Read Kangri लूका 19 Bible Online

लूका 19 - Kangri bible

लूका 19

¹यीशु यरीहो सैहरे च पुज्जा कने रस्ते च चलेया था।

²तित्थु जक्कई नांऐ दा इक्क माणु था जेह्ड़ा चुंगी लैंणे आल़ेआं दा सरदार था कने अमीर था।

³सैह़ यीशुये जो दिक्खणा चांह़दा था कि सैह़ कुण ऐ। अपर मती भीड़ होणे दिया बज़ाह ते दिक्खी नीं सकदा था, क्जोकि सैह़ बोणा था।

⁴ताह़लू सैह़ तिसियो दिक्खणे तांई गांह दौड़ी नैं इक्की रुम्बली दे रूखे पर चढ़ी गेआ, क्जोकि यीशु तिस रस्ते च जाणे आल़ा था।

⁵जाह़लू यीशु तिसा रूखे अल्ल पुज्जा, तां ऊपर दिक्खी करी तिस नैं ग्लाया, “हे जक्कई, झटपट लौई आ; क्जोकि अज्ज मैं तेरे घरैं रैहणा ऐ।”

⁶सैह़ झटपट रूखे ते थल्लै लुत्था कने खुस होई नैं यीशुये जो अपणे घरेयो लेई गेआ कने तिसदा सुआगत कित्ता।

⁷एह़ दिक्खी नैं सारे लोक बुड़बुड़ाई नैं ग्लाणा लग्गे, “एह़ तां इक्क पापी माणुये दे घरेयो चलेया ऐ।”

⁸जक्कई खड़ोई करी प्रभु नैं ग्लाणा लग्गा, “हे प्रभु, सुण, मैं अपणी आधी धन दौलत गरीबां जो दिंदा ऐ, कने कुसी नैं बेइमानी करी नैं लेई भी लेआ ऐ तां तिस जो चार गुणा बापस करी दिंगा।”

⁹ताह़लू यीशुयैं तिस नैं ग्लाया, “अज्ज इस घरे च उद्धार आया ऐ, इसतांई एह़ भी अब्राहमे दा इक्क जागत ऐ।

¹⁰क्जोकि मैं माणुये दा पुत्तर गुआचेआं जो तोपणा कने तिन्हां दा उद्धार करणा आया ऐ।”

¹¹जाह़लू तित्थु लोक एह़ गल्लां सुणा दे थे, तां यीशुयैं इक्क होर उदारण देई नैं ग्लाया, इसतांई कि सैह़ यरूशलेम सैहरे नेड़े था, कने लोक समझदे थे कि परमात्मे दा राज्ज हुण ई ओणे आल़ा ऐ।

¹²कने तिन्हीं ग्लाया, “इक्क अमीर माणु दूर देसे जो चलेया तांजे राज्ज पद पाई नैं बापस औयें।

¹³तिन्हीं अपणे दासां च दसा जो सद्दी नैं तिन्हां जो दस मोहरां[5] दित्तियां कने तिन्हां नैं ग्लाणा लग्गा, ‘मेरे बापस ओणे तिकर लैण-दैण करनेयों।’

¹⁴अपर तिसदे सैहरे दे अक्खे-बक्खे रैहणे आल़े लोक तिस नैं बैर रखदे थे, कने तिसदे पचांह़ संदेसा दैणे आल़े दुवारी एह़ ग्लाई करी घल्लेया, अहां नीं चांह़दे कि एह़ अहां पर राज करैं।

¹⁵“जाह़लू सैह़ राज्ज पद पाई नैं बापस आया, तां इआं होएया कि तिन्हीं अपणेयां दासां जो जिन्हां जो मोहरां दित्तियां थियां तिन्हां जो अप्पु अल्ल सद्देया तांजे पता करैं कि तिन्हां लैण-दैण ते क्या-क्या कमाया।

¹⁶ताह़लू पैहल्ले आई नैं ग्लाया, ‘हे मालक, तेरियां मोहरां ते मैं दस होर मोहरां कमाईयां हन।’

¹⁷मालकैं तिस नैं ग्लाया, धन, ‘हे उत्तम दास। तू मते ते ई थोड़े च बसुआसे जोग्गा निकल़ेया हुण दस्सां सैहरां पर हक्क रख।’

¹⁸दूँये आई नैं ग्लाया, ‘हे मालक तेरियां मोहरां ते मैं पंज होर मोहरां कमाईयां हन।’

¹⁹तिन्हीं तिस नैं भी ग्लाया, ‘तूमी पंजा सैहरां पर हाकम होई जां।’

²⁰त्रीयें दासें भी आई नैं ग्लाया, ‘हे मालक, दिक्ख तेरी मोहर एह़ ऐ, जिसियो मैं परने च बन्नी नैं रखदा था।

²¹क्जोकि मैं तिज्जो ते डरदा था, इसतांई कि तू कठोर माणु ऐ, जेह्ड़ा तैं नीं रखेया तिसियो चुक्की लैंदा ऐ, कने जेह्ड़ा तैं नीं बाया, तिसियो बड्डी लैंदा ऐ।’

²²मालकैं तिस नैं ग्लाया, हे दुष्ट दास, मैं तेरे ई मुँऐ ते तिज्जो दोसी ठैहरांदा ऐ। तू मिन्जो जाणदा था कि मैं सक्त माणु ऐ, जेह्ड़ा मैं नीं रखेया तिसियो चुक्की लैंदा, कने जेह्ड़ा मैं नीं बाया तिसियो बड्डदा ऐ;

²³तां तैं मेरिया मोहरा सौकारां अल्ल क्जो नीं रखी दित्ते कि आई नैं ब्याजे समेत लेई लैंदा?

²⁴कने जेह्ड़े माणु बक्खे खड़ोत्यो थे, तिन्हीं तिन्हां नैं ग्लाया, ‘सैह़ मोहर इसते लेई लेआ, कने जिस अल्ल दस मोहरां हन तिसियो देई देआ।’

²⁵तिन्हां तिस नैं ग्लाया, ‘हे मालक, तिस अल्ल दस मोहरां हन।’

²⁶‘मैं तुहां नैं ग्लांदा कि जिन्हां अल्ल ऐ, तिन्हां जो दित्ता जांगा; कने जिन्हां अल्ल नीं ऐ, तिन्हां ते सैह़ भी जेह्ड़ा तिन्हां अल्ल ऐ लेई लेआ जांगा।

²⁷अपर मेरे तिन्हां बैरियां जो जेह्ड़ा नीं चांह़दे थे कि मैं तिन्हां पर राज्ज करैं, तिन्हां जो ऐत्थियो अंणी करी मेरे सामणै मारा’।”

²⁸एह़ गल्लां ग्लाई करी यीशु अपणे चेलेयां सौगी यरूशलेम सैहरे दे पास्सेयो तिन्हां दे गांह-गांह चला।

²⁹जाह़लू सैह़ जैतून नांऐ दे प्हाड़े पर बैतफगे ग्रांऐ कने बैतनिय्याह ग्रांऐ अल्ल पुज्जा, तां तिन्हीं अपणे चेलेयां च दूँ जो एह़ ग्लाई नैं घल्लेया,

³⁰“सामणै आल़े ग्रांऐ च जा; कने तिस ग्रांऐ च पुजदेयां ई इक्क गधिया दा बच्चा जिस पर कदी कोई भी नीं बैठेया ऐ, बन्नेया होएया तुहां जो मिलगा। तिसियो खोली नैं लेई ओआ।

³¹जे कोई तुहां ते पुछैं कि क्जो खोला दे हन, तां एह़ ग्लानेयों कि प्रभु जो इसदी जरूरत ऐ।”

³²जेह्ड़े दो चेले घल्लेयो थे, तिन्हां जाई नैं जिंआं यीशुयैं तिन्हां नैं ग्लाया था, तिन्हां जो तिदेया ई मिल्ला।

³³जाह़लू सैह़ गधे दे बच्चे जो खोला दे थे, तां तिस गधे दे मालकैं तिन्हां ते पुछया, “इस बच्चे जो क्जो खोला दे?”

³⁴तिन्हां ग्लाया, “प्रभु जो इसदी जरूरत ऐ।”

³⁵सैह़ तिसियो यीशु अल्ल लेई आये, कने अपणे कपड़े तिस बच्चे परालैं रखी नैं यीशुये जो तिस पर बठाई दित्ता।

³⁶जाह़लू यीशु जा दा था, तां मतेआं लोकां अपणे कपड़े रस्ते च बछाई दित्ते।

³⁷बक्खे ओंदे-ओंदे जाह़लू सैह़ जैतून प्हाड़े दी ढलाना पर पुज्जा, तां चेलेयां दी सारी मंडल़ी तिन्हां सारेयां सामर्थी दे कम्मां दिया बज़ाह ते जेह्ड़े तिन्हां दिख्यो थे, खुस होई नैं जोरे नैं परमात्मे दी स्तुति करणा लग्गे:

³⁸“धन ऐ सैह़ राजा, जेह्ड़ा प्रभु दे नांऐ ते ओंदा ऐ, सुअर्गे च सांति कने सुअर्गे च परमात्मे दी स्तुति होयैं।”

³⁹ताह़लू लोकां दियां भीड़ा च कुच्छ फरीसी माणु तिस नैं ग्लाणा लग्गे, “हे गुरू, अपणे चेलेयां जो चुप रैहणे तांई ग्ला।”

⁴⁰तिन्हीं जवाब दित्ता, “मैं तुहां नैं सच्च ग्लांदा ऐ, जे एह़ लोक चुप रैह़न तां पत्थर डड्डी पोंगे।”

⁴¹जाह़लू सैह़ बक्खे आया तां सैहरे जो दिक्खी नैं तिस पर रोया।

⁴²कने ग्लाया, “जे तू, हाँ तू, अज्ज इतणा समझी लैंदा कि सांतिया दा मतलब क्या ऐ, अपर हुण तुहां ते छुपाई नैं रखेया ऐ।

⁴³क्जोकि सैह़ दिन तिज्जो पर भी ओंगे कि तेरे बैरी मोर्चा बन्नी करी तिज्जो घेरी लैंगे, कने चौंन्नी पास्से ते तिज्जो बंद करी दिंगे;

⁴⁴कने तेरे बैरी तिज्जो कने तेरे जागतां जो जेह्ड़े तिज्जो च हन, नास करी दिंगे, कने एह़ तेरे पत्थरां दे बणायो भवने दा इक्क भी पत्थर नीं छड्डगे; क्जोकि जाह़लू तिज्जो पर दयादृष्टि कित्ती गेई, तां तैं तिस मौके जो नीं पणछैणया।”

⁴⁵ताह़लू यीशु मंदरे च जाई नैं तित्थु बैठेयो बपार करणे आल़ेआं जो बाहर कड्डणा लग्गा,

⁴⁶कने तिन्हां नैं ग्लाणा लग्गा, “पवित्रशास्त्रे च लिख्या ऐ, ‘मेरा मंदर प्रार्थना दा घर हुंगा,’ अपर तुहां इसियो डाकुआं दा अड्डा बणाई दित्ता ऐ।”

⁴⁷यीशु हर रोज मंदरे च सिक्षा दिंदा था; कने प्रधान याजक कने सास्त्री कने लोकां दे मुखिये तिसियो खत्म करणे दा मौका तोपदे थे।

⁴⁸अपर कोई तरीका नीं निकाल़ी सकेया कि एह़ कुस तरीके नैं करन, क्जोकि सारे माणु बड़ा मन लगाई नैं तिसदी सुणदे थे।