Read Kangri लूका 1 Bible Online

लूका 1 - Kangri bible

लूका 1

¹लूका लिखदा ऐ, हे श्रीमान थियुफिलुस जी, इसतांई कि मतेआं तिन्हां गल्लां जो जेह्ड़ियां अहां दे बिच्च होईयां थियां, इतिहास लिखणे च अहां दा साथ दित्या,

²जिंआं कि सैह़ माणु पैहल्ले ते ई इन्हां गल्लां जो अपणिया अखीं नैं दिक्खणे आल़े कने वचनां दे दास थे, तिन्हां एह़ गल्लां अहां तिकर पज्जाईयां।

³तां मिन्जो भी एह़ ठीक लग्गा कि तिन्हां सारियां गल्लां दा पूरा हाल सुरू ते ठीक-ठीक जांच परख करणे दे बाद ई तिन्हां जो इक्क-इक्क करी नैं तुहां तांई लिखें।

⁴कने मैं एह़ तां लिखा दा ऐ, कि तू जाणी लैं, जिन्हां गल्लां दी तैं सिक्षा पाईयो ऐ, कितणियां सच्च हन।

⁵एह़ तिस बग्ते दी गल्ल ऐ, जाह़लू यहूदिया प्रदेसे च हेरोदेस राजे दा राज्ज था, तां तित्थु जकरियाह नांऐ दा इक्क याजक था, सैह़ कने तिसदी लाड़ी दोयो हारून दे वंशे दे थे, कने तिसदिया लाड़िया दा नां इलीशिबा था।

⁶जकरियाह कने इलीशिबा परमात्मे सामणै बड़े धर्मी थे, कने परमात्मे दे सारे हुक्मां कने विधिया पर सिध्धे मने नैं चलणे आल़े थे।

⁷अपर तिन्हां दी कोई भी औलाद नीं थी, क्जोकि इलीशिबा बाँझ थी, कने सैह़ दोयो जबरे थे।

⁸इक्क दिन जकरियाह अपणिया मंडल़िया सौगी परमात्मे सामणै याजके दा कम्म करदा था।

⁹तां याजकां दिया रीतिया मताबक तिसदे नांऐ पर चिठ्ठी निकल़ी कि प्रभु दे मंदरे च जाई नैं धूप बाल़।

¹⁰कने धूपे बाल़णे दे बग्त अराधना करणे आल़े लोकां दी सारी मंडल़ी मंदरे दे अँगणे च प्रार्थना करा दी थी।

¹¹तां तिसदे सामणै परमात्मे दा इक्क सुअर्गदूत धूप बाल़णे आल़िआ वेदिया दे सज्जे पास्से खड़ोत्या तिसियो दुस्सेया।

¹²जकरियाह तिसियो दिक्खी नैं विजकेया कने बड़ा डरणा लग्गा।

¹³अपर सुअर्गदूतैं तिस नैं ग्लाया, “हे जकरियाह, डरें मत क्जोकि परमात्मे तेरी प्रार्थना सुणी लेईयो ऐ; कने तेरिया लाड़िया इलीशिबा ते तिज्जो तांई इक्क जागत पैदा होणा, कने तू तिसदा नां यूहन्ना रखेयां।

¹⁴तिसदे पैदा होणे पर तुहां तां खुस होणा ऐ अपर होर लोक भी खुस हुंगे।

¹⁵क्जोकि सैह़ परमात्मे दिया नजरा च म्हान हुंगा, कने अंगूरा दा रस कने सराब कदी नीं पींगा; कने अपणिया माँऊ दे पेटे ते ई पवित्र आत्मा दिया सामर्थी नैं भरोई जांगा।

¹⁶कने सैह़ इस्राएलियां दे मतेआं लोकां जो तिन्हां दे प्रभु परमात्मे दे पास्से फेरगा।

¹⁷कने परमात्मे दे भविष्यवक्ता एलिय्याह साइआं आत्मा कने सामर्थी च भरोई नैं तिसदे गांह-गांह चलगा कि माँ-बुढ़ेआं दा मन अपणे बाल बच्चेयां दे पास्से फेरी दे; कने हुक्म नीं मन्नणे आल़ेआं जो धर्मियां साइआं समझ दैं; तांजे प्रभु तांई इक्क खरी मानस जात त्यार होई सकैं।”

¹⁸तां जकरियाह सुअर्गदूते ते पुछया, “इसा गल्ला जो मैं किंआं मन्नी लैं, क्जोकि मैं कने मेरी लाड़ी जबरे होई गियो हन।”

¹⁹सुअर्गदूते तिसियो जवाब दित्ता, “मेरा नां जिब्राईल ऐ, जेह्ड़ा परमात्मे सामणै खड़ोई रैंह्दा ऐ। परमात्मे मिन्जो तिज्जो अल्ल एह़ सुसमाचार सणाणे जो घल्लेया ऐ।

²⁰दिक्ख, जाह़लू तिकर एह़ गल्लां पूरियां नीं होई जान, ताह़लू तिकर तू गूंगा रैंह्गा कने ग्लाई नीं सकगा, क्जोकि तैं मेरियां गल्लां दा बसुआस नीं कित्ता, जेह्ड़ियां कि अपणे बग्ते पर पूरियां हुंगियां।”

²¹जेह्ड़े लोक मंदरे दे अँगणे च जकरियाह जो निहालणा खड़ोत्यो थे सैह़ सोचणा लग्गे कि जकरियाह जो मंदरे च इतणी देर क्जो लग्गी?

²²जाह़लू सैह़ बाहरेयो आया, तां सैह़ तिन्हां जो सणकां लगाणा लग्गा, क्जोकि सैह़ ग्लाई नीं सकदा था, सैह़ सब बाहर खड़ोत्यो माणु जाणी गै कि मंदरे अंदर जरूर इसियो कुसकी दे दर्शन होएयो हन।

²³जाह़लू तिसदी सेवा करणे दे दिने पूरे होई गै, तां यरूशलेम सैहरे जो छड्डी नैं अपणे घरेयो चली गेआ।

²⁴कुच्छ दिनां बाद तिसदी लाड़ी इलीशिबा गर्भवती होई; अपर सैह़ पंज मीहने तिकर अपणे घरे अंदर ई रेई।

²⁵कने तिन्नै अपणे मने च सोचेया कि, “लोकां च मेरी बदनामी दूर करणे तांई, परमात्मैं इन्हां दिनां च दयादृष्टि करी नैं मिन्जो तांई इआं कित्या ऐ।”

²⁶जाह़लू इलीशिबा जो छेमां मीहना लगेया, तां परमात्मे जिब्राईल सुअर्गदूते जो, गलील प्रदेस दे नासरत सैहर च, मरियम नांऐ दिया इक्की कुआरिया कुड़िया अल्ल घल्लेया।

²⁷कने मरियमा दी मंगणी यूसुफ नांऐ दे माणुये नैं होईयो थी, जेह्ड़ा कि राजा दाऊदे दे खानदाने दा था।

²⁸सुअर्गदूतैं तिसा अल्ल जाई करी ग्लाया, “मरियम तिज्जो मेरा नमस्कार। तिज्जो पर परमात्मे दी दया होई ऐ कने सैह़ तिज्जो सौगी ऐ।”

²⁹सुअर्गदूते दी एह़ गल्ल सुणी करी मरियम घबराई गेई, कने सोचणा लग्गी कि इसा गल्ला दा क्या मतलब ऐ?

³⁰सुअर्गदूते तिसा जो ग्लाया, “हे मरियम; घबरा मत, क्जोकि परमात्मे दी दया तिज्जो पर होई ऐ।

³¹कने सुण, तू गर्भवती हुंगी, कने इक्क जागत जम्मगी; तू तिसदा नां यीशु रखेयां।

³²सैह़ म्हान हुंगा, कने परम प्रधान परमात्मे दा पुत्तर हुंगा। कने प्रभु परमात्मे तिसियो तिसदे पूर्वज दाऊद राजे साइआं राजा बणांगा।

³³कने सैह़ याकूब दे घराने पर सदा राज्ज करगा; कने तिसदे राज्जे दा अन्त नीं होणा।”

³⁴ताह़लू मरियम सुअर्गदूते नैं ग्लाणा लग्गी, “एह़ किंआं होई सकदा ऐ? मैं तां कुआरी ऐ।”

³⁵सुअर्गदूते तिसा जो जवाब दित्ता, “पवित्र आत्मा कने परम प्रधान परमात्मे दी सामर्थ तिज्जो पर बणी रैहणी ऐ; इसतांई सैह़ जागत जेह्ड़ा तिज्जो ते पैदा होणे आल़ा ऐ, सैह़ पवित्र कने परमात्मे दा पुत्तर होणा।

³⁶होर क्या ग्लां, सुण, तेरी रिस्तेदार इलीशिबा, जिसा जो लोक बाँझ ग्लांदे थे, गर्भवती ऐ कने तिसा जो छेमां मीहना लगेया ऐ।

³⁷क्जोकि जेह्ड़ा वचन परमात्मे दे पास्से ते हुंदा ऐ, तिस वचने मताबक परमात्मा सब कुच्छ करी सकदा ऐ।

³⁸मरियमा ग्लाया, सुण, मैं प्रभु दी दासी ऐ, जिंआं प्रभु चांह़दा तिंआं ई मिन्जो तांई होयैं।” ताह़लू सुअर्गदूत तित्थु ते चली गेआ।

³⁹कुच्छ दिनां बाद मरियम त्यार होई करी झटपट प्हाड़ी लाक्के दे यहूदा प्रदेसे दे इक्की सैहरे जो गेई,।

⁴⁰कने जकरियाह दे घरे च पुज्जी करी इलीशिबा जो नमस्कार कित्ता।

⁴¹जिंआं ई इलीशिबा मरियमा दा नमस्कार ग्लांदे सुणेयां, तिंआं ई बच्चा तिसदे पेटे च उटकया, कने इलीशिबा पवित्र आत्मा नैं भरोई गेई।

⁴²सैह़ जोरे नैं मरियमा जो ग्लाणा लग्गी, “तू सारियां जणासा च धन ऐ, कने धन ऐ सैह़ बच्चा जिसियो तू जन्म दैणे आल़ी ऐ।

⁴³मैं अपणे आप्पे जो बड़ी भाग्यवान समझदी ऐ, कि मेरे प्रभु दी माँ मेरे घरेयो आईयो ऐ,

⁴⁴सुण, जिंआं तेरे नमस्कारे दा सब्द मेरे कन्नां च पेआ, तां तिंआं ई बच्चा मेरे पेटे च खुसिया नैं उटकी पेआ।

⁴⁵धन ऐ, तू कि जिन्नै परमात्मे दियां गल्लां पर बसुआस कित्ता कि जेह्ड़ियां भी गल्लां सुअर्गदूतैं तिज्जो नैं ग्लाईयां, सैह़ जरूर पूरी हुंगिया।”

⁴⁶ताह़लू मरियमा ग्लाया, “मैं प्रभु दी तारीफ करदी ऐ।

⁴⁷कने मैं, मेरा उद्धार करणे आल़े परमात्मे च खुस ऐ,

⁴⁸क्जोकि परमात्मे अपणिया दासिया दी दीनता पर दयादृष्टि कित्ती ऐ। इसतांई सुणा, अज्जे ते बाद सारे जुगा दे लोक मिन्जो धन ग्लांगे।

⁴⁹क्जोकि सर्वशक्तिमान परमात्मे मिन्जो तांई बड़े-बड़े कम्म कित्ते हन। कने तिसदा नां पवित्र ऐ,

⁵⁰जेह्ड़े परमात्मे दा डर मनदे तिन्हां पर तिसदी दया पीढ़ी ते पीढ़ी तिकर बणी रैंह्दी ऐ।

⁵¹तिन्हीं बड्डे-बड्डे सामर्थी दे कम्म कित्ते, कने जेह्ड़े अपणे आप्पे पर घमंड करदे हन, सैह़ दीन कित्ते जांगे।

⁵²परमात्मे राजेयां जो राजगद्दी ते हटाई दित्ता; कने दीनां दा आदर कित्ता।

⁵³तिन्हीं भुखेयां भाणेयां जो खरियां चीज्जां नैं रज्जाया, कने अमीरां जो खाली हत्थ कड्डी दित्ता।

⁵⁴तिन्हीं अहां दे पूर्वजां नैं कित्यो वादे जो याद करी नैं, अपणे इस्राएल देसे दे लोकां जो सम्भाल़ी लेआ।

⁵⁵परमात्मे दा कित्या वादा अब्राहमे कने तिसदे वंशे पर सदा रैंह्गा, जेह्ड़ा तिन्हीं अहां दे पूर्वजां नैं कित्या था।”

⁵⁶मरियम कोई त्रै मीहने तिकर इलीशिबा सौगी रेई करी अपणे घरेयो बापस चली आई।

⁵⁷जाह़लू इलीशिबा दे प्रसूता होणे दे दिन पूरे होये, तां तिन्नै जागते जो जन्म दित्ता।

⁵⁸तिसादे नेह्ड़ प्ड़ेस कने रिस्तेदारां एह़ सुणी करी बड़े खुस होये, कि प्रभुयैं तिसा पर दया कित्ती ऐ।

⁵⁹कने एह़ होएया कि जाह़लू सैह़ अठमैं दिने जागते दा खतणा करणा आये। कने तिसदा नां भी तिसदे बुढ़े दे नांऐ पर जकरियाह रखणा लग्गे।

⁶⁰अपर जागते दिया माँऊ इलीशिबा ग्लाया, “ना - ना इसदा नां यूहन्ना रखणा।”

⁶¹तिन्हां तिसा नैं ग्लाया, “तेरे खानदाने च तां कुसी दा भी नां यूहन्ना नीं ऐ।”

⁶²भिरी तिन्हां सणक लाई करी जकरियाह ते पुछया कि तू इसदा नां क्या रखणा चांह़दा ऐ?

⁶³जकरियाह लिखणे जो पट्टी मंगवाई करी, तिसदा नां यूहन्ना लिखी दित्ता। एह़ दिक्खी नैं सब हरान होई गै।

⁶⁴कने तिसी बग्त तिसदा मुँ कने जीभ भी खुली गेई; सैह़ ग्लाणा लग्गी पेआ कने परमात्मे दा धन्यावाद करणा लग्गा।

⁶⁵एह़ सब दिक्खी करी तिसदे अड़ेसी प्ड़ेसी हरान होई नैं डरणा लग्गे; कने एह़ गल्ल पूरे यहूदिया प्रदेसे दे सारे प्हाड़ी लाक्के च फैली गेई,

⁶⁶कने सारियां गल्लां जो सुणने दे बाद माणु अपणे-अपणे मने च बचार करी नैं ग्लाणा लग्गे, “एह़ जागत कदेया हुंगा?” क्जोकि प्रभु दी सामर्थ इस सौगी थी।

⁶⁷तिस बच्चे दा बुढ़ा जकरियाह पवित्र आत्मा नैं भरोई करी, भविष्यवाणी करणा लग्गा।

⁶⁸“इस्राएल देसे दे प्रभु परमात्मे दी स्तुति होयैं, क्जोकि तिन्हीं अपणेयां लोकां पर नजर कित्ती कने तिन्हां लोकां दा उद्धार कित्ता ऐ।

⁶⁹कने तिन्हीं अपणे सेवक दाऊदे दे वंशे ते अहां तांई इक्क सामर्थी उद्धार करणे आल़ा पैदा कित्ता,

⁷⁰बड़े बग्त पैहल्ले तिन्हीं अपणे पवित्र भविष्यवक्तां दे जरिये ग्लाया था, जेह्ड़े कि संसारे दे सुरू ते ई हुंदे आएयो हन,

⁷¹मतलब अहां दे दुश्मणा ते कने अहां दे सारे बैरियां दे हत्थे नैं अहां दा उद्धार कराया ऐ,

⁷²कि अहां दे पूर्वजां पर दया करी नैं अपणे पवित्र वादे जो याद करैं,

⁷³कने सैह़ वादा जेह्ड़ा तिन्हीं अहां दे पिता अब्राहमे नैं कित्या था,

⁷⁴कि सैह़ अहां जो एह़ दिंगा, कि अहां अपणे दुश्मणा दे हत्थे ते बची करी,

⁷⁵तिसदे सामणै पवित्र कने धर्मी होई करी, ज़िन्दगी भर निडर होई नैं तिसदी भक्ति करदे रैह़न।

⁷⁶हे बच्चे, तू परम प्रधान परमात्मे दा भविष्यवक्ता बणगा, क्जोकि तू परमात्मे दा रस्ता त्यार करणे तांई तिसदे गांह-गांह चलगा,

⁷⁷क्जोकि तिसदे लोकां जो उद्धार पाणे दा ज्ञान दिंगा, जेह्ड़ा कि तिसदे पापां दी माफी ते हासल हुंदा ऐ।

⁷⁸एह़ अहां दे परमात्मे दिया तिसा बड़िया दया ते हुंगा; जिंआं सूरज चमकी नैं लौ दिंदा ऐ तिंआं ई मसीह अहां तांई सुअर्गे ते ओंगा,

⁷⁹कि नेहरे कने मौत्ती दे डरे च बैठणे आल़ेआं जो जोत्ती दैं, कने अहां दे पैरां जो सांति दे रस्ते च सिध्धे चलां।”

⁸⁰कने सैह़ जागत यूहन्ना बड्डा कने आत्मा च ताकतवर हुंदा गेआ, कने इस्राएल देसे दे लोकां च सुसमाचार प्रचार करणे ते पैहल्ले सैह़ ताह़लू तिकर सुनसाण जगाह च रेह्आ।