Read Kangri यूहन्ना 15 Bible Online

यूहन्ना 15 - Kangri bible

यूहन्ना 15

¹यीशुयैं ग्लाया, “सच्ची अंगूरा दी बेल मैं ऐ, कने मेरा पिता किसान ऐ।

²जेह्ड़ी डाल़ी मिन्जो नैं जुड़ियो ऐ कने फल़दी नीं ऐ, तिसा जो सैह़ बड्डी दिंदा ऐ, कने जेह्ड़ी फल़दी ऐ तिसा जो छांगदा ऐ तांजे होर जादा फल़ें।

³तुहां तां तिन्हां वचनां दिया बज़ाह ते जेह्ड़े मैं तुहां नैं ग्लाये हन, सुद्ध हन।

⁴तुहां मिन्जो सौगी जुड़ी रेह्आ, कने मैं तुहां सौगी। जिंआं डाल़ी जे अंगूरा दी बेली सौगी जुड़ी नीं रैंह्, तां अप्पु ते नीं फल़ी सकदी, तिंआं ई तुहां भी जे मिन्जो सौगी जुड़ी नीं रैह़न तां नीं फल़ी सकदे हन।

⁵मैं अंगूरा दी बेल ऐ, तुहां डाल़िआं हन। जेह्ड़ा मिन्जो सौगी जुड़ी रैंह्दा ऐ कने मैं तिस सौगी, सैह़ मते फल़ दिंदा ऐ, क्जोकि मिन्जो ते लग्ग होई नैं तुहां कुच्छ भी नीं करी सकदे।

⁶जे कोई मिन्जो सौगी जुड़ी नीं रैंह्, तां सैह़ डाल़िया साइआं सट्टी दित्ता जांदा, कने जाह़लू सैह़ सुकी जांदियां हन; तां लोक तिन्हां जो बटीणी नैं अग्गी च पाई दिंदे हन, कने सैह़ फकौई जांदियां हन।

⁷जे तुहां मिन्जो सौगी जुड़ी रैह़न, कने मेरे वचन तुहां च बणी रैह़न, जेह्ड़ा कुच्छ तुहां चांह़दे हन सैह़ मंगा कने सैह़ तुहां तांई होई जांगा।

⁸मेरे पिता दी महिमा इसी ते हुंदी ऐ, कि तुहां मता सारा फल़ लेई करी ओन, ताह़लू तुहां मेरे चेले हुंगे।

⁹जिंआं पितैं मिन्जो नैं प्यार रखेया, तिंआं ई मैं भी तुहां नैं प्यार रखेया; मेरे प्यारे च बणी रेह्आ।

¹⁰जे तुहां मेरे हुक्मां जो मनगे, तां मेरे प्यारे च बणी रैंह्गे; जिंआं कि मैं अपणे पिता दे हुक्मां जो मन्नेया ऐ, कने तिसदे प्यारे च बणी रैंह्दा ऐ।

¹¹मैं एह़ गल्लां तुहां नैं इसतांई ग्लाईयां हन, कि मेरी खुसी तुहां च बणी रैंह्, कने तुहां दी खुसी पूरी होई जां।

¹²“मेरा हुक्म एह़ ऐ, कि जिंआं मैं तुहां नैं प्यार रखेया, तिंआं ई तुहां भी इक्की दूये नैं प्यार रखा।

¹³इसते बड्डा प्यार कुसी दा नीं, कि कोई अपणे साथियां तांई अपणे प्राण दैं।

¹⁴जेह्ड़ा हुक्म मैं तुहां जो दित्या, जे तिसियो मनन तां तुहां मेरे साथी हन।

¹⁵अज्जे ते मैं तुहां जो दास नीं ग्लाणा, क्जोकि दास नीं जाणदा कि तिसदा मालक क्या करदा ऐ; अपर मैं तुहां जो साथी ग्लाया ऐ, क्जोकि मैं जेह्ड़ियां गल्लां अपणे पिता ते सुणियां, सैह़ सारियां दस्सी दित्तियां।

¹⁶तुहां मिन्जो नीं चुणेया अपर मैं तुहां जो चुणेया ऐ कने तुहां जो नियुक्त कित्या कि तुहां जाई नैं फल़ लेयोन कने तुहां दा फल़ बणी रैंह्, कि तुहां मेरे नांऐ ते जेह्ड़ा कुच्छ पिता ते मंगन, सैह़ तुहां जो दैं।

¹⁷इन्हां गल्लां दे हुक्म मैं तुहां जो इसतांई दित्ते कि तुहां इक्की दूये नैं प्यार रखन।

¹⁸“जे संसारे लोक तुहां नैं बैर रखदे हन, तां तुहां जाणदे हन, कि तिन्हां तुहां ते पैहल्लैं मिन्जो नैं बैर रखेया।

¹⁹जे तुहां संसारे दे लोकां साइआं हुंदे, तां संसार अपणेयां लोकां नैं प्यार रखदा; अपर इसा बज़ाह ते कि तुहां संसारे दे नीं, मैं तुहां जो संसारे ते चुणी लेआ ऐ, इसतांई संसार दे लोक तुहां नैं बैर रखदा हन।

²⁰जेह्ड़ी गल्ल मैं तुहां नैं ग्लाईयो थी, दास अपणे मालके ते बड्डा नीं हुंदा, इसा गल्ला जो याद रखा। जे तिन्हां मिन्जो सताया, तां तुहां जो भी सतांगे; जे तिन्हां मेरे वचन मन्ने, तां तुहां दे भी मनगे।

²¹अपर सैह़ तुहां जो मेरे नांऐ दिया बज़ाह ते सतांगे, क्जोकि सैह़ मेरे घल्लणे आल़े परमात्मे जो नीं जाणदे।

²²जे मैं नीं ओंदा कने तिन्हां नैं गल्लां नीं करदा, अपर हुण तिन्हां अल्ल तिन्हां देयां पापां तांई कोई भाना नीं ऐ।

²³जेह्ड़ा मिन्जो नैं बैर रखदा ऐ, सैह़ मेरे पिता नैं भी बैर रखदा ऐ।

²⁴जे मैं तिन्हां च चमत्कार दे कम्म नीं करदा, जेह्ड़े होर कुणी नीं कित्ते, तां सैह़ पापी नीं हुंदे; अपर हुण तां तिन्हां मिन्जो कने मेरे पिता दून्नी जो दिख्या, कने दून्नी नैं बैर रखेया।

²⁵एह़ इसतांई होएया कि सैह़ वचन पूरा होयैं, जेह्ड़ा तिन्हां दे नियमां च लिख्या ऐ, तिन्हां मिन्जो नैं बिना बज़ाह ते बैर कित्ता।

²⁶अपर जाह़लू सैह़ सहायक ओंगा, जिसियो मैं तुहां अल्ल पिता दे पास्से ते घल्लगा, मतलब सच्च दा आत्मा, जेह्ड़ा पवित्र आत्मा ऐ, जेह्ड़ा परमात्मे दी सच्चाईया जो प्रगट करदा ऐ, तां सैह़ मेरी गवाही दिंगा।

²⁷कने तुहां भी मेरे गवाह हन क्जोकि तुहां सुरू ते मिन्जो सौगी रेहयो हन।”