Read Kangri यूहन्ना 13 Bible Online

यूहन्ना 13 - Kangri bible

यूहन्ना 13

¹फसह दे त्योहारे ते पैहल्लैं, जाह़लू यीशुये जो पता लग्गा कि मेरा सैह़ बग्त आई पुज्जया ऐ कि मिन्जो संसारे छड्डी नैं अपणे पिता अल्ल जाणा, तां सैह़ अपणेयां लोकां नैं जेह्ड़े संसारे च थे जिंआं प्यार सैह़ करदा था, अन्त तिकर तिंआं ई प्यार करदा रेह्आ।

²जाह़लू यीशु कने तिसदे चेले राती दा खाणा- खाणा बैठेयो थे, ताह़लू सैताने शमौने दे पुत्तरे यहूदा इस्करियोतिये दे मने च एह़ गल्ल पाई चुकेया था कि यीशुये जो पकड़ुआं,

³यीशुयैं, एह़ जाणी नैं कि पितैं सारा कुच्छ मेरे हक्के च करी दित्या ऐ कने मैं परमात्मे पास्से ते आया ऐ, कने परमात्मे अल्ल ई जांदा ऐ।

⁴खाणा खाई नैं सैह़ उठेया कने अपणे बाहरे आल़े कपड़े खोली दित्ते, कने परना लेई नैं अपणा लक्क बन्नी लेआ।

⁵भिरी इक्की भांडे च पाणी भरी नैं चेलेयां दे पैरां धोणा कने जेह्ड़ा परना तिसदे लक्के बन्नेया था तिस नैं पुंज्जणा लग्गा।

⁶जाह़लू यीशु शमौन पतरसे अल्ल आया, ताह़लू पतरसैं तिसियो ग्लाया, हे प्रभु, क्या तू मेरे पैरां धोणा लगेया ऐ।

⁷यीशुयैं तिसियो जवाब दित्ता, “जेह्ड़ा मैं करदा ऐ, तू तिसदा मतलब अह्ल्ली नीं जाणदा, अपर इसते बाद समझी जांगा।”

⁸पतरसैं तिस नैं ग्लाया, “तू मेरे पैरां कदी नीं धोई सकदा।” एह़ सुणी नैं यीशुयैं तिस नैं ग्लाया, “जे मैं तिज्जो नीं धोयें, तां तेरा मिन्जो नैं कुच्छ भी लैणां दैणा नीं ऐ।”

⁹शमौन पतरसैं तिस नैं ग्लाया, “हे प्रभु, तां मेरे पैर ई नीं, अपर मेरेयां हत्थां कने सिरे भी धोई दे।”

¹⁰यीशुयैं तिस नैं ग्लाया, “जेह्ड़ा नौई बैठेया ऐ, तिसियो पैरां छड्डी होर कुच्छ धोणे दी जरूरत नीं, सैह़ बिलकुल सुद्ध ऐ; कने तुहां च इक्की जो छड्डी करी सारे सुद्ध हन।”

¹¹सैह़ तां अपणे पकड़ुआणे आल़े जो जाणदा था, इसतांई तिन्हीं ग्लाया, “कने तुहां च इक्की जो छड्डी करी सारे सुद्ध नीं।”

¹²जाह़लू सैह़ तिन्हां दे पैरां धोई बैठा, कने अपणे कपड़ेयां लाई नैं भिरी बेई गेआ, तां तिन्हां नैं ग्लाणा लग्गा, “क्या तुहां समझे कि मैं तुहां नैं क्या कित्ता?”

¹³तुहां मिन्जो गुरू, कने प्रभु ग्लांदे हन, कने खरा ई ग्लांदे हन, क्जोकि मैं सैई ऐ।

¹⁴जे मैं प्रभु कने गुरू होई नैं तुहां दे पैर धोते; तां तुहां जो भी इक्की दूये दे पैर धोणा चाइदे।

¹⁵क्जोकि मैं तुहां जो नमूना दस्सी दित्ता ऐ, कि जिंआं मैं तुहां नैं कित्ता ऐ, तुहां भी तिंआं ई करा-करा।

¹⁶मैं तुहां नैं सच्च-सच्च ग्लांदा ऐ, दास अपणे मालके ते बड्डा नीं, कने नीं घल्लेया होएया अपणे घल्लणे आल़े ते।

¹⁷तुहां एह़ गल्लां जाणदे हन, कने जे तिन्हां पर चलण तां धन हन।

¹⁸मैं तुहां सबना दे बारे च नीं ग्ला दा; जिन्हां जो मैं चुणी लेआ ऐ, तिन्हां जो मैं जाणदा ऐ; अपर एह़ इसतांई ऐ कि पवित्रशास्त्रे दा एह़ वचन पूरा होएया, जिन्हीं संगी साथी होई नैं मिन्जो सौगी खाणा खादा, तिन्हीं मेरे खलाफ होई नैं दुश्मणा साइआं बर्ताब कित्ता।

¹⁹हुण मैं तिसा गल्ला होणे ते पैहल्लैं तुहां जो दस्सी दित्ता ऐ, कि जाह़लू एह़ गल्ल पूरी होई जांगी तां तुहां बसुआस करा कि “मैं सैई ऐ।”

²⁰मैं तुहां नैं सच्च-सच्च ग्लांदा ऐ, कि जेह्ड़ा मेरे घल्लणे आल़े जो अपनांदा ऐ, सैह़ मिन्जो अपनांदा ऐ; कने जेह्ड़ा मिन्जो अपनांदा ऐ, सैह़ मेरे घल्लणे आल़े जो अपनांदा ऐ।

²¹एह़ गल्लां ग्लाई नैं यीशु आत्मा च बचैन होएया कने एह़ गवाही देई नैं अपणे चेलेयां नैं ग्लाया, “मैं तुहां नैं सच्च-सच्च ग्लांदा ऐ, कि तुहां च इक्की मिन्जो पकड़ुआंणा।”

²²चेले शक करी नैं कि सैह़ कुसदे बारे च ग्ला दा ऐ, इक्की दूये बक्खी दिक्खणा लग्गी पै।

²³तिसदे चेलेयां च इक्क जिसियो यीशु प्यार करदा था, जेह्ड़ा यीशु सौगी बैठेया था।

²⁴शमौन पतरसैं तिस बक्खी इसारा करी नैं तिसते पुछया, दस्सा भला, सैह़ कुसदे बारे च ग्ला करदा ऐ।

²⁵ताह़लू तिन्हीं तिंआं ई यीशुये दे बक्खे जाई नैं तिसते पुछया, “हे प्रभु सैह़ कुण ऐ?”

²⁶यीशुयैं जवाब दित्ता, जिसियो मैं एह़ रोटी दा टुकड़ा डुबाई नैं दिंगा सैई ऐ। कने तिन्हीं टुकड़ा डुबाई नैं शमौन इस्करियोती दे जागते यहूदे जो दित्ता।

²⁷यहूदैं जाह़लू रोटी दा टुकडा खादा तां यीशुयैं तिस नैं ग्लाया, “जेह्ड़ा तू करणे आल़ा ऐ, तौल़ी कर।” तिसी बग्त सैतान तिस च समाई गेआ।

²⁸अपर बैठणे आल़ेआं च कुसी जो पता नीं लग्गा कि तिन्हीं एह़ गल्ल तिस नैं क्जो ग्लाई ऐ।

²⁹यहूदे अल्ल झोल़ी रैंह्दी थी इसतांई कुच्छ चेले समझणा लग्गे कि यीशु तिस नैं ग्ला दा ऐ कि जेह्ड़ा कुच्छ अहां जो त्योहारे बासती चाइदा सैह़ खरीदी लैं, या एह़ कि गरीबां जो कुच्छ दे।

³⁰जिंआं ई यहूदैं सैह़ रोटी दा टुकड़ा खादा तिसी बग्त बाहरेयो चली गेआ; कने एह़ राती दा बग्त था।

³¹जाह़लू सैह़ बाहरेयो चली गेआ तां यीशुयैं ग्लाया, “हुण माणुये दे पुत्तरे दी महिमा होई ऐ, कने परमात्मे दी महिमा तिस च होई ऐ;

³²जे तिस च परमात्मे दी महिमा होई ऐ, तां परमात्मा भी अप्पु च तिसदी महिमा करणी कने तौल़ी करणी।

³³हे प्यारेयो, मैं होर थोड़ी देर तुहां अल्ल ऐ, भिरी तुहां मिन्जो तोपणा, कने जिंआं मैं यहूदियां नैं ग्लाया, ‘जित्थु मैं चलेया ऐ तित्थु तुहां नीं आई सकदे,’ तिंआं ई मैं हुण तुहां नैं भी ग्ला दा ऐ।

³⁴मैं तुहां जो इक्क नौआं हुक्म दिंदा कि इक्की दूये नैं प्यार रखा; जिंआं मैं तुहां नैं प्यार रखेया ऐ, तिंआं ई तुहां भी इक्की दूये नैं प्यार रखा।

³⁵जे अप्पु च प्यार रखगे, तां इसते ई सबना जो पता लगणा, कि तुहां मेरे चेले हन।”

³⁶शमौन पतरसैं तिस नैं ग्लाया, “हे प्रभु तू कुत्थू चलेया ऐ?” यीशुयैं जवाब दित्ता, “जित्थु मैं चलेया तित्थु तू मिन्जो पचांह़ नीं आई सकदा; अपर इसते बाद मिन्जो पचांह़ औणां।”

³⁷पतरसैं तिस नैं ग्लाया, “हे प्रभु, हुण मैं तिज्जो पचांह़ क्जो नीं आई सकदा? मैं तां तिज्जो तांई अपणे प्राण भी दैणे तांई त्यार ऐ।”

³⁸यीशुयैं जवाब दित्ता, “क्या तू मिन्जो तांई अपणे प्राण दिंगा? मैं तिज्जो नैं सच्च-सच्च ग्लांदा ऐ, कि कुक्ड़े दे बांग दैणे ते पैहल्लैं तैं त्रै बरी मिन्जो पणछैणने ते मुकरना।”