Read Kangri यूहन्ना 12 Bible Online

यूहन्ना 12 - Kangri bible

यूहन्ना 12

¹यीशु फसह दे त्योहारे दे छे दिन पैहल्लैं बैतनिय्याह ग्रांऐ च आया, जित्थु लाजर था, जिसियो यीशुयैं मरेयां ते जिन्दा कित्या था।

²तित्थु तिन्हां तिस तांई राती दा खाणा बणाया, कने मार्था तिसदी सेवा करा दी थी, कने लाजर तिन्हां च इक्क था, जेह्ड़ा तिस सौगी खाणा-खाणा बैठेया था।

³ताह़लू मरियमा जटामानसिया दा लगभग अधा लीटर कीमती खुसबुदार इत्तर लेई नैं यीशुये दे पैरां पर मल़ेया, कने अपणे बाल़ां नैं तिसदे पैर पुंज्जे, कने इत्तरे दिया खुसबुया नैं सारा घर खुसबुदार होई गेआ।

⁴अपर तिसदे चेलेयां च यहूदा इस्करियोती नांऐ दा इक्क चेला जेह्ड़ा तिसियो पकड़ुआणे आल़ा था, ग्लाणा लग्गा,

⁵“एह़ कीमती इत्तर त्रै सौ दीनार च बेची नैं गरीबां जो क्जो नीं दित्ता?”

⁶तिन्हीं एह़ गल्ल इसतांई नीं ग्लाई कि तिसियो गरीबां दी फिकर थी अपर इसतांई कि सैह़ चोर था, कने तिस अल्ल तिन्हां दे पैसेयां दी झोल़ी रैंह्दी थी, कने तिसा च जेह्ड़ा कुच्छ पांदे थे, सैह़ कड्डी लैंदा था।

⁷यीशुयैं ग्लाया, “इसायो परेसान मत करा, कने जेह्ड़ा करा दी इसायो करणा देआ, क्जोकि एह़ मेरे अन्तिम संस्कार दी त्यारी तांई ऐ,

⁸क्जोकि गरीब तां तुहां सौगी हमेसा रैंह्दे हन, अपर मैं तुहां सौगी हमेसा नीं रैंह्गा।”

⁹जाह़लू यहूदी लोकां दिया भीड़ा जो पता लग्गी गेआ कि सैह़ तित्थु ऐ, तां सैह़ ना सिर्फ यीशु दिया बज़ाह ते आये अपर इसतांई भी कि लाजरे जो भी दिक्खणा आये, जिसियो तिन्हीं मरेयां च जिन्दा कित्या था।

¹⁰ताह़लू प्रधान याजकां लाजरे जो भी मकाणे दी साजस रची।

¹¹क्जोकि तिसदिया बज़ाह ते मते यहूदी लोक चली गै, कने यीशु पर बसुआस कित्ता।

¹²दूँये दिने मते सारे लोकां जेह्ड़े त्योहारे च आएयो थे, एह़ सुणी करी, कि यीशु यरूशलेम सैहरे च औणां लगेया ऐ।

¹³इसतांई तिन्हां खजूरे दियां डाल़िआं लियां कने तिस नैं मिलणा चली पै, कने जोरे नैं ग्लाणा लग्गे, “परमात्मे दी स्तुति करा जेह्ड़ा सुअर्गे च ऐ। धन ऐ इस्राएले दा राजा, जेह्ड़ा प्रभु दे नांऐ ते ओआ दा ऐ।”

¹⁴जाह़लू यीशुये जो गधे दा इक्क बच्चा मिल्ला; तां सैह़ तिस पर बेई करी यरूशलेम सैहरे जो आई गेआ, जिंआं पवित्रशास्त्रे च लिख्या ऐ।

¹⁵“हे यरूशलेम सैहरे दे लोको, मत डरा; दिक्खा, तुहां दा राजा गधे दे बच्चे पर सवारी करी नैं ओआ दा ऐ।”

¹⁶यीशुये दे चेले पैहल्लैं इन्हां गल्लां जो नीं समझेयो थे, अपर जाह़लू यीशु दी महिमा प्रगट होई, तां तिन्हां जो याद आया कि एह़ गल्लां तिसदे बारे च लिखियां थियां; कने लोकां तिस नैं इस तरांह दा बर्ताब कित्ता था।

¹⁷ताह़लू भीड़ा देयां लोकां जेह्ड़े तिस बग्त तिस सौगी थे एह़ गवाही दित्ती, जाह़लू तिन्हीं लाजरे जो कब्रा ते सद्दी नैं, मरेयां च जिन्दा कित्या था।

¹⁸इसा बज़ाह ते लोक तिस नैं मिलणा चली आएयो थे क्जोकि तिन्हां सुणेया था कि तिन्हीं एह़ चमत्कार दस्सेया ऐ।

¹⁹ताह़लू फरीसी माणु अप्पु च ग्लाणा लग्गे, “दिक्खा, तुहां लोक कुच्छ नीं करी सकदे हन; सुणा, सारा संसार तिस पचांह़ चली पेआ ऐ।”

²⁰जेह्ड़े लोक तिस त्योहारे च अराधना करणा आएयो थे तिन्हां च कुच्छ यूनानी लोक थे।

²¹तिन्हां गलील प्रदेसे दे बैतसैदा सैहरे दे रैहणे आल़े फिलिप्पुसे अल्ल आई नैं तिस नैं विणती कित्ती, “श्रीमान, अहां यीशुये नैं मिलणा चांह़दे हन।”

²²फिलिप्पुसैं आई नैं अन्द्रियासे नैं ग्लाया, ताह़लू अन्द्रियासे कने फिलिप्पुसे जाई नैं यीशुये नैं ग्लाया।

²³इसा गल्ला पर यीशुयैं तिन्हां नैं ग्लाया, सैह़ बग्त आई गेआ ऐ, कि माणुये दे पुत्तरे दी महिमा होयैं।

²⁴मैं तुहां नैं सच्च-सच्च ग्लांदा ऐ, कि जाह़लू तिकर कणका दा दाणा जमीना च पेई नैं मरी नीं जांदा, ताह़लू तिकर इक्क ई रैंह्दा ऐ। अपर जाह़लू मरी जांदा ऐ, तां मते दाणेयां जो पैदा करदा ऐ, तिंआं ई मिन्जो सौगी भी हुंगा।

²⁵जेह्ड़ा अपणे प्राणा जो प्यारा जाणदा ऐ, सैह़ तिन्हां जो गुआई दिंदा ऐ; कने जेह्ड़ा इस संसारे च अपणे प्राणा जो प्यारा नीं जाणदा ऐ, सैह़ सदा दी ज़िन्दगी तांई तिसदी रखवाल़ी करगा।

²⁶जे कोई मेरी सेवा करणा चां, तां सैह़ मेरा चेला बणैं; कने जित्थु मैं ऐ, तित्थु मेरा चेला भी हुंगा। जे कोई मेरी सेवा करैं, तां पिता तिसदा आदर करगा।

²⁷“हुण मेरा जी बड़ा बेचैन ऐ। इसतांई हुण मैं क्या ग्लां? ‘हे पिता, मिन्जो इस दुखे दे बग्ते ते बचा?’ अपर मैं इस संसारे च तां आया कि दुख झेलैं कने अपणे प्राण दैं।

²⁸हे पिता, अपणे नांऐ दी महिमा कर।” ताह़लू परमात्मैं सुअर्गे ते एह़ ग्लाया, “मैं तिसदी महिमा कित्ती ऐ, कने भिरी भी करगा।”

²⁹ताह़लू जेह्ड़े माणु खड़ोई नैं सुणा दे थे तिन्हां ग्लाया कि अम्बर गरजेया ऐ। होर ग्लाणा लग्गे, “कोई सुअर्गदूत तिस नैं गल्लां करा दा ऐ।”

³⁰इस गल्ला पर यीशुयैं ग्लाया, “एह़ उआज़ मिन्जो तांई नीं, अपर तुहां तांई आईयो ऐ।

³¹हुण इस संसारे दा न्याय हुंदा ऐ, हुण इस संसारे दा अधिकारी कड्डी दित्ता जांगा ऐ;

³²कने मैं जे धरतिया ते ऊचिया जगाह चढ़ाया जांगा, तांजे सबना जो अप्पु अल्ल लेई ओंगा।”

³³इआं ग्लाई नैं तिन्हीं एह़ दस्सी दित्ता कि सैह़ कदेई मौत्त मरगा।

³⁴इसा गल्ला पर लोकां तिस नैं ग्लाया, “अहां सास्त्रां दी एह़ गल्ल सुणी ऐ कि मसीह हमेसा जींगा, भिरी तू क्जो ग्लांदा ऐ, कि माणुये दे पुत्तरे जो ऊंचे पर चढ़ाया जाणा जरूरी ऐ? एह़ माणु दा पुत्तर कुण ऐ?”

³⁵यीशुयैं तिन्हां नैं ग्लाया, “जोत्ती हुण थोड़ी देर तिकर तुहां सौगी ऐ। जाह़लू तिकर जोत्ती तुहां सौगी ऐ ताह़लू तिकर चली रेह्आ, इआं नीं होयैं कि नेहरा तुहां जो आई नैं घेरी लैं; जेह्ड़ा नेहरे च चलदा ऐ सैह़ नीं जाणदा कि कतांह चलेया ऐ।

³⁶जाह़लू तिकर जोत्ती तुहां सौगी ऐ, जोतिया पर बसुआस करा तांजे तुहां जोत्ती दी औलाद बणन।” एह़ गल्लां ग्लाई नैं यीशु चली गेआ कने तिन्हां ते दूर रेह्आ।

³⁷तिन्हीं तिन्हां सामणै इतणे चमत्कार दस्से, तमी तिन्हां तिस पर बसुआस नीं कित्ता;

³⁸तांजे यशायाह भविष्यवक्ता दा वचन पूरा होयैं जेह्ड़ा तिन्हीं ग्लाया: “हे प्रभु अहां दे सुसमाचारे पर कुणी बसुआस कित्ता ऐ? कने प्रभु दी बांई दा जोर कुणी दिख्या ऐ?”

³⁹इसा बज़ाह ते सैह़ बसुआस नीं करी सके, क्जोकि यशायाह एह़ भी ग्लाया;

⁴⁰“तिन्हीं तिन्हां दियां अखीं अन्नियां, कने तिन्हां दा मन कठोर करी दित्यो हन; कुत्थी इआं नीं होयैं कि सैह़ अखीं नैं दिक्खन कने मने नैं समझन, कने फिरन, कने मैं तिन्हां जो ठीक करैं।”

⁴¹यशायाहें एह़ गल्लां इसतांई ग्लाईयां कि तिन्हीं तिसदी महिमा दिक्खी, कने तिन्हीं यीशुये दे बारे च गल्लां कित्तियां।

⁴²तमी अधिकारियां च भी मतेआं तिस पर बसुआस कित्ता, अपर फरीसी माणुआं दिया बज़ाह ते नीं मनदे थे, तांजे इआं नीं होयैं कि सैह़ आराधनालय ते कड्डी दित्ते जान;

⁴³माणुआं दिया तरफा ते तारीफ तिन्हां जो परमात्मे दिया तारीफा ते जादा बधिया लगदी थी।

⁴⁴यीशुयैं भीड़ा दे लोकां जो जोरे नैं ग्लाया, “जेह्ड़ा मिन्जो पर बसुआस करदा ऐ, सैह़ मिन्जो पर नीं अपर मिन्जो घल्लणे आल़े पर बसुआस करदा ऐ।

⁴⁵कने जेह्ड़ा मिन्जो दिक्खदा ऐ, सैह़ मेरे घल्लणे आल़े जो दिक्खदा ऐ।

⁴⁶मैं संसारे च जोत्ती बणी नैं आया ऐ, तांजे जेह्ड़ा कोई मिन्जो पर बसुआस करैं सैह़ नेहरे च नीं रैंह्।

⁴⁷जे कोई मेरे वचनां जो सुणी नैं नीं मने, तां मैं तिसियो अपराधी नीं ठैहरांदा; क्जोकि मैं संसारे जो अपराधी ठैहराणे तांई नीं, अपर संसारे दे लोकां दा उद्धार करणे तांई आया ऐ।

⁴⁸जेह्ड़ा मिन्जो तुच्छ जाणदा ऐ कने मेरियां वचनां जो नीं अपनांदा ऐ तिसियो अपराधी ठैहराणे आल़ा तां इक्को ई ऐ; मतलब जेह्ड़ा वचन मैं ग्लाया ऐ, सैई पिछले दिनां च तिसियो अपराधी ठैहरांगा।

⁴⁹क्जोकि मैं अपणिया तरफा ते गल्लां नीं कित्तियां; अपर पिता जिन्हीं मिन्जो घल्लेया ऐ, तिन्हीं मिन्जो हुक्म दित्या ऐ कि क्या-क्या ग्लां कने क्या-क्या बोलें?

⁵⁰कने मैं जाणदा ऐ, कि तिसदा हुक्म सदा दी ज़िन्दगी दिंदा ऐ। इसतांई मैं जेह्ड़ा कुच्छ ग्लांदा ऐ, सैह़ जिंआं पितैं मिन्जो नैं ग्लाया ऐ तिंआं ई ग्लांदा ऐ।”