Read Kangri मरकुस 9 Bible Online

मरकुस 9 - Kangri bible

मरकुस 9

¹कने यीशुयैं तिन्हां जो ग्लाया, “मैं तुहां नैं सच्च ग्लांदा ऐ, कि जेह्ड़े ऐत्थु खड़ोत्यो हन, इन्हां च कुच्छ-कुच्छ ऐदेय हन, कि जाह़लू तिकर परमात्मे दे राज्जे जो सामर्था सौगी ओंदेयां दिक्खी नीं लैन, ताह़लू तिकर मौत्त तिन्हां पर कदी नीं ओंगी।”

²छिं दिनां दे बाद यीशु, पतरस, याकूब, कने यूहन्ने जो अप्पु सौगी इक्क सुनसाण जगाह च कुसी ऊचे प्हाड़े पर लेई गेआ। औत्थू तिन्हां सामणै तिसदा रूप बदली गेआ,

³कने तिसदे कपड़े ऐदेय चमकणा लग्गे, कने इतणे चिट्टे होई गै, कि धरतिया दा धोबी भी इतणे चिट्टे नीं करी सकदा था।

⁴कने चेलेयां जो पराणे जमाने दे दो भविष्यवक्ता मूसा कने एलिय्याह यीशु सौगी गल्लां करदे दुस्से।

⁵एह़ सब दिक्खी करी पतरस यीशुये नैं ग्लाणा लग्गा, “हे गुरू, अहां दा ऐत्थु रैहणा ठीक ऐ; इसतांई अहां ऐत्थु त्रै तम्बू बणाई लैंदे; इक्क तुहां तांई, इक्क मूसा तांई, कने इक्क एलिय्याह तांई।”

⁶क्जोकि पतरस नीं जाणदा था कि क्या जवाब दैं, इसतांई कि सैह़ बड़े डरेयो थे।

⁷ताह़लू चाणचक इक्की बदल़ैं प्रगट होई नैं तिन्हां जो ढक्की लेआ, कने तिस बदल़े च परमात्मे दी एह़ उआज़ आई, “एह़ मेरा प्यारा पुत्तर ऐ, इसदी सुणा।”

⁸ताह़लू चेलेयां चाणचक चौंन्नी पास्सेयां नजर फेरी, कने यीशुये जो छड्डी नैं होर कुसी जो नीं दिख्या।

⁹प्हाड़े ते लौंदिया बेल्ला यीशुयैं तिन्हां चेलेयां जो हुक्म दित्ता, “जाह़लू तिकर मैं माणु दा पुत्तर मरेयां ते जिन्दा नीं होई जां, ताह़लू तिकर जेह्ड़ा कुच्छ तुहां दिख्या ऐ सैह़ कुसी नैं मत दस्सदे।”

¹⁰चेलेयां इसा गल्ला जो याद रखेया; कने अप्पु च सवाल जवाब करणा लग्गे, “कि मरी नैं भिरी जिन्दा होणे दा क्या मतलब होई सकदा ऐ?”

¹¹कने चेलेयां यीशुये ते पुछया, “सास्त्री क्जो ग्लांदे हन कि मसीह दे ओणे ते पैहल्ले एलिय्याह दा औणां जरूरी ऐ?”

¹²यीशुयैं तिन्हां जो जवाब दित्ता, “एलिय्याह दा पैहल्ले औणां सच्च-बिच्च जरूरी ऐ, क्जोकि मिन्जो तांई लोकां दे मनां जो त्यार करैं, कने माणुये दे पुत्तरे दे बारे च भी पवित्रशास्त्रे च एह़ क्जो लिख्या ऐ कि सैह़ बड़े दुख झेलगा, कने सैह़ नीच गिणेयां जांगा?

¹³अपर मैं तुहां नैं ग्लांदा कि एलिय्याह तां आई चुकेया, कने जिंआं तिसदे बारे च पवित्रशास्त्रे च लिख्या ऐ, जेह्ड़ा कुच्छ तिन्हां चाया तिंआं ई तिस नैं कित्ता।”

¹⁴जाह़लू सैह़ चेलेयां अल्ल आये, तां तिन्हां क्या दिख्या कि तिन्हां चेलेयां दे चौंन्नी पास्से बड़ी भीड़ खड़ोतियो थी कने सास्त्री माणु तिन्हां नैं सवाल जवाब करा दे हन।

¹⁵जाह़लू भीड़ा दे लोकां यीशुये जो दिख्या कने बड़े हरान होणा लग्गे, कने तिसदे पास्से दौड़ी नैं तिसियो नमस्कार कित्ता।

¹⁶यीशुयैं तिन्हां ते पुछया, “तुहां इन्हां नैं क्या बैंह्स करा दे हन?”

¹⁷तां भीड़ा च इक्की माणुयैं तिसियो जवाब दित्ता, “हे गुरू, मैं अपणे जागते जो तुहां अल्ल लेई नैं आया, इस च जेह्ड़ी दुष्टआत्मा ऐ, तिन्नै इस जागते जो गूंगा करी दित्या ऐ।

¹⁸सैह़ जित्थु कुत्थी भी इसियो पकड़दी ऐ, तित्थु ई परछाड़ी दिंदी, कने एह़ मुँऐ ते झघूड़े कड्डदा ऐ, कने दंदा क्रीड़दा कने अकड़ी जांदा ऐ। मैं तेरे चेलेयां जो ग्लाया कि इसा दुष्टआत्मा जो कड्डी देआ, अपर एह़ तां कड्डी नीं सके।”

¹⁹एह़ सुणी नैं यीशुयैं तिन्हां जो जवाब देई नैं ग्लाया, “हे बेबसुआसियो, मैं काह़लू तिकर तुहां सौगी रैंह्गा? कने काह़लू तिकर तुहां दी झेलगा? इसियो मिन्जो अल्ल लेयोआ।”

²⁰ताह़लू लोक जागते जो यीशु अल्ल लेई आये; कने जाह़लू दुष्टआत्मा यीशुये जो दिख्या, तां तिन्नै दुष्टआत्मा जागते जो मरोड़ेया; कने भुइआं पेई गेआ, कने मुँऐ ते झघूड़ चली पेआ, कने जमीना पर लम्लेटां मारणा लग्गा।

²¹यीशुयैं तिस जागते दे बुढ़े ते पुछया, “इसदा एह़ हाल काह़लू ते ऐ?” तिन्हीं ग्लाया, “बचपणे ते।

²²तिन्नै दुष्टआत्मा इसियो कदी अग्गी च कने कदी पांणिये च सट्टी करी नास करणे दी कोसस कित्ती; अपर जे तू कुच्छ करी सकदा ऐ, तां अहां पर तरस खाई नैं अहां दी मदत कर।”

²³यीशुयैं तिस नैं ग्लाया, “जे तू करी सकदा ऐ, एह़ क्या गल्ल ऐ? परमात्मे पर बसुआस करणे आल़ेआं तांई सब कुच्छ होई सकदा ऐ।”

²⁴जागते दे बुढ़ैं तिसी बग्त गिड़गिड़ाई नैं ग्लाया, “हे प्रभु मैं बसुआस करदा ऐ कि तुहां मिन्जो पर दया करी सकदे हन। अपर मेरे बेबसुआसे जो दूर करी देआ।”

²⁵जाह़लू यीशुयैं दिख्या कि लोकां दी भीड़ होर बधदी जा दी ऐ, तां तिन्हीं दुष्टआत्मा जो झिड़की नैं ग्लाया, “हे गूंगा कने टौणा करणे आल़ी दुष्टआत्मा मैं तिज्जो हुक्म दिंदा ऐ, इस जागते दे अंदरे ते निकल़ी जा, कने भिरी कदी इस च मत ओंदी।”

²⁶ताह़लू दुष्टआत्मा चींड मारी कने जागते जो बड़ा मरोड़ी नैं निकल़ी गेई। कने जागत मरेयां साइआं होई गेआ, ऐत्थु तिकर कि लोक ग्लाणा लग्गे, कि एह़ मरी गेआ।

²⁷अपर यीशुयैं तिसदा हत्थ पकड़ी नैं तिसियो ठुआल़ेया, कने सैह़ उठी खड़ोता।

²⁸जाह़लू यीशु कने तिसदे चेले बापस घरे जो आये तां तिसदेयां चेलेयां तिसते पड़दे नैं पुछया, “अहां तिसा दुष्टआत्मा जो क्जो नीं कड्डी सके?”

²⁹यीशु चेलेयां नैं ग्लाणा लग्गा, “इसा किस्मा दी दुष्टआत्मा जो सिर्फ ब्रते सौगी प्रार्थना करी नैं ई कड्डी सकदे हन।”

³⁰भिरी यीशु कने तिसदे चेले तित्थु ते चली पै, कने गलील प्रदेसे ते होई नैं जा दे थे। सैह़ चांह़दा था कुसियो पता ना लग्गैं,

³¹क्जोकि यीशु अपणे चेलेयां जो सिक्षा देई नैं जो ग्लांदा था, “मैं माणुये दा पुत्तर, माणुआं दे हत्थे च पकड़ुआया जाणा, कने सैह़ मिन्जो मारी दिंगे; अपर मरने दे त्रीं दिनां बाद मैं भिरी मरेयां ते जिन्दा होई जांगा।”

³²अपर एह़ गल्ल चेलेयां दिया समझा च नीं आई, कने सैह़ तिसते इस बारे च पुछणे ते डरदे थे।

³³भिरी यीशु कने तिसदे चेले कफरनहूम सैहरे च आये; कने घरैं आई नैं तिन्हीं चेलेयां ते पुछया, “रस्ते च तुहां कुसा गल्ला पर बैंह्स करा दे थे?”

³⁴सैह़ चुप रैह्, क्जोकि रस्ते च सैह़ अप्पु च एह़ बैंह्स करा दे थे, कि अहां च बड्डा कुण ऐ।

³⁵ताह़लू यीशुयैं बेई नैं बारांह चेलेयां जो सद्देया कने तिन्हां नैं ग्लाया, “जे कोई बड्डा होणा चांह़दा ऐ, तां सैह़ सबना ते लोक्का कने सारेयां दा दास बणैं।”

³⁶कने यीशुयैं इक्की जागते जो लेई नैं तिन्हां दे बिच्च खरेड़ी दित्ता, कने तिसियो मूड़ै लेई नैं तिन्हां चेलेयां जो ग्लाया,

³⁷“जेह्ड़ा कोई ऐदेय जागते जो मेरे नांऐ ते अपनांदा ऐ, सैह़ मिन्जो अपनांदा ऐ, कने जेह्ड़ा कोई मिन्जो अपनांदा ऐ, सैह़ मिन्जो ई नीं, अपर मेरे घल्लणे आल़े जो भी अपनांदा ऐ।”

³⁸ताह़लू यूहन्ना नांऐ दे चेला यीशुये नैं ग्लाणा लग्गा, “हे गुरू, अहां इक्की माणुयैं जो तेरे नांऐ ते दुष्टआत्मां जो कड्डदे दिख्या कने अहां तिसियो रोकणे दी कोसस कित्ती, क्जोकि सैह़ अहां साइआं तुहां दा चेला नीं था।”

³⁹यीशुयैं ग्लाया, “तिसियो मत रोका; क्जोकि जेह्ड़ा माणु मेरे नांऐ ते सामर्थी दे कम्म करदा ऐ, सैह़ इतणी तौल़ी मेरी बुराई नीं करी सकदा,

⁴⁰क्जोकि जेह्ड़ा अहां दा बरोधी नीं ऐ, सैह़ अहां सौगी ऐ।

⁴¹जेह्ड़ा कोई इक्क ग्लास पांणिये दा तुहां जो एह़ समझी नैं पियां कि तुहां मसीह दे हन, तां मैं तुहां नैं सच्च ग्लांदा ऐ कि तिन्हां जो तिन्हां दा प्रतिफल़ जरूर मिलणा ऐ।”

⁴²यीशुयैं ग्लाया, “इक्क माणु जेह्ड़ा बसुआसे च मजबूत ऐ कने सैह़ बसुआसे च कमजोर माणुये ते पाप करवांदा ऐ, तिसियो परमात्मा सज़ा दिंगा, अपर परमात्मे दिया खतरनाक सज़ा ते एह़ खरा ऐ कि इक्क बड्डे घराटे दा पुड़ तिसदे गल़े च लटकाई करी सैह़ समुंदरे च सट्टी दित्ता जां।

⁴³जे तेरा हत्थ हुंदे भी तिज्जो ते पाप करांदा ऐ तां तिसियो बड्डी करी सट्टी दे। डुडां होई नैं सदा दी ज़िन्दगी च प्रवेश करणा तिज्जो तांई इसते बधिया ऐ कि हत्थां हुंदेया भी तू नरके दिया अग्गी च सट्टेया जां जेह्ड़ी कदी नीं बुझदी।

⁴⁴जित्थु कीड़ा खांदा रैंह्दा ऐ, कने नीं मरदा, कने ना ई अग्ग बुझदी।

⁴⁵जे तेरा पैर हुंदे भी तिज्जो ते पाप करांदा ऐ तां तिसियो बड्डी करी सट्टी दे। लंगड़ा होई नैं सदा दी ज़िन्दगी च प्रवेश करणा तिज्जो तांई इसते बधिया ऐ कि पैरां हुंदेया भी तू नरके दिया अग्गी च सट्टेया जां।

⁴⁶जित्थु कीड़ा खांदा रैंह्दा कने नीं मरदा, कने ना ई अग्ग बुझदी।

⁴⁷कने जे तेरी अख हुंदे भी तिज्जो ते पाप करवांदी ऐ तां तिसायो कड्डी करी सट्टी दे। काणा होई नैं परमात्मे दे राज्जे च प्रवेश करणा तिज्जो तांई इसते बधिया ऐ कि दूँ अखीं हुंदेया भी तू नरके दिया अग्गी च सट्टेया जां।

⁴⁸जित्थु कीड़ा खांदा रैंह्दा कने नीं मरदा, कने ना ई अग्ग बुझदी।

⁴⁹क्जोकि हर इक्क माणु अग्गी दे जरिये परखेया जांगा। जिंआं खाणे च लूणै दा सुआद चखेया जांदा ऐ।

⁵⁰लूण इक्क खरी चीज्ज ऐ, अपर जे लूणै दा लूणकापन चली जां, तां तिसियो कुसा चीज्जा नैं लूणका करगे? इसतांई अपणे आप्पे च लूणकापन रखा, कने अप्पु च मेल-जोल करी नैं रेह्आ।”