Read Kangri लूका 15 Bible Online

लूका 15 - Kangri bible

लूका 15

¹सारे चुंगी लैणे आल़े कने पापी तिस अल्ल ओआ दे थे तांजे सैह़ यीशु दी सुणन।

²अपर फरीसी कने सास्त्री कुड़कुड़ाई नैं ग्लाणा लग्गे, “एह़ तां पापियां नैं मिलदा ऐ कने तिन्हां सौगी भी खांदा पींदा ऐ।”

³ताह़लू यीशुयैं तिन्हां नैं एह़ उदारण ग्लाया:

⁴“तुहां च कुण ऐ जिसदियां सौ भेड्डां होन, कने तिन्हां च इक्क गुआची जां, तां नड़ीनूयें जो सुनसाण जगाह च छड्डी नैं, तिसा गुआचिया जो जाह़लू तिकर मिल्ली नीं जां ताह़लू तिकर तोपदा नीं रैह्?”

⁵“कने जाह़लू सैह़ मिल्ली जांदी ऐ, ताह़लू सैह़ बड़िया खुसिया नैं तिसायो सिरे पर चुक्की लैंदा ऐ;

⁶कने घरैं आई नैं साथियां कने प्ड़ेसियां जो किठ्ठा करी नैं ग्लांदा ऐ, ‘मिन्जो सौगी खुसी मना, क्जोकि मेरी गुआचियो भेड्ड मिल्ली गियो ऐ।’

⁷मैं तुहां नैं ग्लांदा ऐ; कि इस तरीके नैं इक्क मन बदलणे आल़े पापिये दे बारे च भी सुअर्गे च इतणी खुसी हुंदी ऐ, जितणी कि नड़ीनूयें ऐदेय धर्मी माणुआं दे बारे च नीं हुंदी, जेह्ड़े सोचदे हन, कि अहां मन बदली करी धर्मी बणी गियो हन।

⁸“यीशुयैं इक्क होर उदारण देई नैं ग्लाया, कुण ऐदई जणांस हुंगी जिसा अल्ल दस सिक्के होन, कने तिन्हां च इक्क गुआची जां, तां सैह़ दीय्ये बाल़ी नैं कने घरे दी झाड़ चम्ब करी नैं, जाह़लू तिकर मिल्ली नीं जां जी लगाई नैं तोपदी नीं रैंह्?

⁹कने जाह़लू मिल्ली जांदा ऐ, तां सैह़ अपणी सहेलियां कने प्ड़ेसणियां जो कठ्ठेरी नैं ग्लांदी ऐ, ‘मिन्जो सौगी खुसी मना, क्जोकि मेरा सिक्का गुआची गेआ था पर हुण मिल्ली गेआ ऐ।’

¹⁰मैं तुहां नैं ग्लांदा ऐ, इस तरीके नैं मन बदलणे आल़े पापी माणु दे बारे च परमात्मे दे सुअर्गदूतां दे सामणै बड़ी खुसी मनाई जांदी ऐ।”

¹¹यीशुयैं दुवारी भिरी होर उदारण देई नैं ग्लाया, “इक्की माणुये दे दो जागत थे।

¹²तिन्हां च लोक्कें जागतैं बुढ़े नैं ग्लाया, ‘हे बापू जायदाता च जेह्ड़ा मेरा हिस्सा ऐ सैह़ मिन्जो इसी बग्त देई दे।’ तां बुढ़ैं तिन्हां दून्नी जो अपणी जायदात बराबर-बराबर बंडी दित्ती।

¹³कुच्छ दिनां बाद लोक्का जागत सब कुच्छ किठ्ठा करी नैं दूर देसे जो चली गेआ, कने तित्थु बुरे कम्मां च अपणी पूरी धन दौलत बरबाद करी दित्ती।

¹⁴जाह़लू सैह़ सब कुच्छ खर्ची बैठा, तां तिस देसे च बड़ा अकाल पेआ, कने तिस अल्ल कुच्छ भी नीं रेह्आ, कने भुखा मरना लग्गा।

¹⁵कने सैह़ तिस देसे दे इक्की माणुये दे घरैं कम्म करणे तांई गेआ, कने तिन्हीं तिसियो अपणे खेतां च सूअरां चगाणे तांई रखी लेआ।

¹⁶अपर तिसियो बड़े जोरे दी भुख लगियो थी, कने चांह़दा था कि तिन्हां फल़ियां जिन्हां जो सूअर खांदे थे, खाई नैं अपणा पेट भरैं; क्जोकि तिसियो कोई भी कुच्छ नीं दिंदा था।

¹⁷ताह़लू तिसदियां अखीं खुलियां तां सोचणा लग्गा, मेरे बुढ़े दे घरैं कितणे मजदूर कम्म करदे कने तिन्हां जो रोटी मिलदी ऐ, अपर मैं ऐत्थु भुखा मरा दा ऐ।

¹⁸मैं हुण उठी नैं अपणे बुढ़े अल्ल चलेया कने तिस नैं ग्लांगा कि बापू जी, मैंई परमात्मे दे बरोधे च कने तेरिया नजरा च पाप कित्या ऐ।

¹⁹हुण मैं तुहां दा जागत कैहलाणे जोग्गा नीं रेह्आ, मिन्जो अपणा इक्क मजदूर बणाई नैं रखी लेआ।

²⁰“ताह़लू सैह़ तिस देसे जो छड्डी करी अपणे बुढ़े अल्ल बापस चली गेआ, सैह़ अह्ल्ली दूर ई था कि तिसदे बुढ़ैं तिसियो दिक्खी करी तरस खादा, कने दौड़ी नैं अपणे जागते जो गल़े लगाया, कने बड़ा प्यार कित्ता कने चूम्मेया।

²¹जागतैं बुढ़े नैं ग्लाया, ‘बापू जी, मैं परमात्मे दे बरोधे च कने तेरिया नजरा च पाप कित्या ऐ; कने मैं तेरा जागत कैहलाणे जोग्गा नीं रेह्आ।’

²²अपर बुढ़ैं अपणे दासां नैं ग्लाया, ‘झटपट करा खरे-खरे कपड़े कड्डी नैं तिसियो पैहना, कने तिसदे हत्थे च गूठी, कने पैरां च जुतियां पैहनाआ,

²³कने पाल़ेया पैरू अंणी करी बड्डा तांजे अहां खान कने खुसी मनान।

²⁴क्जोकि मैं एह़ सोचेया था कि मेरा जागत मरी गेआ, मरेया नीं अपर गुआची गेआ था, जेह्ड़ा हुण मिल्ली गेआ ऐ।’ कने सैह़ सारे तिसदे मिलणे दी खुसी मनाणा लग्गे।

²⁵“तिस बग्त तिसदा बड्डा जागत खेतां च था। जाह़लू सैह़ ओंदे-ओंदे घरे अल्ल पुज्जया, तां तिन्हीं गाणे बजाणे कने नचणे दी उआज़ सुणी।

²⁶तिन्हीं इक्की दासे जो सद्दी नैं पुछया, ‘एह़ क्या होआ दा ऐ?’

²⁷तिन्हीं तिस नैं ग्लाया, ‘तेरा लोक्का भाऊ घरेयो बापस आईआ ऐ,’ कने तेरे बुढ़ैं पाल़ेया पैरू बड्डाया ऐ, ‘क्जोकि तिसियो सैह़ सही सलामत मिल्ला ऐ।’

²⁸एह़ सुणी नैं सैह़ गुस्से नैं भरोई करी अंदर जाणा लग्गा, तां तिसदा बुढ़ा बाहर आई नैं तिसियो मनाणा लग्गा।

²⁹तिन्हीं बुढ़े जो जवाब दित्ता, ‘दिक्ख, मैं इतणे साल्लां ते तेरी सेवा करा दा ऐ, कने कदी भी तेरा हुक्म नीं टाल़ेया, तमी तैं मिन्जो कदी भी पैरू दा बच्चा बड्डणा नीं दित्ता, कि मैं अपणे साथियां सौगी खुसी मना।

³⁰अपर जाह़लू तेरा एह़ जागत, जिन्हीं तेरी सारी धन दौलत वैश्यां च बरबाद करी आया तां तिस तांई तुहां पाल़ेया पैरू बड्डाया।’

³¹तिन्हीं तिस नैं ग्लाया, ‘मेरे जागता, तू तां हमेसा मिन्जो सौगी ऐ; कने जेह्ड़ा कुच्छ मेरा ऐ सैह़ सब तेरा ई ऐ।

³²अपर अहां जो हुण खुसी मनाणा कने खुस होणा चाइदा क्जोकि मैं एह़ सोचेया था कि मेरा जागत मरी गेआ; मरेया नीं अपर गुआची गेआ था, जेह्ड़ा हुण मिल्ली गेआ ऐ।’ ”