Read Kangri लूका 11 Bible Online

लूका 11 - Kangri bible

लूका 11

¹यीशु कुसी जगाह पर प्रार्थना करा दा था। जाह़लू सैह़ प्रार्थना करी बैठा तां तिसदे चेलेयां च इक्की चेलैं ग्लाया, “हे प्रभु, जिंआं एह़ यूहन्ना अपणे चेलेयां जो प्रार्थना करणा सखाया तिंआं ई तू अहां जो भी सखाई दे।”

²यीशु तिन्हां नैं ग्लाणा लग्गा, “जाह़लू तुहां प्रार्थना करन तां ग्ला: ‘हे अहां दे पिता, तू जेह्ड़ा सुअर्गे च ऐ, तेरा नां पवित्र मन्नेया जां, तेरा राज्ज औयें।

³अहां दी दिन भर दी रोटी हर दिन अहां जो देआ कर,

⁴कने अहां दे पापां जो माफ कर, क्जोकि अहां भी अपणे हर इक्की अपराधियै जो माफ करदे हन, कने अहां जो परीक्षा च मत पा’।”

⁵ताह़लू यीशुयैं तिन्हां नैं ग्लाया, “तुहां च कुण ऐ कि जिसदा इक्क साथी होयैं, कने सैह़ अधिया राती जो तिस अल्ल जाई करी तिस नैं ग्लां, ‘हे साथी; मिन्जो तीन रोटियां दे।

⁶क्जोकि इक्क यात्री साथी मिन्जो अल्ल आया ऐ, कने तिसियो दैणे तांई मिन्जो अल्ल कुच्छ नीं ऐ।’

⁷कने सैह़ अंदरा ते जवाब दैं, कि मिन्जो दुख मत दे; हुण तां दरवाजा बंद ऐ कने मेरा जागत मिन्जो सौगी बिस्तरे च ऐ तिस तांई मैं तिज्जो उठी नैं देई नीं सकदा?

⁸मैं तुहां नैं ग्लांदा ऐ, जे तिसदा साथी होणे पर भी तिसियो उठी नैं ना दैं, तमी तिसदी सर्म छड्डी नैं लगातार मगणे दिया बज़ाह ते तिसियो जितणी जरूरत होयैं उतणी ई उठी नैं दिंगा।

⁹कने मैं तुहां नैं ग्लांदा ऐ, कि परमात्मे ते मंगा, तां तुहां जो दित्ता जांगा। परमात्मे जो तोपगे, तां तुहां जो मिलगा। दरवाजे ठोरगे, तां तुहां तांई खोलेया जांगा।

¹⁰क्जोकि जेह्ड़ा कोई मंगदा ऐ, तिसियो मिलदा ऐ; कने जेह्ड़ा तोपदा ऐ, सैह़ पांदा ऐ; कने जेह्ड़ा दरवाजे ठोरदा ऐ, तिस तांई खोलेया जांगा।

¹¹तुहां च कोई भी ऐदेया पिता नीं हुंगा, कि जाह़लू तिसदा जागत रोटी मंगे, तां तिसियो पत्थर दैं। या मच्छी मंगे, तां मच्छी दे बदले तिसियो सर्प दैं?

¹²या अंडा मंगे तां तिसियो डंग्गु दैं?

¹³कने जाह़लू तुहां बुरे होई नैं अपणे बच्चेयां जो खरियां चीज्जां दैणा जाणदे हन, तां तुहां दा सुअर्गीय पिता भी अपणे मंगणे आल़ेआं जो पवित्र आत्मा क्जो नीं दिंगा।”

¹⁴भिरी तिन्हीं इक्क गूंगिया दुष्टआत्मां जो कड्डेया। जाह़लू दुष्टआत्मां निकल़ी गेई तां गूंगा ग्लाणा लग्गा, एह़ सब दिक्खी नैं सारे माणु हरान होये।

¹⁵अपर तिन्हां च कुच्छ माणुआं ग्लाया, “एह़ तां दुष्टआत्मां दे प्रधान बालजबूल (सैतान) दिया मदत लेई नैं दुष्टआत्मां जो कड्डदा ऐ।”

¹⁶होरनी तिसदी परीक्षा करणे तांई तिसते सुअर्गे दा इक्क नसाण मंगेया।

¹⁷अपर यीशुयैं तिन्हां दे मनां दियां गल्लां जाणी करी तिन्हां नैं ग्लाया, “जिस-जिस राजे दे राज्जे च बैर हुंदा ऐ, सैह़ राज्ज उजड़ी जांदा ऐ; कने जिस घरे च बैर हुंदा ऐ, सैह़ घर भी उजड़ी जांदा ऐ।

¹⁸जे बालजबूल (सैतान) बैरी बणी नैं अपणे लोकां च बैर पाई दैं तां तिसदा राज्ज किंआं बणी रैंह्गा? क्जोकि तुहां मेरे बारे च तां ग्लांदे हन कि एह़ सैताने दिया मदता ते दुष्टआत्मां जो कड्डदा ऐ।

¹⁹अच्छा जे मैं बालजबूल (सैताने) दिया मदता ते दुष्टआत्मां जो कड्डदा ऐ, तां तुहां दी औलाद कुसदी मदत लेई नैं कड्डदे हन? इसतांई सैह़ ई तुहां दा न्याय करगे।

²⁰अपर जे मैं परमात्मे दी सामर्थी नैं दुष्टआत्मां जो कड्डदा ऐ, तां परमात्मे दा राज्ज तुहां अल्ल आई रेह्आ ऐ।

²¹जाह़लू ताकतवर माणु हत्थयार लेई नैं अपणे घरे दा पैहरा करदा ऐ, तां तिसदी धन दौलत बची रैंह्दी ऐ।

²²अपर जाह़लू तिसते बधी करी कोई होर ताकतवर युद्ध करी नैं जीत्ती लैंदा, तां तिसदे सैह़ हत्थयार जिन्हां पर तिसदा भरोसा था, खोई लैंदा कने तिसदिया धन दौलता लुटी नैं बंडी दिंदा ऐ।

²³जेह्ड़ा मिन्जो सौगी नीं सैह़ मेरे खलाफ ऐ, कने जेह्ड़ा मिन्जो सौगी नीं बटीणदा सैह़ रंगाड़दा ऐ।

²⁴“जाह़लू दुष्टआत्मा तिस माणुये ते निकल़ी जांदी ऐ तां सैह़ अराम करणे जो सुनसाण जगाह तोपदी फिरदी ऐ, अपर जाह़लू जगाह नीं मिलदी ताह़लू सैह़ अप्पु जो ग्लांदी ऐ, कि ‘जिस माणुये ते मैं निकल़ियो थी, भिरी तिस च चली जांगी।’

²⁵कने बापस आई नैं तिस माणुये दिया ज़िन्दगिया जो इक्क साफ सुथरा कने सजे-सजायो घरे साइआं पांदी ऐ।

²⁶ताह़लू सैह़ जाई नैं अपणे ते भी बुरी सत होर दुष्टआत्मां जो अप्पु सौगी लेई ओंदी, कने सैह़ तिस च समाई नैं वास करदी ऐ, कने तिस माणुये दी हालत पैहल्ले ते बुरी होई जांदी ऐ।”

²⁷जाह़लू यीशु एह़ गल्लां ग्ला दा ई था तां लोकां दिया भीड़ा च इक्क जणांस जोरे नैं ग्लाणा लग्गी, “धन ऐ सैह़ जणांस जिन्नै तिज्जो जन्म दित्या कने पाल़ेया पोसेया ऐ।”

²⁸तिन्हीं ग्लाया, “हाँ, अपर धन सैह़ हन जेह्ड़े परमात्मे दा वचनां जो सुणदे कने मनदे हन।”

²⁹जाह़लू लोकां दी बड़ी भीड़ किठ्ठी हुंदी जांदी थी तां सैह़ ग्लाणा लग्गा, “इस जुगे दे माणु बुरे हन, सैह़ नसाण तां पांदे हन; अपर योना भविष्यवक्ता दे नसाणां जो छड्डी नैं होर कोई नसाण तिन्हां जो नीं दित्ता जांगा।

³⁰जिंआं योना नीनवे दे लोकां तांई नसाण ठेहरैया, तिंआं ई मैं माणुये दा पुत्तर भी तिस जुगे दे लोकां तांई ठैहरगा।

³¹दक्षिण देसे दिया राणिया न्याय दे दिने इस बग्ते दे माणुआं सौगी उठी करी तिन्हां जो दोसी ठैहरांगी, क्जोकि सैह़ सुलेमाने दा ज्ञान सुणने जो धरतिया दे दूये बन्ने ते आई, कने दिक्खा, ऐत्थु सैह़ ऐ जेह्ड़ा सुलेमाने ते भी बड्डा ऐ।

³²नीनवे दे माणु न्याय दे दिने इस बग्ते दे लोकां सौगी खड़ोई नैं, तिन्हां जो दोसी ठैहरांगे; क्जोकि तिन्हां योना दा प्रचार सुणी नैं मन बदलेया कने दिक्खा, ऐत्थु सैह़ ऐ जेह्ड़ा योने ते भी बड्डा ऐ।

³³“कोई माणु दीय्ये बाल़ी करी टोकरुये थल्लैं या लकाई करी नीं रखदा अपर वरैक्टा पर रखदा ऐ कि अंदर ओणे आल़े लौई जो दिक्खन।

³⁴तेरे सरीरे दा दीय्या तेरियां अखीं हन, इसतांई एह़ जाह़लू तिकर तेरियां अखीं खरिया हन तां तेरे सारे सरीरे च लौ ऐ। अपर जाह़लू सैह़ बुरी ऐ तां तेरा सरीर भी नेहरे साइआं ऐ।

³⁵इसतांई चौकन्ने रैहणा कि जेह्ड़ी लौ तिज्जो च ऐ सैह़ बुझी नीं जां।

³⁶अपर जे तेरे सारे सरीरे च लौ ऐ तां तिसदा कोई भी हिस्सा नेहरा नीं रैंह्, तां सारे सरीरे च ऐदई लौ हुंगी, जिंआं तिस बग्त हुंदी ऐ जाह़लू दीय्या अपणिया लौई ते तिज्जो लौ दिंदा ऐ।”

³⁷जाह़लू सैह़ गल्लां करा दा था ताह़लू कुणकी फरीसियें तिस नैं विणती कित्ती कि मेरे घरैं खाणे जो पधारा। सैह़ अंदर जाई करी खाणा-खाणा बैठा।

³⁸फरीसी माणुआं जो एह़ दिक्खी नैं हरानी होई कि तिन्हां खाणा खाणे ते पैहल्लैं हत्थ नीं धोते।

³⁹प्रभुयैं तिस नैं ग्लाया, “हे फरीसी माणुओ, तुहां तिन्हां कटोरे कने थाल़िया साइआं हन, जेह्ड़ियां बाहरे ते साफ कने अंदरे ते गंदियां हन, तिंआं ई तुहां देयां मनां अंदर भी लालच कने बुराई भरोईयो ऐ।

⁴⁰हे वेअक्लेयो, जिन्हीं बाहरे दा हिस्सा बणाया ऐ, क्या तिन्हीं अंदरे दा हिस्सा नीं बणाया?

⁴¹अपर हाँ, अंदरे आल़ी चीज्जां जो दान करी देआ, तां दिक्खा, सब कुच्छ तुहां तांई खरा होई जांगा।

⁴²“अपर हे फरीसी माणुओ, तुहां पर हाय, तुहां पुदीने, कने ब्रमी दा कने हर किस्मां दे साग-सब्जियां दा दसमा हिस्सा दिंदे हन, अपर न्याय जो कने परमात्मे दे प्यारे जो टाल़ी दिंदे हन; अपर तुहां तांई खरा हुंदा कि इन्हां दून्नी गल्लां जो मनदे रैंह्दे।

⁴³हे फरीसी माणुओ, तुहां जो हाय। तुहां आराधनालयां च खास-खास आसण कने बजारां च नमस्कार चांह़दे हन।

⁴⁴हाय तुहां पर। क्जोकि तुहां तिन्हां लुकियां कब्रा साइआं हन, जिन्हां पर माणु चलदे हन, अपर नीं जाणदे।”

⁴⁵ताह़लू इक्क व्यवस्थापकें तिस जो जवाब दित्ता, “हे गुरू, इन्हां गल्लां ग्लाई नैं तू अहां दी निंदा करदा ऐ।”

⁴⁶तिन्हीं ग्लाया; “हे व्यवस्थापको तुहां जो भी हाय। तुहां मते भरी कायदे कानून बणांदे हन, जिन्हां जो लोकां तांई मन्नणा बड़ा औखा ऐ। अपर अपणे बणाएयो कायदे कानूना जो तां मन्नणे दी तां सैह़ जरा भी कोसस नीं करदे।

⁴⁷हाय तुहां पर। तुहां तिन्हां भविष्यवक्ता दी कब्रां जो तिन्हां दा आदर दैणे तांई बणांदे हन, जिन्हां जो तुहां दे ई पूर्वजां नैं मारी दित्या था।

⁴⁸कने तुहां गवाह हन, कने अपणे पूर्वजां दे कम्मां ते सेहमत हन; क्जोकि तिन्हां-तिन्हां जो मारी दित्या कने तुहां तिन्हां दियां कब्रां बणांदे हन।

⁴⁹इसतांई परमात्मे दी अक्ल भी दस्सदी ऐ, मैं तिन्हां अल्ल भविष्यवक्तां जो कने प्रेरितां जो घल्लगी, कने सैह़ तिन्हां च कुच्छना जो मारी दिंदा ऐ, कने कुच्छना जो सतांगे।

⁵⁰तांजे जितणे भी भविष्यवक्तां दा खून संसारे दी सृष्टिया ते बहाया गेआ ऐ, सारेयां दा लेखा इस जुगे दे लोकां ते लेआ जां:

⁵¹हाबिले दी हत्या ते लेई करी जकरियाह दी हत्या तिकर, जेह्ड़ा वेदी कने मंदरे दे बिच्च मारेया जांगा। मैं तुहां नैं सच्च ग्लांदा ऐ इन्हां सारेयां दा लेखा इस बग्त दे लोकां ते लेआ जांगा।

⁵²हे व्यवस्थापको हाय तुहां पर। तुहां अल्ल ज्ञान तां ऐ, इसतांई ना तां तुहां परमात्मे दे राज्जे च दाखल हुंदे कने जेह्ड़े कि इस च दाखल होणा चांह़दे हन तिन्हां जो तुहां हाजर होणा नीं दिंदे।”

⁵³जाह़लू यीशु तित्थु ते चली गेआ, तां सास्त्री कने फरीसी बुरी तरांह तिसदे पचांह़ पेई गै कने छेड़णा लग्गे कि यीशु तिन्हां दे सवालां दा जवाब दैं,

⁵⁴कने ताक्का च लग्गी रैह् कि तिसदे मुँऐ दी कोई गल्ल पकड़न।