो जेह्ड़ा अटकी-अटकी नैं भी ग्लांदा था, तिस अल्ल अंणी करी तिस नैं विणती कित्ती “कि अपणा हत्थ तिस पर रखा।”

³³ताह़लू यीशु तिस माणुये जो भीड़ा ते लग्ग लेई गेआ, कने अपणियां उंगलियां तिसदेयां कन्नां च लगाईयां, कने थूके दी लार तिसदिया जीभा पर लगाई;

³⁴ताह़लू तिन्हीं डुग्गा साह भरी करी सुअर्गे बक्खी दिक्खी नैं तिसियो ग्लाया, “इप्पतह।” मतलब “खुली जा।”

³⁵जिंआं ई यीशुयैं ग्लाया खुली जा, तां सैह़ माणु पूरी तरांह सुणना, कने तिसदी जीभ खुली गेई, कने साफ-साफ ग्लाणा लग्गी पेआ।

³⁶ताह़लू यीशुयैं लोकां जो हुक्म देई नैं समझाया “कि कुसी नैं मत ग्लांदे।” अपर जितणा तिन्हीं तिन्हां लोकां जो समझाया उतणा ई सैह़ होर प्रचार करणा लग्गे।

³⁷सैह़ बड़े ई हरान होई नैं ग्लाणा लग्गे, “तिन्हीं जे कुच्छ कित्ता सैह़ सब ठीक कित्ता ऐ। दिक्खा, सैह़ टौणेयां जो सुणने दी, कने गूंगेयां जो ग्लाणे दी ताकत दिंदा ऐ।”