Read Kangri यूहन्ना 16 Bible Online

यूहन्ना 16 - Kangri bible

यूहन्ना 16

¹यीशुयैं ग्लाया, “एह़ गल्लां मैं तुहां नैं इसतांई ग्लाईयां हन, कि जेह्ड़ा बसुआस तुहां मिन्जो पर कित्या तिस पर तुहां कमजोर नीं होन।

²सैह़ तुहां जो आराधनालयां ते कड्डी दिंगे, अपर सैह़ बग्त ओआ दा ऐ, कि जेह्ड़ा कोई तुहां जो मारगा सैह़ समझगा कि मैं परमात्मे दी सेवा करदा ऐ।

³इआं तिन्हां इसतांई करणा कि तिन्हां ना तां पिता जो जाणेया ऐ कने ना तां मिन्जो जाणदे हन।

⁴अपर एह़ गल्लां मैं इसतांई तुहां नैं ग्लाईयां, कि जाह़लू इन्हां दा बग्त औयें तां तुहां जो याद आई जां, कि मैं तुहां नैं पैहल्लैं ई दस्सी दित्या था, “मैं सुरू च तुहां नैं एह़ गल्लां इसतांई नीं ग्लाईयां क्जोकि मैं तुहां सौगी था।

⁵अपर हुण मैं अपणे घल्लणे आल़े अल्ल चली पेआ; कने तुहां च कोई मिन्जो ते नीं पुछदा, कि ‘हुण तू कुत्थू चली पेआ ऐ?’

⁶क्जोकि मैं जेह्ड़ियां एह़ गल्लां तुहां नैं ग्लाईयां हन, इसतांई तुहां बड़े भरी दुखी होई गियो हन।

⁷भिरी भी मैं तुहां नैं सच्च ग्लांदा ऐ, कि मेरा जाणा तुहां तांई खरा ऐ, क्जोकि जे मैं नीं जां तां सैह़ सहायक तुहां अल्ल नीं ओंगा; अपर जे मैं जांगा, तां तिसियो तुहां अल्ल घल्ली दिंगा।

⁸जाह़लू सैह़ ओंगा तां संसारे दे लोकां दा पाप कने धार्मिकता कने न्याय दे बारे च भरोसा दिलांगा;

⁹पाप दे बारे च इसतांई कि सैह़ मिन्जो पर बसुआस नीं करदे।

¹⁰कने धार्मिकता दे बारे च इसतांई कि मैं पिता अल्ल चली पेआ, कने तुहां मिन्जो भिरी नीं दिक्खगे;

¹¹न्याय दे बारे च इसतांई कि क्जोकि इस संसारे दे लोकां पर राज्ज करणे आल़े सैताने जो दोसी ठैहराया गेआ ऐ।

¹²“मैं तुहां नैं होर भी मतिआं गल्लां ग्लाणा चांह़दा ऐ, अपर हुण तुहां तिन्हां जो समझी नीं सकदे।

¹³अपर जाह़लू सैह़, मतलब सच्च दा आत्मा ओंगी, जेह्ड़ा पवित्र आत्मा ऐ, कने परमात्मे दी सच्चाईया जो प्रगट करदा ऐ, तां तुहां जो भी सच्चाईया दा रस्ता दस्सगा, क्जोकि सैह़ अपणिया तरफा ते नीं अपर जेह्ड़ा कुच्छ परमात्मे ते सुणगा सैई दस्सगी, कने ओणे आल़िआं गल्लां तुहां नैं दस्सगा।

¹⁴सैह़ मेरी महिमा करगा, क्जोकि सैह़ मेरियां गल्लां ते तुहां जो दस्सगा।

¹⁵जेह्ड़ा कुच्छ पिता दा ऐ, सैह़ सब मेरा ऐ; इसतांई मैं ग्लाया कि सैह़ मेरियां गल्लां ते लेई नैं तुहां जो दस्सगा।

¹⁶“कने थोड़िया देरा बाद भिरी तुहां मिन्जो नीं दिक्खगे, कने थोड़िया देरा बाद तुहां भिरी मिन्जो दिक्खगे।”

¹⁷ताह़लू तिसदे कुच्छ चेले अप्पु च ग्लाणा लग्गे, “एह़ क्या ऐ जेह्ड़ा सैह़ अहां नैं ग्ला दा ऐ, ‘कने थोड़िया देरा बाद भिरी तुहां मिन्जो नीं दिक्खगे, कने थोड़िया देरा बाद तुहां भिरी मिन्जो दिक्खगे?’ कने एह़ ‘इसतांई कि मैं पिता अल्ल चलेया ऐ’?”

¹⁸ताह़लू तिन्हां ग्लाया, “एह़ थोड़ी देरा बाद, जेह्ड़ा एह़ ग्ला दा ऐ, ‘क्या गल्ल ऐ?’ अहां नीं जाणदे कि सैह़ क्या ग्ला दा ऐ।”

¹⁹यीशुयैं एह़ जाणी नैं कि सैह़ मिन्जो ते कुच्छ पुछणा चांह़दे हन, तिन्हीं तिन्हां नैं ग्लाया, “क्या तुहां अप्पु च मेरिया इसा गल्ला दे बारे च पुछताछ करा दे हन, कने थोड़िया देरा बाद भिरी तुहां मिन्जो नीं दिक्खगे, ‘कने थोड़िया देरा बाद तुहां भिरी मिन्जो दिक्खगे?’

²⁰मैं तुहां नैं सच्च-सच्च ग्लांदा ऐ, कि मेरे मरने ते बाद तुहां रोणा कने दुख मनाणा, अपर संसार दे लोक खुसी मनांगे; तुहां दुखी हुंगे, अपर जाह़लू मैं मरेयां ते दुवारी जिन्दे होई नैं बापस ओंगा, तां तुहां दा दुख खुसिया च बदली जांगा।

²¹जाह़लू जणासा दा प्रसूता होणे दा बग्त ओंदा ऐ, तां तिसा जो दर्द हुंदा ऐ, क्जोकि तिसादा दुखे दा बग्त आई पुज्जया ऐ, अपर जाह़लू सैह़ जागते जो जन्म देई दिंदी ऐ, तां इसा खुसिया च कि संसारे च इक्क माणु पैदा होएया, सैह़ तिस दर्दे जो भुल्ली जांदी ऐ।

²²तिंआं ई तुहां जो भी हुण तां दुख ऐ, अपर जाह़लू मैं तुहां नैं भिरी मिलगा, तां तुहां बड़े खुस होई जांगे; कने तुहां दिया खुसिया जो कोई तुहां ते खोई नीं सकदा।

²³तिस दिन तुहां मिन्जो ते कुच्छ नीं पुछगे। मैं तुहां नैं सच्च-सच्च ग्लांदा ऐ, जे पिता ते कुच्छ मंगगे, तां सैह़ मेरे नांऐ ते तुहां जो दिंगा।

²⁴अह्ल्ली तिकर तुहां मेरे नांऐ ते पिता ते कुच्छ नीं मंगेया; परमात्मे ते मंगा, तां दित्ता जांगा, तांजे तुहां दी खुसी पूरी होई जां।

²⁵“मैं एह़ गल्लां तुहां नैं उदारणा च ग्लाईयां हन, अपर सैह़ बग्त ओआ दा ऐ कि मैं तुहां नैं भिरी उदारणा च नीं ग्लांगा, अपर खुली नैं तुहां जो पिता दे बारे च दस्सगा।

²⁶तिस दिन तुहां मेरे नांऐ ते पिता ते मंगगे; कने मैं तुहां नैं एह़ नीं ग्लांदा, कि मैं तुहां तांई पिता नैं विणती करगा;

²⁷क्जोकि मेरा पिता तां अप्पु ई तुहां नैं प्यार रखदा ऐ, इसतांई कि तुहां मिन्जो नैं प्यार रखेया ऐ, कने एह़ भी बसुआस कित्या ऐ, कि मैं पिता दे पास्से ते आया।

²⁸मैं पिता दे पास्से ते संसारे च आया; मैं भिरी संसारे जो छड्डी नैं पिता अल्ल चलेया।”

²⁹तिसदे चेले ग्लाणा लग्गे, “दिक्ख, हुण तां तू खुली नैं ग्ला दा ऐ, कने कोई उदारण नीं ग्ला दा ऐ।

³⁰हुण अहां जाणी गियो हन, कि तू सब कुच्छ जाणदा ऐ, कने इसदी जरूरत नीं कि कोई तिज्जो ते कुच्छ पुछे; इसते अहां बसुआस करदे हन कि तू परमात्मे दे पास्से ते आया ऐ।”

³¹एह़ गल्लां सुणी नैं यीशुयैं तिन्हां नैं ग्लाया, “क्या तुहां हुण बसुआस करदे हन?

³²दिक्खा, सैह़ बग्त ओआ दा ऐ अपर आई रेह्आ ऐ कि तुहां सबना तितर-बितर होई नैं अपणा-अपणा रस्ता नापी लैंणा, कने मिन्जो किल्ला छड्डी दैणा; तमी मैं किल्ला नीं क्जोकि पिता मिन्जो सौगी ऐ।

³³मैं एह़ गल्लां तुहां नैं इसतांई ग्लाईयां हन, कि तुहां जो मिन्जो च सांति मिल्ले। अपर हौंसला रखा, क्जोकि मैं इस संसारे दे लोकां पर राज्ज करणे आल़े सैताने जो हराई दित्या ऐ।”