Read Kangri यूहन्ना 1 Bible Online

यूहन्ना 1 - Kangri bible

यूहन्ना 1

¹सारी सृष्टिया दे सुरू होणे ते पैहल्ले वचन था, कने सैह़ वचन परमात्मे सौगी था। कने सैह़ वचन परमात्मा था।

²सैई सृष्टिया ते पैहल्ले परमात्मे सौगी था

³कने परमात्मैं सब कुच्छ तिसदे जरिये बणाया गेआ ऐ, कने जेह्ड़ा कुच्छ बणाया गेआ ऐ, तिस च कोई भी चीज्ज तिसदे बिना नीं बणियो।

⁴तिस च ज़िन्दगी थी कने सैह़ ज़िन्दगी सारे माणुआं जो जोत्ती दिंदी थी।

⁵जोत्ती नेहरे च चमकदी ऐ, कने नेहरा जोतिया जो नास नीं करी सकेया।

⁶परमात्मैं इक्क माणु घल्लेया, जिसदा नां यूहन्ना था।

⁷सैह़ इसतांई आया था कि लोकां जो जोतिया दे बारे च दस्सी सकैं, तांजे सारे लोक तिसदे जरिये तिसा जोतिया च बसुआस करन।

⁸यूहन्ना अप्पु सैह़ जोत्ती नीं था, अपर सैह़ लोकां जो परमात्मे दी तिसा जोतिया दे बारे च दस्सणा आया था।

⁹सच्ची जोत्ती जेह्ड़ी हर इक्क माणुये जो लौ दिंदी ऐ, संसारे दे लोकां च अपणे आप्पे जो प्रगट करणे आल़ी थी।

¹⁰सैह़ संसारे च था, कने संसार तिसदे जरिये बणाया गेआ, अपर संसारे दे लोकां तिसियो नीं पणछैणया।

¹¹सैह़ अपणे लोकां च आया अपर तिसदे अपणेयां तिसियो नीं अपनाया।

¹²अपर जितणेयां तिसियो अपनाया, तिन्हीं तिन्हां जो परमात्मे दी औलाद होणे दा हक्क दित्ता, मतलब तिन्हां जो जेह्ड़े तिसदे नांऐ पर बसुआस रखदे हन।

¹³सैह़ ना तां माँ-बुढ़े ते, ना तां सरीरे दिया इच्छा ते, ना तां माणुये दिया मर्जिया ते अपर परमात्मे दिया इच्छा दे मताबक पैदा होएया ऐ।

¹⁴कने वचन माणु बणी करी आया; कने अनुग्रह कने सच्चाईया नैं पूरा भरोई नैं अहां दे बिच्च डेरा कित्ता। कने अहां तिसदी देहई महिमा दिक्खी, जिंआं पिता दे इकलौते पुत्तरे दी महिमा।

¹⁵यूहन्ने तिसदे बारे च गवाही दित्ती, कने जोरे नैं ग्लाया, “एह़ सैई ऐ, जिसदे बारे च मैं दस्सेया था, कि जेह्ड़ा मिन्जो ते बाद ओआ दा ऐ, सैह़ मिन्जो ते म्हान ऐ क्जोकि सैह़ मिन्जो ते पैहल्ले मजूद था।”

¹⁶क्जोकि तिसदे अनुग्रह दी भरपूरिया ते अहां सबना जो आसीष पर आसीष मिल्ली।

¹⁷इसतांई कि परमात्मे व्यबस्था तां मूसा दे जरिये दित्ती, अपर तिन्हीं अनुग्रह कने सच्चाई यीशु मसीह दे जरिये दित्ती।

¹⁸परमात्मे जो कदी कुणी नीं दिख्या, सिर्फ तिसदे इकलौते पुत्तरें जेह्ड़ा अप्पु ई परमात्मा ऐ, कने अपणे पिता दिया गोदी च बैठेया ऐ, कने तिन्हीं परमात्मे जो प्रगट कित्ता।

¹⁹यूहन्ने दी गवाही एह़ ऐ, कि जाह़लू यहूदी अगुआं यरूशलेम सैहरे ते याजकां कने लेवियां जो तिसते एह़ पुछणे तांई घल्लेया, “तू कुण ऐ?”

²⁰तां तिन्हीं साफ-साफ दस्सी दित्ता, कि “मैं मसीह नीं ऐ।”

²¹ताह़लू तिन्हां तिसते पुछया, तां भिरी एह़ कुण? क्या तू एलिय्याह भविष्यवक्ता ऐ? तिन्हीं ग्लाया, “मैं नीं ऐ।” “तां क्या तू सैह़ भविष्यवक्ता ऐ?” तिन्हीं जवाब दित्ता, “नीं।”

²²ताह़लू तिन्हां तिसते पुछया “भिरी तू कुण ऐ? तांजे अहां अपणे घल्लणे आल़ेआं जो जवाब दैन। तू अपणे बारे च क्या ग्लांदा ऐ?”

²³यूहन्ने तिन्हां लोकां जो यशायाह भविष्यवक्तैं दे वचनां दा इस्तेमाल करी नैं ग्लाया, “मैं सुनसाण जगाह च इक्क हक्कां पाणे आल़े दी उआज़ ऐ कि ‘तुहां प्रभु तांई लोकां देयां मनां जो त्यार करा’।”

²⁴सैह़ लोक फरीसियां दे पास्से ते घल्लेयो थे,

²⁵तिन्हां माणुआं भिरी तिसते पुछया, “जे तू ना मसीह ऐ, कने ना तां एलिय्याह, कने ना सैह़ भविष्यवक्ता ऐ, तां भिरी बपतिस्मा क्जो दिंदा ऐ?”

²⁶यूहन्ने तिन्हां जो जवाब दित्ता, “मैं तां पांणिये ते बपतिस्मा दिंदा ऐ, अपर तुहां बिच्च इक्क माणु ऐ, जिसियो तुहां नीं जाणदे।

²⁷मतलब एह़ सैई ऐ जेह्ड़ा मेरे बाद ओणे आल़ा ऐ, जिसदेयां जूत्तेयां दे तस्मेआं दियां गठ्ठी मैं खोलणे जोग्गा भी नीं ऐ।”

²⁸एह़ सारियां गल्लां यरदन नदिया पार बैतनिय्याह नांऐ दे ग्रांऐ च होईयां, जित्थु यूहन्ना लोकां जो बपतिस्मा दिंदा था।

²⁹दूँये दिने यूहन्ने यीशुये जो अपणे अल्ल ओंदे दिक्खी नैं ग्लाया, “दिक्खा एह़ परमात्मे दा मेम्ना ऐ जेह्ड़ा अपणा बलिदान देई करी संसारे दे पापां जो अप्पु ऊपर लेई लैंदा ऐ,

³⁰एह़ सैई ऐ जिसदे बारे च मैं ग्लाया था, इक्क माणु मिन्जो पचांह़ ओआ दा ऐ, जेह्ड़ा मिन्जो ते म्हान ऐ, क्जोकि सैह़ मिन्जो ते पैहल्ले था।

³¹मैं नीं जाणदा था, कि सैह़ मसीह ऐ, अपर मेरे पांणिये नैं बपतिस्मा दैणे दे जरिये इस्राएल देसे दे लोक इसा गल्ला जो जाणी लैन, कि सैह़ कुण ऐ।”

³²कने यूहन्ने एह़ गवाही दित्ती, “मैं आत्मा जो कबूतरे साइआं सुअर्गे ते लौंदे कने तिस पर बैंहदे दिख्या था।

³³मैं तां तिसियो नीं जाणदा था, अपर जिन्हीं मिन्जो पांणिये नैं बपतिस्मा दैणे तांई घल्लेया, तिन्हीं मिन्जो नैं ग्लाया, ‘जिस पर तू पवित्र आत्मा जो ओंदे कने रुकदे दिक्खगा, सैई पवित्र आत्मा नैं बपतिस्मा दैणे आल़ा ऐ।’

³⁴कने मैं तिसियो दिख्या, कने सच्च-सच्च ग्लांदा ऐ कि ऐई परमात्मे दा पुत्तर ऐ।”

³⁵दूँये दिने भिरी यूहन्ना अपणे दूँ चेलेयां सौगी तिसा जगाह खड़ोत्या था,

³⁶कने जाह़लू तिन्हीं यीशुये जो तिणछी जांदे दिख्या तां तिन्हीं ग्लाया, दिक्खा एह़ परमात्मे दा मेम्ना ऐ,

³⁷ताह़लू यूहन्ना दे दून्नी चेलेयां एह़ ग्लांदे सुणेयां तां सैह़ यीशुये पचांह़ चली पै।

³⁸यीशुयैं मुड़ी नैं तिन्हां जो अपणे पचांह़ ओंदे दिख्या कने तिन्हां जो ग्लाया, “तुहां कुसियो तोपा करदे हन?” तिन्हां तिस नैं ग्लाया, “हे रब्बी (मतलब हे गुरू), तू कुत्थू रैंह्दा ऐ?”

³⁹यीशुयैं तिन्हां नैं ग्लाया, “आईआ कने दिक्खी लेआ।” ताह़लू तिन्हां तिस सौगी जाई नैं तिसदे रैहणे दी जगाह दिक्खी, कने तिस दिन सैह़ तिस सौगी रैह्। क्जोकि एह़ लगभग दोपैरा दे चार बजे दा बग्त था।

⁴⁰तिन्हां दूँई च, जेह्ड़ा यूहन्ना दी गल्ल सुणी नैं यीशुये पचांह़ चली पैयो थे, तिन्हां च इक्क शमौन पतरसे दा भाऊ अन्द्रियास था।

⁴¹अन्द्रियासैं पैहल्लैं अपणे सक्के भाऊ शमौने नैं मिल्ली करी तिसियो ग्लाया, “अहां जो ख्रिस्त, मतलब मसीह मिल्ली गेआ।”

⁴²अन्द्रियास अपणे भाऊ शमौने जो यीशु अल्ल लेई आया। यीशुयैं तिस पर नजर करी नैं ग्लाया, “तू यूहन्ने दा पुत्तर शमौन ऐ। अज्जे तू कैफा नांऐ ते जाणेया जांगा,” या पतरस दून्नी नां दा मतलब चट्टान ऐ।

⁴³दूँये दिने यीशुयैं गलील प्रदेसे जो जाणे दे बारे च सोचेया। यीशु फिलिप्पुस नांऐ दे इक्की माणुये नैं मिल्लेया कने ग्लाया, “मेरे पचांह़ चली पौ।”

⁴⁴फिलिप्पुस भी अन्द्रियासे कने पतरसे दे सैहर बैतसैदा दा रैहणे आल़ा था।

⁴⁵फिलिप्पुस नतनएल नांऐ दे इक्की माणुये नैं मिल्ला कने तिसियो ग्लाया, “जिसदे बारे च मूसा दी व्यबस्था च कने भविष्यवक्तां ग्लाया ऐ, सैह़ अहां जो मिल्ली गेआ; सैह़ यूसुफे दा पुत्तर, यीशु नासरी ऐ।”

⁴⁶नतनएलें तिस नैं ग्लाया, “क्या कोई खरी चीज्ज भी नासरते ते निकल़ी सकदी ऐ?” फिलिप्पुसैं तिस नैं ग्लाया, “चली नैं दिक्खी लै।”

⁴⁷यीशु नतनएले जो अपणे अल्ल ओंदे दिक्खी नैं तिसदे बारे च ग्लाणा लग्गा, “सुणा, एह़ पक्का इस्राएली ऐ, जेह्ड़ा बड़ा ईमानदार ऐ।”

⁴⁸नतनएलें तिस नैं ग्लाया, “तू मिन्जो किंआं जाणदा ऐ?” यीशुयैं तिसियो जवाब दित्ता, “इसते पैहल्ले कि फिलिप्पुसैं तिज्जो सद्देया, जाह़लू तू धूड़े दे रूखे थल्लैं था, ताह़लू मैं तिज्जो दिख्या था।”

⁴⁹नतनएलें तिस जो जवाब दित्ता, “हे गुरू तू परमात्मे दा पुत्तर ऐ; तू इस्राएल देसे दा महाराजा ऐ।”

⁵⁰यीशुयैं तिस जो जवाब दित्ता, “मैं जेह्ड़ा तिज्जो ग्लाया कि मैं तिज्जो धूड़े दे रूखे थल्लै दिख्या, क्या तू इसतांई बसुआस करदा ऐ? तू इसते भी बड्डे-बड्डे कम्म दिक्खगा।”

⁵¹भिरी तिस नैं ग्लाया, “मैं तुहां नैं सच्च-सच्च ग्लांदा ऐ, कि तुहां सुअर्गे जो खुलेया, कने परमात्मे दे सुअर्गदूतां जो माणु दे पुत्तरे ऊपर लौंदे कने ऊपर जांदे दिक्खगे।”