Read Kangri लूका 5 Bible Online

लूका 5 - Kangri bible

लूका 5

¹यीशु जाह़लू गलील प्रदेसे दे गन्नेसरत नांऐ दिया झीला दे कनारे पर खड़ोत्या था तां लोकां दी बड़ी बड्डी भीड़ तिसदे चौंन्नी पास्से खड़ोई करी परमात्मे दा वचन सुणना लगियो थी तां क्या होएया कि,

²यीशुये दी नजर तिसा झीला दे कनारे खड़ोतियां दूँ किस्तियां पर पेई, तिन्हां ते मछुवारे लौई करी मच्छियां पकड़णे आल़े जाल़ां धोआ करदे थे।

³ताह़लू यीशु इक्की किस्तिया पर चढ़ी गेआ, जेह्ड़ी कि शमौन नांऐ दे इक्की माणुये दी थी, कने तिस नैं ग्लाणा लग्गा, किस्तिया कनारे ते थोड़ी देहई गांह लेई चल। भिरी सैह़ तिसा किस्तिया च बेई करी तिन्हां माणुआं जो वचन सणाणा लग्गा।

⁴जाह़लू यीशु लोकां जो वचन सणाई बैठा तां शमौने नैं ग्लाया, “किस्तिया डुग्गिया जगाह च लेई चल, कने मच्छियां पकड़णे तांई अपणे जाल़े पांणिये च सट्ट।”

⁵ताह़लू शमौने तिसियो जवाब दित्ता, “हे मालक, अहां तां पूरी रात मेहनत करदे रैह् अपर कख भी पले नीं पेआ; अपर चलो जे तुहां ग्लांदे हन तां अहां भिरी ते जाल़ सट्टदे हन।”

⁶जाह़लू पतरसैं कने तिसदे साथियां जाल़ सट्टेया तां मतिआं भरी मच्छियां तिसदे जाल़े च फंसी गियां, कने तिसदा जाल़ छकूई चला।

⁷तां एह़ दिक्खी करी तिन्हां अपणे संगी साथियां जो जेह्ड़े दूईआ किस्तिया च थे, सणक लाई करी सदणा लग्गा कि आई करी अहां दी मदत करा, कने तिन्हां आई करी दोयो किस्तियां इतणी भरी लेईआं कि डुबणा लगियां।

⁸एह़ दिक्खी करी शमौन पतरस यीशुये दे पैरां पर पेई करी ग्लाणा लग्गा, “हे प्रभु मेरे बक्खे ते चली जा क्जोकि मैं पापी माणु ऐ।”

⁹क्जोकि मती सारी मच्छियां पकड़ी लैणे ते तिसियो कने तिसदे साथियां जो बड़ी हरानी होई।

¹⁰कने जबदिये दे पुत्तर याकूब कने यूहन्ने जो भी जेह्ड़े तिस सौगी थे एह़ दिक्खी करी हरानगी होई। ताह़लू यीशु शमौने नैं ग्लाणा लग्गा, “डर मत हुण जिंआं तू मच्छियां पकड़दा था, तिंआं ई अज्जे दे बाद तैं माणु परमात्मे तांई सिष्य बणाणे हन।”

¹¹कने सैह़ किस्तियां जो कनारे पर लेई आये कने सब कुच्छ छड्डी करी यीशुये पचांह़ चली पै।

¹²भिरी इक्की सैहरे च यीशुये दी मुलाकात इक्की कोढ़िये सौगी होई, जिसियो बड़ा भारी कोढ़ था, सैह़ यीशुये दे पैरां पेई करी प्रार्थना करणा लग्गा, “हे प्रभु जे तू चां तां मिन्जो खरा करी सकदा ऐ।”

¹³यीशुयैं हत्थ गांह करी नैं तिसियो छुता, कने ग्लाया, “हाँ, मैं चांह़दा ऐ, कि तू खरा होई जां।” कने तिसदा कोढ़ ताह़लू ई खरा होई गेआ।

¹⁴ताह़लू तिन्हीं तिसियो समझाया, “जेह्ड़ा कुच्छ तिज्जो नैं होएया तिसियो कुस नैं मत दस्सदा, अपर जाई नैं अप्पु जो याजके जो दस्स, कने अपणे खरे होणे दे बारे च जेह्ड़ा चढ़ावा मूसैं भविष्यवक्तैं दस्सेया ऐ, तिसियो भेंट चढ़ा तांजे तिन्हां लोकां जो पता लग्गी जां कि तू खरा होई गेआ।”

¹⁵अपर यीशुये दे कम्मां दी चर्चा होर भी फैलदी गेई, भिरी भीड़ा दी भीड़ तिसदी सुणने तांई कने अपणी बमारियां ते ठीक होणे तांई किठ्ठी होई।

¹⁶अपर यीशु तिन्हां ते दूर जाई करी सुनसाण जगाह च प्रार्थना करदा था।

¹⁷इक्क दिन इआं होएया कि यीशु वचन सणा दा था, कने तित्थु फरीसी कने व्यवस्थापक भी बैठेयो थे, सैह़ गलील प्रदेस कने यहूदिया प्रदेसे दे हर सैहरां ते, कने यरूशलेम सैहरे ते आएयो थे, कने बमारां जो ठीक करणे दी सामर्थ यीशु च थी।

¹⁸कने दिक्खा कुच्छ माणु अधरंगे दे इक्की रोगिये जो मंजोल़ूये च चुक्की नैं लेई आये, सैह़ तिसियो यीशुये अल्ल अंदरेयो लिणे दा तरीका तोपणा लग्गे,

¹⁹अपर तित्थु भीड़ इतणी थी कि अंदर पैर रखणेयो जगाह भी नीं थी तां सैह़ माणु छत्ती पर चढ़ी गै कने तिन्हां छत्ती दे सैल़ां कुआड़ी करी तिस माणुये जो मंजोल़ूये समेत तिसा जगाह ते यीशुये सामणै लौआई दित्ता।

²⁰यीशुयैं तिन्हां दा बसुआस दिक्खी करी तिस रोगिये नैं ग्लाया, “हे माणु, तेरे पाप माफ होये।”

²¹ताह़लू एह़ सब दिक्खी करी सास्त्री कने फरीसी माणु अप्पु च ग्लाणा लग्गे, “एह़ कुण ऐ, जेह्ड़ा परमात्मे दी निंदा करदा ऐ, परमात्मे जो छड्डी नैं होर कुण पापां जो माफ करी सकदा ऐ?”

²²यीशुयैं तिन्हां दे मने दियां गल्लां जाणी नैं ग्लाया, “तुहां अपणे मने च क्या सोचा दे हन कि मैं परमात्मे दी निंदा करा दा ऐ?

²³सौखा क्या ऐ, क्या एह़ ग्लाणा कि ‘तेरे पाप माफ होये,’ या एह़ ग्लाणा कि ‘उठ कने चल फिर?’

²⁴अपर इसतांई कि तुहां जाणी लेआ कि मैं माणुये दा पुत्तर जिसियो धरतिया पर पाप माफ करणे दा भी हक्क ऐ।” यीशुयैं तिस अधरंगे दे रोगिये नैं ग्लाया, “कि मैं तिज्जो नैं ग्लांदा ऐ, उठ कने अपणे मंजोल़ूये चुक्की नैं अपणे घरे जो चली जा।”

²⁵सैह़ इकदम उठी नैं तिन्हां दे दिक्खदे-दिक्खदे जिस मंजोल़ूये पर सैह़ पेआ था तिसियो चुक्की करी परमात्मे दी महिमा करदा अपणे घरेयो चली गेआ।

²⁶एह़ दिक्खी करी सारे लोक हरान होई करी परमात्मे दी महिमा करणा लग्गे कने बड़े डरी करी ग्लाणा लग्गे, “अज्ज अहां बड़ा बड्डा चमत्कार दिख्या ऐ।”

²⁷कने इसते बाद यीशु सैहरे ते बाहर गेआ, कने तित्थु इक्क लेवी नांऐ दा चुंगी लैणे आल़े माणुये जो चुंगी लैणे दिया चौकिआ पर बैठेया दिख्या, कने यीशु तिस नैं ग्लाणा लग्गा, मिन्जो पचांह़ चली पौ।

²⁸ताह़लू सैह़ सब कुच्छ छड्डी करी यीशुये पचांह़ चली पेआ।

²⁹कने लेवियैं अपणे घरैं बड्डी धाम लगाई; कने धामा च लेवियैं अप्पु सौगी चुंगी लैणे आल़ेआं कने मतेआं परोणेयां सौगी खाणा खाणे बैठे, कने मती भीड़ थी।

³⁰इसा गल्ला पर फरीसी कने तिन्हां दे सास्त्री माणु तिसदे चेलेयां नैं एह़ ग्लाई करी कुडकुड़ाणे लग्गे, “तुहां चुंगी लैणे आल़ेआं कने पापियां सौगी क्जो खांदे पींदे हन।”

³¹यीशुयैं तिन्हां जो जवाब दित्ता, “बैद भले चंगेया तांई नीं, अपर बमारां तांई जरूरी हुंदे हन।

³²मैं धर्मियां जो नीं, अपर पापियां दा मन बदलणे तांई कने सदणा आया ऐ तांजे पापी उद्धार पान।”

³³तिन्हां यीशुयैं नैं ग्लाया “यूहन्ने दे चेले तां बराबर ब्रत रखदे कने प्रार्थना करदे हन, कने तिंआं ई फरीसी माणुआं दे चेले भी करदे, अपर तेरे चेले तां खांदे पींदे हन।”

³⁴यीशु तिन्हां नैं ग्लाणा लग्गा, “जाह़लू तिकर लाड़ा बरातियां सौगी ऐ, तां क्या बराती ब्रत करी सकदे हन?

³⁵अपर सैह़ दिन ओंगे, जाह़लू लाड़ा तिन्हां ते लग्ग कित्ता जांगा, ताह़लू सैह़ तिन्हां दिनां च ब्रत करगे।”

³⁶यीशुयैं इक्क होर गल्ल सणाई करी ग्लाया, “कोई भी माणु नौये कपड़े छेकी करी पराणे कपड़े च कितरू नीं लगांदा, नीं तां नौआं छकूई जांगा कने पराणा कितरू तिस नैं मेल भी नीं खांगा।

³⁷कोई भी ताजा अंगूरा दा रस पराणियां पत्तल़ियां सराईयां च नीं भरदा, क्जोकि ताजा अंगूरा दा रस तिन्हां सराईयां जो फाड़ी करी निकल़ी जांगा, कने सराईयां नास होई जागियां।

³⁸ताजा अंगूरा दा रस नौईआं मोटियां सराईयां च भरणा चाइदा।

³⁹जेह्ड़ा कोई पराणा अंगूरा दा रस पी करी ताजा नीं चांह़दा क्जोकि सैह़ ग्लांदा ऐ, कि पराणा ई ठीक ऐ।”