Read Kangri लूका 2 Bible Online

लूका 2 - Kangri bible

लूका 2

¹एह़ तिस बग्त दी घटनां ऐ, जाह़लू राजैं औगुस्तुस कैसरें एह़ हुक्म दित्ता कि सारे रोमी सम्राज्य दे लोकां दी गिणती करी नैं तिन्हां दे नां लिखे जान।

²एह़ पैहल्ली लोकां दी गिणती कने नां लिखाई तिस बग्त होई, जाह़लू किवरिनियुस सीरिया प्रदेसे दा राज्यपाल था।

³कने तिस सम्राज्य दे सारे लोक अपणा-अपणा नां लखाणे तांई अपणे-अपणे सैहरे जो गै।

⁴यूसुफ भी गलील प्रदेस दे नासरत सैहरे ते यहूदिया प्रदेसे च दाऊदे दे सैहरे बैतलहम ग्रांऐ जो गेआ, क्जोकि सैह़ दाऊद राजे दे परवारे दा कने खानदाने दा सैहर था

⁵तांजे सैह़ अपणिया मगेंतरा मरियमा सौगी जेह्ड़ी गर्भवती थी, नां लखां।

⁶जाह़लू सैह़ बैतलहम सैहरे च पुज्जे, तां तित्थु तिन्हां जो रैहणे दी जगाह नीं मिल्ली, तां सैह़ घराला च रैह्। जाह़लू मरियमा दे प्रसूता होणे दा बग्त आया, ताह़लू तिन्नै अपणे पैहल्ले जागते जो जन्म दित्ता, कने तिसियो फालड़ूये लपेटी करी डंगरा दिया खुरलिया च रखी दित्ता।

⁷

⁸कने तिस लाक्के च कुच्छ गुआले थे, जेह्ड़े राती खुले मैदाने च रेई नैं अपणे धणे दा पैहरा करा करदे थे।

⁹चाणचक परमात्मे दा इक्क सुअर्गदूत तिन्हां दे सामणै आई खड़ोता कने प्रभु दा तेज तिन्हां दे चौंन्नी पास्से चमकेया, कने सैह़ बड्डे भरी डरी गै।

¹⁰ताह़लू सुअर्गदूत तिन्हां नैं ग्लाणा लग्गा, “डरा मत, क्जोकि दिक्खा, मैं तुहां जो बड़ी खुसिया दा सुसमाचार सणांदा ऐ; जेह्ड़ा कि सारेयां लोकां तांई होणा ऐ।

¹¹कि अज्ज दाऊद राजे दे सैहर बैतलहमे च तुहां तांई इक्क उद्धार करणे आल़ा पैदा होएया ऐ, कने ऐई मसीह प्रभु ऐ।

¹²तुहां तांई तिसदी एह़ पणछैण ऐ, कि तुहां जो इक्क बच्चा जेह्ड़ा फालड़ूये नैं लपेटया कने खुरलिया च रखेया दुस्सगा।”

¹³तां दिक्खदे-दिक्खदे ई तिस सुअर्गदूते सौगी सुअर्गदूतां दा झुंड परमात्मे दी स्तुति करदे होये कने एह़ ग्लांदे दुस्से,

¹⁴“सुअर्गे च परमात्मे दी महिमा होयैं कने धरतिया च तिन्हां लोकां जो सांति मिल्ले जिन्हां ते सैह़ खुस ऐ।”

¹⁵जाह़लू सुअर्गदूत तिन्हां दे बक्खे ते सुअर्गे जो चली गै, तां गुआले अप्पु च ग्लाणा लग्गे, “ओआ, अहां बैतलहम ग्रांऐ जो चलदे कने जेह्ड़ी गल्ल परमात्मे अहां जो दस्सियो, तिसा जो जाई करी दिक्खदे।”

¹⁶कने तिन्हां ताह़लू जाई नैं मरियमा कने यूसुफे जो, कने खुरलिया च सैह़ बच्चा दिख्या।

¹⁷तिसियो दिक्खी नैं सुअर्गदूतां दी सैह़ गल्ल जेह्ड़ी इस जागते दे बारे च तिन्हां नैं ग्लाईयो थी, तिन्हां जो दस्सी दित्ती,

¹⁸गुआलेयां दियां गल्लां सुणी करी सारे लोकां जो हरानी होई।

¹⁹अपर मरियम तिन्हां सारियां गल्लां जो अपणे मने च रखी नैं सोचदी रेई।

²⁰कने गुआलेयां जो जिंआं सुअर्गदूतां ग्लाया था, तिंआं ई सब कुच्छ सुणी करी कने दिक्खी करी परमात्मे दी महिमा कने स्तुति करदे-करदे बापस चली गै।

²¹यीशुये दे जन्म दे अठ दिन बाद जाह़लू तिसदे खतणे दा बग्त आया, तां तिसदा नां यीशु रखेया, एह़ नां, जेह्ड़ा मरियमा दे गर्भवती होणे ते पैहल्ले सुअर्गदूतैं दस्सी दित्या था।

²²जाह़लू मूसा दी व्यबस्था दे मताबक मरियमा कने यूसुफ दे सुद्ध होणे दे दिन पूरे होये, तां सैह़ तिस जागते जो यरूशलेम सैहरे दे मंदरे च परमात्मे सामणै लेई गै।

²³जिंआं कि परमात्मे दी व्यबस्था च लिख्या ऐ, “हर जेठा पुत्तर प्रभु तांई पवित्र ठैहरगा।”

²⁴कने परमात्मे दी व्यबस्था दे वचनां मताबक “घुग्गियां दा इक्क जोड़ा, या कबूतरे दे दो बच्चे” लेई करी बलिदान करैं।

²⁵तिस बग्त यरूशलेम सैहरे च शमौन नांऐ दा इक्क माणु था, कने सैह़ माणु धर्मी कने भक्त था; कने सैह़ पवित्र आत्मा नैं भरोया था कने इस्राएल देसे दे लोकां जो सांति दैणे आल़े मसीह दा इन्तजार करा दा था,।

²⁶कने पवित्र आत्मा तिसियो दस्सेया, कि जाह़लू तिकर सैह़ परमात्मे दे मसीह जो दिक्खी नीं लैंगा ताह़लू तिकर तिसदी मौत्त नीं हुंगी।

²⁷तिस बग्त सैह़ पवित्र आत्मा दिया अगुआई ते मंदरे च आया; कने जाह़लू माँ-बुढ़े यीशुये जो मंदरे अंदर लेई करी आये, कि मूसा दिया व्यबस्था दे मताबक बल़ि-भेंट चढ़ांन।

²⁸तां शमौने तिस जागते जो अपणिया गोदी च लेआ कने परमात्मे दा धन्यावाद करी नैं ग्लाणा लग्गा कि,

²⁹“हे प्रभु, हुण तू अपणे दासे जो अपणे वचने मताबक सांतिया नैं मरना दे,

³⁰क्जोकि हुण मैं अपणिया अखीं नैं तेरे उद्धारे जो दिक्खी लेआ,

³¹जिसियो तैं सब देसां दे लोकां तांई घल्लेया।

³²कि सैह़ होरनी जाति दे लोकां जो लौ दैणे तांई जोत्ती हुंगा, कने तेरे खास लोक इस्राएल देसे दी महिमा होयैं।”

³³यीशुये दे बारे च शमौने दियां ग्लाईयां गल्लां सुणी नैं यूसुफ कने मरियम बड़े हरान होई गै।

³⁴ताह़लू शमौने तिन्हां जो आशीर्वाद देई नैं, तिसदिया माँऊ मरियमा नैं ग्लाया, “सुण, एह़ जागत कईआं इस्राएली लोकां तांई खात्मे दा कने उद्धारे दा नसाण होणा, लोक जिसदे बरोध च गल्लां करगे।

³⁵इक्क बड्डा दुख जेह्ड़ा तलवारा साइआं ऐ, तेरे प्राणा जो भी चिरदा निकल़ी जांगा। इसते कई लोकां दे मने दियां गल्लां दा पता लगगा।”

³⁶आशेर दे गोत्रे ते फनूएल नांऐ दे इक्की माणुये दी कुड़ी जिसा दा नां हन्नाह था, भविष्यवक्तण थी। सैह़ जबरी होई गियो थी, कने ब्याह होणे ते बाद सत साल तिकर ई अपणे लाड़े सौगी रेईयो थी।

³⁷सैह़ चौरासी साल्लां ते बिधवा थी, कने सैह़ मंदरे जो नीं छड्डदी थी। अपर ब्रत कने प्रार्थना करी नैं रात -दिन अराधना करदी थी।

³⁸कने हन्नाह तिस बग्त औत्थू आई नैं परमात्मे दा धन्यावाद करणा लग्गी, कने तिन्हां सारेयां नैं यीशुये दे बारे च ग्लाणा लग्गी। जेह्ड़े कि यरूशलेम सैहरे दे लोकां दे छुटकारा दैणे आल़े परमात्मे दे घल्लेयो मसीह दा इन्तजार करा करदे थे।

³⁹जाह़लू यूसुफ कने मरियम परमात्मे दी व्यबस्था मताबक सब कुच्छ पूरा करी चुके तां गलील प्रदेस दे अपणे नासरत सैहरे जो बापस चली गै।

⁴⁰कने जागत बडुंदा कने ताकतवर हुंदा कने ज्ञानवान होणा लग्गा; कने परमात्मे दी दया तिस पर थी।

⁴¹यीशुये दे माँ-बुढ़े हर साल फसह दे त्योहार मनाणे तांई यरूशलेम सैहरे जांदे थे।

⁴²जाह़लू यीशु बारांह साल्लां दा होएया, तां सैह़ रीतिया मताबक त्योहारे मनाणा यरूशलेम जो गै।

⁴³जाह़लू त्योहार मुक्की गेआ तां सैह़ अपणे घरेयो बापस औणां लग्गे, अपर जागत यीशु यरूशलेम सैहरे च ई रेई गेआ; कने इसा गल्ला दा तिसदे माँऊ-बुढ़े जो भी नीं पता था।

⁴⁴सैह़ एह़ समझदे रैह् कि यीशु, सौगी चलेयो लोकां सौगी हुंगा, इक्की दिने दा सफर कट्टी दित्ता, जाह़लू तिन्हां जो पता लग्गा कि यीशु सौगी नीं ऐ, तां तिसियो अपणे रिस्तेदारां च कने जाण पणछैणा आल़े लोकां च तोपणा लग्गे।

⁴⁵अपर जाह़लू यीशु नीं मिल्लेया, तां तोपदे-तोपदे यरूशलेम सैहरे जो भिरी बापस हटी गै।

⁴⁶तोपदे-तोपदे त्रीं दिनां बाद तिन्हां जो सैह़ मंदरे दे अँगणे च यहूदी धार्मिक गुरुआं बिच्च बैठेया कने तिन्हां सौगी सवाल-जवाब करदा दिख्या।

⁴⁷जितणे लोक तिसदियां गल्लां सुणा दे थे, सैह़ सब तिसदी समझा ते कने सवालां-जवाबां ते हरान परेसान थे।

⁴⁸ताह़लू माँ-बुढ़े यीशुये जो दिक्खी नैं हरान होये कने तिसदी माँ ग्लाणा लग्गी, “हे पुत्तर तैं अहां सौगी इआं क्जो कित्ता, दिक्ख मैं कने तेरे पिता तिज्जो तोपदे-तोपदे परेसान होई गियो थे।”

⁴⁹यीशुयैं तिन्हां नैं ग्लाया, “तुहां मिन्जो क्जो तोपा दे थे, क्या तुहां जो पता नीं ऐ कि मिन्जो अपणे पिता दे घरे च होणा जरूरी ऐ?”

⁵⁰अपर जेह्ड़ी गल्ल यीशुयैं तिन्हां नैं ग्लाई, सैह़ तिन्हां दिया समझा च नीं आई।

⁵¹ताह़लू सैह़ तिन्हां सौगी चली गेआ, कने नासरत सैहरे च पुज्जे, कने यीशु अपणे माता पिता दा आज्ञाकारी बणी नैं रेह्आ; अपर तिसदिया माँऊ एह़ सारियां गल्लां अपणे मने च रखियां।

⁵²कने यीशु जुआन हुंदा गेआ, कने बुद्धिया, कने डील-डौल च कने परमात्मे कने माणु दी कृपा सौगी गांह बधदा गेआ।