Read Kangri लूका 9 Bible Online

लूका 9 - Kangri bible

लूका 9

¹भिरी यीशुयैं अपणे बारांह चेलेयां जो अप्पु अल्ल सद्देया कने तिन्हां सबना जो दुष्टआत्मां, बमारियां जो दूर करणे दी सामर्थ कने हक्क दित्ता,

²कने तिन्हां जो परमात्मे दे राज्जे दा प्रचार करणे तांई कने बमारां जो ठीक करणे तांई घल्लेया।

³तिन्हीं तिन्हां नैं ग्लाया, “रस्ते तांई कुच्छ मत लेआ, ना तां सोठी, ना झोल़ु, ना रोटी, ना पैसे, कने ना दो-दो कपड़ेयां दी जोड़ी।

⁴जिस कुसी दे भी घरेयो तुहां जान, तित्थु ई परोणा बणी नैं रेह्आ, कने तित्थु ते ई विदा होआ।

⁵जेह्ड़ा कोई तुहां दा आदर नीं करगा, तिस ग्रांऐ ते बाहर निकल़दे ई अपणे पैरां दिया धूड़ी झाड़ी देआ, कि एह़ तिस सैहरे दे लोकां जो दस्सगा कि परमात्मा तिन्हां दा न्याय करगा।”

⁶सैह़ निकल़ी नैं ग्रांऐ -ग्रांऐ च सुसमाचार सणांदे, कने हर जगाह च लोकां जो चंगा करदे-करदे घूमदे रैह्।

⁷देसे दे चौथे हिस्से दा राजा हेरोदेस एह़ सब सुणी नैं डरी गेआ, क्जोकि कुच्छ लोक ग्लाणा लग्गे कि यूहन्ना मरेयां ते जिन्दा होईया ऐ,

⁸कुच्छ लोकां एह़ ग्लाया कि एलिय्याह दुस्सेया ऐ, कने होरनी एह़ ग्लाया, कि पराणे भविष्यवक्ता ते कोई जिन्दा होएया ऐ।

⁹अपर हेरोदेस राजैं ग्लाया, “यूहन्ने दा तां मैं सिर कटवाया, हुण एह़ कुण ऐ जिसदे बारे च एह़ गल्लां सणांदा ऐ?” कने तिन्हीं तिसियो दिक्खणे दी इच्छा कित्ती।

¹⁰भिरी प्रेरितां बापस आई नैं जेह्ड़ा तिन्हां कित्या था, तिसियो दस्सी दित्ता; कने सैह़ तिन्हां जो लग्ग करी नैं बैतसैदा नांऐ दे ग्रांऐ जो लेई गेआ।

¹¹एह़ जाणी नैं लोकां दी भीड़ तिसदे पचांह़ चली पेई, कने सैह़ खुसिया नैं तिन्हां सौगी मिल्लेया, कने तिन्हां नैं परमात्मे दे राज्जे दी गल्लां करणा लग्गा, कने जेह्ड़े खरे होणा चांह़दे थे तिन्हां जो खरा कित्ता।

¹²जाह़लू दिन घरूणा लग्गा तां बारांह चेलेयां आई नैं तिस नैं ग्लाया, “इसा भीड़ा जो घल्ली देआ, कि चौंन्नी पास्से दे ग्रांऐ कने बस्तियां च जाई नैं अपणे तांई रैहणे जो जगाह दा कने खाणे दा इंतजाम करन, क्जोकि अहां ऐत्थु सुनसाण जगाह च हन।”

¹³यीशुयैं तिन्हां नैं ग्लाया, “तुहां ई इन्हां जो खाणे जो देआ।” तिन्हां ग्लाया, “अहां अल्ल पंज रोटियां कने दो मच्छियां जो छड्डी नैं होर कुच्छ नीं ऐ; अपर हाँ, जे अहां जाई नैं तिन्हां सारेयां तांई खाणा खरीदी लैन, तां होई सकदा ऐ।” सैह़ लोक तां पंज हज़ार मरद थे।

¹⁴(क्जोकि तित्थु तिन्हां च लगभग पंज हज़ार मरद थे।) ताह़लू यीशुयैं अपणेयां चेलेयां जो ग्लाया, “तिन्हां जो पजांह़-पजांह़ करी नैं इक्क-इक्क पंगत लगाई नैं बठाल़ी देआ।”

¹⁵तिन्हां इआं ई कित्ता, कने सबना जो बठाल़ी दित्ता।

¹⁶ताह़लू यीशुयैं सैह़ पंज रोटियां कने दो मच्छियां लेईआं, सुअर्गे दे पास्से दिक्खी नैं धन्यावाद कित्ता, कने तोड़ी-तोड़ी करी चेलेयां जो दिंदा गेआ कि लोकां जो बंडन।

¹⁷ताह़लू सारे खाई नैं रज्जी गै, कने चेलेयां बचियां रोटियां दे बाराह टोकरु भरी नैं चुके।

¹⁸जाह़लू यीशु किल्ला बेई नैं प्रार्थना करा दा था कने तिसदे चेले तिस सौगी थे, तां तिन्हीं अपणे चेलेयां ते पुछया, “लोक मिन्जो क्या ग्लांदे हन? कि मैं कुण ऐ?”

¹⁹तिन्हां यीशुये जो ग्लाया, “यूहन्ना बपतिस्मा दैणे आल़ा कने कोई तां एलिय्याह कने कोई तां एह़ कि पराणे भविष्यवक्ता च कोई जिन्दा होएया।”

²⁰तिन्हीं तिन्हां ते पुछया, “अपर तुहां मिन्जो क्या ग्लांदे हन कि मैं कुण ऐ?” पतरसैं ग्लाया, “परमात्मे दे घल्लेयो मसीह।”

²¹ताह़लू तिन्हीं तिन्हां जो चतौणी नैं ग्लाया कि एह़ कुसी नैं मत दस्सदे।

²²भिरी तिन्हीं ग्लाया, “माणुये दे पुत्तरे तांई जरूरी ऐ कि सैह़ बड़ा दुख झेलैं, कने स्याणे, प्रधान याजक कने सास्त्री तिसियो नीच समझी नैं मारी दिंगे, कने सैह़ त्रीये दिनैं भिरी मरेयां ते जिन्दा हुंगा।”

²³यीशु सबना नैं ग्लाणा लग्गा, “जेह्ड़ा कोई मिन्जो पचांह़ औणां चांह़दा, सैह़ अपणियां इच्छां जो छड्डी करी कने हर-रोज अपणे दुखां कने कष्टां दिया सूल़िया चुक्की नैं, मेरे पचांह़ चली पोयैं।

²⁴क्जोकि जेह्ड़ा कोई अपणे प्राण बचाणा चांह़गा सैह़ अपणे प्राण गुआंगा, अपर जेह्ड़ा कोई मिन्जो तांई अपणे प्राण गुआंगा सैह़ अपणे प्राण बचांगा।

²⁵जेह्ड़ा माणु सारे संसारे जो हासल करणे तांई अपणे प्राणा जो गुआई दैं, या तिसदा नकसान भुकतैं, तां तिसियो क्या फायदा हुंगा?

²⁶जेह्ड़ा कोई मिन्जो ते कने मेरियां गल्लां ते सर्मांगा, मैं माणुये दा पुत्तर भी, जाह़लू अपणी कने अपणे पिता दी कने पवित्र सुअर्गदूतां दी महिमा सौगी ओंगा, तां तिसते भी सर्मांगा।

²⁷मैं तुहां नैं सच्च ग्लांदा ऐ, कि जेह्ड़े ऐत्थु खड़ोत्यो हन, इन्हां च कुच्छ लोक ऐदेय हन कि जाह़लू तिकर परमात्मे दा राज दिक्खी नीं लैंगे, ताह़लू तिकर मौत्त तिन्हां पर कदी नीं ओंगी।”

²⁸तिन्हां गल्लां ते कोई अठां दिनां बाद सैह़ पतरस, यूहन्ने कने याकूबे जो सौगी लेई करी प्रार्थना करणे तांई प्हाड़े पर गेआ।

²⁹जाह़लू यीशु प्रार्थना करा दा ई था, तां तिसदे चेहरे दा रूप बदली गेआ, कने तिसदे कपड़े चिट्टे होई नैं चमकणा लग्गे।

³⁰कने दिक्खा, मूसा कने एलिय्याह, एह़ दो माणु यीशु सौगी गल्लां करा दे थे।

³¹एह़ महिमा सौगी दुस्से कने तिसदिया मौत्ती दे बारे च चर्चा करा दे थे, जेह्ड़ा यरूशलेम सैहरे च होणे आल़ा था।

³²पतरस कने तिसदे साथी निंदरा नैं भरोयो थे, जाह़लू ठीक तरीके नैं जागे तां तिसदी महिमा कने तिन्हां दूँ माणुआं जो, जेह्ड़े तिस सौगी खड़ोत्यो थे, दिख्या।

³³जाह़लू सैह़ तिस अल्ल जाणा लग्गे, तां पतरस यीशुये नैं ग्लाणा लग्गा, “हे मालक, अहां दा ऐत्थु रैहणा ठीक ऐ कने इसतांई अहां तीन तम्बू बणान, इक्क तिज्जो तांई, इक्क मूसे तांई, कने इक्क एलिय्याह तांई।” सैह़ जाणदा नीं था कि क्या ग्ला दा ऐ।

³⁴पतरस एह़ ग्ला दा ई था कि इक्की बदल़ैं आई नैं तिन्हां जो ढक्की लेआ, कने जाह़लू सैह़ तिस बदल़े नैं ढकूणा लग्गे तां सैह़ डरी गै।

³⁵कने ताह़लू तिस बदल़े ते एह़ उआज़ आई, “एह़ मेरा पुत्तर ऐ कने मेरा चुणेया ऐ, इसदी सुणा।”

³⁶एह़ सब्द ग्लांदे ई यीशु किल्ला रेई गेआ; कने सैह़ चुप होई गै, कने जेह्ड़ा कुच्छ भी दिख्या था तिसदी चर्चा कुसी नैं नीं कित्ती।

³⁷दूये दिने जाह़लू यीशु कने तिसदे चेले प्हाड़े ते लौत्थे तां इक्क माणुआं दी बड़ी भीड़ तिस नैं आई मिल्ली।

³⁸कने दिक्खा, भीड़ा ते इक्क माणुये जोरे नैं ग्लाणा लग्गा, “हे गुरू, मैं तिज्जो नैं विणती करदा ऐ कि मेरे जागते पर दया कर; क्जोकि सैह़ मेरा इक्क लौता जागत ऐ।

³⁹कने दिक्ख, इक्की दुष्टआत्मां इसियो पकड़ेया ऐ, कने सैह़ तिसियो मरोड़ा दी ऐ कने सैह़ मुँऐ ते झघूड़े कड्डा दा ऐ; कने तिसियो मरोड़ी करी बड़िया मुस्कला नैं छड्डदी ऐ।

⁴⁰कने मैं तेरे चेलेयां नैं विणती कित्ती कि इसा दुष्टआत्मा जो कड्डी देआ, अपर एह़ तां कड्डी नीं सके।”

⁴¹यीशुयैं जवाब दित्ता, “हे बेबसुआसियो कने बेइमान लोको, मैं काह़लू तिकर तुहां सौगी रैंह्गा, कने तुहां दी झेलगा? अपणे जागते जो मिन्जो अल्ल लेयो।”

⁴²सैह़ ओआ दा ई था कि दुष्टआत्मां तिसियो पटकी करी मरोड़ेया, अपर यीशुयैं दुष्टआत्मां जो झिड़की नैं ग्लाया कने जागते जो खरा करी नैं तिसदे बुढ़े जो देई दित्ता।

⁴³ताह़लू सारे माणु परमात्मे दी महासामर्थ ते हरान होये। अपर जाह़लू सारे माणु तिसदेयां कम्मां ते जेह्ड़ा सैह़ करदा था, हरान थे, तां तिन्हीं अपणे चेलेयां नैं ग्लाया,

⁴⁴“तुहां तिन्हां सारियां गल्लां जो ध्याने नैं सुणा, क्जोकि मैं माणुये दा पुत्तर माणुआं दे हत्थे च पकड़ुणे आल़ा ऐ।”

⁴⁵अपर सैह़ ना तां इसा गल्ला जो समझी सके, कने ना ई इसा गल्ला दा भेत पाई सके; कने सैह़ इसा गल्ला जो तिसते पुछणे ते डरदे थे।

⁴⁶भिरी तिन्हां च एह़ बैंह्स होणा लग्गी कि अहां च बड्डा कुण ऐ।

⁴⁷अपर यीशुयैं तिन्हां दे मने दी गल्ल जाणी लेई, कने इक्क बच्चा लेई नैं अपणे बक्खे खरेड़ी दित्ता,

⁴⁸कने तिन्हां जो ग्लाया, “जेह्ड़ा कोई मेरे नांऐ ते इस जागते जो अपनांदा ऐ; कने जेह्ड़ा कोई मिन्जो अपनांदा ऐ, सैह़ मेरे घल्लणे आल़े जो अपनांदा ऐ, क्जोकि जेह्ड़ा कोई तुहां च सबना ते छोटे ते छोटा ऐ, सैई बड्डा ऐ।”

⁴⁹ताह़लू यूहन्ना ग्लाणा लग्गा, “हे गुरू, अहां इक्की माणुये जो तेरे नांऐ ते दुष्टआत्मां जो कड्डदे दिख्या, कने अहां तिसियो रोकणे दी कोसस कित्ती, क्जोकि सैह़ चेला नीं था।”

⁵⁰यीशुयैं तिन्हां नैं ग्लाया, “तिसियो मत रोका; क्जोकि जेह्ड़ा तुहां दे बरोधे च नीं ऐ, सैह़ तुहां पास्से ऐ।”

⁵¹जाह़लू तिसदे सुअर्गेयो जाणे दे दिन पूरे होणे आल़े थे, तां तिन्हां यरूशलेम सैहरे जो जाणे दा फैसला कित्ता।

⁵²तिन्हीं अपणे गांह-गांह सामरिया देसे दे हर ग्रांऐ च इसा गल्ला दा संदेसा लेई करी कुच्छ माणु घल्ले, कि सैह़ तिस तांई जगाह त्यार करन।

⁵³अपर तिन्हां लोकां तिसियो औणां नीं दित्ता, क्जोकि सैह़ यरूशलेम सैहरे जो जा दा था।

⁵⁴एह़ दिक्खी नैं तिसदे चेले याकूब कने यूहन्ने ग्लाया, “हे प्रभु, तू क्या चांह़दा ऐ कि अहां हुक्म दैन, कि अम्बरे ते अग्ग पेई करी तिन्हां जो भस्म करी दैं?”

⁵⁵अपर यीशुयैं पचांह़ मुड़ी करी तिन्हां जो झिड़केया, कने ग्लाया, “तुहां नीं जाणदे हन कि तुहां कदेई आत्मा दे हन।

⁵⁶क्जोकि माणुये दा पुत्तर लोकां दे प्राणा लैणां नीं अपर बचाणा आया ऐ।” कने सैह़ कुसकी दूये ग्रांऐ च चली गै।

⁵⁷जाह़लू सैह़ रस्ते च चलेयो थे, तां कुणकी तिस नैं ग्लाया, “जित्थु-जित्थु तू जांगा, मैं तिज्जो पचांह़-पचांह़ चलगा।”

⁵⁸यीशुयैं तिस नैं ग्लाया, “गीदड़ीं दियां झोरीं कने अम्बरे दे पंछियां दे अल्ले हुंदे हन, अपर मैं माणुये दा पुत्तर होई नैं भी मिन्जो अल्ल रैहणे तांई घर नीं ऐ।”

⁵⁹यीशुयैं दूये नैं ग्लाया, “मिन्जो पचांह़ चली पौ।” तिन्हीं ग्लाया, “हे प्रभु मिन्जो पैहल्लैं घरेयो जाणा दे, तांजे मैं अपणे बुढ़े दे मरने ते बाद तिसियो दब्बी करी, भिरी तिज्जो पचांह़ चलगा।”

⁶⁰तिन्हीं तिस नैं ग्लाया, “कने जेह्ड़े आत्मिक रूप ते मुड़दे हन, तिन्हां जो अपणे मुड़दे दब्बणा दे, अपर तू जाई नैं परमात्मे दे राज्जे दा सुसमाचार सणा।”

⁶¹इक्की होरनी भी ग्लाया, “हे प्रभु, मैं तिज्जो पचांह़ चली पोंगा; अपर पैहल्लैं मिन्जो घरेयो जाणा देआ कि मैं घरे देहयां माणुआं ते विदा लेई औयें।”

⁶²यीशुयैं तिस नैं ग्लाया, “जेह्ड़ा कोई माणु अपणे खेतां बांदे बग्त पचांह़ दिक्खदा ऐ, सैह़ परमात्मे दे राज्जे जोग्गा नीं ऐ।”