Read Kangri लूका 20 Bible Online

लूका 20 - Kangri bible

लूका 20

¹इक्क दिन इआं होएया कि जाह़लू यीशु मंदरे च लोकां जो सिक्षा दै दा कने सुसमाचार सणांदा था, तां प्रधान याजक कने सास्त्री, स्याणेयां सौगी आई करी बक्खे खड़ोई गै;

²कने ग्लाणा लग्गे, “अहां जो दस्स, तू इन्हां कम्मां जो कुस हक्के नैं करदा ऐ, कने सैह़ कुण ऐ जिन्हीं तिज्जो एह़ हक्क दित्या ऐ?”

³तिन्हीं तिन्हां जो जवाब दित्ता, “मैं भी तुहां ते इक्क गल्ल पुछदा ऐ; मिन्जो दस्सा

⁴यूहन्ने दा बपतिस्मा सुअर्गे दे पास्से ते था या माणुआं दे पास्से ते था?”

⁵ताह़लू सैह़ अप्पु च ग्लाणा लग्गे, “जे अहां ग्लांगे, ‘सुअर्गे दे पास्से ते,’ तां इन्हीं ग्लाणा, ‘भिरी तुहां यूहन्ने पर बसुआस क्जो नीं कित्ता?’

⁶कने जे अहां ग्लांगे, ‘माणुआं दे पास्से ते,’ तां सारेयां लोकां अहां पर पत्थर मारने, क्जोकि सैह़ सच्च-बिच्च जाणदे हन कि यूहन्ना भविष्यवक्ता था।”

⁷इसतांई तिन्हां जवाब दित्ता, “अहां नीं जाणदे कि सैह़ कुसदे पास्से ते था।”

⁸यीशुयैं तिन्हां नैं ग्लाया, “तां मैं भी तुहां जो नीं दस्सणा कि मैं एह़ कम्म कुस हक्के नैं करदा ऐ।”

⁹ताह़लू यीशु लोकां नैं एह़ उदारण ग्लाणा लग्गा, “इक्की माणुयैं अंगूरा दा बाग लगाया, कने किसानां जो तिसदा ठेका देई दित्ता कने मते दिनां बासती परदेस चली गेआ।

¹⁰जाह़लू बग्त आया तां तिन्हीं किसानां अल्ल इक्की दासे जो घल्लेया कि सैह़ अंगूरा दे बागे च थोड़े फल़ां दा हिस्सा लेई औयें, अपर किसानां तिसियो मारी कूटी करी खाली हत्थ बापस घल्ली दित्ता।

¹¹भिरी तिन्हीं इक्क होर दास घल्लेया, कने तिन्हां तिसियो भी मारेया कने तिसदी बेइज्जती करी नैं खाली हत्थ बापस घल्ली दित्ता।

¹²भिरी तिन्हीं त्रीआ दास घल्लेया, कने किसानां तिसियो भी जख्मी करी नैं कड्डी दित्ता।

¹³ताह़लू अंगूरा दे बागे दा मालक ग्लाणा लग्गा, ‘मैं क्या करैं? मैं अपणे प्यारे जागते जो घल्लदा, जरूर सैह़ इसदा लैआज रखगे।’

¹⁴जाह़लू किसानां तिस जो दिख्या तां अप्पु च ग्लाणा लग्गे, ‘एह़ तां वारस ऐ; ओआ, अहां इसियो मारी दिंदे कि सारी मलकीत अहां दी होई जां।’

¹⁵कने तिन्हां तिसियो अंगूरा दे बागे ते बाहर कड्डी नैं मारी दित्ता। इसतांई अंगूरा दे बागे दा मालक तिन्हां नैं क्या करगा?

¹⁶सैह़ आई नैं तिन्हां किसानां जो खत्म करगा, कने अंगूरा दे बागे जो दूयेयां जो दिंगा।” एह़ सुणी करी तिन्हां ग्लाया, “परमात्मा करैं ऐदेया ना होयैं।”

¹⁷तिन्हीं तिन्हां दे बक्खी दिक्खी नैं ग्लाया, “तां भिरी पवित्रशास्त्रे च एह़ क्या लिख्या ऐ: ‘जिस पत्थरे जो राजमिस्त्रियां नकम्मा ठैहराया था, सैई कुणे दा सिरा होई गेआ।’

¹⁸जेह्ड़ा कोई तिस पत्थरे पर पोंगा सैह़ चकनाचूर होई जांगा, कने जिस पर सैह़ पोंगा, तिसियो पित्थी दिंगा।”

¹⁹तिस बग्त सास्त्रियां कने प्रधान याजकां तिसियो पकड़णा चाया, क्जोकि सैह़ समझी गियो थे कि तिन्हीं अहां पर एह़ उदारण ग्लाया, अपर सैह़ लोकां ते डरे।

²⁰कने सैह़ तिसदी ताक च लग्गे, कने भेत्ती घल्ले कि धर्मी दा भेस बदली करी तिसदी कोई ना कोई गल्ल पकड़न, जे तां तिसियो हाकमां दे हक्क कने अधिकारियां दे हुआलैं करी दिंगे।

²¹तिन्हां तिसते एह़ पुछया, “हे गुरू, अहां जाणदे हन कि तू ठीक ग्लांदा कने सखांदा भी ऐ, कने कुसी दा भेदभाव नीं करदा, अपर परमात्मे दा रस्ता सच्चाईया नैं दस्सदा ऐ।

²²क्या अहां जो कैसरे जो चुंगी दैणा ठीक ऐ कि नीं?”

²³तिन्हीं तिन्हां दी चलाकिया जो जाणी नैं तिन्हां नैं ग्लाया,

²⁴“इक्क दीनार मिन्जो भी दस्सा। तिस पर कुसदी मौहर कने नां ऐ?” तिन्हां ग्लाया, “कैसरे दा।”

²⁵तिन्हीं तिन्हां नैं ग्लाया, “तां जेह्ड़ा कैसर दा ऐ, सैह़ कैसर जो देआ; कने जेह्ड़ा परमात्मे दा ऐ, सैह़ परमात्मे जो देआ।”

²⁶सैह़ लोकां दे सामणै इसा गल्ला च पकड़ी नीं सकैं, अपर तिसदे जवाबे ते हरान होई नैं चुप रेई गै।

²⁷भिरी सदूकी माणु जेह्ड़े ग्लांदे हन कि मरेयां दा जिन्दा होणा ऐ कि नीं, तिन्हां च कुच्छना तिस अल्ल आई नैं पुछया,

²⁸“हे गुरू, मूसैं अहां तांई पवित्रशास्त्रे च लिख्या ऐ, ‘जे कुसी दा भाऊ अपणिया लाड़िया दे हुंदे बगैर औलादी मरी जां, तां तिसदा भाऊ तिसदिया लाड़िया नैं ब्याह करी लैं, कने अपणे भाऊये तांई वंश पैदा करैं।’

²⁹सत भाऊ थे, पैहल्ला भाऊ ब्याह करी नैं बगैर औलादी मरी गेआ।

³⁰भिरी दूँये,

³¹कने त्रीयें भी तिसा जणासा नैं ब्याह करी लेआ। इस तरीके नैं सतो बिना औलादी ते मरी गै।

³²तिसते बाद सैह़ जणांस भी मरी गेई।

³³इसतांई सैह़ जिन्दे होणे पर सैह़ तिन्हां च कुसदी लाड़ी हुंगी, क्जोकि सैह़ सतां दी लाड़ी रेई चुकियो थी।”

³⁴यीशुयैं तिन्हां नैं ग्लाया, “इस जुगे दियां औलादी च तां ब्याह हुंदा ऐ,

³⁵अपर जेह्ड़े लोक इस जोग्गे ठैहरगे कि इस जुगे जो कने मरेयां ते जिन्दे होणे जो हासल करन, सैह़ ना तां ब्याह करगे कने ना ई ब्याये च दित्ते जांगे।

³⁶सैह़ भिरी मरने जो भी नीं; क्जोकि सैह़ सुअर्गदूतां साइआं हुंगे, कने दुवारी जिन्दे होणे दी औलाद होणे ते परमात्मे दी भी औलाद हुंगे।

³⁷अपर इसा गल्ला जो कि मरेयो भी जिन्दे हुंदे हन, मूसैं भी अग्गी आल़ी झाड़ी दी कथा च प्रगट कित्ता ऐ कि सैह़ प्रभु जो ‘अब्राहमे दा परमात्मा, कने इसहाके दा परमात्मा, कने याकूबे दा परमात्मा’ ग्लांदा ऐ।

³⁸परमात्मा मुड़देयां दा नीं अपर जिन्देया दा परमात्मा ऐ, क्जोकि तिसदे नेड़े सारे जिन्दे हन।”

³⁹ताह़लू एह़ सुणी नैं सास्त्रियां च कुच्छना एह़ ग्लाया, “हे गुरू, तैं ठीक ग्लाया।”

⁴⁰कने तिन्हां जो भिरी तिसते होर कुच्छ पुछणे दी हिम्मत नीं होई।

⁴¹भिरी तिन्हीं तिन्हां ते पुछया, “मसीह जो दाऊदे दी औलाद किंआं ग्लांदे हन?

⁴²दाऊद अप्पु भी भजन संहिता दिया कताबा च ग्लांदा ऐ: ‘प्रभुयैं मेरे प्रभु नैं ग्लाया,

⁴³मेरे सज्जे बक्खे बैठ, जाह़लू तिकर कि मैं तेरे बैरियां जो तेरेयां पैरां थल्लैं नीं करी दैं।’

⁴⁴दाऊद तां तिस जो प्रभु ग्लांदा ऐ; तां भिरी सैह़ तिसदी औलाद किंआं होएया?”

⁴⁵जाह़लू सारे माणु सुणा दे थे, तां तिन्हीं अपणे चेलेयां नैं ग्लाया,

⁴⁶“सास्त्रियां ते चौकन्ने रेह्आ, जिन्हां जो लम्मे-लम्मे कपड़े पैहनी करी घूमणा खरा लगदा ऐ, कने जिन्हां जो बजारां च नमस्कार, कने आराधनालयां च खास-खास आसण कने धामा च खास जगाह प्यारी लगदी ऐ।

⁴⁷सैह़ बिधवां दे घरां जो चलाकिया नैं हड़पी लेई जांदे हन, कने दस्सणे तांई लमियां-लमियां प्रार्थना करदे हन। क्जोकि एह़ जादा सज़ा पांगे।”