Read Kangri यूहन्ना 11 Bible Online

यूहन्ना 11 - Kangri bible

यूहन्ना 11

¹मरियम कने तिसदी बैहण मार्था दे ग्रांऐ बैतनिय्याह दा लाजर नांऐ दा इक्क माणु बमार था।

²एह़ सैई मरियम थी जिन्नै प्रभु पर इत्तर मल़ी नैं तिसदेयां पैरां जो अपणे बाल़ां नैं पुंज्जेया था, इसादा भाऊ लाजर बमार था।

³तिसदियां बैहणा तिसियो सनेहा घल्लेया, “हे प्रभु, दिक्ख जिस नैं तू प्यार करदा ऐ सैह़ बमार ऐ।”

⁴एह़ सुणी नैं यीशु ग्लाणा लग्गा, “एह़ बमारी मौत्ती दी नीं; अपर परमात्मे दी महिमा तांई ऐ, कि तिसदिया बज़ाह ते परमात्मे दे पुत्तरे दी महिमा होयैं।”

⁵यीशु मार्था नैं कने तिसा दिया बैह्णी नैं कने लाजरे नैं प्यार रखदा था।

⁶अपर जाह़लू तिन्हीं सुणेया कि सैह़ बमार ऐ, तां जिसा जगाह पर सैह़ था, तित्थु दो दिन होर रुकी गेआ।

⁷इसते बाद तिन्हीं चेलेयां नैं ग्लाया, “ओआ, अहां भिरी यहूदिया प्रदेसे जो चलण।”

⁸चेलेयां तिसियो ग्लाया, “हे गुरू, हुण तां यहूदी अगुऐ तिज्जो पर पत्थर मारणा चांह़दे थे, कने क्या तू भिरी तित्थियो जाणा चांह़दा ऐ?”

⁹यीशुयैं जवाब दित्ता, “क्या दिने दे बाराह घंटे नीं हुंदे? जे कोई दिने चल्लैं तां ठोकर नीं लगदी, क्जोकि सैह़ इस संसारे दी लौ मतलब सूरजे जो दिक्खदा ऐ।

¹⁰जे कोई राती चल्लैं तां ठोकर लगदी ऐ, क्जोकि तिस अल्ल लौ नीं हुंदी।”

¹¹तिन्हीं एह़ गल्लां ग्लाई करी, कने इसते बाद तिन्हां नैं ग्लाणा लग्गा, “अहां दा साथी लाजर सोई गेआ ऐ, अपर मैं तिसियो जगाणा चलेया।”

¹²ताह़लू चेलेयां तिस नैं ग्लाया, “हे प्रभु जे सैह़ सोई गेआ ऐ, तां तिन्हीं उठी पोणा।”

¹³यीशुयैं तां तिसदिया मौत्ती दे बारे च ग्लाया था, अपर सैह़ समझे कि तिन्हीं निदरां च सोणे दे बारे च ग्लाया।

¹⁴ताह़लू यीशुयैं तिन्हां नैं साफ-साफ ग्लाई दित्ता, “लाजर मरिया;

¹⁵कने मैं तुहां दिया बज़ाह ते खुस ऐ कि मैं तित्थु नीं था जिसते तुहां बसुआस करन। अपर हुण ओआ अहां तिस अल्ल चलिये।”

¹⁶ताह़लू थोमा जिसियो दिदुमुस ग्लांदे थे, अपणे साथी चेलेयां नैं ग्लाणा लग्गा, “ओआ, अहां भी तिस अल्ल मरना चलण।”

¹⁷बैतनिय्याह ग्रांऐ च पुज्जदे ई यीशुये जो एह़ पता लग्गा कि लाजरेयो कब्रा च रखेयो चार दिन होईयो हन।

¹⁸सैह़ ग्रां यरूशलेम सैहरे ते कोई दो मील दी दूर था।

¹⁹मते सारे यहूदी अगुऐ मार्था कने मरियमा अल्ल तिसादे भाऊये दिया मौत्ती पर दिलासा दैणे तांई आएयो थे।

²⁰जाह़लू मार्था यीशुये दे ओणे दी खबर सुणी तां तिस नैं मिलणा गेई, अपर मरियम घरैं बेई रेई।

²¹मार्था यीशुये नैं ग्लाया, “हे प्रभु जे तू ऐत्थु हुंदा, तां मेरा भाऊ नीं मरदा।

²²कने मैं हुण भी जाणदी कि जेह्ड़ा कुच्छ तू परमात्मे ते मंगगा, परमात्मा तिज्जो दिंगा।”

²³यीशुयैं तिसा नैं ग्लाया, तेरा भाऊ भिरी मरेयां ते जिन्दा होई जांगा।

²⁴मार्था तिस नैं ग्लाणा लग्गी, “मैं जाणदी ऐ कि आखरी दिने च दुवारी जिन्दे होणे दे बग्त सैह़ भिरी मरेयां ते जिन्दा होई जांगा।”

²⁵यीशुयैं तिसा नैं ग्लाया, मैं सैई ऐ जेह्ड़ा मरेयां लोकां जो ज़िन्दगिया च वापस लेयोंदा ऐ; जेह्ड़ा कोई मिन्जो पर बसुआस करदा ऐ जे सैह़ मरी भी जां तमी तिन्हीं जिन्दे होणा।

²⁶कने जेह्ड़ा कोई जिन्दा ऐ, कने मिन्जो पर बसुआस करदा ऐ, सैह़ सदा काल तिकर नीं मरगा। “क्या तू इसा गल्ला पर बसुआस करदी ऐ।”

²⁷तिन्नै तिस नैं ग्लाया, हाँ हे प्रभु, मैं बसुआस करदी कि परमात्मे दा पुत्तर मसीह जेह्ड़ा संसारे च ओणे आल़ा था, सैह़ तू ई ऐ।

²⁸एह़ ग्लाई नैं सैह़ चली गेई, कने अपणिया बैह्णी मरियमा जो डोल करी सद्दी नैं ग्लाया, “गुरू ऐत्थु ई ऐ, कने तिज्जो सद्दा दा ऐ।”

²⁹एह़ सुणी करी सैह़ झटपट उठी नैं तिस अल्ल आई।

³⁰यीशु अह्ल्ली ग्रांऐ च नीं पुज्जया था अपर तिसा जगाह ई था जित्थु मार्था तिस नैं मिलियो थी।

³¹ताह़लू तित्थु जेह्ड़े यहूदी लोक तिसा सौगी घरे च थे कने तिसायो दिलासा देआ करदे थे, एह़ दिक्खी नैं कि मरियम झटपट उठी नैं बाहरेयो गेई ऐ एह़ समझे कि सैह़ कब्रा पर रोणा चलियो ऐ, तां सैह़ भी तिसा पचांह़ चली पै।

³²जाह़लू मरियम तित्थु जाई रेई जित्थु यीशु था, तां तिसियो दिक्खदे ई तिसदेयां पैरां पेई गेई कने ग्लाया, “हे प्रभु जे तू ऐत्थु हुंदा तां मेरा भाऊ नीं मरदा।”

³³जाह़लू यीशुयैं तिसा जो कने तिन्हां यहूदियां जो जेह्ड़े तिसा सौगी आएयो थे, रोंदे दिख्या, तां आत्मा च बड़ा भरी उदास कने बचैन होएया,

³⁴कने ग्लाणा लग्गा, “तुहां लाजरे दिया लाह्सा जो कुत्थू दब्बेया ऐ?” तिन्हां तिस नैं ग्लाया, “हे प्रभु, चली नैं दिक्खी लेआ।”

³⁵यीशु रोया।

³⁶ताह़लू यहूदी लोक ग्लाणा लग्गे, दिक्खा, सैह़ तिस नैं कितणा प्यार रखदा था।

³⁷अपर तिन्हां च कुच्छ लोक ग्लाणा लग्गे, “क्या एह़ जिन्हीं अन्ने दियां अखीं खरी कित्तियां, एह़ भी नीं करी सकेया कि एह़ माणु नीं मरदा?”

³⁸यीशु मने च भिरी बड़ा ई उदास होई नैं कब्रा पर आया। सैह़ इक्क गुफा थी कने इक्क पत्थर तिसा पर रखेया था।

³⁹यीशुयैं ग्लाया, “पत्थरे टाआ।” तिस मरेयो दी बैहण मार्था तिस नैं ग्लाणा लग्गी, “हे प्रभु इस च हुण तां मुस्क ओआ दी ऐ, क्जोकि मेरे भाऊये मरेयो चार दिन होई चुकेयो हन।”

⁴⁰यीशुयैं तिसा नैं ग्लाया, क्या मैं तिज्जो नैं नीं ग्लाया था कि जे तू बसुआस करगी, तां परमात्मे दी महिमा जो दिक्खगी।

⁴¹ताह़लू तिन्हां तिस पत्थरेयो टाया। कने यीशुयैं सुअर्गे पास्से दिक्खी नैं ग्लाया, “हे पिता, मैं तेरा धन्यावाद करदा ऐ कि तैं मेरी प्रार्थना सुणी लेई ऐ।

⁴²मैं जाणदा था, कि तू सदा मेरी सुणदा ऐ, अपर जेह्ड़ी भीड़ अक्खे बक्खे खड़ोतियो ऐ, तिन्हां दिया बज़ाह ते मैं जोरे नैं ग्लाया, जिसते कि सैह़ बसुआस करन, कि तैं मिन्जो घल्लेया ऐ।”

⁴³एह़ ग्लाई नैं तिन्हीं जोरे नैं हक्क पाई, “हे लाजर बाहर निकल़ी आ।”

⁴⁴जेह्ड़ा मरी गेआ था जिसदे हत्थ पैर कफने नैं बन्नेयो थे सैह़ तिंआं ई निकल़ी आया, कने तिसदा मुँ कपड़े नैं लपेटया था। यीशुयैं तिन्हां नैं ग्लाया, “इसियो खोली देआ कने जाणा देआ।”

⁴⁵ताह़लू जेह्ड़े यहूदी लोक मरियमा सौगी आएयो थे, कने तिसदा एह़ कम्म दिख्या था, तिन्हां च मतेआं तिस पर बसुआस कित्ता।

⁴⁶अपर तिन्हां च कुच्छ लोक फरीसी माणुआं अल्ल जाई नैं यीशुये दे कम्मां दी खबर सणाई।

⁴⁷इसा गल्ला सुणी करी प्रधान याजकां कने फरीसी माणुआं महासभा सद्दी कने ग्लाया, “अहां क्या करन? एह़ माणु तां मते चमत्कार दस्सदा ऐ।

⁴⁸जे अहां इसियो इआं ई छड्डी दैन, तां सबना इस पर बसुआस करी लैणां, कने रोमी माणुआं आई नैं अहां दिया जगाह कने जातिआं दून्नी पर हक्क जमाई लैणां।”

⁴⁹ताह़लू तिन्हां च काइफा नांऐ दे इक्की माणुयैं जेह्ड़ा तिस साल्ले दा महायाजक था, तिन्हां नैं ग्लाणा लग्गा, “तुहां कुच्छ भी नीं जाणदे;

⁵⁰कने ना एह़ समझदे हन कि तुहां तांई एह़ खरा ऐ कि अहां दे लोकां तांई इक्क माणु मरे, कने सारी जाति नास नीं होयैं।”

⁵¹एह़ गल्ल तिन्हीं अपणिया तरफा ते नीं ग्लाई, अपर तिस साल्ले दा महायाजक होई नैं भविष्यवाणी कित्ती, कि यीशु इस्राएल देसे दे लोकां तांई मरगा।

⁵²कने ना सिर्फ इस्राएली लोकां तांई, अपर इसतांई भी कि परमात्मे दे तितर-बितर होएयां बच्चेयां जो इक्क करी दैं।

⁵³कने तिसी दिने ते यहूदी अगुऐ यीशुये जो मकाणे दी साजस रचणा लग्गे।

⁵⁴इसतांई यीशु तिस बग्त ते यहूदी अगुआं दे सामणै सरेआम नीं घुमेया, अपर तित्थु ते सुनसाण जगाह दे इक्की प्रदेसे दे इफ्राईम नांऐ दे इक्की सैहरे जो चली गेआ; कने अपणे चेलेयां सौगी तित्थु रैहणा लग्गा।

⁵⁵यहूदियां दा फसह दा त्योहार नेड़े था, कने मते लोक फसह ते पैहल्ले देहात सैहरे ते यरूशलेम सैहरे जो गै, कि अपणे आप्पे जो मंदरे च सुद्ध करन।

⁵⁶कने सैह़ यीशुये जो तोपणा लग्गे कने मंदरे च खड़ोई नैं अप्पु च ग्लाणा लग्गे, “तुहां क्या सोचदे हन? क्या सैह़ इस त्योहारे च नीं ओंगा?”

⁵⁷प्रधान याजकां कने फरीसियां एह़ हुक्म देई रखेया था कि जे कुसकियो पता लग्गी गेआ हुंगा कि यीशु कतांह ऐ तां दस्सनेयों, तांजे सैह़ तिसियो पकड़ी सकन।