Read Kangri लूका 6 Bible Online

लूका 6 - Kangri bible

लूका 6

¹भिरी जाह़लू बिस्रामे आल़े दिन यीशु अपणे चेलेयां सौगी कणका देयां खेतां ते होई करी जा दे थे, कने तिसदे चेले कणका दे सिल्लेयां तोड़ी-तोड़ी नैं हत्थां च मल़ी-मल़ी करी खा करदे थे।

²एह़ दिक्खी नैं कुच्छ फरीसी माणु ग्लाणा लग्गे, “तुहां सैह़ कम्म क्जो करा दे हन जेह्ड़ा बिस्रामे आल़े दिनैं करणा ठीक नीं ऐ।”

³यीशुयैं फरीसी माणुआं जो जवाब दित्ता, “क्या तुहां पवित्रशास्त्रे च एह़ नीं पढ़ेया कि दाऊदैं जाह़लू सैह़ कने तिसदे साथी भुखे थे तां तिन्हां क्या कित्ता?

⁴सैह़ किंआं परमात्मे दे घरे च गेआ? कने तित्थु चढ़ावे दियां रोटियां खादियां, जिन्हां जो खाणा याजकां जो छड्डी नैं होर कुसी जो भी ठीक नीं था।”

⁵कने यीशुयैं तिन्हां नैं ग्लाया, “मैं माणुये दा पुत्तर बिस्रामे आल़े दिने पर भी अधिकार रखदा ऐ।”

⁶इआं होएया कि कुसी होर बिस्रामे आल़े दिनैं सैह़ आराधनालय च जाई करी सिक्षा दैणा लग्गा; कने तित्थु इक्क माणु था जिसदा खब्बा हत्थ सुक्केया था।

⁷सास्त्री कने फरीसी माणु तिस पर दोस लगाणे दा मौका तोपा दे थे सैह़ ग्लाणा लग्गे, कि अज्ज दिक्खदे हन कि सैह़ बिस्रामे आल़े दिनैं ठीक करदा ऐ कि नीं।

⁸अपर यीशु तिन्हां दे मने दे बचारां जो जाणदा था; इसतांई तिन्हीं सुक्के हत्थे आल़े माणुये नैं ग्लाया, “उठ, बिच्च खड़ोई जा।” सैह़ उठी करी खड़ोई गेआ।

⁹यीशुयैं तिन्हां नैं ग्लाया, “मैं तुहां ते एह़ पुछदा ऐ, कि मूसा दिया व्यबस्था मताबक बिस्रामे आल़े दिन क्या करणा ठीक ऐ, खरा या बुरा करणा; प्राणा जो बचाणा या नास करणा।”

¹⁰ताह़लू यीशुयैं तित्थु बैठेयो सारे माणुआं जो दिक्खी करी सुक्के हत्थे आल़े माणुये जो ग्लाया, “अपणे हत्थे गांह कर।” जिंआं ई तिन्हीं अपणा हत्थ गांह कित्ता, तिसदा हत्थ खरा होई गेआ।

¹¹अपर सास्त्री कने फरीसी माणु आप्पे ते बाहर होई करी अप्पु च सोचणा लग्गे कि अहां यीशुये नैं क्या करन।

¹²तिन्हां दिनां च यीशु प्हाड़े पर प्रार्थना करणा गेआ, कने पूरी रात परमात्मे नैं प्रार्थना करदे बिताई।

¹³जाह़लू भ्याग होई तिन्हीं अपणे सारे चेले अप्पु अल्ल सदे कने तिन्हां च खास बाराह चेले चुणी लै, कने तिन्हां जो प्रेरित ग्लाया।

¹⁴कने तिन्हां दे नां एह़ हन, शमौन जिसदा नां पतरस भी रखेया, तिसदा भाऊ अन्द्रियास, याकूब कने यूहन्ना, फिलिप्पुस कने बरतुल्मै,

¹⁵कने मत्ती, थोमा, हलफई दा पुत्तर याकूब, कने शमौन जिसदा नां जेलोतेस भी ऐ,

¹⁶याकूबे दा पुत्तर यहूदा, कने यहूदा इस्करियोती जिन्हीं बादे च यीशुये जो पकड़ुवाया था।

¹⁷ताह़लू यीशु अपणे चेलेयां सौगी प्हाड़े ते लौई करी इक्क खुलिया जगाह च खड़ोईया, कने तिसदे होर चेलेयां दी भीड़ दूरे-दूरे ते कने सारे यहूदिया प्रदेसे ते, यरूशलेम सैहरे ते, सूर कने सैदा देसे ते समुंदरी लाक्के ते बड़े भरी माणु,

¹⁸सैह़ माणु तिसदे वचनां सुणना कने अपणी बमारियां ते ठीक होणे तांई तिस अल्ल आएयो थे, तिन्हां माणुआं ते यीशुयैं कई दुष्टआत्मां कड्डी करी खरे कित्ते।

¹⁹सारे माणु यीशुये जो हत्थ लगाणा चांह़दे थे, क्जोकि तिसते सामर्थ निकल़दी थी कने रोगी ठीक हुंदे थे।

²⁰ताह़लू यीशुयैं अपणे चेलेयां जो दिक्खी करी ग्लाया, “धन हन तुहां, जेह्ड़े दीन मने दे हन, क्जोकि परमात्मे दा राज तुहां दा ऐ।

²¹धन हन तुहां जेह्ड़े इस बग्त भी भुखे हन, क्जोकि परमात्मा तुहां जो तृप्त करगा। धन हन तुहां जेह्ड़े हुण रोंदे हन, क्जोकि सैह़ हंसगे।

²²धन हन तुहां, जाह़लू माणुये दे पुत्तरे दिया बज़ाह ते लोक तुहां नैं बैर करगे, कने तुहां जो कड्डी दिंगे, कने तुहां दी निंदा करगे, कने तुहां दा नां बदनाम करगे।

²³“तुहां तिस दिन खुस होई करी कुदणा, क्जोकि इस बासती तुहां तांई सुअर्गे च इक्क बड्डा प्रतिफल़ ऐ। तिन्हां दे स्याणे भी पराणे जमाने दे भविष्यवक्तां सौगी भी तिंआं ई बर्ताब करदे थे।

²⁴“अपर हाय, तुहां पर जेह्ड़े बड़े अमीर हन, क्जोकि तुहां अपणी खुसी पाई चुकेयो हन।

²⁵हाय, तुहां पर जेह्ड़े हुण रज्जेयो हन, क्जोकि सैह़ भुखे हुंगे। हाय तुहां पर जेह्ड़े हुण हंसदे हन, क्जोकि सोक करगे कने रोंगे।

²⁶हाय, तुहां पर जाह़लू सारे माणु तुहां जो खरा ग्लान, क्जोकि तुहां दे पूर्वज भी झूठे भविष्यवक्तां सौगी इआं ई करदे थे।

²⁷“अपर मैं तुहां सुणने आल़ेआं जो ग्लांदा ऐ, कि अपणे दुश्मणा नैं भी प्यार रखा; जेह्ड़े तुहां नैं बैर रखगे, तिन्हां दा खरा करा।

²⁸जेह्ड़ा तुहां जो श्राप दैं, तिन्हां जो आसीष देआ; जेह्ड़ा तुहां दा अपमान करैं, तिन्हां तांई प्रार्थना करा।

²⁹जेह्ड़ा तुहां दिया इक्की खाखा पर चपेड़ मारे तिसदे गांह दूईआ खाखा भी करी देआ; कने जेह्ड़ा तेरी कमरी लैणां चांह़दा ऐ, तिसियो कुरता लैणे ते भी मत रोक।

³⁰जेह्ड़ा कोई तिज्जो ते मंगे, तिसियो दे, कने जेह्ड़ा तेरी चीज्ज खोई लैं, तिसते मत मंग।

³¹कने जिंआं तुहां चांह़दे हन कि माणु तुहां सौगी करन, तुहां भी तिन्हां सौगी तिंआं ई करा।

³²“जे तुहां अपणे प्यार रखणे आल़ेआं सौगी प्यार रखन, तां इस च कुण देहई बड्डी गल्ल ऐ? क्जोकि पापी भी तां अपणे प्यार रखणे आल़ेआं सौगी प्यार रखदे हन।

³³जे तुहां भी अपणेयां भलाई करणे आल़ेआं सौगी ई भलाई करदे हन, तां इस च कुण देहई बड्डी गल्ल ऐ? क्जोकि पापी भी इआं ई करदे हन।

³⁴जे तुहां माणुआं जो उधार दैन, जिन्हां ते भिरी पाणे दी आस रखदे हन, तां इस च कुण देहई बड्डी गल्ल ऐ? क्जोकि पापी-पापियां जो उधार दिंदे हन कि तितणा भिरी पान।

³⁵अपर अपणे दुश्मणा नैं भी प्यार रखा, कने भलाई करा कने भिरी पाणे दी उम्मीद नीं रखी करी उधार देआ। कने तुहां तांई बड़ा बड्डा प्रतिफल़ हुंगा, कने तुहां परम प्रधान परमात्मे दे बच्चे हुंगे, क्जोकि सैह़ तिन्हां बुरे माणुआं पर दयाबान ऐ, जेह्ड़े धन्यावाद नीं करदे।

³⁶जिंआं तुहां दा पिता परमात्मा दयाबान ऐ, तिंआं ई तुहां भी दयाबान बणा।

³⁷“दोस मत लगा, तां तुहां पर भी दोस नीं लगाया जांगा। कुसियो दोसी मत बणा, तां तुहां भी दोसी नीं बणाया जांगा। माफ करा, तां तुहां जो भी माफ कित्ता जांगा।

³⁸तुहां दिंगे, तां तुहां जो भी दित्ता जांगा। लोक तुहां जो पूरे नापे नैं जिक्की-जिक्की करी कने हलाई-हलाई करी कने चूंड लगाई नैं तुहां दिया गोदिया च पांगे, क्जोकि जिस नापे नैं तुहां नापदे हन तिस नापे नैं तुहां तांई भी नापेया जांगा।”

³⁹भिरी यीशुयैं तिन्हां जो इक्क उदारण दित्ता, “क्या इक्क अन्ना, अन्ने जो रस्ता दस्सी सकदा ऐ? क्या दोयो खड्डे च नीं पोंगे।

⁴⁰चेला अपणे गुरुये ते बड्डा नीं हुंदा, अपर जेह्ड़ा कोई सिद्ध हुंगा, सैह़ अपणे गुरुये साइआं हुंगा।

⁴¹तू क्जो अपणे भाऊये दी अखीं दे कखे जो दिक्खदा ऐ, कने तिज्जो अपणिया अखीं दा लट्ठा नीं दुस्सदा?

⁴²कने जाह़लू तिज्जो अपणिया अखीं दा लट्ठा नीं दुस्सदा, तां अपणे भाऊये नैं किंआं ग्लाई सकदा ऐ, ‘हे भाऊ ठैहर मैं तेरिया अखीं दे कखे जो कड्डी दिंदा?’ हे पाखंडी, पैहल्ले अपणिया अखीं दे लट्ठे जो तां कड्ड, ताह़लू जेह्ड़ा कख तेरे भाऊये दिया अखीं च ऐ, खरे कित्ते दिक्खी नैं कड्डी सकगा।

⁴³“कोई भी खरा रूख नकम्मा फल़ नीं दिंदा, कने ना तां कोई नकम्मा रूख ऐ जेह्ड़ा खरा फल़ दिंदा ऐ।

⁴⁴हर इक्क रूख अपणे फल़े ते पणछुंदा ऐ; क्जोकि माणु झाड़ियां ते धूड़े नीं तोड़दे कने ना झड़बेरी ते अंगूर।

⁴⁵भला माणु अपणे मने दे खरे भण्डार ते खरियां गल्लां कड्डदा ऐ, कने बुरा माणु अपणे मने दे बुरे भण्डारे ते बुरिआं गल्लां कड्डदा ऐ; क्जोकि जेह्ड़ा मने च भरोया हुंदा ऐ सैई तिसदे मुँऐ च निकल़दा ऐ।

⁴⁶“जाह़लू तुहां मेरा कैहणा ई नीं मनदे तां मिन्जो क्जो ‘हे प्रभु, हे प्रभु’ ग्लांदे हन?

⁴⁷जेह्ड़ा कोई मिन्जो अल्ल ओंदा ऐ कने मेरियां गल्लां सुणी करी तिन्हां जो मनदा ऐ, मैं तुहां जो दस्सदा ऐ कि सैह़ कुस साइआं ऐ:

⁴⁸सैह़ माणु तिस अक्लमंद माणुये साइआं ऐ, जिन्हीं अपणा घर बणांदे बग्त जमीना पर डुग्गी नीई खुणी कने पत्थर पाई करी बणाया, कने जाह़लू बाढ़ आई तां पाणी तिस घरे नैं लग्गा अपर तिसियो कोई नकसान नीं होएया, क्जोकि सैह़ पक्का बणया था।

⁴⁹अपर जेह्ड़ा मेरियां गल्लां सुणी करी नीं मनदा सैह़ मूर्ख माणुये साइआं ऐ जिन्हीं धरतिया दिया चिक्का पर बगैर नीआं पाई करी घर बणाया, जाह़लू बाढ़ आई कने तिस घरे नैं टकराई ताह़लू सैह़ तिसी बग्त ढेई नैं सत्यानाश होई गेआ।”