Read Kangri यूहन्ना 10 Bible Online

यूहन्ना 10 - Kangri bible

यूहन्ना 10

¹यीशुयैं ग्लाया, “मैं तुहां नैं सच्च-सच्च ग्लांदा ऐ, कि जेह्ड़ा कोई दरवाजे ते भेड्डां दिया घराला अंदर नीं जांदा, अपर कुसी दूये पास्से ते अंदर चली जांदा ऐ, तां सैह़ चोर कने डाकू ऐ।

²अपर जेह्ड़ा भेड्डां दा गुआल़ा ऐ, सैह़ दरवाजे ते अंदरेयो जांदा ऐ ।

³दुआरपाल तिस तांई दरवाजे खोली दिंदा ऐ, कने भेड्डां तिसदी उआज़ सुणी करी पणछैणदियां हन, कने सैह़ अपणियां भेड्डां दा नां लेई-लेई करी सददा ऐ कने बाहरेयो लेई जांदा ऐ।

⁴जाह़लू सैह़ अपणियां सारियां भेड्डां जो बाहरेयो कड्डी दिंदा ऐ, तां सैह़ तिन्हां दे गांह-गांह चलदा ऐ कने भेड्डां तिसदे पचांह़-पचांह़ चलदियां हन, क्जोकि सैह़ तिसदिया उआज़ा पणछैणदियां हन।

⁵अपर तिन्हां कुसकी पखले दे पचांह़ नीं जाणा, अपर पखले ते नठ्ठी पोणा, क्जोकि सैह़ पखलेयां दी उआज़ा नीं पणछैणदियां।”

⁶यीशुयैं तिन्हां नैं इक्क उदारण ग्लाया, अपर सैह़ नीं समझे कि इसदा क्या मतलब ऐ जेह्ड़ा सैह़ अहां नैं ग्लांदा ऐ।

⁷ताह़लू यीशुयैं तिन्हां नैं भिरी ग्लाया, “मैं तुहां नैं सच्च-सच्च ग्लांदा ऐ, कि भेड्डां तांई अंदर ओणे दा दरवाजा मैं ऐ।

⁸जितणे मिन्जो ते पैहल्ले आएयो; सैह़ सारे चोर कने डाकू हन अपर मेरियां भेड्डां तिन्हां दी नीं सुणी।

⁹दरवाजा मैं ऐ; कने परमात्मा तिन्हां दा उद्धार करगा, जेह्ड़े मेरे जरिये अंदर जांदे हन, कने अंदर बाहर आई जाई सकगे कने तिन्हां जो खाणे तांई खाणा मिलगा।

¹⁰चोर कुसी होर कम्मे तांई नीं अपर सिर्फ चोरी करणा, मारणा कने खत्म करणा ओंदा ऐ; मैं इसतांई आया कि सैह़ ज़िन्दगी पान, कने मती सारी पान।

¹¹खरा गुआल़ा मैं ऐ; खरा गुआल़ा भेड्डां तांई अपणे प्राण दिंदा ऐ।

¹²मजदूर जेह्ड़ा ना तां गुआल़ा ऐ, कने ना तां भेड्डां दा मालक ऐ, भेड़िये जो ओंदे दिक्खी नैं भेड्डां जो छड्डी नैं नठ्ठी जांदा ऐ; कने भेड़िया तिन्हां पर हमला करी तितर-बितर करी दिंदा ऐ।

¹³सैह़ इसतांई नठ्ठी जांदा ऐ कि सैह़ किराये दा मजदूर ऐ, कने तिसियो भेड्डां दी फिकर नीं।

¹⁴खरा गुआल़ा मैं ऐ; कने मैं अपणियां भेड्डां जो जाणदा ऐ, कने तिंआं ई मेरियां भेड्डां मिन्जो जाणदियां हन।

¹⁵जिंआं पिता मिन्जो जाणदा ऐ, कने तिंआं ई मैं पिता जो जाणदा ऐ। कने मैं भेड्डां तांई अपणे प्राण दिंदा ऐ।

¹⁶मेरियां होर भी भेड्डां हन, जेह्ड़ियां इसा भेड्डां दिया घराला दियां नीं हन। मिन्जो तिन्हां जो भी लेयोणा जरूरी ऐ। सैह़ मेरी उआज़ सुणी करी पणछैणदियां हन, ताह़लू इक्को ई झुंड कने इक्को ई गुआल़ा हुंगा।

¹⁷पिता मिन्जो नैं प्यार रखदा ऐ, क्जोकि मैं अपणे प्राण दिंदा ऐ, तांजे मैं भिरी दुवारी जीयें।

¹⁸कोई मेरे प्राणा जो मिन्जो ते लेई नीं सकदा, अपर मैं तिन्हां जो अपणिया मर्जिया ते दिंदा ऐ। मिन्जो अपणे प्राण दैणे दा भी हक्क ऐ, कने तिन्हां जो भिरी लेई लैणे दा भी हक्क ऐ, क्जोकि एह़ हुक्म मिन्जो मेरे पिता ते मिल्लेया ऐ।”

¹⁹इन्हां गल्लां दिया बज़ाह ते यहूदी अगुआं च भिरी बैर पेई गेआ।

²⁰तिन्हां च मते लोक ग्लाणा लग्गे, “तिस च दुष्टआत्मा ऐ, कने सैह़ पागल ऐ; तुहां तिसदी क्जो सुणदे हन?”

²¹होर लोक ग्लाणा लग्गे, “एह़ गल्लां ऐदेय माणु दी नीं जिस च दुष्टआत्मा होयैं। क्या दुष्टआत्मा अन्नेयां दियां अखीं खरी करी सकदी ऐ?”

²²यरूशलेम सैहरे च समर्पण दा त्योहार मनाणा लाया था; कने ठंडी दा मौसम था।

²³यीशु मंदरे च सुलेमाने दे बरांडे च घुमा करदा था।

²⁴ताह़लू यहूदी अगुआं तिसियो आई नैं घेरी लेआ कने पुछया, “तू अहां दे मनां जो काह़लू तिकर दुविधा च रखगा? जे तू मसीह ऐ तां अहां नैं साफ-साफ दस्सी दे।”

²⁵यीशुयैं तिन्हां जो जवाब दित्ता, “मैं तुहां नैं दस्सी दित्ता अपर तुहां बसुआस करदे ई नीं हन। जेह्ड़ा कम्म मैं अपणे पिता दे हक्के नैं करदा सैई मेरे गवाह हन,

²⁶अपर तुहां इसतांई बसुआस नीं करदे क्जोकि मेरियां भेड्डां च नीं हन।

²⁷मेरियां भेड्डां मेरी उआज़ सुणी करी पणछैणदियां हन; मैं तिन्हां जो जाणदा, कने सैह़ मिन्जो पचांह़-पचांह़ चलदियां हन।

²⁸कने मैं तिन्हां जो सदा दी ज़िन्दगी दिंदा ऐ। कने भेड्डां दा कदी नास नीं हुंगा, कने कोई तिन्हां जो मेरे हत्थे ते खोई नीं सकदा।

²⁹मेरा पिता, जिन्हीं तिन्हां जो मिन्जो दित्या ऐ, सबना ते बड्डा ऐ, कने कोई तिन्हां जो पिता दे हत्थे ते छड्डाई नीं सकदा।

³⁰मैं कने पिता इक्को ई हन।”

³¹भिरी यहूदी अगुआं तिसियो मारने तांई पत्थर चुके।

³²इसा गल्ला पर यीशुयैं तिन्हां नैं ग्लाया, “मैं तुहां जो अपणे पिता दे पास्से मते भले कम्म दस्से हन; तिन्हां कम्मां च कुस कम्मे तांई तुहां मिन्जो पर पत्थर मारा करदे हन?”

³³यहूदियां तिसियो जवाब दित्ता, “खरेयां कम्मां तांई अहां तिज्जो पर पत्थर नीं मारदे अपर परमात्मे दी निंदा करणे दिया बज़ाह ते; कने इसतांई कि तू माणु होई नैं अप्पु जो परमात्मा बणाणे दा दावा करदा ऐ।”

³⁴यीशुयैं तिन्हां जो जवाब दित्ता, “क्या तुहां दे पवित्रशास्त्रे च नीं लिख्या ऐ, ‘मैं ग्लाया, तुहां ईश्वर हन?’

³⁵जिन्हां जो परमात्मे दा संदेस दित्या था, तिन्हां जो ईश्वर ग्लाई नैं दस्सेया गेआ ऐ, (कने पवित्रशास्त्रे दा लेख टल़ी नीं सकदा। )

³⁶तां जिसियो पितैं पवित्र बणाई नैं इस संसारे च घल्लेया ऐ, तुहां तिस नैं ग्लांदे हन, ‘तू निंदा करदा ऐ,’ इसतांई कि मैं ग्लाया, ‘मैं परमात्मे दा पुत्तर ऐ।’

³⁷जे मैं अपणे पिता देयां कम्मां नीं करदा तां मेरा बसुआस मत करा।

³⁸अपर जे मैं करदा ऐ, तां चाहे मेरा बसुआस भी मत करा, अपर तिन्हां कम्मां दा तां बसुआस करा। तांजे तुहां जाणन कने समझी सकन, कि पिता मिन्जो च ऐ कने मैं पिता च ऐ।”

³⁹ताह़लू तिन्हां भिरी तिसियो पकड़णे दी कोसस कित्ती अपर सैह़ तिन्हां ते बची करी निकल़ी गेआ।

⁴⁰भिरी यीशु यरदन नदिया दे पारले पास्से तिसा जगाह चली गेआ, जित्थु यूहन्ना पैहल्लैं बपतिस्मा दिंदा था, कने तित्थु ई रेह्आ।

⁴¹मते सारे लोक तिस अल्ल आई नैं ग्लांदे थे, “यूहन्ने तां कोई चमत्कार नीं दस्सेया, अपर जेह्ड़ा कुच्छ यूहन्ने इसदे बारे च ग्लाया था, सैह़ सब सच्च था।”

⁴²कने तित्थु मतेआं लोकां यीशुये पर बसुआस कित्ता।