Read Kangri मरकुस 8 Bible Online

मरकुस 8 - Kangri bible

मरकुस 8

¹तिन्हां दिनां च जाह़लू भिरी बड़ी बड्डी भीड़ कठ्ठरोई, कने तिन्हां अल्ल खाणे जो कुच्छ नीं था, तां यीशुयैं अपणेयां चेलेयां जो अप्पु अल्ल सद्दी नैं ग्लाया,

²“इसतांई कि एह़ लोक त्रीं दिनां ते मिन्जो सौगी हन, कने इन्हां अल्ल खाणे तांई कुच्छ नीं ऐ। मिन्जो इन्हां लोकां पर बड़ी दया ओआ दी ऐ।

³जे मैं इन्हां जो भुखे पेट घरे जो घल्ली देयां, तां इन्हां ते घरे नीं पुज्जी होणा; क्जोकि कुच्छ माणु बड़ी दूरे ते आएयो हन।”

⁴तिसदे चेलेयां तिस नैं ग्लाया, “ऐत्थु सुनसाण जगाह च इतणे लोकां तांई खाणे दा इंतजाम कुत्थू ते होई सकदा ऐ, कि एह़ रज्जी नैं खाई सकन?”

⁵यीशुयैं तिन्हां ते पुछया, “तुहां अल्ल कितणियां रोटियां हन?” तिन्हां ग्लाया, “सत रोटियां।”

⁶ताह़लू यीशुयैं लोकां जो हुक्म दित्ता कि सारे भुइआं बेई जा, कने सैह़ सत रोटियां लियां कने परमात्मे दा धन्यावाद करी नैं तोड़ियां, कने अपणे चेलेयां जो दिंदा गेआ कि सैह़ लोकां जो बंडदे जान।

⁷तिन्हां अल्ल थोड़ियां दियां लोक्कियां-लोक्कियां मच्छियां भी थियां; तिन्हीं भिरी परमात्मे दा धन्यावाद करी नैं ग्लाया इन्हां जो भी बंडदे जा।

⁸सैह़ खाई नैं रज्जी गै कने चेलेयां बचेयो रोटियां दे सत टोकरु भरी नैं किठ्ठे कित्ते।

⁹कने लगभग लोक चार हज़ार तिकर थे; ताह़लू यीशुयैं तिन्हां लोकां जो अपणे-अपणे घरां जो घल्ली दित्ता,

¹⁰कने तिसी बग्त यीशु अपणे चेलेयां सौगी किस्तिया पर चढ़ी नैं दलमनूता लाक्के जो चली गेआ।

¹¹भिरी फरीसी माणु आई करी यीशुये नैं सवाल जवाब करणा लग्गे, कने तिसियो परखणे तांई तिसते सुअर्गीय नसाण मंगेया।

¹²यीशुयैं डुग्गा साह भरी नैं ग्लाया, “इस जमाने दे लोक क्जो नसाण तोपा दे हन? मैं तुहां नैं सच्च ग्लांदा कि इस जमाने दे लोकां जो कोई नसाण नीं दित्ता जांगा।”

¹³कने यीशु तिन्हां जो छड्डी नैं भिरी किस्तिया पर चढ़ी नैं झीला दे पारली तरफ चली गेआ।

¹⁴कने चेले रोटियां लैणां भुल्ली गियो थे, कने किस्तिया च तिन्हां अल्ल सिर्फ इक्क रोटी थी।

¹⁵तिन्हीं तिन्हां जो हुक्म देई नैं समझाया, “कि दिक्खा, फरीसी माणुआं दे कने हेरोदेस राजे दे खमीरे ते चौकन्ने रेह्आ।”

¹⁶चेले अप्पु च सोच बचार करी नैं ग्लाणा लग्गे, “क्जोकि अहां अल्ल जादा रोटियां नीं हन, इसतांई तिन्हीं इआं ग्लाया।”

¹⁷एह़ जाणी नैं यीशुयैं तिन्हां जो ग्लाया, “तुहां क्जो अप्पु च एह़ बचार करा दे हन कि अहां अल्ल रोटियां नीं हन? क्या तुहां अह्ल्ली तिकर भी नीं जाणी कने नीं समझी सके? क्या तुहां अल्ल दिमाग नीं ऐ?

¹⁸क्या तुहां अखीं हुंदेया भी तुहां जो कुच्छ दुस्सदा नीं, कने कन्नां हुंदेया भी तुहां कुच्छ भी नीं सुणी पांदे हन, क्या तुहां जो कुच्छ भी याद नीं ऐ?

¹⁹कि जाह़लू मैं पंज हज़ार लोकां तांई पंज रोटियां तोड़ियां थियां तां तुहां बचेयो रोटियां दे कितणे टोकरु भरी नैं किठ्ठे कित्ते?” तिन्हां यीशुये नैं ग्लाया, “बाराह टोकरु।”

²⁰यीशुयैं भिरी पुछया, “कने जाह़लू चौं हज़ारां तांई सत रोटियां थियां तां तुहां बचेयो रोटियां दे कितणे टोकरु भरी नैं किठ्ठे कित्ते?” तिन्हां यीशुये नैं ग्लाया, “सत टोकरु।”

²¹यीशुयैं चेलेयां नैं ग्लाया, “क्या तुहां अह्ल्ली भी नीं समझी सके?”

²²यीशु कने तिसदे चेले बैतसैदा सैहरे च आये; तां लोक इक्की अन्ने माणुये जो तिस अल्ल लेई नैं आये कने विणती कित्ती कि तिस जो छुये।

²³यीशुयैं तिस अन्ने दा हत्थ पकड़ी नैं तिसियो ग्रांऐ दे बाहर लेई गेआ, कने तिसदियां अखीं पर अपणा थूक लगाई नैं तिस पर हत्थ रखेया, कने तिसते पुछया, “क्या तिज्जो कुच्छ दुस्सा दा ऐ?”

²⁴तिन्हीं अन्ने तां-तुंह दिक्खी नैं ग्लाया, “मैं माणुआं जो दिक्खा दा; सैह़ मिन्जो चलदे रूखां साइआं दुस्सा दे हन।”

²⁵ताह़लू यीशुयैं भिरी तिसदियां अखीं पर हत्थ रखेया, कने अन्ने गौरा नैं दिख्या। सैह़ खरा होईया, कने अन्ने जो सब कुच्छ साफ-साफ दुस्सणा लग्गी पेआ।

²⁶यीशुयैं तिसियो एह़ ग्लाई नैं घरे जो घल्ली दित्ता, कि जेह्ड़ा ऐत्थु होएया ऐ, सैह़ ग्रांऐ आल़ेआं जो नीं दस्सणा, “कने हुण इस ग्रांऐ अंदर पैर भी नीं पाणा।”

²⁷यीशु कने तिसदे चेले कैसरिया फिलिप्पी सैहरे दे अक्खे-बक्खे दे ग्रांऐ जो चली गै; रस्ते च तिन्हीं अपणे चेलेयां ते पुछया, “लोक मिन्जो क्या ग्लांदे हन? कि मैं कुण ऐ?”

²⁸चेलेयां जवाब दित्ता, “कई तां तुहां जो यूहन्ना बपतिस्मा दैणे आल़ा; अपर कई एलिय्याह कने कोई-कोई तां भविष्यवक्तां च इक्क भी ग्लांदे हन।”

²⁹यीशुयैं तिन्हां ते पुछया, “अपर तुहां मिन्जो क्या ग्लांदे हन कि मैं कुण ऐ?” पतरसैं ग्लाया, “तुहां परमात्मे दे घल्लेयो मसीह हन।”

³⁰ताह़लू यीशुयैं तिन्हां जो हुक्म देई नैं ग्लाया, “कि मेरे बारे च एह़ कुसी नैं मत दस्सदे कि मैं मसीह ऐ।”

³¹ताह़लू यीशु तिन्हां जो सखाणा लग्गा, कि एह़ जरूरी ऐ, “मैं माणुये दा पुत्तर बड़ा दुख झेलगा, कने स्याणेयां कने प्रधान याजकां, कने सास्त्री माणुआं तिसियो नीच समझी नैं मारी दैणा, कने सैह़ त्रीं दिनां बाद मरेयां ते भिरी जिन्दा होई जांगा।”

³²यीशुयैं एह़ गल्ल तिन्हां जो साफ-साफ दस्सी दित्ती। इसा गल्ला जो सुणी करी पतरस तिसियो पड़दे नैं झिड़कणा लग्गा।

³³अपर यीशुयैं मुड़ी नैं अपणे चेलेयां दे पास्से दिख्या, कने पतरसे जो झिड़की नैं ग्लाया, “हे सैतान, मेरे सामणै ते दूर होई जा। क्जोकि तू परमात्मे दियां गल्लां पर नीं, अपर माणुआं दियां गल्लां पर मन लगांदा ऐ।”

³⁴यीशु भीड़ा जो कने चेलेयां जो अप्पु अल्ल सद्दी करी तिन्हां नैं ग्लाणा लग्गा, “जेह्ड़ा कोई मिन्जो पचांह़ औणां चांह़दा ऐ, सैह़ अपणियां इच्छां जो छड्डी करी कने अपणे दुखां कने कष्टां दिया सूल़िया चुक्की नैं, मेरे पचांह़ चली पोयैं।

³⁵क्जोकि जेह्ड़ा कोई अपणे प्राण बचाणा चांह़गा, सैह़ अपणे प्राण गुआंगा, अपर जेह्ड़ा कोई मिन्जो तांई कने सुसमाचार तांई अपणे प्राण गुआंगा, सैह़ अपणे प्राणा जो बचांगा।

³⁶जे माणु सारे संसारे जो हासल करणे तांई अपणे प्राणा जो गुआं, तां तिसियो क्या फायदा हुंगा?

³⁷माणु अपणे प्राणा दे बदले होर क्या देई सकदा ऐ?

³⁸जेह्ड़ा कोई इस ब्यभिचारी कने पापी पीढ़ी दे लोकां बिच्च मिन्जो ते कने मेरियां गल्लां ते सर्मांगा, तां मैं माणुये दा पुत्तर भी जाह़लू पवित्र सुअर्गदूतां कने अपणे पिता दी महिमा सौगी ओंगा, ताह़लू तिसते भी सर्मांगा।”