Read Kangri लूका 17 Bible Online

लूका 17 - Kangri bible

लूका 17

¹भिरी यीशुयैं अपणे चेलेयां नैं ग्लाया, “एह़ होई नीं सकदा कि मुसीबतां नीं ओन, अपर हाय, तिस माणुये पर जिसदिया बज़ाह ते सैह़ ओंदियां हन।

²जेह्ड़ा इन्हां लोक्केयां च कुसी इक्की ते पाप करवांदा ऐ, तिसियो परमात्मा सज़ा दिंगा, अपर परमात्मे दिया खतरनाक सज़ा ते एह़ खरा कि बड्डे घराटे दा पुड़ तिसदे गल़े च लटकाई करी सैह़ समुंदरे च सट्टी दित्ता जां।

³चौकन्ने रेह्आ; जे तेरा बसुआसी भाऊ अपराध करैं तां तिस जो समझा, कने जे पछतां तां तिसियो माफ कर।

⁴जे दिन भर च सैह़ सत बरी तेरा अपराध करैं कने सत बरी तिज्जो अल्ल आई नैं ग्लां, कि मैं पछतांदा ऐ, तां तिसियो माफ कर।”

⁵ताह़लू खास बारांह चेलेयां प्रभुये नैं ग्लाया, “अहां दे बसुआसे जो बधा।”

⁶प्रभुयैं ग्लाया, “जे तुहां जो राईया दे दाणे बराबर भी बसुआस हुंदा, तां तुहां इस सहतूत दे रूखे नैं ग्लांदे हन कि जड़ा ते पटौई करी समुंदरे च लग्गी जा, तां सैह़ तुहां दी मन्नी लैंदा।

⁷“तुहां च देहया कुण ऐ, जिसदा दास हल़े जोतदा ऐ या भेड्डां चगांदा ऐ, कने जाह़लू सैह़ खेतां ते बापस ओंदा ऐ, तां तिसियो ग्लां, ‘तौल़ी आ कने खाणा खा?’

⁸नीं अपर सैह़ ग्लांगा, कि मेरा खाणा त्यार कर, कने जाह़लू तिकर मैं खां-पीयैं ताह़लू तिकर कमरा कसी नैं मेरी सेवा कर; तिसते बाद तूंमी खाई पी लेआं।

⁹क्या सैह़ तिस दासे दा साह़न मनगा कि तिन्हीं सैह़ कम्म कित्ते जिन्हां दा हुक्म दित्या था?

¹⁰इसी तरीके नैं तुहां भी जाह़लू तिन्हां सारेयां कम्मां जो करी लैन जिन्हां दा हुक्म तुहां जो दित्या ऐ, तां ग्ला, ‘अहां नकम्मे दास हन; जेह्ड़ा अहां जो करणा चाइदा था अहां सिर्फ सैई कित्या ऐ।’ ”

¹¹कने एह़ होएया जाह़लू यीशु कने तिसदे चेले यरूशलेम सैहरे जो जांदे बग्त सामरिया प्रदेस कने गलील प्रदेसे दे लाक्के च होई नैं जा दे थे।

¹²तां इक्की ग्रांऐ च पुज्जदे बग्त तिन्हां जो दस कोढ़ी मिल्ले।

¹³सैह़ दूर खड़ोई करी जोरे नैं ग्लाणा लग्गे, “हे यीशु, हे मालक, अहां पर दया कर।”

¹⁴यीशुयैं तिन्हां जो दिक्खी नैं ग्लाया, “यरूशलेम सैहरे दे मंदरे च जा, कने अपणे आप्पे जो याजकां जो दस्सा।” कने सैह़ रस्ते च चलदे-चलदे ई खरे होई गै।

¹⁵ताह़लू तिन्हां च इक्की एह़ दिक्खी नैं कि मैं खरा होई गेआ ऐ, जोरे नैं परमात्मे दी महिमा करदा-करदा बापस हटी आया;

¹⁶कने यीशुये दे पैरां पर मुँऐ भार पेई नैं तिसदा धन्यावाद करणा लग्गा; कने सैह़ सामरी था।

¹⁷इसा गल्ला पर यीशुयैं ग्लाया, “क्या दस्सां दे दस खरे नीं होये, तां भिरी सैह़ नौ कुत्थू हन?

¹⁸क्या इस परदेसिये जो छड्डी नैं होर कोई नीं निकल़ेया जेह्ड़ा परमात्मे दी महिमा करदा ऐ?”

¹⁹ताह़लू तिन्हीं तिस नैं ग्लाया, “उठी करी चली जा; तेरे बसुआसैं तिज्जो खरा कित्ता ऐ।”

²⁰जाह़लू फरीसी माणुआं यीशु ते पुछया, कि परमात्मे दा राज्ज काह़लू ओंगा, तां तिन्हीं तिन्हां जो जवाब दित्ता, “परमात्मे दा राज्ज कोई ऐदई चीज्ज नीं ऐ, जेह्ड़ी तुहां दिक्खी सकदे हन।

²¹कने माणु एह़ नीं ग्लांगे, दिक्खा, ऐत्थु ऐ, या औत्थू ऐ। क्जोकि दिक्खा, परमात्मे दा राज्ज तुहां दे बिच्च ई ऐ।”

²²भिरी तिन्हीं चेलेयां नैं ग्लाया, “सैह़ दिन ओंगे, जिन्हां दिनां च तुहां मिन्जो जेह्ड़ा माणुये दा पुत्तर ऐ, इक्क दिन दिक्खणा चांह़गे, अपर दिक्खी नीं पांगे।

²³ताह़लू माणु तुहां नैं ग्लांगे, ‘दिक्खा, मसीह औत्थू ऐ।’ या ‘दिक्खा, मसीह ऐत्थु ऐ।’ अपर तुहां चली मत जांदे कने ना ई तिसदे पचांह़ जान्नेयों।

²⁴क्जोकि जिंआं बिजल़ी अम्बरे दे इक्की पास्से ते निकल़ी करी दूँये पास्से चमकदी ऐ तिंआं ई मैं माणुये दा पुत्तर भी अपणे दिनां च ओंगा, तां सारे लोक दिक्खगे।

²⁵अपर पैहल्लैं जरूरी ऐ कि सैह़ बड़ा भरी दुख झेलैं, कने इस जुगे दे लोक तिसियो नीच समझन।

²⁶“जिंआं नूह दे दिनां च होएया था, तिंआं ई माणुये दे पुत्तरे दे दिनां च भी हुंगा।

²⁷जिस दिन तिकर नूह जाह्जे पर नीं चढ़ेया था, तिस दिन तिकर माणु खांदे पींदे थे, कने तिन्हां च ब्याह हुंदे थे। ताह़लू जल-प्रलयै आया कने तिन्हां सबना जो खत्म करी दित्ता।

²⁸“तिंआं ई जिंआं लूते दे दिनां च होएया था, कि माणु खांदे पींदे, कने लैण-दैण करदे, कने रूख लगांदे कने घर बणांदे थे;

²⁹अपर जिस दिन लूत सदोमे ते निकल़ेया, तिस दिन अग्ग कने गंधक अम्बरे ते बरसी कने तिस सैहरे सारे लोकां जो नास करी दित्ता।

³⁰“मैं माणुये दे पुत्तर जाह़लू दुवारी बापस ओंगा, तां तिन्हां दिनां च भी इआं ई हुंगा।

³¹तिस दिन जेह्ड़े छत्ती पर हुंगे, सैह़ अपणे घरे ते कुच्छ भी लैणे तांई थल्लै नीं लौन, कने अंदर नीं जान। कने जेह्ड़े खेतां च हुंगे, सैह़ अपणा कपड़े लैणे तांई पचांह़ नीं हटन।

³²लूते दिया लाड़िया जो याद रखा कि तिसा नैं क्या होएया था।

³³जेह्ड़ा कोई अपणे प्राण बचाणा चांह़गा सैह़ अपणे प्राण गुआंगा, कने जेह्ड़ा कोई अपणे प्राण गुआंगा सैह़ अपणे प्राण बचांगा।

³⁴मैं तुहां नैं ग्लांदा ऐ, तिसा राती दो माणु इक्की मंजोल़ूये पर हुंगे; इक्की जो लेई लेआ जाणा कने दूआ छड्डी दैणा।

³⁵दो जणासां सौगी-सौगी चक्की पीआ दियां हुंगियां, इक्क लेई ली जांगी कने दूई छड्डी दित्ती जांगी।

³⁶दो माणु खेतां च हुंगे, तां इक्क लेई लेआ जांगा कने दूआ छड्डी दित्ता जांगा।”

³⁷एह़ सुणी नैं तिन्हां तिसते पुछया, “हे प्रभु एह़ कतांह हुंगा?” तिन्हीं तिन्हां नैं ग्लाया, हर इक्क माणु जाणगा, कि एह़ कुत्थू हुंगा, “ठीक तिंआं ई जिंआं जित्थु लाह्सां हन, तित्थु इलणी कठ्ठियां हुंदियां हन।”