Read Kangri लूका 7 Bible Online

लूका 7 - Kangri bible

लूका 7

¹जाह़लू यीशु लोकां नैं एह़ सारियां गल्लां ग्लाई बैठा, तां सैह़ कफरनहूम सैहरे च आया।

²तिस सैहरे च इक्क रोमी फौजा दा सूबेदार रैंह्दा था कने तिसदा इक्क प्यारा दास बमार कने मरना लगेया था।

³जाह़लू तिन्हीं यीशु दी चर्चा सुणी तां कुच्छ स्याणे यहूदी माणु तिस अल्ल घल्ले कि तिस नैं विणती करन कि सैह़ आई करी मेरे दासे जो खरा करैं।

⁴सैह़ यीशु अल्ल आये, कने तिस नैं बड़ी विणती करी नैं ग्लाणा लग्गे, “सैह़ इस जोग्गा ऐ कि तूं तिस तांई एह़ करैं,

⁵क्जोकि सैह़ अहां दी जाति दे माणुआं नैं प्यार रखदा ऐ, कने तिन्हीं अहां दे आराधनालय जो बणाया ऐ।”

⁶यीशु तिन्हां सौगी चली गेआ, अपर जाह़लू सैह़ सूबेदारे दे घरैं पुज्जणे आल़ा था, तां सूबेदारैं तिस अल्ल अपणे कुच्छ साथी एह़ ग्लाई नैं घल्ले, “हे प्रभु मेरे घर ओणे दा कष्ट मत करा, क्जोकि मैं इस जोग्गा नीं ऐ कि तुहां मेरे घरेयो ओन।

⁷इसतांई मैं अपणे आप्पे जो इस जोग्गा भी नीं समझेया कि मैं तिज्जो अल्ल औयें, अपर जित्थु ऐ तित्थु ते वचन ग्लाई दे तां मेरा दास ठीक होई जांगा।

⁸मिन्जो पता ऐ, कि मैं भी कुसी अधिकारिये थल्लैं कम्म करणे आल़ा माणु ऐ; कने मिन्जो थल्लैं भी कुच्छ सपाई कम्म करदे हन, जाह़लू मैं इक्की जो हुक्म देई नैं ग्लांदा कि ‘जा,’ तां सैह़ चली जांदा ऐ; कने दूये दासे नैं, ‘आ,’ तां सैह़ आई जांदा ऐ; कने जाह़लू अपणे दासे नैं ग्लांदा, कि ‘एह़ कम्म कर,’ तां सैह़ तिस कम्मे करदा ऐ।”

⁹एह़ सुणी करी यीशु बड़ा हरान होएया, कने तिन्हीं पचांह़ मुड़ी करी तिसा भीड़ा जो जेह्ड़ी तिसदे पचांह़ ओआ दी थी ग्लाया “मैं तुहां नैं ग्लांदा ऐ कि मैं इस्राएल देसे च भी ऐदेया बसुआस नीं पाया।”

¹⁰कने जेह्ड़े साथी घरेयो बापस घल्लेयो थे, तिन्हां पुज्जी करी दिख्या सैह़ दास खरा होई गेआ।

¹¹थोड़े दिनां बाद सैह़ नाईन नांऐ दे इक्की सैहरे जो गेआ। तिसदे चेले कने माणुआं दी भीड़ तिस कने जा दी थी।

¹²जाह़लू यीशु सैहरे च पुज्जा ई था, तां क्या दिख्या, कि लोक इक्की मुड़दे दा अन्तिम संस्कार करणे जो लेई करी रस्ते च जा दे थे। जेह्ड़ा अपणिया माँऊ दा इक्को ई पुत्तर था, कने सैह़ बिधवा थी; कने सैहरे दे मते भरी लोक अन्तिम संस्कार करणा तिसा सौगी चलेयो थे।

¹³प्रभु जो तिसा बिधवा जो दिक्खी करी तरस आया, कने तिन्हीं ग्लाया, “मत रोयें।”

¹⁴ताह़लू तिन्हीं बक्खे आई करी अर्थिया जो छुता, कने अर्थिया चुकणे आल़े रुकी गै। ताह़लू तिन्हीं ग्लाया, “हे जुआन, मैं तिज्जो ग्लांदा ऐ, उठ।”

¹⁵जाह़लू सैह़ मुड़दा उठी बैठा, कने ग्लाणा लग्गी पेआ, कने तिन्हीं तिसियो तिसदिया माँऊ जो देई दित्ता।

¹⁶एह़ दिक्खी करी सारे लोक हरान होई गै, कने सैह़ परमात्मे दी महिमा करी नैं ग्लाणा लग्गे, “अहां बिच्च इक्क बड़ा बड्डा भविष्यवक्ता आया ऐ, कने परमात्मैं अपणे लोकां पर दया करणा आया ऐ।”

¹⁷कने यीशुये दे बारे च एह़ गल्ल सारे यहूदिया कने अक्खे-बक्खे दे सारे लाक्के च फैली गेई।

¹⁸कने यूहन्ना बपतिस्मा दैणे आल़े दे चेलेयां इन्हां सबना गल्लां दी खबर यूहन्ने जो सणाई।

¹⁹ताह़लू यहून्नें अपणे चेलेयां च दूँ चेलेयां जो अप्पु अल्ल सद्दी करी प्रभुये अल्ल एह़ पुछणे तांई घल्लेया, “क्या ओणे आल़ा तू ई ऐ, या अहां कुसी दूये दा इन्तजार करन?”

²⁰यूहन्ने दे दो चेले यीशु अल्ल जाई करी ग्लाणा लग्गे, “यूहन्ना बपतिस्मा दैणे आल़ैं अहां जो तिज्जो अल्ल पुछणे तांई घल्लेया ऐ कि क्या ओणे आल़ा तू ई ऐ, या अहां कुसी होर दा इन्तजार करन?”

²¹तिस बग्त यीशुयैं कई तरांह दे बमारां कने पीड़ा आल़ेआं कने दुष्टआत्मां आल़े माणुआं जो छड्डाया; कने अन्ने माणु दिक्खणा लग्गे।

²²तां यीशुयैं तिन्हां नैं ग्लाया, “जेह्ड़ा कुच्छ तुहां दिख्या कने सुणेयां ऐ, सैह़ जाई करी यूहन्ने जो दस्सी देआ; कि अन्ने दिक्खदे हन, कने लंगड़े हंडदे-फिरदे हन, कोढ़ी खरे कित्ते जांदे हन, बोल़े सुणदे हन, मुड़दे जिन्दे हुंदे हन, कने गरीबां जो सुसमाचार सणाया जांदा ऐ।

²³धन ऐ सैह़, जेह्ड़ा मिन्जो पर शक नीं करदा।”

²⁴जाह़लू यूहन्ने दे चेले चली गै तां यीशु यूहन्ने दे बारे च लोकां नैं ग्लाणा लग्गा, “तुहां सुनसाण जगाह च क्या दिक्खणा गियो थे? क्या हौआ नैं झुलदेयां कनेड़े[1] दे डंडेया जो?

²⁵तां भिरी तुहां क्या दिक्खणा गियो थे? मैंह्गे कपड़े लगाणे आल़े माणुआं जो? दिक्खा जेह्ड़े चमकीले कपड़े पैहणदे, कने सुख विलासे च जींदे हन, सैह़ मैहलां च रैंह्दे हन।

²⁶तां भिरी क्या दिक्खणा गियो थे? क्या कुसी भविष्यवक्ता जो? हाँ मैं तुहां नैं ग्लांदा ऐ, भविष्यवक्ता ते भी बड्डे जो।

²⁷एह़ तां सैई माणु ऐ, जिसदे बारे पवित्रशास्त्रे च लिख्या ऐ: कि ‘दिक्ख, मैं अपणे संदेसा दैणे आल़े जो तिज्जो गांह-गांह घल्लदा ऐ, जेह्ड़ा तिज्जो ते पैहल्लैं तेरा रस्ता सिध्धा करगा।’

²⁸“मैं तुहां नैं ग्लांदा ऐ, कि जेह्ड़े अज्जे तिकर जणासा ते पैदा होएयो हन, तिन्हां सबना च यूहन्ने ते बड्डा कोई नीं ऐ, अपर परमात्मे दे राज्जे च जेह्ड़ा लोक्के ते लोक्का ऐ, सैह़ तिसते भी बड्डा ऐ।”

²⁹जाह़लू यीशुये जो एह़ ग्लांदे सुणेया, तां सबना आम लोकां कने चुंगी लैणे आल़ेआं भी यूहन्ने ते बपतिस्मा लेई करी परमात्मे जो सच्चा मन्नी लेआ।

³⁰अपर फरीसी कने व्यवस्थापक माणुआं यूहन्ने ते बपतिस्मा नीं लेई करी परमात्मे दी मनसा जो अपणे बारे च टाल़ी दित्ता।

³¹“तां मैं इस जुगे दे लोकां दी तुलणा कुस नैं करैं कि सैह़ कुस साइआं ऐ?

³²सैह़ तिन्हां जागतां साइआं हन जेह्ड़े बजारे च बेई नैं इक्की दूये नैं दस्सी करी ग्लांदे हन, ‘अहां तुहां तांई बंसरी बजाई, अपर तुहां नीं नचे; अहां रोण पीटण पाया, कने तुहां नीं रोये।’

³³क्जोकि यूहन्ना बपतिस्मा दैणे आल़ा ना तां रोटी खांदा आया ना तां अंगूरा दा रस पींदा आया, कने तुहां ग्लांदे हन, कि तिस च दुष्टआत्मां ऐ।

³⁴मैं माणु दा पुत्तर खांदा पींदा आया ऐ, कने तुहां ग्लांदे हन, ‘दिक्खा एह़ भुखड़ कने पियक्कड़ माणु जेह्ड़ा चुंगी लैणे आल़ेआं दा कने पापियां दा साथी ऐ।’

³⁵अपर परमात्मे दा ज्ञान अपणी सारी औलांदी दिया बज़ाह ते सच्चा ठैहराया गेआ ऐ।”

³⁶भिरी इक्की फरीसी माणुयैं यीशुये नैं विणती कित्ती कि मिन्जो सौगी खाणा खा, तां एह़ सुणी करी यीशु तिस फरीसिये दे घरैं खाणा खाणे बैठा।

³⁷कने दिक्खा तिस सैहरे दी इक्क पापण जणासा जो एह़ पता लग्गा कि यीशु फरीसी माणुये दे घरैं खाणा खाणे बैठेया ऐ तां तिन्नै संगमरमरे दिया सीसिया च कीमती इत्तर लंदा।

³⁸कने सैह़ पचांह़ खड़ोई करी रोंदी-रोंदी यीशुये दे पैरां जो आसुंआं नैं सेड़ी करी कने अपणे सिरे दे बाल़ां नैं पुज्जणा लग्गी, कने तिसदे पैरां जो बार-बार चुम्मी करी तिन्हां पर इत्तर मल़ेया।

³⁹एह़ दिक्खी करी फरीसी माणु जिन्हीं यीशुये जो सद्देया था, अपणे मने च सोचणा लग्गा, “जे एह़ भविष्यवक्ता हुंदा तां जाणी जांदा कि एह़ पैरां छूणे आल़ी जणांस कदेई ऐ, क्जोकि एह़ तां पापण ऐ।”

⁴⁰यीशुयैं तिसदे मने दी गल्ल जाणी करी ग्लाया, “हे शमौन मिन्जो तिज्जो नैं कुच्छ ग्लाणा ऐ।” सैह़ ग्लाणा लग्गा, “हे गुरू, ग्ला।”

⁴¹यीशुयैं तिसते बाद इक्क होर उदारण ग्लाया, “कुसकी महाजणे दे दो कर्जदार थे, इक्क पंज सौ दीनारां, कने दूआ पजांह़ दीनारां[2] दा कर्जदार था।

⁴²जाह़लू तिन्हां अल्ल दैणे जो कुच्छ नीं रेह्आ, तां तिन्हीं दून्नी दा कर्ज माफ करी दित्ता। इसतांई इन्हां दून्नी च कुण तिस नैं जादा प्यार रखगा?”

⁴³शमौने जवाब दित्ता, “मेरिया समझा च सैह़ जिसदा तिन्हीं जादा कर्ज माफ करी दित्ता।” यीशुयैं तिस नैं ग्लाया, “तैं ठीक ग्लाया ऐ।”

⁴⁴कने तिसा जणासा दे पास्से भिरी ध्यान करी नैं यीशुयैं शमौने नैं ग्लाया, “क्या तू इसा जणासा जो दिक्खा दा ऐ? मैं तेरे घरैं आया अपर तैं मिन्जो पैरां धोणे तांई पाणी नीं दित्ता, अपर इन्नै मेरे पैर अखीं दे आसुंआं नैं धोते कने अपणे बाल़ां नैं पुज्जें।”

⁴⁵तैं मिन्जो गल़े लगाई नैं मेरा सुआगत नीं कित्ता, अपर जाह़लू ते मैं ऐत्थु आया ऐ, तिस बग्त ते ई इन्नै मेरे पैरां जो चूम्मणा नीं छड्डेया।

⁴⁶तैं मेरे सिरे पर तेल नीं मल़ेया, अपर इन्नै मेरे पैरां पर इत्तर मल़ेया ऐ।

⁴⁷“इसतांई मैं तुहां नैं ग्लांदा ऐ कि इसादे पाप जेह्ड़े मते थे माफ कित्ते गै हन, क्जोकि इन्नै जादा प्यार कित्ता, अपर जिसदे पाप थोड़े माफ हन, सैह़ थोड़ा प्यार करदा ऐ।”

⁴⁸कने यीशुयैं जणासा जो ग्लाया, “तेरे पाप माफ होये।”

⁴⁹ताह़लू जेह्ड़े माणु तिस सौगी खाणा-खाणा बैठेयो थे, सैह़ अपणे-अपणे मने च सोचणा लग्गे, “एह़ कुण ऐ जेह्ड़ा पापां जो भी माफ करदा?” अपर पापां जो तां सिर्फ परमात्मा माफ करी सकदा ऐ।

⁵⁰अपर यीशुयैं जणासा नैं ग्लाया, “तिज्जो परमात्मे बचाई लेआ, क्जोकि तैं तिस पर बसुआस कित्ता ऐ, खुसी-खुसी चली जा।”