Read Kangri लूका 10 Bible Online

लूका 10 - Kangri bible

लूका 10

¹इन्हां गल्लां ते बाद प्रभुयैं सत्तर होर चेले चुणे कने नियुक्त कित्ते, कने जिस-जिस सैहरे कने जगाह जो सैह़ अप्पु जाणे आल़ा था, तित्थु तिन्हां जो दो-दो करी नैं अप्पु ते पैहल्ले घल्ली दित्ते।

²यीशु तिन्हां नैं ग्लाणा लग्गा, “मते खेत पकी गियो हन, अपर मजदूर घट हन; इसतांई खेत दे मालके नैं विणती करा कि सैह़ अपणे खेतां दिया फसला जो बड्डणे तांई होर मजदूर घल्ली दैं।

³जा; दिक्खा, मैं तुहां जो भेड्डां साइआं भेड़ियां दे बिच्च घल्लदा ऐ।

⁴इसतांई ना बटुआ, ना झोल़ी, ना जूते लेआ; कने ना रस्ते च कुसियो नमस्कार करा।

⁵कने तुहां जिस कुसी दे भी घरे च जा, पैहल्लैं ग्ला, कि ‘तिस घरे च परमात्मे दी सांति होयैं।’

⁶जे तिस घरे च कोई माणु जेह्ड़ा परमात्मे ते सांति पाणा चांह़दा ऐ, तां सैह़ सांति तिस पर हुंगी, नीं तां तुहां अल्ल बापस आई जांगी।

⁷तुहां तिस ई घरे च परोणा बणी नैं रेह्आ, कने जेह्ड़ा कुच्छ भी तिन्हां ते मिल्लैं, सैई खा कने पीआ, क्जोकि मजदूरे जो अपणी दिहाड़ी मिलणी चाइदी; घर-घर नीं घूमणा।

⁸जिस भी सैहरे जो जा, कने तित्थु दे माणु तुहां जो रोकन, तां जेह्ड़ा कुच्छ भी तुहां सामणै रखेया सैई खा।

⁹तित्थु दे बमारां जो ठीक करा कने तिन्हां नैं ग्ला, ‘परमात्मे दा राज्ज तुहां दे नेड़े आई रेह्आ ऐ।’

¹⁰अपर जिस भी सैहरे च जा, कने तित्थु दे माणु तुहां दा आदर ना करन, तां तिन्हां दे बजारां च जाई नैं ग्ला,

¹¹‘तुहां दे सैहरे दिया धूड़ी भी, जेह्ड़ी अहां देयां पैरां च लगियो ऐ, अहां तुहां सामणै झाड़ी दिंदे हन; तमी एह़ समझी लेआ कि परमात्मे दा राज्ज तुहां दे नेड़े ओआ दा ऐ।’

¹²मैं तुहां नैं ग्लांदा ऐ, कि तिस दिन तिस देसे दे लोकां दी हालत कने सदोम देसे दे लोकां दिया हालता ते जादा खराब हुंगी।

¹³“हाय खुराजीन। कने हाय बैतसैदा सैहरे दे लोको। जेह्ड़े सामर्थी दे कम्म तुहां च कित्ते गै, जे सैह़ सूर कने सैदा दे सैहरां च कित्ते जांदे, तां लोक दरिया उढी नैं कने धूड़ी च बेई नैं तिन्हां काह़लू दा मन बदली लेआ हुंदा।

¹⁴अपर न्याय दे दिन तुहां दी हालत कने सूर कने सैदा देसां दे लोकां दी हालत जादा झेलणे जोग्गी हुंगी।

¹⁵कने हे कफरनहूम सैहर, क्या तू सुअर्गे तिकर ऊचा कित्ता जांगा? तू तां अधोलोक तिकर थल्लैं जांगा।

¹⁶जेह्ड़ा तुहां दी सुणदा ऐ, सैह़ मेरी सुणदा ऐ, कने जेह्ड़ा तुहां जो नीच समझदा ऐ, सैह़ मिन्जो नीच समझदा ऐ; कने जेह्ड़ा मिन्जो नीच समझदा ऐ; सैह़ मेरे घल्लणे आल़े जो नीच समझदा ऐ।”

¹⁷जाह़लू सैह़ सत्तर चेले खुसी मनादे बापस आये कने ग्लाणा लग्गे, “हे प्रभु तेरे नांऐ ते दुष्टआत्मां भी अहां दे बसे च हन।”

¹⁸यीशुयैं तिन्हां नैं ग्लाया, जाह़लू दुष्टआत्मां तुहां दे बसे च होईयां, “तां मैं सैताने जो बिजल़ी साइआं सुअर्गे ते पोंदा दिक्खा दा था।

¹⁹सुणा, मैं तां तुहां जो सर्पां कने डंग्गुआं जो चिल़णे दा, कने सैतान जेह्ड़ा तुहां दा दुश्मण ऐ, तिसदिया सारी सामर्थी पर हक्क दित्या ऐ; कने कुसा भी चीज्जा ते कोई नकसान नीं हुंगा।

²⁰अपर तमी इसते खुस मत होआ कि दुष्टआत्मा तुहां दे बसे च ऐ, अपर इसते खुस होआ कि तुहां दे नां सुअर्गे च लिख्यो हन।”

²¹तिसा घड़िया सैह़ पवित्र आत्मा च होई नैं खुसिया कने भरोई गेआ, कने ग्लाणा लग्गा, “हे पिता, सुअर्ग कने धरतिया दे प्रभु, मैं तेरा धन्यावाद करदा ऐ, कि तैं इन्हां गल्लां जो अक्लमंद कने समझदार माणुआं ते छुपाई नैं रखेया, कने जागतां पर प्रगट कित्ता। हाँ, हे पिता, क्जोकि तुहां जो ऐई खरा लग्गा।

²²मेरे पितैं मिन्जो सब कुच्छ दित्या ऐ; कने कोई नीं जाणदा कि पुत्तर कुण ऐ सिर्फ पिता, कने पिता कुण ऐ एह़ भी कोई नीं जाणदा सिर्फ पुत्तरे दे सिवाय, कने सैह़ जिस पर पुत्तर तिसियो प्रगट करणा चां।”

²³ताह़लू चेलेयां दे पास्से मुड़ी करी किल्ले च ग्लाया, “धन हन सैह़ अखीं, जेह्ड़ियां एह़ गल्लां जेह्ड़े तुहां दिक्खा दे हन, दिक्खदियां हन।

²⁴क्जोकि मैं तुहां नैं ग्लांदा ऐ, कि मते सारे भविष्यवक्तां कने राजेयां चाया कि जेह्ड़ियां गल्लां तुहां दिक्खा करदे हन, दिक्खन, अपर तिन्हां नीं दिक्खियां, कने जेह्ड़ियां गल्लां तुहां सुणदे हन, सुणन, अपर तिन्हां नीं सुणियां।”

²⁵कने सुणा, इक्क दिन जाह़लू यीशु लोकां जो सिक्षा दै दा था, “ताह़लू इक्क व्यवस्थापक उठेया कने एह़ ग्लाई नैं तिसदी परीक्षा करणा लग्गा, हे गुरू, सदा दी ज़िन्दगी हासल करणे तांई मैं क्या करैं?”

²⁶यीशुयैं तिस नैं ग्लाया, “मूसा दिया व्यबस्था च क्या लिख्या ऐ? तू किंआं पढ़दा कने समझदा ऐ?”

²⁷तिन्हीं जवाब दित्ता, “तू प्रभु अपणे परमात्मे नैं अपणे सारे मने कने सारे प्राण कने अपणी सारी सक्तिया कने अपणी सारिया अक्ला दे सौगी प्यार रख, कने अपणे प्ड़ेसिये नैं अप्पु साइआं प्यार रख।”

²⁸यीशुयैं तिस नैं ग्लाया, “तैं ठीक जवाब दित्ता, ऐई कर तां तू सदा दी ज़िन्दगी पांगा।”

²⁹अपर तिन्हीं अपणे आप्पे जो धर्मी ठैहराणे दी इच्छा ते यीशुये ते पुछया, “तां मेरा प्ड़ेसी कुण ऐ?”

³⁰यीशुयैं इसा गल्ला जो सुणी करी, तिसियो इक्क काहणी सुणाई, सुण “इक्क माणु यरूशलेम सैहरे ते यरीहो सैहरे जो जा दा था, ताह़लू डाकुआं पकड़ी नैं तिसदे कपड़े कने जेह्ड़ा कुच्छ तिस अल्ल था लुटी लेआ, कने मारी-जक्की नैं अधमरा छड्डी नैं चली गै।

³¹कने इआं होएया कि तिस रस्ते ते इक्क यहूदी याजक जा दा था, अपर तिसियो दिक्खी नैं तिसदे बक्खे ते निकल़ी करी चली गेआ।

³²इस तरीके नैं मंदरे दा सेवादार इक्क लेवी माणु तिसा जगाह च आया, सैह़ भी तिसियो दिक्खी नैं तिसदे बक्खे ते निकल़ी करी चली गेआ।

³³तिसते बाद भिरी सामरी जाति दा माणु तिसा जगाह ते निकल़ेया, कने तिसियो दिक्खी करी तरस आया।

³⁴तिन्हीं तिस अल्ल आई करी तिसदे जख्मां पर तेल कने दवाई लगाई नैं पट्टियां बन्नियां कने अपणे गधे पर बठाई नैं सराईं च लेई गेआ कने तिसदी सेवा कित्ती।

³⁵कने दूये दिने तिन्हीं दो दीनार[4] कड्डी नैं सराईं दे मालके जो दित्ते, कने ग्लाणा लग्गा, तिसदा लाज करैयां, कने जेह्ड़ा कुच्छ तेरा होर लगगा, सैह़ मैं बापस ओणे पर तिज्जो देई दिंगा।”

³⁶ताह़लू यीशुयैं तिसते पुछया, “हुण तेरिया समझा च जिस माणुये जो डाकुआं पकड़ेया कने लुटी लेआ था, तिन्हां त्रीनां च तिसदा प्ड़ेसी कुण होएया?”

³⁷तिन्हीं ग्लाया, “सैई जिन्हीं तिस पर दया कित्ती।” यीशुयैं तिस नैं ग्लाया, “जा, तूमी एह़ ई कर।”

³⁸जाह़लू यीशु कने तिसदे चेले रस्ते च चलेयो थे तां सैह़ इक्की ग्रांऐ च पुज्जे, तिस ग्रांऐ च मार्था नांऐ दी इक्क जणासा थी, जिन्नै तिसियो अपणे घरैं सद्दी करी तिसदा सुआगत कित्ता।

³⁹मरियम नांऐ दी तिसा दी इक्क बैहण थी सैह़ प्रभु दे चरणा च बेई करी तिसदा वचन सुणादी थी।

⁴⁰अपर मार्था अपणे घरे दे कम्मां दी बड़ी भरी फिकर करा दी थी, कने यीशु अल्ल आई नैं ग्लाणा लग्गी, “हे प्रभु, क्या तिज्जो मेरी कुच्छ भी फिकर नीं कि मेरिया बैह्णी मिन्जो घरे दे कम्मां जो करणे तांई किल्लिया छड्डी दित्ता? हुण इसा जो ग्ला कि मेरी मदत कर।”

⁴¹प्रभुयैं तिसा जो जवाब दित्ता, “मार्था, हे मार्था तू मतिआं गल्लां दी फिकर करदी कने घबरांदी ऐ।

⁴²अपर इक्क गल्ल जरूरी ऐ, कि मरियमा अप्पु तांई खरी जगाह चुणी लेई ऐ जेह्ड़ा तिसाते कोई खोई नीं सकदा।”