Read Kangri लूका 12 Bible Online

लूका 12 - Kangri bible

लूका 12

¹इतणे च जाह़लू हज़ारां लोकां दी भीड़ लग्गी गेई, ऐत्थु तिकर कि सैह़ इक्की-दूये जो धक्का-मुक्की करणा लग्गी पैयो थे, ताह़लू यीशु सबना ते पैहल्ले अपणे चेलेयां नैं ग्लाणा लग्गा, “फरीसी माणुआं दे खमीरे ते मतलब झूठी सिक्षा ते चौकन्ने रैहणा।

²कुच्छ भी ढकेया नीं, जेह्ड़ा कुआड़ेया नीं जांगा, कुच्छ भी छुपेया नीं ऐ, जेह्ड़ा सामणै प्रगट नीं कित्ता जांगा।

³इसतांई जेह्ड़ा कुच्छ तुहां नेहरे च ग्लाया ऐ, सैह़ परगड़े च सुणेया जांगा, कने जेह्ड़ा तुहां अंदर कमरेयां च कन्नां कंन्न ग्लाया ऐ, सैह़ छत्ती पर चढ़ी करी प्रचार कित्ता जांगा।

⁴“मैं तुहां नैं जेह्ड़े मेरे साथी हन ग्लांदा ऐ, कि जेह्ड़े सरीरे जो मारदे हन अपर तिसते जादा होर कुच्छ नीं करी सकदे, तिन्हां ते मत डरा।

⁵मैं तुहां जो समझांदा कि तुहां जो कुसते डरणा चाइदा, मरने ते बाद जिस जो नरके च पाणे दा हक्क ऐ, तिस परमात्मे ते डरा, हाँ मैं तुहां नैं ग्लांदा तिसते डरा।

⁶क्या दो पैसेयां च पंज चिड़ियां बिकदियां हन? तमी परमात्मा तिन्हां च इक्की जो भी नीं भुलदा।

⁷परमात्मा तुहां दिया ज़िन्दगिया दी हर इक्की गल्ला दा ध्यान रखदा ऐ, ऐत्थु तिकर तिन्हीं तुहां दे सिरे दा इक्क-इक्क बाल़ गिणेयां ऐ, इसतांई डरा मत, तुहां मतिआं चिड़ियां ते बधी नैं हन।

⁸“मैं तुहां नैं ग्लांदा ऐ जेह्ड़ा कोई माणुआं सामणै मिन्जो अपनाई लैंगा तिसियो मैं माणुये दा पुत्तर भी परमात्मे दे सुअर्गदूतां सामणै अपनाई लैंगा।

⁹अपर जेह्ड़ा कोई माणुआं दे सामणै मिन्जो नकारी दिंगा, तिसियो मैं परमात्मे दे सुअर्गदूतां सामणै भी नकारी दिंगा।

¹⁰“जेह्ड़ा कोई माणुये दे पुत्तरे दे खलाफ कोई गल्ल ग्लां, तिसदा सैह़ अपराध माफ कित्ता जांगा, अपर जेह्ड़ा कोई पवित्र आत्मा दी निंदा करैं, तिसदा अपराध माफ नीं कित्ता जाणा ऐ।

¹¹“जाह़लू माणु तुहां जो आराधनालयां कने हाकमां कने अधिकारियां सामणै लेई जान, तां एह़ फिकर मत करणा कि अहां कुस तरीके नैं या क्या जवाब दिंगे कने क्या ग्लांगे।

¹²क्जोकि पवित्र आत्मा तुहां जो तिस बग्त सखाई दिंगा कि क्या ग्लाणा चाइदा।”

¹³भिरी लोकां दिया भीड़ा च इक्की माणुयैं यीशुये नैं ग्लाया, “हे गुरू, मेरे भाऊये जो ग्ला कि अहां दे बुढ़े दी जायदात मिन्जो सौगी बंडी लैं।”

¹⁴यीशुयैं तिन्हां नैं ग्लाया, “हे माणु, कुणी मिन्जो तुहां दिया जायदाता दा बंडवारा करणे आल़ा बणाया ऐ?”

¹⁵कने तिन्हीं तिन्हां नैं ग्लाया, “चौकन्ने रेह्आ, कने हर किस्मां दे लालचे ते अपणे आप्पे जो बचाई रखा; क्जोकि कुसी दी ज़िन्दगी तिसदिया धन-दौलता दिया बढ़तिया नैं नीं हुंदा।”

¹⁶यीशुयैं तिन्हां नैं इक्क उदारण ग्लाया, “कुसी अमीरे दिया जमीना च बड़ा अनाज होएया।

¹⁷ताह़लू सैह़ अपणे मने च सोचणा लग्गा, ‘मिन्जो कुच्छ पता नीं लग्गा कि मैं क्या करैं क्जोकि मिन्जो अल्ल मती जगाह नीं ऐ जित्थु मैं अपणे अनाजे जो किठ्ठा करी नैं रखैं।’

¹⁸कने तिन्हीं ग्लाया, ‘मैं जाणदा ऐ, कि मिन्जो क्या करणा चाइदा, मैं अपणे पेड़ूयां जो भेड़ी करी तिन्हां ते बड्डा बणांगा। कने तित्थु अपणा सारा अनाज कने धन दौलत रखगा;

¹⁹तिसते बाद सैह़ अपणे आप्पे नैं ग्लांगा, हे मेरे सरीर, तिज्जो अल्ल मते साल्लां तांई खाणे तांई बड़ा अनाज कने मती धन दौलत रखियो ऐ। आरामें नैं खा पी कने मौजा नैं रैह्।’

²⁰अपर परमात्मैं तिस नैं ग्लाया, ‘हे मूर्ख। इसा राती ई मैं तेरे प्राण तिज्जो ते लेई लैंगा; ताह़लू जेह्ड़ा कुच्छ तैं कठ्ठेरया सैह़ कुसदा हुंगा?’

²¹ऐई हालत तिन्हां माणुआं दी हुंदी ऐ, जेह्ड़े अपणे तांई धन दौलत किठ्ठा करदे हन, अपर सैह़ परमात्मे दिया नजरा च अमीर नीं।”

²²भिरी यीशुयैं अपणे चेलेयां नैं ग्लाया, “इसतांई मैं तुहां नैं ग्लांदा ऐ, अपणिया ज़िन्दगिया दे बारे च एह़ फिकर मत करा, कि अहां क्या खांगे; ना अपणे सरीरे दी फिकर कि क्या लगांगे।

²³क्जोकि ज़िन्दगी खाणे ते, कने सरीर कपड़ेयां ते भी जादा कीमती ऐ।

²⁴कोगलेयां पर ध्यान देआ, सैह़ ना तां बांदे हन, ना बडदे; ना तिन्हां अल्ल भण्डार कने ना तां पेड़ू हुंदा ऐ; तमी परमात्मा तिन्हां जो पाल़दा ऐ। तुहां दी कीमत इन्हां पंछियां ते भी जादा ऐ।”

²⁵तुहां च कुण ऐ, जेह्ड़ा फिकर करी नैं अपणिया उम्रा च इक्क घड़ी भी बधाई सकदा ऐ?

²⁶इसतांई जे तुहां सारेयां ते छोटा कम्म भी नीं करी सकदे, तां अपणी ज़िन्दगिया च होरनी गल्लां दी क्जो फिकर करदे हन?

²⁷जंगली फूलां दे बूटेयां पर ध्यान करा कि सैह़ किंआं बडुंदे हन। सैह़ ना मेहनत करदे, ना तां अपणे तांई कपड़े बणांदे हन। तमी मैं तुहां नैं ग्लांदा ऐ कि सुलेमान राजा भी अपणी पूरी राजपाठ आल़ी ज़िन्दगिया च इन्हां छैल़ फूलां साइआं नीं सज्जी सकेया।

²⁸इसतांई जे परमात्मैं दरबड़े दे घाऐ जो इतणा छैल़ बणाया ऐ, जेह्ड़ा अज्ज ऐ कने कल तिसियो अग्गी च फूकदे हन, भिरी भी सैह़ तिसदा इतणा जादा ध्यान रखदा ऐ। तां हे बेबसुआसियो तुहां दा सैह़ इन्हां ते भी जादा ध्यान रखगा।

²⁹कने तुहां इसा गल्ला दी फिकर मत करा, कि क्या खाणा कने क्या पीणा ऐ, कने ना शक करा।

³⁰क्जोकि संसारे दी दूईआं जातिआं दे लोक इन्हां सारियां चीज्जां दी फिकर करदे रैंह्दे हन कने तुहां दा पिता जाणदा ऐ, तुहां जो इन्हां चीज्जां दी जरूरत ऐ।

³¹अपर परमात्मे दे राज्जे दी खोज करदे रेह्आ तां एह़ चीज्जां भी तुहां जो मिल्ली जागियां।

³²“हे भेड्डां साइआं झुंड, मत डर; क्जोकि तुहां दे पिता परमात्मे तुहां जो राज्ज दैणे दी दया कित्ती ऐ।

³³अपणिया धन दौलता बेची करी दान करी देआ; अपणे तांई ऐदेय बटुए बणा जेह्ड़े पराणे नीं हुंदे, ग्लाणे दा मतलब एह़ ऐ कि सुअर्गे च इतणा धन दौलत कठ्ठेरा जेह्ड़ी घटदी नीं कने जिस अल्ल चोर नीं जांदा, कने कीड़ा नीं लगदा।

³⁴क्जोकि जित्थु तुहां दी धन दौलत ऐ, तित्थु तुहां दा मन भी लगेया रैंह्गा।

³⁵“परमात्मे दे कम्मां तांई तुहां हमेसा त्यार रेह्आ, जिंआं कम्म करणे तांई लोक कमर कसी नैं सारी रात दीय्ये बाल़ी करी त्यार रैंह्दे हन।

³⁶कने तुहां तिन्हां माणुआं साइआं बणा, जेह्ड़े अपणे मालके दे इन्तजारे च रैंह्दे हन, कि सैह़ ब्याये ते काह़लू बापस ओंगा, कि जाह़लू सैह़ आई नैं दरवाजे ठोरैं तां इकदम तिस तांई खोली दैन।

³⁷धन हन सैह़ दास, जिन्हां जो मालक बापस आई नैं इन्तजारे च जागदे दिक्खैं, मैं तिज्जो नैं सच्च ग्लांदा ऐ, कि सैह़ मालक दासां दे कपड़े पैहनी नैं तिन्हां जो खाणा खाणे तांई बठाल़गा, कने अप्पु आई नैं तिन्हां दी सेवा करगा।

³⁸जे सैह़ अधिया राती या भ्यागा दे बग्त आई नैं जागदे दिक्खैं, तां सैह़ दास धन हन।

³⁹अपर तुहां एह़ जाणी लेआ कि जे घरे दे मालके जो एह़ पता होयैं कि चोर कुस बग्त ओंगा, तां जागदा रैंह्दा, कने अपणे घरे च सेंध नीं लगणा दिंदा ऐ।

⁴⁰मेरे बापस ओणे तिकर तुहां दा त्यार रैहणा जरूरी ऐ; क्जोकि जिस बग्त दे बारे च तुहां सोचदे भी नीं, तिसी बग्त मैं माणुये दा पुत्तर बापस आई जांगा।”

⁴¹ताह़लू पतरसैं ग्लाया, “हे प्रभु क्या एह़ उदारण तैं अहां नैं ई या सबना नैं ग्ला दा ऐ।”

⁴²प्रभुयैं ग्लाया, “सैह़ बसुआसे जोग्गा कने अक्लमंद भण्डारी कुण ऐ, जिसियो मालकैं नौकरां चाकरां पर अधिकारी बणाया कि तिन्हां जो खाणे दी समग्री दैं।

⁴³धन ऐ सैह़ दास, जिसियो तिसदा मालक आई नैं इआं ई करदे दिक्खैं,

⁴⁴मैं तुहां नैं सच्च ग्लांदा ऐ, सैह़ तिसियो अपणी सारिया धन दौलता दा हक्कदार बणांगा।

⁴⁵अपर जे सैह़ दास सोचैं, कि मेरा मालक ओणे च देर करा दा ऐ, कने दासां कने दासियां जो मारणा-कुटणा लग्गैं, कने खाणा-पीणा कने पियक्कड़ होणा लग्गैं।

⁴⁶तां तिस दासे दे मालकैं ऐसें दिन औणां, जाह़लू सैह़ तिसदा इन्तजार नीं करा दा होयैं, कने ऐसें बग्तें ओंगा जिसियो सैह़ नीं जाणदा होयैं, कने तिसियो बड़ी भरी सज़ा देई नैं तिसदा हिस्सा बेबसुआसियां सौगी ठैहरांगा।

⁴⁷हर इक्क दास जेह्ड़ा अपणे मालके दी इच्छा जो जाणदा ऐ, सैह़ अपणे मालकैं तांई क्या करैं; जेह्ड़ा तिसदा दास अपणे मालके दी इच्छा पर नीं चलदा, सैह़ बड़ी मार खांगा।

⁴⁸अपर हर इक्क दास जेह्ड़ा अपणे मालके दी इच्छा जो नीं जाणदा ऐ, कि अपणे मालकैं तांई तिसियो क्या करणा ऐ; कने सज़ा पाणे जोग्गा कम्म करैं सैह़ थोड़ी मार खांगा। जिसियो बड़ा जादा दित्ता गेआ ऐ, तिसते बड़ा जादा मंगेया जांगा; कने जिस जो मता दित्ता गेआ ऐ, तिसते मता लेई लेआ जांगा।

⁴⁹“मैं धरतिया पर अग्ग लगाणा आया ऐ; कने कदेया खरा हुंदा, जे एह़ इसी बग्त होई जांदा।

⁵⁰मैं तां इक्क बपतिस्मा लैणां ऐ, जेह्ड़ा बड़े भरी खतरनाक दुखां नैं भरेया ऐ, कने जाह़लू तिकर सैह़ ना लेई लैं ताह़लू तिकर मेरा मन बेचैन रैंह्गा।

⁵¹क्या तुहां समझदे हन कि मैं धरतिया पर लोकां बिच्च मेल-जोल करवाणा आया ऐ? मैं तुहां नैं ग्लांदा ऐ; मेल-जोल करवाणा नीं, अपर लग्ग करवाणा आया ऐ।

⁵²क्जोकि जे इक्की परवारे च पंज माणु होन, तां मेरिया बज़ाह ते लग्ग कित्ते जांगे, तिन्हां च त्रै माणु जेह्ड़े मिन्जो पर बसुआस नीं करदे, तिन्हां बाक्कि दूँ माणुआं दा जेह्ड़े मिन्जो पर बसुआस रखदे हन, तिन्हां दा बरोध करणा।

⁵³पिता पुत्तरे नैं, कने पुत्तर पिता नैं बैर रखगा; माँ कुड़िया नैं, कने कुड़ी माँऊ नैं, सस्स नुमां नैं, कने नु सस्सु नैं बैर रखगी।”

⁵⁴तिन्हीं माणुआं दी भीड़ा नैं भी ग्लाया, “जाह़लू तुहां बदल़े जो पशिचम दिसा ते उठदे दिक्खदे हन, तां झट ग्लांदे हन; कि बरखा होणी, कने इआं ई हुंदा ऐ।

⁵⁵कने जाह़लू दक्षिण दिसा ते हौआ चलदिया दिक्खदे हन तां ग्लांदे हन कि लू चलगी, कने इआं ई हुंदा ऐ।

⁵⁶हे पाखंडी माणुओ, तुहां धरतिया कने अम्बरे दे लछणा दा भेत जाणी सकदे हन, अपर इस जुगे दा परमात्मा क्या करा दा ऐ, एह़ भेत क्जो करणा नीं जाणदे?

⁵⁷“तुहां जो अप्पु फैसला करणा चाइदा, कि अहां जो क्या करणा ठीक ऐ?

⁵⁸जाह़लू तुहां अपणे दुश्मणे सौगी कोट कचेहरी जो मकदमे तांई जांदे हन, तां तिस सौगी रस्ते च ई समझौता करणे दी कोसस करा, इआं ना होयैं कि सैह़ तिज्जो हाकमे अल्ल लेई जां, कने हाकम तिज्जो सपाईये दे हुआलैं करी दैं कने सपाई तिज्जो जेला च पाई दैं।

⁵⁹मैं तुहां नैं ग्लांदा ऐ, कि जाह़लू तिकर तू पाई-पाई चुकाई नीं दैं ताह़लू तिकर तित्थु ते छुटी नीं पांगा।”