Read Kangri लूका 24 Bible Online

लूका 24 - Kangri bible

लूका 24

¹अपर हफ्ते दे पैहल्ले दिन बड़िया भ्यागा जो सैह़ तिन्हां खुसबु आल़िआं चीज्जां जो जेह्ड़ियां तिन्हां त्यार कित्तियां थियां, लेई नैं कब्रा पर आईआं।

²जाह़लू सैह़ तित्थु पुज्जियां, ताह़लू तिन्हां दिख्या कि कब्रा दे मुँऐ ते पत्थर हटेया ऐ,

³जाह़लू सैह़ कब्रा दिया गुफा दे अंदर गेईयां, तां तित्थु तिन्हां यीशु दी लाह्स नीं दिक्खी।

⁴जाह़लू सैह़ इसा गल्ला पर हरान होआ दियां थियां, तां दिक्खा दो माणु चमकदे कपड़ेयां च तिन्हां अल्ल आई खड़ोते।

⁵डरे दे मारे तिन्हां धरतिया दे पास्से मुँ झुकाया था तां तिन्हां दूँ माणुआं तिन्हां नैं ग्लाया, “तुहां जिन्दे जो मरेयां च क्जो तोपा दियां हन?

⁶सैह़ ऐत्थु नीं ऐ, अपर जिन्दा होई गेआ ऐ। याद करा कि तिन्हीं गलील प्रदेसे च रेई करी तुहां नैं ग्लाया था,

⁷‘जरूरी ऐ कि मैं माणुये दा पुत्तर पापियां दे हुआलैं कित्ता जांगा, कने सूल़िया पर टुंगी दित्ता जांगा, कने त्रीयें दिने मरेयां ते दुवारी भिरी जिन्दा होई जांगा।’ ”

⁸ताह़लू तिसदियां गल्लां तिन्हां जो याद आईआं,

⁹कने कब्रा ते बापस आई नैं तिन्हां ग्यारा चेलेयां जो, कने होरनी सारेयां जो, एह़ सारियां गल्लां ग्लाई नैं सणाईयां।

¹⁰तिन्हां प्रेरितां नैं एह़ गल्लां ग्लाईयां सैह़ मरियम मगदलीनी कने योअन्ना, याकूबे दी माँ मरियम कने तिसा सौगी होर जणासा भी थियां।

¹¹अपर तिन्हां दियां गल्लां तिन्हां जो काहणियां साइआं लगियां, कने तिन्हां जणासा दा बसुआस नीं कित्ता।

¹²ताह़लू पतरस उठी नैं कब्रा अल्ल दौड़ी नैं गेआ, कने झुकी नैं सिर्फ कपड़े पैयो दिक्खे, कने जेह्ड़ा होएया था तिसते हरान होई नैं अपणे घरेयो चली गेआ।

¹³तिसी दिने तिसदे दो चेले इम्माऊस नांऐ दे ग्रांऐ जो जा दे थे, जेह्ड़ा यरूशलेम सैहरे ते कोई सत मील दूर था।

¹⁴सैह़ तिन्हां सारियां गल्लां पर जेह्ड़ियां होईयां थियां, अप्पु च गल्लबात करदे जा दे थे,

¹⁵कने जाह़लू अप्पु च गल्लबात कने पुछताछ करा दे थे, तां यीशु अप्पु आई नैं तिन्हां सौगी चली पेआ।

¹⁶अपर परमात्मैं तिन्हां दियां अखीं ऐसियां बंद कित्तियां थियां कि यीशुये जो पणछैणी नीं सके।

¹⁷तिन्हीं तिन्हां ते पुछया, “एह़ क्या गल्लां हन, जेह्ड़ियां तुहां चलदे-चलदे अप्पु च करा दे हन?” सैह़ उदास होई करी खड़ोई गै।

¹⁸एह़ सुणी नैं तिन्हां नैं क्लियोपास नांऐ दे इक्की माणुयैं ग्लाया, “क्या तू यरूशलेम सैहरे च किल्ला परदेसी ऐ, जेह्ड़ा नीं जाणदा कि इन्हां पिछले कुच्छ दिनां च इस सैहरे च क्या-क्या होएया ऐ?”

¹⁹तिन्हीं तिन्हां ते पुछया, “कुण देईयां गल्लां?” तिन्हां तिस नैं ग्लाया, “यीशु नासरी दे बारे च जेह्ड़ा परमात्मे कने सारेयां लोकां बिच्च अपणे कम्मां कने वचनां च बड़ा सामर्थी भविष्यवक्ता था,

²⁰कने प्रधान याजकां कने अहां दे सरदारां तिसियो पकड़ुआई दित्ता कि तिस पर मौत्ती दा हुक्म दित्ता जां; कने तिसियो सूल़िया पर टूंगेया।

²¹अपर अहां जो आस थी कि एह़ ई इस्राएल देसे जो रोम देसे ते छुटकारा दिंगा। हाँ होर जादा क्या सैह़ सारियां गल्लां जेह्ड़ियां होई चुकियां हन, तिन्हां दा अज्ज त्रीआ दिन ऐ,

²²अपर हुण अहां च कईआं जणासा भी अहां जो हरानिया च पाई दित्या ऐ, जेह्ड़ियां अज्ज भ्यागा कब्रा पर गियां थियां।

²³कने जाह़लू तिसदी लाह्स नीं दिक्खी तां एह़ ग्लांदियां आईआं कि अहां सुअर्गदूतां दे दर्शन कित्ते; जिन्हां ग्लाया, कि यीशु दुवारी जिन्दा होईया ऐ।

²⁴ताह़लू अहां दे साथियां च इक्क कब्रा पर गेआ, कने जिंआं जणासां ग्लाया था तिंआं ई दिख्या; अपर तिसियो नीं दिख्या।”

²⁵ताह़लू यीशुयैं दूँ चेलेयां नैं ग्लाया, “हे मूर्ख लोको, तुहां भविष्यवक्तां दी सारियां गल्लां पर बसुआस करणे पर कितणे सुस्त हन।

²⁶क्या जरूरी नीं था कि मसीह एह़ दुख झेली नैं अपणी महिमा च दाखल होयैं?”

²⁷ताह़लू यीशुयैं मूसा ते कने सारे भविष्यवक्ता ते सुरू करी नैं सारे पवित्रशास्त्र च अपणे बारे च लिखियां गल्लां दा मतलब तिन्हां जो समझाई दित्ता।

²⁸इतणे च सैह़ तिस ग्रांऐ अल्ल पुज्जे जित्थु सैह़ जा दे थे, यीशुयैं ऐदेया बर्ताब कित्ता जिंआं कि तिसियो गांह जाणा होयैं।

²⁹अपर तिन्हां एह़ ग्लाई नैं तिसियो रोकेया, “अहां सौगी रुकी जा, लगभग संझ होईयो ऐ कने हुण दिन ज्यादा ढल़ी गेआ ऐ। ताह़लू सैह़ तिन्हां सौगी रैहणे तांई अंदर गेआ।”

³⁰जाह़लू सैह़ तिन्हां सौगी खाणा बैठा, तां तिन्हीं रोटी लेई धन्यावाद कित्ता कने रोटी तोड़ी नैं तिन्हां जो दैणा लग्गा।

³¹ताह़लू तिन्हां दियां अखीं खुली गियां; कने तिन्हां तिसियो पणछैणी लेआ, कने सैह़ तिन्हां दियां अखीं ते गायब होई गेआ।

³²तिन्हां अप्पु च ग्लाया, “जाह़लू सैह़ रस्ते च अहां नैं गल्लां करा दा था कने पवित्रशास्त्र दा मतलब समझादा था, तां अहां दे मने च बड़ा जोश पैदा होएया।”

³³सैह़ तिस बग्त उठी नैं यरूशलेम सैहरे जो बापस चली गै, कने तिन्हां ग्यारां चेलेयां जो कने तिन्हां साथियां जो किठ्ठा दिख्या।

³⁴सैह़ ग्लांदे थे, “प्रभु सच्च-बिच्च जिन्दा होएया ऐ, कने शमौन पतरसे जो दुस्सेया ऐ।”

³⁵ताह़लू तिन्हां रस्ते दियां गल्लां तिन्हां जो दस्सी दित्तियां, कने एह़ भी कि तिन्हां यीशुये जो रोटी तोड़दे बग्त किंआं पणछैणया।

³⁶चेले एह़ गल्लां ग्ला दे ई थे, कि यीशु अप्पु ई तिन्हां दे बिच्च आई खड़ोता, कने तिन्हां नैं ग्लाणा लग्गा, “तुहां जो सांति मिल्लैं।”

³⁷अपर सैह़ घबराई गै, कने डरी गै, कने समझे कि अहां कुसी भूते जो दिक्खा दे हन।

³⁸तिन्हीं तिन्हां नैं ग्लाया, “क्जो घबरांदे हन? कने तुहां दे मने च क्जो शक होआ दा ऐ?

³⁹मेरे हत्थां कने पैरां जो दिक्खा कि मैं सैई ऐ। मिन्जो छुई नैं दिक्खा, क्जोकि आत्मा जो हड्डी मास नीं हुंदा, जिंआं मिन्जो च दिक्खदे हन।”

⁴⁰एह़ ग्लाई नैं यीशुयैं तिन्हां जो अपणे हत्थ पैर दस्से।

⁴¹जाह़लू खुसिया दे मारे तिन्हां जो बसुआस नीं होएया, कने सैह़ हरान हुंदे थे, तां तिन्हीं तिन्हां ते पुछया, “क्या तुहां अल्ल ऐत्थु कुच्छ खाणेयों ऐ?”

⁴²तिन्हां तिसियो भुनिया मच्छिया दा टुकड़ा दित्ता।

⁴³तिन्हीं लेई नैं तिन्हां दे सामणै खादा।

⁴⁴भिरी यीशुयैं तिन्हां नैं ग्लाया, “एह़ मेरियां सैह़ गल्लां हन, जेह्ड़ियां मैं तुहां सौगी रेई करी तुहां नैं ग्लाईयां थियां, कि जरूरी ऐ कि जितणियां गल्लां मूसा दी व्यबस्था कने भविष्यवक्तां कने भजनां दिया कताबा च मेरे बारे च लिखियां हन, सारियां पूरियां होन।”

⁴⁵ताह़लू तिन्हीं पवित्रशास्त्र समझणे तांई तिन्हां दी मदत कित्ती,

⁴⁶कने भिरी यीशु तिन्हां नैं ग्लाणा लग्गा, “पवित्रशास्त्रे च एह़ लिख्या ऐ कि मसीह दुख झेलगा, कने त्रीये दिनैं मरेयां ते जिन्दा होई जांगा,

⁴⁷कने यरूशलेम सैहरे ते लेई नैं सारी जातिआं दे लोकां च मन बदलणे दा कने पापां दी माफी दा प्रचार, मसीह दे नांऐ ते कित्ता जांगा।

⁴⁸तुहां इन्हां सारियां गल्लां दे गवाह हन।

⁴⁹कने सुणा, मैं अप्पु पवित्र आत्मा तुहां पर घल्लगा जिसादे बारे च मेरे पितैं वादा कित्या ऐ, अपर जाह़लू तिकर तुहां जो सुअर्गे ते सामर्थ नीं मिल्लैं, ताह़लू तिकर तुहां तिस सैहरे जो मत छड्डदे ।”

⁵⁰ताह़लू यीशु तिन्हां जो बैतनिय्याह ग्रांऐ ते बाहर लेई गेआ, कने अपणा हत्थ चुक्की नैं आसीष दित्ती;

⁵¹कने तिन्हां जो आसीष देई करी सैह़ तिन्हां ते लग्ग होई गेआ कने सुअर्गे जो चली गेआ।

⁵²ताह़लू सैह़ तिस जो प्रणांम करी नैं बड़े खुस होई नैं यरूशलेम सैहरे जो बापस हटी आये।

⁵³कने सैह़ लगातार मंदरे च आई नैं परमात्मे दी स्तुति कने धन्यावाद करदे थे।