Read Kangri लूका 3 Bible Online

लूका 3 - Kangri bible

लूका 3

¹एह़ घटनां राजा तिबिरियुस कैसर दे राज्जे दे पन्दरां साल्लां च जाह़लू पुन्तियुस पिलातुस नांऐ दा इक्क माणु यहूदिया प्रदेसे दा हाकम था, कने राजा हेरोदेस गलील प्रदेसे दे चौथाई हिस्से पर राज्ज करदा था कने तिसदे भाऊ फिलिप्पुस इतूरिया कने त्रखोनितिस जिले पर राज्ज करदे थे, कने अबिलेन जिले च लिसानियास राज्ज करदा था।

²कने तिस बग्त हन्ना कने काइफा महायाजक थे, तिस बग्त परमात्मे दा वचन सुनसाण जगाह च जकरियाह दे पुत्तर यूहन्ने अल्ल पुज्जा,

³कने सैह़ यरदन नदिया दे अक्खे-बक्खे देयां सारेयां प्रदेसां च जाई करी, लोकां जो अपणे-अपणे पापां दी माफी तांई मने बदलणे दे बपतिस्मे दा प्रचार करणा लग्गा।

⁴जिंआं यशायाह भविष्यवक्ता दे ग्लायो वचनां दिया कताबा च लिख्या ऐ, कि “सुनसाण जगाह च इक्क हक्कां पाणे आल़े दी उआज़ सुम्मां दी कि, ‘प्रभु तांई लोकां देयां मनां जो त्यार करा, कने अपणे आप्पे जो सुधारा।

⁵हर इक्क खाई भरी दित्ती जांगी, कने सारे प्हाड़ कने टिले बराबर होई जांगे; कने जेह्ड़े टेड्डे कने उबड़ खाबड़ हन, सैह़ रस्ते बराबर कित्ते जाणे।

⁶कने हर इक्क माणु तिसदा दर्शन करगा, जेह्ड़ा परमात्मे दे पास्से ते छुटकारा दैणे तांई घल्लेया ऐ’।”

⁷जेह्ड़ी लोकां दी बड़ी बड्डी भीड़ यूहन्ने अल्ल बपतिस्मा लैणे जो निकल़ी नैं ओंदी थी, तिन्हां नैं सैह़ ग्लांदा था, “हे सर्पे साइआं जेहरिलै लोको, तुहां जो कुणी दस्सी दित्ता कि परमात्मे दे ओणे आल़े कोपे ते नठा।

⁸कने अपणे-अपणे मने जो पापां ते बदलणे दा खरे कम्म करी नैं सबूत देआ, कि सच्च बिच्च तुहां मन बदली लियो हन कने एह़ सोचणा छड्डी देआ, कि ‘अहां तां अब्राहमे दे वंशे दे हन, तां अहां बची जांगे।’ क्जोकि मैं तुहां नैं ग्लांदा ऐ, कि परमात्मा इन्हां पत्थरां ते भी अब्राहमे तांई औलाद पैदा करी सकदा ऐ।

⁹हुण गल्ल इआं कि परमात्मा हर इक्की जो जेह्ड़ा मने जो नीं बदलणा चांह़दा, तिसियो सज़ा दैणे तांई बिलकुल त्यार ऐ। ठीक तिंआं ई जिंआं कि कुआड़ी रूखां दियां जड़ा पर रखियो ऐ, इसतांई जेह्ड़ा-जेह्ड़ा रूख खरा फल़ नीं दिंदा, सैह़ बड्डी करी अग्गी च फूकेया जांदा ऐ।”

¹⁰ताह़लू लोकां तिसते पुछया, “तां अहां जो परमात्मे दिया सज़ा ते बचणे तांई क्या करणा चाइदा?”

¹¹यूहन्ने तिन्हां जो जवाब दित्ता, “जिस अल्ल दो कुरते हन, सैह़ तिस सौगी जिस अल्ल नीं हन बंडी लै कने जिस अल्ल मता खाणेयो ऐ, सैह़ भी इआं ई करैं।”

¹²चुंगी लैणे आल़े भी बपतिस्मा लैणां आये, कने तिसते पुछणा लग्गे, “हे गुरू, तां अहां जो भी परमात्मे दिया सज़ा ते बचणे तांई क्या करणा चाइदा?”

¹³यूहन्ने तिन्हां नैं ग्लाया, “जेह्ड़ा कर तुहां जो रोमी सरकार दे जरिये लैणे तांई दस्सेया तितणा ई लेआ करा, अपर धोखा धड़ी करी नैं तिसते जादा मत लैंदे।”

¹⁴भिरी सपाई भी तिसते पुछणा लग्गे, “अहां क्या करन?” तिन्हीं तिन्हां नैं ग्लाया, “कुसी ते रिश्वत मत लैंदे कने ना ई कुसी पर झूठा दोस लगाणा, कने जितणी तणखाह तुहां जो मिलदी ऐ तिस च ई खुस रेह्आ।”

¹⁵जाह़लू लोक मसीह दे ओणे दिया निहाल़पा च बैठेयो थे, कने सारे अपणे-अपणे मने च यूहन्ने दे बारे च बचार करा दे थे? कि क्या ऐई मसीह तां नीं ऐ।

¹⁶ताह़लू यूहन्ने तिन्हां सबना जो ग्लाया, मैं तां तुहां जो पांणिये ते बपतिस्मा दिंदा ऐ, अपर सैह़ ओणे आल़ा मसीह ऐ, जेह्ड़ा मिन्जो ते सामर्थी ऐ। मैं तां इस जोग्गा भी नीं कि तिसदे जूत्तेयां देयां तस्मेआं दी गठ्ठी भी खोली सकैं। सैह़ तां तुहां जो पवित्र आत्मा कने अग्गी ते बपतिस्मा दिंगा।

¹⁷तिसदा छज, तिसदे हत्थे च ऐ; कने सैह़ अपणेयां खेतां जो खरे कित्ते साफ करगा; कने कणकां जो अपणे पेड़ूये च किठ्ठा करगा; अपर भूये जो तिसा अग्गी च जेह्ड़ी कदी भी बुझदी नीं फुकी दिंगा।

¹⁸इन्हीं साह्भें यूहन्ने खरियां गल्लां सणाई करी लोकां जो सुसमाचार सणांदा रेह्आ।

¹⁹अपर जाह़लू यूहन्ने गलीले दे चौथाई देसे दे हेरोदेस राजे जो अपणे भाऊ फिलिप्पुसे दी लाड़ी हेरोदियासा जो अपणी लाड़ी बणाणे दे बारे च कने तिन्हां सारे बुरे कम्मां दे बारे च जेह्ड़े तिन्हीं कित्यो थे एह़ ग्लाई नैं झिड़केया।

²⁰तां इसा गल्ला पर हेरोदेस राजैं यूहन्ने जो कैदी बणाई करी इक्क होर बड्डा अपराध करी दित्ता।

²¹जाह़लू सारे लोकां दे बपतिस्मा लैणे ते बाद यीशु भी जाह़लू बपतिस्मा लेई करी प्रार्थना करणा लग्गा, तां अम्बर खुली गेआ।

²²कने पवित्र आत्मा कबूतरे साइआं तिस पर आया, कने परमात्मे सुअर्गे ते ग्लाया, “तू मेरा प्यारा पुत्तर ऐ, जिस नैं मैं प्यार रखदा ऐ, मैं तिज्जो ते खुस ऐ।”

²³जाह़लू यीशु परमात्मे दे वचनां दी भक्ति करणा लग्गा, तां सैह़ कोई तीयां साल्लां दा था, (जिंआं कि माणु यीशुये जो यूसुफे दा पुत्तर समझदे थे) तां तिसदा खानदान इआं ऐ कि, यीशु यूसुफ दा पुत्तर था कने यूसुफ एलिये दा,

²⁴कने सैह़ मत्ताते दा, कने सैह़ लेविये दा कने सैह़ मलकी दा, कने सैह़ यन्ना दा, कने सैह़ यूसुफे दा।

²⁵कने सैह़ मत्तित्याह दा, कने सैह़ आमोसे दा, कने सैह़ नहूमे दा, कने सैह़ असल्याह दा, कने सैह़ नोगह दा।

²⁶कने सैह़ माते दा, कने सैह़ मत्तित्याह दा, कने सैह़ शिमी दा, कने सैह़ योसेखे दा, कने सैह़ योदाह दा,

²⁷कने सैह़ यूहन्ने दा, कने सैह़ रेसे दा, कने सैह़ जरूब्बाबिले दा, कने सैह़ शालतिएले दा, कने सैह़ नेरी दा,

²⁸कने सैह़ मलकी दा, कने सैह़ अद्दी दा, कने सैह़ कोसामे दा, कने सैह़ इलमोदामे दा, कने सैह़ एरे दा,

²⁹कने सैह़ यहोशू दा, कने सैह़ इलाजारे दा, कने सैह़ योरीमे दा, कने सैह़ मत्ताते दा, कने सैह़ लेविये दा,

³⁰कने सैह़ शमौने दा, कने सैह़ यहूदा दा, कने सैह़ यूसुफे दा, कने सैह़ योनाने दा, कने सैह़ इलयाकीमे दा,

³¹कने सैह़ मलेआह दा, कने सैह़ मिन्नास दा, कने सैह़ मत्तता दा, कने सैह़ नातान दा, कने दाऊदे दा,

³²कने सैह़ यिशै दा, कने सैह़ ओबेदे दा, कने सैह़ बोअजे दा, कने सैह़ सलमोने दा, कने सैह़ नहशोने दा,

³³कने सैह़ अम्मीनादाबे दा, कने सैह़ अरनी दा, कने सैह़ हिस्रोने दा, कने सैह़ फिरिसे दा, कने सैह़ यहूदा दा,

³⁴कने सैह़ याकूबे दा, कने सैह़ इसहाके दा, कने सैह़ अब्राहमे दा, कने सैह़ तिरहे दा, कने सैह़ नाहोरे दा,

³⁵कने सैह़ सरूगे दा, कने सैह़ रऊ दा, कने सैह़ फिलिगे दा, कने सैह़ एबिरे दा, कने सैह़ शिलहे दा,

³⁶कने सैह़ अरफक्षदे दा, कने सैह़ शेमे दा, कने सैह़ नूहे दा, कने सैह़ लिमिके दा,

³⁷कने सैह़ मथूशिलह दा, कने सैह़ हनोके दा, कने सैह़ यिरिदे दा, कने सैह़ महललेले दा, कने सैह़ केनाने दा,

³⁸कने सैह़ इनोशे दा, कने सैह़ शेते दा, कने सैह़ आदमे दा, कने सैह़ परमात्मे दा पुत्तर था।