Read Kangri लूका 16 Bible Online

लूका 16 - Kangri bible

लूका 16

¹यीशुयैं भिरी इक्क होर उदारण अपणे चेलेयां नैं ग्लाया, “कुसकी अमीरे दा इक्क भण्डारी था, कने लोकां तिसदे सामणै एह़ इल्जाम लगाया कि सैह़ तेरी सारी धन दौलत बरबाद करी दिंदा ऐ।

²कने तिन्हीं तिसियो सद्दी नैं ग्लाया, ‘एह़ क्या ऐ जेह्ड़ा मैं तेरे बारे च सुणा दा ऐ? अपणे भण्डारी खाते दा हसाब कताब दस्स, क्जोकि तू गांह जो भण्डारी नीं रेई सकदा।’

³ताह़लू भण्डारी सोचणा लग्गा, ‘हुण मैं क्या करैं? क्जोकि मेरा मालक हुण भण्डारिये दे कम्मे ते मिन्जो कड्डा दा ऐ। जमीना च तां खड्डे मिन्जो ते खुणी नीं होणे; कने भिख मगणे च मिन्जो सर्म ओंदी ऐ।

⁴हुण मैं समझी गेआ, कि मैं क्या करगा, तांजे जाह़लू ते मैं भण्डारिये दा कम्म छड्डगा तां लोक मिन्जो अपणे घरे च रखी लैन।’

⁵ताह़लू तिन्हीं अपणे मालके दे दैणदारां जो इक्क -इक्क करी नैं सद्देया कने पैहल्ले ते पुछया, ‘तिज्जो पर मेरे मालक दा कितणा कर्ज ऐ?’

⁶तिन्हीं ग्लाया, ‘सौ मण तेल,’ ताह़लू तिन्हीं तिस नैं ग्लाया, अपणे खाते पकड़ कने बेई नैं झटपट पजांह़ लिखी दे।

⁷भिरी तिन्हीं दूये ते पुछया, ‘तिज्जो पर कितणा कर्ज ऐ?’ तिन्हीं ग्लाया, ‘सौ मण कणक,’ ताह़लू तिन्हीं तिस नैं ग्लाया, ‘तूमी अपणे खाते पकड़ कने अस्सी लिखी दे।’

⁸“मालकैं तिस अधर्मी भण्डारिये जो साबासी दित्ती, कि तिन्हीं चलाकिया दा कम्म कित्ता ऐ। क्जोकि इस संसारे दे लोक अपणे बग्ते दे लोकां सौगी अपणे सभावे च जोतिया दे लोकां ते जादा चलाक हन।

⁹यीशुयैं ग्लाया, मैं तुहां नैं ग्लांदा ऐ कि संसारिक धन-दौलता नैं अपणे तांई साथी बणाई लेआ, तांजे जाह़लू तुहां दे मरने दे बाद धन-दौलत मुक्की जांगी तां सैह़ सदा दी रैहणे आल़े घरे च तुहां दा सुआगत करगे।

¹⁰जेह्ड़ा थोड़े ते थोड़े च ईमानदार ऐ, सैह़ मते च भी ईमानदार ऐ। कने जेह्ड़ा थोड़े ते थोड़े च बेइमान ऐ, सैह़ मते च भी बेइमान ऐ।

¹¹इसतांई जाह़लू तुहां बेइमानी दी धन दौलता च ईमानदार नीं ठैह़रन, तां ईमानदारी दी धन दौलत तिज्जो कुण दिंगा।

¹²कने जे तुहां पराये दी धन दौलता च ईमानदार नीं ठेहरै तां जेह्ड़ा तुहां दा ऐ, तिसियो तुहां जो कुण दिंगा?

¹³“कोई भी दास दूँ मालकां दी सेवा नीं करी सकदा, क्जोकि सैह़ तां इक्की मालके नैं बैर कने दूये नैं प्यार रखगा; या इक्की नैं मिल्लेया रैंह्गा कने दूये जो घटिया समझगा। कने तिंआं ई तुहां परमात्मे दी कने धन दौलता दी दून्नी दी सेवा नीं करी सकदे।”

¹⁴फरीसी जेह्ड़े लालची थे, एह़ सारियां गल्लां सुणी करी तिसदा मजाक करणा लग्गे।

¹⁵यीशुयैं तिन्हां नैं ग्लाया, तुहां तां माणुआं साइआं अपणे आप्पे जो धर्मी ठैहरांदे हन, अपर परमात्मा तुहां दे मनां जो जाणदा ऐ, क्जोकि जेह्ड़ी चीज्ज माणुआं दियां नजरा च म्हान ऐ, सैह़ परमात्मे दी नजरा च घृणित ऐ।

¹⁶“यीशुयैं ग्लाया, मूसा दी व्यबस्था कने भविष्यवक्तां दा संदेस यूहन्ना बपतिस्मा दैणे आल़े दे बग्त तिकर थे, तिसते बाद परमात्मे दे राज्जे दा सुसमाचार तुहां जो सणाया जा दा ऐ, कने हर इक्क माणु तिस च बड़ी मजबूतिया नैं ओआ दा ऐ।

¹⁷जाह़लू तिकर अम्बर कने धरती टल़ी नीं जां, ताह़लू तिकर व्यबस्था ते इक्क मात्रा या इक्क बिंदु भी पूरा होये बगैर नीं टलगा। एह़ व्यबस्था ताह़लू तिकर रैहणी ऐ, जाह़लू तिकर तिसादा मकसद पूरा नीं होई जां।

¹⁸“जेह्ड़ा कोई अपणिया लाड़िया जो छड्डी नैं दूईआ नैं ब्याह करदा ऐ, सैह़ ब्यभिचार करदा ऐ कने जेह्ड़ा कोई छड्डिया जणासा नैं ब्याह करदा ऐ, सैह़ भी ब्यभिचार करदा ऐ।”

¹⁹“इक्क अमीर माणु था जेह्ड़ा मैंह्गे कपड़े पैहणदा कने हर रोज सुख-विलासे च कने बड़ी ठाट बाट नैं रैंह्दा था।

²⁰लाजर नांऐ दा इक्क गरीब माणु जख्मां नैं भरोया तिसदे घरे दे गेटे सामणै अंणी नैं बठाल़ी दित्ता जांदा था,

²¹कने सैह़ चांह़दा था कि अमीर माणुये दे खाणे बाद मेज्जे पर जेह्ड़ा जूठा बचदा था तिस नैं अपणा पेट भरैं; ऐत्थु तिकर कि कुत्ते भी तिसदेयां जख्मां जो चटदे थे।

²²इआं होएया कि सैह़ गरीब मरी गेआ, कने सुअर्गदूतां तिसियो लेई करी, अब्राहमे सौगी आदर-सम्मान दी जगाह पर बठाल़ी दित्ता। सैह़ अमीर भी मरी गेआ कने दब्बी दित्ता,

²³जिंआं ई तिन्हीं अधोलोक च पीड़ा च पैयो ऊपर नजर कित्ती, तां दूरे ते लाजरे जो अब्राहमे सौगी आदर-सम्मान दी जगाह पर बैठेया दिख्या।

²⁴ताह़लू तिन्हीं जोरे नैं ग्लाया, ‘हे पिता अब्राहम मिन्जो पर दया करी नैं लाजरे जो घल्ली दे, जे सैह़ अपणिया उंगलिया पांणिये च सेड़ी नैं मेरिया जीभा जो ठंडिया करैं, क्जोकि मैं इसा अग्गी च तड़फा दा ऐ।’

²⁵अपर अब्राहमे ग्लाया, ‘बच्चा, याद कर कि तू अपणिया ज़िन्दगिया च खरियां चीज्जां लेई चुकेया ऐ, कने तिंआं ई लाजर भी बुरिआं चीज्जां लेई चुकेया ऐ, अपर हुण सैह़ ऐत्थु सुख पा दा ऐ, कने तू तड़फा दा ऐ।

²⁶इन्हां सारियां गल्लां जो छड्डी करी अहां दे कने तुहां दे बिच्च इक्क बड़ा बड्डा खड्डा बणाया ऐ कि जेह्ड़ा ऐत्थु ते तिस पार तुहां अल्ल औणां चां, सैह़ नीं जाई सकदा; कने ना कोई औत्थू ते इस पार अहां अल्ल आई सकदा।’

²⁷तिन्हीं ग्लाया, ‘तां हे पिता, मैं तिज्जो नैं विणती करदा ऐ कि तू लाजरे जो मेरे पिता दे घरेयो घल्ल,

²⁸क्जोकि मेरे पंज भाऊ हन; मैं चांह़दा ऐ, कि सैह़ जाई नैं तिन्हां जो इन्हां गल्लां दी चतौणी दैं, इआं ना होयैं कि सैह़ भी इसा पीड़ा दैणे आल़िआ जगाह च ओन।’

²⁹अब्राहमे तिस नैं ग्लाया, ‘तिन्हां अल्ल तां मूसा कने भविष्यवक्तां दियां कताबा हन, तांजे सैह़ तिन्हां दी सुणन।’

³⁰तिन्हीं ग्लाया, ‘नीं, हे पिता अब्राहम; अपर जे कोई मरेयां ते तिन्हां अल्ल जां, कने तिन्हां जो चतौणी दैं, तां सैह़ अपणे पापां ते मने बदली लैंगे।’

³¹तिन्हीं तिस नैं ग्लाया, ‘जाह़लू सैह़ मूसा कने भविष्यवक्तां दी सुणी करी भी बसुआस नीं करदे, जे मरेयां ते कोई भी जिन्दा होई जां तां तिस पर बसुआस किंआं करगे’।”